Read fon Maki 8 Bible Online

Maki 8 - fon bible

Maki 8

¹Hwenɛ́nu ɖokpó ɔ́, mɛ gěgé ɖé lɛ́ɛ jɛ Jezu gúdo. Yě ka sɔ́ ɖó nǔɖuɖu ɖé bó ná ɖu ǎ. Bɔ Jezu ylɔ́ ahwanvú tɔn lɛ́ɛ, bó ɖɔ nú yě ɖɔ:

²“Mɛ élɔ́ lɛ́ɛ sín nǔ blá wǔ nú mì, ɖó sín azǎn atɔn ɖíe ɖokpóó wɛ yě kó ɖo kpɔ́ xá mì; yě ka sɔ́ ɖó nǔɖé bó ná ɖu ǎ.

³Nú yě ma ka ɖu nǔ ǎ, bónú un nyi yě sɛ́ dó to yětɔn lɛ́ɛ mɛ ɔ́, hlɔ̌nhlɔ́n ná hwedó yě ɖo alixo, bɔ yě ná jɛ ayǐ, ɖó mɛɖé lɛ́ɛ ɖo yě mɛ, bó gosín fí línlín.”

⁴Ahwanvú tɔn lɛ́ɛ ka yí gbe n'i ɖɔ: “Fítɛ́ è ka sixú mɔ nǔɖuɖu ɖe nú mɛ tobutóbú élɔ́ lɛ́ɛ, ɖo gbětótló mɛ fí, bɔ é ná kpé yě?”

⁵Jezu ka kanbyɔ́ yě ɖɔ: “Wɔ̌xúxú nabí wɛ ɖo mi sí?” Bɔ yě yǐ gbe n'i ɖɔ: “Tɛ́nwe.”

⁶Jezu ka ná gbe mɛ lɛ́ɛ bɔ yě jínjɔ́n ayǐ; é ka fɔ wɔ̌xúxú tɛ́nwe lɛ́ɛ, bó dó kú nú Mawu, bó kán yě, bó sɔ́ jó nú ahwanvú tɔn lɛ́ɛ nú yě ní má nú mɛ lɛ́ɛ, bɔ yě má nú yě.

⁷Hweví kpɛví kpɛví ɖé lɛ́ɛ ka ɖo yě sí, bɔ Jezu dó kú nú Mawu, bó ɖɔ è nǐ má nú mɛ lɛ́ɛ.

⁸Yě bǐ ɖu nǔ bó gɔ́ xo ganjí, bɔ yě bɛ́ nǔ e yě ɖu kpo ɔ́ kplé, bɔ é gɔ́ xasun tɛ́nwe.

⁹Yě mɛ e ɖo fínɛ́ lɛ́ɛ yi děgba (4.000) mɔ̌. Énɛ́ ɔ́ gúdo ɔ́, Jezu nyi yě.

¹⁰Azɔn ɖokpó ɔ́, Jezu kpódó ahwanvú tɔn lɛ́ɛ kpó byɔ́ tɔjíhún mɛ, bó yi Dalumanúta gbé jí.

¹¹ Falizyɛn lɛ́ɛ wá Jezu gɔ́n, bó jló ná ɖó mɔ n'i. Yě jɛ nǔ dɔn xá ɛ jí, bó ɖɔ é ní jlɛ́ nǔ ɖokpó, bó ɖe xlɛ́ ɖɔ Mawu gɔ́n wɛ hlɔ̌nhlɔ́n émítɔn gosín.

¹² Jezu yi agbɔ̌n jǐ, bó ɖɔ nú yě ɖɔ: “Nɛ̌ ka gbɔn bɔ gbɛtɔ́ din tɔn lɛ́ɛ ká nɔ́ ɖo nǔjlɛ́jlɛ́ ba wɛ? Má ɖɔ nǔgbó nú mi: yě ɖo nǔjlɛ́jlɛ́ kwín ɖokpó ná mɔ wɛ ǎ.”

¹³Ée é ɖɔ mɔ̌ ɔ́, é jó yě dó nyi fínɛ́, bó byɔ́ tɔjíhún mɛ ɖidó agě ɖě ɔ́ jǐ.

¹⁴Jezu sín ahwanvú lɛ́ɛ sɔ́ flín bó hɛn wɔ̌xúxú ǎ; wɔ̌xúxú ɖokpó jɛ́n ɖo yě sí ɖo tɔjíhún ɔ́ mɛ.

¹⁵ Jezu ka dó sɛ́n élɔ́ nú yě: “Mi cɔ́ miɖée dó Falizyɛn lɛ́ɛ kpódó axɔ́sú Elódu kpan sín tɔ́n wú.”

¹⁶Ahwanvú tɔn lɛ́ɛ ka jɛ ɖiɖɔ jí ɖo yěɖée tɛ́ntin ɖɔ: “Wɔ̌xúxú ɖěe mǐ má hɛn ǎ wútu wɛ é ɖo mɔ̌ ɖɔ wɛ.”

¹⁷Jezu ka wɔ́ xó e ɖɔ wɛ yě ɖe ɔ́, bó kanbyɔ́ yě ɖɔ: “Étɛ́wútu wɛ mi ka ɖo ɖiɖɔ wɛ ɖɔ wɔ̌xúxú ɖěe émí ma hɛn ǎ wútu wɛ un ɖɔ xó énɛ́? Mi nɔ mɔ nukúnnú jɛ nǔ mɛ ǎ cé? Nǔnywɛ́ lɛ́ hwedó mi sɔ mɔ̌ wɛ a? Aniwú mi ka tlí tó sɔ mɔ̌?

¹⁸ Nukún mitɔn nɔ mɔ nǔ ǎ wɛ a? Tó mitɔn nɔ se nǔ ǎ wɛ a? Mi nɔ flín nǔ ǎ wɛ a?

¹⁹Hwenu e un sɔ́ wɔ̌xúxú atɔ́ɔ́n dó ná nǔɖuɖu gbɛtɔ́ děgba ɖě afatɔ́n (5.000) ɔ́, xasun nabí mɛ mi ka bɛ́ nǔ e yě ɖu kpo lɛ́ɛ dó, bɔ é gɔ́, bɔ mi bɛ́ yi?” Yě yǐ gbe n'i ɖɔ: “Wěwe.”

²⁰“Hwenu e un ka zé wɔ̌xúxú tɛ́nwe dó ná nǔɖuɖu gbɛtɔ́ děgba (4.000) ɔ́, xasun nabí mɛ mi ka bɛ́ nǔ e yě ɖu kpo ɔ́ dó, bɔ é gɔ́, bɔ mi bɛ́ yi?” Yě yí gbe n'i ɖɔ: “Tɛ́nwe.”

²¹Bɔ Jezu ɖɔ nú yě ɖɔ: “Mi nɔ mɔ nukúnnú jɛ nǔ mɛ ǎ cé?”

²²Jezu kpódó ahwanvú tɔn lɛ́ɛ kpó wá yi gletoxo e è nɔ ylɔ́ ɖɔ Bɛtisayida ɔ́ mɛ, bɔ to ɔ́ mɛ nu lɛ́ɛ kplá nya nukúntíntɔ́nnɔ ɖé wá n'i, bó sa vo n'i ɖɔ é ní ɖó alɔ wǔ tɔn, bó hun nukún n'i.

²³É ka hɛn nukúntíntɔ́nnɔ ɔ́ sín alɔ, bó kplá ɛ yi gletoxo ɔ́ gúdo; é ɖó atán dó nukún tɔn lɛ́ɛ jí, bó ɖó alɔ jǐ tɔn, lobo kanbyɔ́ ɛ ɖɔ: “A mɔ nǔɖé a?”

²⁴Bɔ nya ɔ́ hun nukún, bó ɖɔ: “Un mɔ gbɛtɔ́ lɛ́ɛ, bɔ yě cí atín ɖɔhun, bó ɖo zɔnlin ɖi wɛ.”

²⁵Bɔ Jezu lɛ́ ɖó alɔ nukún tɔn lɛ́ɛ jí azɔn wegɔ́ ɔ́, bɔ azɔn tɔn gbɔ, bɔ é kpɔ́n zɔ sɛ́ dó, bó mɔ nǔ céɖécéɖé.

²⁶Jezu ka ɖɔ n'i ɖɔ: “Yi xwé towe gbe; ma sɔ́ lɛ́ kɔ yi gletoxo ɔ́ mɛ ó.”

²⁷Jezu kpódó ahwanvú tɔn lɛ́ɛ kpó ɖidó gletoxo e lɛ́ lɛ̌ dó Sezalée Filípu tɔn ɔ́ mɛ. Ée yě jɛ ali xweyǐgbe ɔ́, Jezu kanbyɔ́ yě ɖɔ: “Mɛ nǎhún wɛ un nyí bɔ mɛ lɛ́ɛ nɔ́ ɖɔ?”

²⁸ Bɔ yě yǐ gbe ɖɔ: “Mɛ ɖé lɛ́ɛ nɔ́ ɖɔ hwi wɛ nyí Jǎan Yɛhwesinlɛnúmɛtɔ́ ɔ́; mɛ ɖě nɔ ɖɔ hwi wɛ nyí Elíi; mɛɖěvo lɛ́ɛ nɔ́ ɖɔ gbeyíɖɔ Mawu tɔn lɛ́ɛ ɖě wɛ a nyǐ.”

²⁹ Jezu ka kanbyɔ́ yě ɖɔ: “Midɛɛ lɛ́ɛ ka lo, mɛ̌ wɛ un nyí bɔ mi nɔ ɖɔ?” Bɔ Piyɛ́ɛ yí xó bó ɖɔ: “Hwi wɛ nyí Klísu ɔ́.”

³⁰Jezu ka dó sɛ́n nú yě syɛ́nsyɛ́n bó ɖɔ yě ní ma ɖɔ nú mɛ ɖěbǔ ɖɔ émí wɛ nyí Klísu ɔ́ ó.

³¹Énɛ́ ɔ́ gúdo ɔ́, Jezu lɛ́ jɛ nǔ kplɔ́n ahwanvú tɔn lɛ́ɛ jí ɖɔ: “Nyɛ Gbɛtɔ́ví ɔ́ ná ji ya ɖésú bɔ tomɛxó lɛ́ɛ kpódó vɔ̌sánú-xwlémawutɔ́gán lɛ́ɛ kpó, kpódó sɛ́nkplɔ́nmɛtɔ́ lɛ́ɛ kpán ná gbɛ́ mì, lobo ná hu mì; azǎn tɔn atɔngɔ́ ɔ́ gbe ɔ́, Mawu ka ná fɔ́n mì sín kú.”

³²Jezu ɖɔ xó énɛ́ lɛ́ɛ kɔn nyi wɛn nú yě. Piyɛ́ɛ ka kplá ɛ yi kpá, bó jɛ nǔ gbɛ́ n'i jí ɖɔ: “Ma sɔ́ ɖɔ mɔ̌ ɖě ó.”

³³Jezu ka lɛ́ kɔ kpɔ́n ahwanvú tɔn lɛ́ɛ, bó bɛ́ adǎn dó Piyɛ́ɛ jí, bó ɖɔ: “Bǔ dó mì Satáan! Đó linlin towe lɛ́ɛ nyí Mawu tɔn ǎ; gbɛtɔ́ lɛ́ɛ sín linlin wɛ ɖo así we.”

³⁴ Jezu ka ylɔ́ ahwan ɔ́ kpódó ahwanvú tɔn lɛ́ɛ kpó, bó ɖɔ nú yě ɖɔ: “Ényí mɛɖé jló ná xwedó mì hǔn, ní jó tito é ɖésúnɔ tɔn lɛ́ɛ dó, bó ɖíɖá aklúzu tɔn[3], bó xwedó mì.

³⁵Đó mɛ e jló ná hwlɛ́n gbɛ éɖée tɔn gán ɔ́, gbɛ tɔn ná bú dó e; mɛ e ka ná hɛn gbɛ tɔn bú ɖó nyɛ kpó Wɛn Ɖagbe ɔ́ kpó wútu ɔ́, ná hwlɛ́n gbɛ tɔn gán.

³⁶Mɛ e gbɛ ɔ́ bǐ ná nyí étɔn, lobɔ gbɛ é ɖésúnɔ tɔn ná bú dó e ɔ́, le tɛ́ wɛ ka ɖ'é mɛ n'i?

³⁷Ani wɛ gbɛtɔ́ ka sixú sɔ́ dó xɔ gbɛ éɖée tɔn ná?

³⁸Mɛ e nyɛ kpódó xó ce lɛ́ɛ kpó ná nyí winnyánú ná ɖo gbɛtɔ́ din tɔn gbejímánɔ-númawutɔ́ lɛ́ɛ nukɔn ɔ́, mɛ ɔ́ lɔmɔ̌ ná nyí winnyánú nú nyɛ Gbɛtɔ́ví ɔ́ hwenu e nyɛ kpódó wɛnsagun ce lɛ́ɛ kpó ná lɛ́ kɔ wá ɖo Tɔ́ ce sín susu mɛ é.”