Read fon Luki 11 Bible Online

Luki 11 - fon bible

Luki 11

¹Jezu ɖo ɖɛ xo wɛ gbe ɖokpó ɖo fí ɖé. Ée é xo ɖɛ ɔ́ fó ɔ́, ahwanvú tɔn ɖokpó ɖɔ n'i ɖɔ: “Aklúnɔ, kplɔ́n mǐ lě e mǐ ná nɔ́ xo ɖɛ gbɔn é, lě e Jǎan kplɔ́n ahwanvú tɔn lɛ́ɛ gbɔn é.”

²Bɔ Jezu ɖɔ nú yě ɖɔ: “Mi ɖo ɖɛ xo wɛ hǔn, mi nɔ ɖɔ: ‘Daá! Nyǐkɔ towe ní nyí nǔsísí; axɔ́súɖuɖu towe ní wá;

³nɔ ná nǔɖuɖu e mǐ ná ɖu é mǐ ayǐhɔ́ngbe ayǐhɔ́ngbe;

⁴sɔ́ hwɛ mǐtɔn lɛ́ɛ kɛ mǐ, ɖó mǐ lɔ nɔ sɔ́ hwɛ kɛ mɛ e nɔ jɛ agɔ dó mǐ lɛ́ɛ bǐ; ma lɔn nú mǐ ní jɛ tɛ́nkpɔ́n mɛ ó.’ ”

⁵É ka lɛ́ ɖɔ nú yě ɖɔ: “Ényí mɛɖé ɖo mi mɛ, bó ɖó xɔ́ntɔn ɖokpó, bó yi mɔ ɛ zǎnxwete, bó ɖɔ n'i ɖɔ: ‘Xɔ́ntɔn, nya wɔ̌xúxú atɔn nú mì,

⁶ɖó xɔ́ntɔn ce ɖokpó xwe tomɛ, bó wá gbɔn gɔ̌n ce; un ka ɖó nǔɖé ná ná ɛ ǎ,’

⁷bónú mɛ ɖě ɔ́ nɔ xɔ mɛ, bó yí gbe n'i ɖɔ: ‘Ma dó tagba nú mì ó. Un ko dó gan hɔn ce mɛ, bɔ nyɛ kpódó vǐ ce lɛ́ɛ kpó kó yi xɔ; un sɔ́ sixú sí te bó sɔ́ nǔɖé nú we ǎ.’

⁸Ma ɖɔ nú mi: ényí é má kpɔ́n dó xɔ́ntɔn e yě nyí ɔ́ wú ǎ ɔ́, é ná kpɔ́n dó tagba e dó n'i wɛ é ɖe é wú, bó ná sí te wá ná ɛ nǔ e hu dó e lɛ́ɛ é bǐ.

⁹Ma ka ɖɔ nú mi: mi byɔ́ nǔ Mawu, é ná ná mi; mi ba, mi ná mɔ; mi xúxú hɔn, è nǎ hun nú mi.

¹⁰Đó, mɛ ɖěbǔ ɖo nǔ byɔ́ wɛ ɔ́, è nǎ na ɛ; mɛɖé ba ɔ́, é ná mɔ; mɛɖé xúxú hɔn ɔ́, è nǎ hun n'i.

¹¹Vǐtɔ́ tɛ́ ká ɖo mi mɛ, bónú vǐ tɔn byɔ́ ɛ hweví ɔ́, é ná zé dan dó alɔ mɛ n'i?

¹²Abǐ, é ná byɔ́ ɛ azin, bɔ é ná sɔ́ hɔnkéklě dó alɔ mɛ n'i?

¹³Midɛɛ lɛ́ɛ ɔ́, lě e mi nyí mɛ nyanya sɔ é nɛ́, có mi nyɔ́ nǔ ɖagbe ná vǐ mitɔn lɛ́ɛ. Bɔ nɛ̌ Mawu Tɔ́ e ɖo sɛ́xwé ɔ́ má ka ná ná Yɛsinsɛn tɔn mɛ e byɔ́ ɛ lɛ́ɛ ǎ gbɔn?”

¹⁴Nya ɖé tíin bɔ yɛ nyanya e nɔ hu ɖɛ̌ nú mɛ ɔ́ ɖo jǐ tɔn, bɔ é nɔ sixú ɖɔ xó ǎ; Jezu ka nya yɛ nyanya ɔ́ sín jǐ tɔn, bɔ é kpácá togun ɔ́ bǐ.

¹⁵ Lo ɔ́, mɛ ɖé lɛ́ɛ ɖo mɛ lɛ́ɛ mɛ bó ɖɔ: “Bɛluzebúlu yɛ nyanya lɛ́ɛ xɔ́sú sín hlɔ̌nhlɔ́n wɛ é nɔ́ dó nya yɛ nyanya lɛ́ɛ ná.”

¹⁶ Mɛ ɖěvo lɛ́ɛ ká jló ná ɖó mɔ nú Jezu, bó byɔ́ ɛ ɖɔ ní ɖe wuntun ɖé xlɛ́ émí, bónú è nǎ mɔ ɖɔ Mawu gɔ̌n wɛ hlɔ̌nhlɔ́n tɔn gosín.

¹⁷Ée Jezu ka tunwun linlin yětɔn lɛ́ɛ ɔ́, é ɖɔ nú yě ɖɔ: “Nú axɔ́súɖuto ɖé tíin, bɔ to ɔ́ mɛ nu lɛ́ɛ ma ɖó gbe kpɔ́ ǎ ɔ́, axɔ́súɖuto énɛ́ ɔ́, gba wɛ é nɔ gba; xwé ɖé ka tíin, bónú xwé ɔ́ gbe nu lɛ́ɛ ma ɖó gbe kpɔ́ ǎ ɔ́, xwé énɛ́ ɔ́ gba wɛ é nɔ gba.

¹⁸Ényí Satáan tɔ́n ahwan éɖée ɔ́, nɛ̌ wɛ axɔ́súɖuto tɔn ka sixú nɔ te gbɔn? Mi ɖíe ɖɔ yɛ nyanya lɛ́ɛ xɔ́sú Bɛluzebúlu sín hlɔ̌nhlɔ́n wɛ nyɛ nɔ dó nya yɛ nyanya lɛ́ɛ ná e.

¹⁹Ényí ɖɔ yɛ nyanya lɛ́ɛ xɔ́sú Bɛluzebúlu sín hlɔ̌nhlɔ́n wɛ nyɛ nɔ sɔ́ dó nya yɛ nyanya lɛ́ɛ ná ɔ́, mɛ̌ sín hlɔ̌nhlɔ́n wɛ ahwanvú mitɔn lɛ́ɛ ká nɔ dó nya yě ná lo? Énɛ́ ɔ́ wútu wɛ yě ɖésúnɔ ná wá ɖɔ hwɛ xá mi.

²⁰Lo ɔ́, é nyí ɖɔ Mawu sín hlɔ̌nhlɔ́n wɛ un nɔ dó nya yɛ nyanya lɛ́ɛ ná ɔ́, hǔn mi bó tunwun ɖɔ axɔ́súɖuɖu Mawu tɔn kó wá mi mɛ.

²¹“Ényí nya hlɔ̌nhlɔ́nɖowǔnánɔ ɖé sɔ́ ahwannú ganjí, bó ɖo xwé tɔn cɔ́ wɛ ɔ́, nǔɖé nɔ́ wa nǔ e é ɖó lɛ́ɛ ǎ.

²²Amɔ̌, ényí mɛ e dó hlɔ̌nhlɔ́n hú i é ɖě ká wá zɔn jǐ tɔn, bó ɖu ɖo jǐ tɔn ɔ́, mɛ énɛ́ ɔ́ ná yí alǐnnyánú e wú é ɖeji dó lɛ́ɛ bǐ sín así tɔn, bó ná bɛ́ nǔ e é ɖó lɛ́ɛ bǐ, bó fɔ má.

²³ “Mɛ e ma ɖo ahwan ce mɛ ǎ ɔ́, mɛ énɛ́ mɔ mì gbɔ ǎ; mɛ e ma ka nɔ dɔn gbɛtɔ́ lɛ́ɛ wá gɔ̌n ce ǎ ɔ́, yě nya dó zɔ nú mì wɛ é ɖe.”

²⁴“Ényí yɛ nyanya gosín mɛɖé jí ɔ́, é nɔ́ yi dán gbɔn axéko jí, bó nɔ́ ɖo gbɔjɛtɛn ba wɛ. Ényí é má mɔ ǎ ɔ́, é nɔ́ ɖɔ jí: ‘Un ná lɛ́ kɔ yi xwé ce e gbe un gosín é.’

²⁵Nú é wá ɔ́, é nɔ mɔ bɔ è ko za xwé ɔ́ gbe, bó ko blóɖó bǐ.

²⁶Nú é mɔ mɔ̌ ɔ́, é nɔ yi, bó nɔ́ kplá yɛ nyanya e nylá hú é ɖésúnɔ ɔ́ tɛ́nwe dó éɖée jí, bɔ yě nɔ wá byɔ́ xwé ɔ́ gbe, bó nɔ́ nɔ fínɛ́, bɔ nya énɛ́ ɔ́ sín ninɔmɛ nɔ wá nylá hú hwenu e yɛ nyanya ɖokpó ɖo jǐ tɔn é.”

²⁷Énɛ́ ɔ́ ɖɔ wɛ Jezu ɖe bɔ nyɔ̌nu ɖé zé gbe yi jǐ ɖo mɛ lɛ́ɛ mɛ, bó ɖɔ: “Nǔ nyɔ́ nú adɔgo e mɛ a nɔ é! Nǔ nyɔ́ nú anɔ̌ e a nɔ̌ é.”

²⁸Jezu ka yí gbe ɖɔ: “Éeǒ! É nyɔ́ wa ɔ́, mɛ e se Mawuxó ɔ́, bó bló ɖ'é jí lɛ́ɛ wɛ nǔ nyɔ́ ná.”

²⁹ Ée mɛ gěgé nyi ahwan wá kplé ɖo Jezu gɔ́n ɔ́, é yí xó bó ɖɔ: “Gbɛtɔ́ din tɔn lɛ́ɛ ɔ́, mɛ nyanya wɛ nú yě; yě ɖo nǔjíjlɛ́ e ná ɖe hlɔ̌nhlɔ́n Mawu tɔn xlɛ́ ɔ́ ɖokpó ba wɛ; yě ká sɔ́ ɖo nǔjíjlɛ́ ɔ́ ɖěvo ná mɔ wɛ zɛ gbeyíɖɔ Mawu tɔn Jonási tɔn ɔ́ wú ǎ.

³⁰Đó lě e Jonási nyí wuntun ɖokpó nú Ninívunu lɛ́ɛ ɔ́, mɔ̌ wɛ nyɛ Gbɛtɔ́ví ɔ́ ná nyí wuntun nú gbɛtɔ́ din tɔn lɛ́ɛ é nɛ́.

³¹Đo hwɛɖɔzán gbe ɔ́, axɔ́sú-nyɔ̌nu tofɔligbé tɔn ɔ́ ná sí te ɖo gbɛtɔ́ din tɔn lɛ́ɛ nukɔn, bó ná ɖó hwɛ nú yě; ɖó é gosín to línlín mɛ, bó wá ɖótó nǔnywɛ́xó axɔ́sú Salomɔ́ɔ tɔn. Nǔ e ka ɖo fí din ɔ́ hú gǎn Salomɔ́ɔ.

³² Hwɛɖɔzán gbe wá su ɔ́, Ninívunu lɛ́ɛ ná sí te ɖo gbɛtɔ́ din tɔn lɛ́ɛ nukɔn, bó ná ɖó hwɛ nú yě; ɖó hwenu e gbeyíɖɔ Mawu tɔn Jonási ɖɔ Mawuxó nú yědɛɛ lɛ́ɛ ɖo Ninívu ɔ́, yě se, lobo lɛ́ kɔ sín hwɛ yětɔn lɛ́ɛ gúdo; éɖíe: nǔ e ka ɖo fí din ɔ́ hú gǎn Jonási.”

³³ “Mɛ ɖé nɔ́ tá zogbɛ́n bó nɔ́ sɔ́ hwlá ǎ; è ka nɔ xwe nǔ dó ǎ. Lo ɔ́, nǔ ta aga wɛ è nɔ sɔ́ ɖó, nú mɛ e ná byɔ́ xwé gbe lɛ́ɛ ná dó mɔ wěziza.

³⁴Nukún towe lɛ́ɛ wɛ nyí zogbɛ́n nú agbaza towe; ényí nukún towe lɛ́ɛ ɖo ganjí ɔ́, agbaza towe bǐ ɖo wěziza mɛ. Ényí nukún towe lɛ́ɛ ma ka ɖo ganjí ǎ ɔ́, agbaza towe ɔ́ bǐ ɖo zǐnflú mɛ.

³⁵Bo cɔ́ hwiɖée, bónú wěziza e ɖo wǔtu towe ɔ́ má nyí zǐnflú ó.

³⁶Ényí agbaza towe bǐ ɖo wěziza mɛ, bónú akpá ɖěbǔ xwé ma ɖo ablu mɛ ǎ ɔ́, é ná za wě bǐ sésé lě e zogbɛ́n sín wěziza nɔ́ hɔ́n dó jǐ towe gbɔn é.”

³⁷Ée Jezu ɖɔ xó fó ɔ́, Falizyɛn ɖokpó wá ylɔ́ ɛ ɖɔ ní wá ɖu nǔ ɖo émí gɔ́n. Jezu ka yi Falizyɛn ɔ́ xwé, bó jínjɔ́n ayǐ, bó ná ɖu nǔ.

³⁸Ée Falizyɛn ɔ́ mɔ ɖɔ Jezu kún klɔ́ alɔ lě e sɛ́n ɔ́ zɔ́n gbɔn ɔ́ cóbó jɛ nǔ ɖu jí ó ɔ́, é kpácá ɛ.

³⁹Lo ɔ́, Aklúnɔ ɔ́ ɖɔ n'i ɖɔ: “Mi Falizyɛn lɛ́ɛ ɖíe nǔgbó; mi nɔ klɔ́ kɔ́fu kpódó agbǎn kpó gúdo; lo ɔ́, dǎka kpódó ajo kpó wɛ gɔ́ xo mitɔn mɛ.

⁴⁰Yɛyinɔ e mi! Mɛ e bló agbǎn gúdo ɔ́ jɛ́n ká bló agbǎn xomɛ lɔmɔ̌ ǎ cé?

⁴¹Mi gbɔ bó ná nǔɖuɖu e ɖo kɔ́fu kpódó agbǎn kpó xomɛ ɔ́ wamamɔnɔ lɛ́ɛ; énɛ́ ɔ́, nǔ bǐ ná nyí nǔ mímɛ́ ɖo nukún mitɔn mɛ.

⁴² “Heelú mi Falizyɛn lɛ́ɛ! Đó mi nɔ ná mǎɖówǒ nǔhwɛ́nkún e è nɔ ylɔ́ ɖɔ mati é kpódó ée è nɔ ylɔ́ ɖɔ hlúu é kpó, kpódó mǎ tɛnmɛ tɛnmɛ lɛ́ɛ kpó tɔn lobo ka nɔ dó vɛ̌ nú nǔjlɔ́jlɔ́wiwa kpódó wǎn yí nú Mawu kpó. Nǔ énɛ́ lɛ́ɛ wɛ mi ɖó ná wa, ma wɔn ɖě lɛ́ɛ.

⁴³“Heelú mi Falizyɛn lɛ́ɛ! Mi nɔ yí wǎn nú tɛn nukɔntɔn lɛ́ɛ mɛ ninɔ, ɖo kplɔ́ngbasá Jwifu lɛ́ɛ tɔn, lobo nɔ jló ɖɔ è nǐ dó gbe émí kpódó sísí kpó ɖo tokplétɛn lɛ́ɛ.

⁴⁴Heelú mi, ɖó mi cí yɔta e è ma ɖó wuntun ǎ, bɔ è ma nɔ tunwun ǎ bó nɔ́ gbɔn jí lɛ́ɛ é ɖɔhun.”

⁴⁵Sɛ́nkplɔ́nmɛtɔ́ ɖokpó ka yí xó, bó ɖɔ n'i ɖɔ: “Mɛ̌si, a ɖo xó ɖɔ gbɔn mɔ̌ wɛ hǔn, mǐ lɔ zun wɛ a ɖe.”

⁴⁶Jezu ka ɖɔ: “Heelú mi sɛ́nkplɔ́nmɛtɔ́ lɛ́ɛ lɔmɔ̌, ɖó mi nɔ dó agban kpinkpɛn nú mɛ lɛ́ɛ, bó ka sɔ́ nɔ wa nǔ ɖěbǔ dó dó alɔ yě ǎ!

⁴⁷Heelú mi, ɖó mi nɔ xo kpe ɖagbe lɛ́ɛ nyi gbeyíɖɔ Mawu tɔn e tɔ́gbó mitɔn lɛ́ɛ hu lɛ́ɛ é sín yɔ lɛ́ɛ ta!

⁴⁸Nǔ e tɔ́gbó mitɔn lɛ́ɛ wa ɔ́, mi ɖo kúnnu ɖe ná wɛ, bó yí dó yětɔn jí; ɖó yědɛɛ lɛ́ɛ hu gbeyíɖɔ Mawu tɔn lɛ́ɛ; midɛɛ lɛ́ɛ ɔ́, mi ka xo kpe ɖagbe nyi yɔ yětɔn lɛ́ɛ ta!

⁴⁹Nǔ énɛ́ wú wɛ Mawu ko ɖɔ dó mi wú ɖ'ayǐ ɖo nǔnywɛ́ tɔn mɛ ɖɔ: ‘Un ná sɛ́ gbeyíɖɔ lɛ́ɛ kpódó mɛsɛ́dó lɛ́ɛ kpán dó yě; yě ná hu mɛ ɖě, bó ná dó ya nú mɛ ɖě,’

⁵⁰bónú Mawu ná kan gbeyíɖɔ tɔn lɛ́ɛ sín hun byɔ́ gbɛtɔ́ din tɔn lɛ́ɛ; gbeyíɖɔ Mawu tɔn e sín hun tɔ́gbó yětɔn lɛ́ɛ sɔ́ kɔn nyi ayǐ sín hwenu e Mawu ko ɖó gbɛ ɔ́ dó é;

⁵¹ɛɛn, má ɖɔ nú mi; Mawu ná kan hun yětɔn byɔ́ gbɛtɔ́ din tɔn lɛ́ɛ, bɛ́ sín Abɛ́li sín hun jí, káká yi jɛ Zekaliya tɔn jí; Zekaliya e è hu ɖo sinsɛnxɔ mɛ, ɖo vɔ̌sákpe ɔ́ kpódó tɛn mímɛ́ ɔ́ kpó tɛ́ntin é.

⁵²“Heelú mi sɛ́nkplɔ́nmɛtɔ́ lɛ́ɛ, ɖó mi sɔ́ nǔnywɛ́xwé sín cávi ɔ́; mi ɖésúnɔ ɔ́, mi byɔ́ mɛ ǎ; mɛ e ka jló ná byɔ́ mɛ lɛ́ɛ ɔ́, mi nɔ lɛ́ sú ali tɔn dó yě!”

⁵³Ée Jezu tɔ́n sín Falizyɛn ɔ́ xwé ɔ́, sɛ́nkplɔ́nmɛtɔ́ lɛ́ɛ kpódó Falizyɛn lɛ́ɛ kpó jɛ gǒmɛ n'i, bó jɛ nǔ kanbyɔ́ ɛ jí magbokɔ,

⁵⁴bó ná dó ɖó mɔ n'i, lobo ná mɔ tɛn bó ná wlí i ɖo xógbe tɔn lɛ́ɛ mɛ.