Read fon Luki 12 Bible Online

Luki 12 - fon bible

Luki 12

¹ Hwenu e Jezu ɖo xó énɛ́ lɛ́ɛ ɖɔ wɛ ɔ́, gbɛtɔ́ afatɔ́n (1.000) afatɔ́n (1.000) donu mɔ̌kpán wá kplé ɖo fí e é ɖe ɔ́; mɛ lɛ́ɛ sukpɔ́ káká, bó ɖo afɔ tɛ yěɖée jí wɛ. Jezu ka to ɖɔ nú ahwanvú tɔn lɛ́ɛ hwɛ̌ ɖɔ: “Mi cɔ́ miɖée dó tɔ́n Falizyɛn lɛ́ɛ tɔn e nyí yɛmɛnúwiwa é wú.

² Nǔɖé ɖo nǔglɔ́, bó ná gɔn wěxo ma jɛ ǎ; nǔɖé ka ɖo wi mɛ bɔ è nǎ gɔn nukúnnú ma mɔ jɛ wú ǎ.

³Énɛ́ ɔ́ wú wɛ nǔ e mi ná ɖɔ ɖo zǐnflú mɛ é bǐ wɛ è nǎ wá se ɖo kéze ɖéɖé. Nǔ e sín kpá mi ka ná ɖe ɖo xɔnɔnɔ mɛ ɔ́, bǐ wɛ è nǎ wá jlá gbɔn fí bǐ, bɔ mɛ bǐ ná se.”

⁴“Xɔ́ntɔn ce lɛ́ɛ, má ɖɔ nú mi; mi ma ɖi xɛsi ɖěbǔ nú mɛ e nɔ hu agbaza, bɔ énɛ́ ɔ́ gúdo ɔ́, yě ma sɔ́ sixú wa nǔɖé hú mɔ̌ ǎ lɛ́ɛ ó.

⁵Lo ɔ́, ma ɖɔ mɛ e mi ná ɖi xɛsi ná é nú mi: mi ɖi xɛsi nú Mawu e ɖó acɛ, bó hɛn ɔ́, é ná zé mi nyi dó zo mɛ ɖo kú mitɔn gúdo é. Ɛɛn! Má ɖɔ nú mi: é wɛ mi ɖó ná nɔ ɖi xɛsi ná.

⁶“Gboli atɔ́ɔ́n ɖo akwɛ́ ɖé jí ǎ; é ɖo mɔ̌ có, Mawu ka nɔ kpé nukún dó ɖokpó ɖokpó yětɔn wu.

⁷Midɛɛ lɛ́ɛ ɔ́, ɖa nabí e ɖo ta nú mi ɔ́ ɖésú ɔ́, Mawu tunwun bǐ; mi bó ma ɖi xɛsi ó. Đó nú è na bo kplé gboli mɔ̌kpán ɖó kpɔ́ ɔ́, mi xɔ akwɛ́ hú yě.”

⁸“Mɛ e ná ɖe kúnnu nú mì ɖo gbɛtɔ́ lɛ́ɛ nukɔn ɖɔ émí nyí ahwanvú ce ɔ́, nyɛ Gbɛtɔ́ví ɔ́ lɔ ná ɖe kúnnu n'i ɖo wɛnsagun Mawu tɔn lɛ́ɛ nukɔn ɖɔ ahwanvú ce wɛ é nyí nǔgbó.

⁹Mɛ e ka na gbɛ́ ɖo gbɛtɔ́ lɛ́ɛ nukɔn ɖɔ émí kún nyí ahwanvú ce ó ɔ́, nyɛ Gbɛtɔ́ví ɔ́ lɔ na gbɛ́ ɛ ɖo wɛnsagun Mawu tɔn lɛ́ɛ nukɔn.

¹⁰ “Mɛɖěbǔ nylá nu dó nyɛ Gbɛtɔ́ví ɔ́ wú ɔ́, Mawu ná sɔ́ kɛ ɛ. Mɛ e ka ná nylá nu dó Yɛsinsɛn wú ɔ́, Mawu ná sɔ́ kɛ ɛ ǎ.

¹¹ “Hwenu e è nǎ dɔn mi yi kplɔ́ngbasá Jwifu lɛ́ɛ tɔn, bó ná dɔn mi yi hwɛɖɔtɔ́ lɛ́ɛ kpódó axɔ́sú lɛ́ɛ kpán nukɔn, bó ná yi ɖɔ hwɛ xá mi ɔ́, mi ma jɛ tagba, bó ɖo xósin e mi ná yi ná bó dó hwlɛ́n miɖée gán ɔ́, abǐ nǔ e mi ná yi ɖɔ ɖo dɔ̌n ɔ́ linkpɔ́n wɛ ó,

¹²ɖó Yɛsinsɛn ná kplɔ́n mi nǔ e mi ná ɖɔ ɔ́, ɖo gan ɔ́ mɛ.”

¹³Mɛ ɖokpó ɖo mɛ lɛ́ɛ mɛ, bó ɖɔ nú Jezu ɖɔ: “Mɛ̌si, ɖe gbe nú nɔví ce, bónú é má gǔ mǐtɔn, nú má yí ce.”

¹⁴Jezu ka yí gbe n'i ɖɔ: “Dǎwe! Mɛ̌ ká sɔ́ mì dó ɖó hwɛɖɔtɔ́, abǐ gǔmátɔ́ mitɔn?”

¹⁵É ka ɖɔ nú yě ɖɔ: “Mi cɔ́ miɖée dó nukúnkɛndídó wú; ɖó nú gbɛtɔ́ na bo ɖó nǔ gbɔn ɖěbǔ ɔ́, gbɛ jɔ gbɛ ɔ́ ɖo dɔkun tɔn lɛ́ɛ mɛ ǎ.”

¹⁶É ka dó lǒ nú yě ɖɔ: “Nya dɔkunnɔ ɖé sín ayǐkúngban ná jinukún gěgé,

¹⁷bɔ é ɖo linlin wɛ ɖɔ: ‘Nɛ̌ un ka ná bló gbɔn? Nyɛ ɖíe ma ɖó fí e un ná bɛ́ nǔkún e un ya lɛ́ɛ bǐ dó ɔ́ ǎ e!’

¹⁸É wá ɖɔ nú éɖée ɖɔ: ‘Nǔ e un ná wa é ɖíe: un ná kíjá agɔ̌ ce lɛ́ɛ, bó ná vɔ́ ɖaxó tɔn ɖěvo lɛ́ɛ bló, lobo ná kplé jinukún ce lɛ́ɛ kpódó dɔkun ce lɛ́ɛ kpó d'é mɛ;

¹⁹lobo ná ɖɔ nú nyɛɖée ɖɔ: nǔ e ná hɛn mì káká nú xwe mɔ̌kpán ɔ́ ɖo así ce; din ɔ́, un ná gbɔjɛ́, bó ná ɖu nǔ, bó nu ahan, bó ná ɖu gbɛ.’

²⁰Mawu ka ɖɔ n'i ɖɔ: ‘Xlonɔ; zǎn élɔ́ mɛ ɔ́, è nǎ yǐ gbɛ towe sín así towe. Nǔ e a ka kplé lɛ́ɛ ɔ́, mɛ̌ tɔn wɛ é ka ná nyí lo?’ ”

²¹Jezu sú ta nú xó ɔ́, bó ɖɔ: “Mɛ e kplé dɔkun gbɛmɛ fí tɔn lɛ́ɛ nú éɖée, bó ma ka ɖó dɔkun ɖé ɖo Mawu gɔ̌n ǎ ɔ́, lě e é nɔ́ nyí gbɔn n'i é nɛ́.”

²²Énɛ́ ɔ́ gúdo ɔ́, Jezu ɖɔ nú ahwanvú tɔn lɛ́ɛ ɖɔ: “Ado ní ma hu mi dó nǔ e mi ná ɖu bó ná nɔ gbɛ é kpódó nǔ e mi ná dó é kpó wú ó;

²³ɖó gbɛ mitɔn xɔ akwɛ́ hú nǔɖuɖu, bɔ agbaza mitɔn xɔ akwɛ́ hú avɔ.

²⁴Mi kpɔ́n nǔ dó avǔnsákɔwó lɛ́ɛ wú: yě nɔ́ dó nǔkún ǎ, yě ká nɔ́ ya nǔkún ǎ; yě ɖó kɔ́zún ǎ, yě ká ɖó agɔ̌ ǎ, có Mawu nɔ́ ná nǔɖuɖu yě; mi ka xɔ akwɛ́ hú xɛ lɛ́ɛ.

²⁵Mɛ̌ ka ɖo mi mɛ, bɔ nǔlinkpɔ́n tɔn ná zɔ́n, bɔ é ná sixú dó azǎn kpɛɖé gbɛzán éɖée tɔn jí?

²⁶Hǔn, nú hlɔ̌nhlɔ́n mitɔn ma kpé nǔ masɔatɛ́n lɛ́ɛ wú ǎ ɔ́, aniwú nǔɖé lɛ́ɛ ka nɔ́ ɖo hǔn mɛ nú mi?

²⁷ Mi kpɔ́n nǔ dó folówa lɛ́ɛ wú; yě nɔ́ wa azɔ̌ ǎ; yě ká nɔ́ lɔn avɔ ǎ, é ɖo mɔ̌ có, má ɖɔ nú mi: axɔ́sú Salomɔ́ɔ ɖésú ɔ́, lě e é ɖó dɔkun sɔ é nɛ́ có, é ká ba acɔ́ sɔ yě ɖokpó ǎ.

²⁸Gběhan e ɖo te ɖo gle mɛ égbé bɔ sɔ ɔ́, è nǎ wá bɛ́ kɔn nyi myɔ mɛ ɔ́, ényí Mawu nɔ ɖó acɔ́ n'i sɔ mɔ̌ ɔ́, nɛ̌ é ma ka ná ná mi nǔ e mi ná dó lɛ́ɛ ǎ gbɔn? Nǔɖiɖikpɛvínɔ e mi.

²⁹Midɛɛ lɛ́ɛ ɔ́, mi ma nú nǔ e mi ná ɖu ɔ́ kpódó nǔ e mi ná nu ɔ́ kpó ní hɛn hǔn nú mi, bónú mi ná ɖo wezun tɔn jí magbokɔ ó.

³⁰Đó mɛ e ɖo gbɛmɛ fí, bó má nɔ sɛn Mawu ǎ lɛ́ɛ wɛ nɔ ɖo wezun nu ɖo nǔ énɛ́ lɛ́ɛ gúdo. Midɛɛ lɛ́ɛ ɔ́, Tɔ́ mitɔn tunwun ɖɔ nǔ énɛ́ lɛ́ɛ hu dó mi.

³¹Mi nú axɔ́súɖuɖu Mawu tɔn ní myá nukún nú mi; énɛ́ ɔ́, Mawu ná ná nǔ énɛ́ lɛ́ɛ bǐ mi d'é jí.”

³²“Lɛ̌ngbɔ́hwan kpɛví, ma ɖi xɛsi ó, ɖó Tɔ́ mitɔn jló ɖɔ mi ní ɖu axɔ́sú xá émí.

³³Mi sa nǔ e mi ɖó lɛ́ɛ, bó má akwɛ́ tɔn nú wamamɔnɔ lɛ́ɛ. Mi hɛn akwɛ́kpo e ma ná gbi ǎ lɛ́ɛ; mi kplé dɔkun ɖó Mawu gɔ́n fí e nǔɖé ma ná wa ɛ ɖe ǎ é; ɖó ajotɔ́ nɔ yi fínɛ́ ǎ; nǔvínúví nɔ ɖu nǔ ɖo fínɛ́ ǎ.

³⁴Đó fí e dɔkun mitɔn ɖe ɔ́, fí e ayi mitɔn lɔ ná nɔ é nɛ́.”

³⁵ “Mi sin gǒjíblánú, bónú zogbɛ́n mitɔn ní ɖo títá.

³⁶ Mi ní cí mɛsɛntɔ́ e ɖo te kpɔ́n gǎn yětɔn e yi asikpíkplá do mɛ, bó lɛ́ kɔ wá hweɖěbǔnu, bó xúxú hɔn ɔ́, yě ná hun n'i tlóló é ɖɔhun.

³⁷Nǔ nyɔ́ nú mɛsɛntɔ́ énɛ́ lɛ́ɛ e gǎn yětɔn ná wá mɔ ɖo wunzɛn lɛ́ɛ é. Má ɖɔ nǔgbó nú mi: gǎn yětɔn ná sɔ́ gǒjíblánú sin, bó ná sɔ́ yě jínjɔ́n ayǐ nú yě ná ɖu nǔ, bɔ é ɖésú ná gbɔn yě ɖokpó ɖokpó jí, lobo ná sɛn ká nú yě.

³⁸Ényí gǎn ɔ́ lɛ́ kɔ wá zǎnxwete, abǐ ayǐtéhɔ̌nnu, bó mɔ mɛsɛntɔ́ énɛ́ lɛ́ɛ ɖo wunzɛn hǔn, nǔ nyɔ́ nú yě.

³⁹ “Mi nywɛ́ ganjí ɖɔ ényí xwétɔ́ ɖé tunwun gan e mɛ ajotɔ́ ná wá dó ɔ́, é ná lɔn bɔ ajotɔ́ ná tɔ́n dǒ tɔn ǎ.

⁴⁰Mi lɔmɔ̌ mi bó nɔ acéjí, ɖó gan e mɛ mi ma ná ɖó ayi tɔn dó ǎ ɔ́ wɛ nyɛ Gbɛtɔ́ví ɔ́ ná wá.”

⁴¹Piyɛ́ɛ ɖɔ jí: “Aklúnɔ, mǐdɛɛ lɛ́ɛ dó lǒ énɛ́ ná wɛ a ɖe a, abǐ mɛ bǐ dó ná wɛ a ɖe?”

⁴²Aklúnɔ ka yí gbe ɖɔ: “Mɛ̌ ká nyí mɛsɛntɔ́ gbejínɔtɔ́ nǔnywɛ́tɔ́? Mɛsɛntɔ́ gbejínɔtɔ́ nǔnywɛ́tɔ́ ɔ́ wɛ nyí mɛ e gǎn tɔn ɖo hwɛ ná zɛ wɛ, bó sɔ́ ɛ ɖó xwé tɔn nu, bɔ é ná nɔ́ ná nǔɖuɖu mɛsɛntɔ́ hǎtɔ́ tɔn ɖě lɛ́ɛ dó hwenu é wɛ.

⁴³Nǔ nyɔ́ nú mɛsɛntɔ́ énɛ́ e gǎn tɔn ná wá mɔ ɖo nukún kpé dó azɔ̌ tɔn wú wɛ é.

⁴⁴Má ɖɔ nǔgbó nú mi: gǎn ɔ́ ná sɔ́ ɛ ɖó dɔkun tɔn lɛ́ɛ bǐ nu.

⁴⁵Lo ɔ́, ényí mɛsɛntɔ́ énɛ́ ɔ́ ka ɖɔ dó ayi tɔn mɛ ɖɔ: ‘Gǎn ce sín wǐwá ɖo lǐnlín wɛ’, bó jɛ mɛsɛntɔ́ súnnu kpódó nyɔ̌nu kpó xo jí, bó jɛ nǔ ba ɖu jí, bó jɛ ahan nu jí, bó húzú ahannumúnɔ ɔ́,

⁴⁶gǎn tɔn ná lɛ́ kɔ wá gbe e gbe é ma ná ɖó ayi tɔn ǎ é, ɖo gan e mɛ é ma ná tunwun ǎ é, bó ná dɔn tó n'i, bɔ é ná vɛ́ ɖésú, lobo ná xwe e dó gbejímánɔtɔ́ lɛ́ɛ sín ahwan mɛ.

⁴⁷“Mɛsɛntɔ́ e ka tunwun nǔ e gǎn tɔn nɔ jló ɔ́, bó ma ka sɔ́nǔ, bó bló nǔ e gǎn tɔn nɔ jló ɔ́ ǎ é ɔ́, é ná ɖu bǎ ɖésú.”

⁴⁸Lo ɔ́, mɛ e ma tunwun gǎn tɔn sín jlǒ ǎ, bó wa nǔ e jɛ xá tó dɔn nú mɛ ɔ́, bǎ kpɛɖé jɛ́n é ná ɖu; ɖó mɛ e è nǎ nǔ gěgé ɔ́, gěgé tɔn wɛ è nǎ byɔ́ ɛ; bɔ mɛ e è zɔ̌n nǔ gěgé hɛn ɔ́, è nǎ byɔ́ ɛ hú mɔ̌.

⁴⁹“Myɔ wɛ un sɔ́ nyí ayǐkúngban ɔ́ jí; é ní wlí ɖɔ wɛ jɛ́n un ɖe.

⁵⁰ Un ɖó ná lɛ yɛhwesin wǔvɛ́ tɔn ɖé, bɔ hǔn ce bǐ ɖo aga káká yi jɛ hwenu e nǔ ná nyí mɔ̌ dó é.

⁵¹Fífá wɛ un hɛn wá ayǐkúngban ɔ́ jí wɛ mi vɛdó a? Éeǒ! Ma ɖɔ nú mi: gbemanɔkpɔ́ wɛ un hɛn wá.

⁵²Đó sín din ɔ́, gbemanɔkpɔ́ ná tíin, bɔ nú mɛ atɔ́ɔ́n ɖo xwé ɖé gbe ɔ́, gbe yětɔn sɔ́ ɖo kpɔ́ ná nɔ wɛ ǎ; mɛ atɔn ná sí te dó mɛ we jí, bɔ mɛ we ná sí te dó mɛ atɔn jí.

⁵³ Tɔ́ ná sí te dó vǐ tɔn súnnu jí, bɔ vǐ súnnu ná sí te dó tɔ́ tɔn jí; nɔ ná sí te dó vǐ tɔn nyɔ̌nu jí, bɔ vǐ nyɔ̌nu ná sí te dó nɔ tɔn jí; asúnɔ ná sí te dó vǐ tɔn sín asi jí; bɔ vǐsi ná sí te dó asú tɔn nɔ jí.”

⁵⁴Jezu ka lɛ́ ɖɔ nú mɛ lɛ́ɛ ɖɔ: “Nú mi mɔ akpɔ́kpɔ́ ɖé fɔ́n sín gbadahwe jí jǎwe ɔ́, mi nɔ ɖɔ tlóló ɖɔ: ‘Jǐ ná ja’, bɔ é ká nɔ nyí mɔ̌ nǔgbó.

⁵⁵Nú jɔhɔn ka jɛ nyinyi jí sín tofɔligbé ɔ́, mi nɔ ɖɔ: ‘Yǒzo ɖo nǎ gbɛ́ wɛ’, bɔ é ka nɔ nyí mɔ̌ nǔgbó.

⁵⁶Yɛmɛnúwatɔ́ e mi, mi nɔ mɔ nukúnnú jɛ wuntun ayǐkúngban tɔn kpódó jǐnukúnsin tɔn kpán wú, bó nɔ́ tínmɛ. Nɛ̌ ká gbɔn bɔ nú mi mɔ nǔ e ɖo jijɛ wɛ ɖo hwe mitɔn nu din lɛ́ɛ ɔ́, mi ma ka nɔ mɔ nukúnnú jɛ yě wú ǎ?”

⁵⁷“Étɛ́wú wɛ ɖokpó ɖokpó mitɔn ma nɔ kan nǔ byɔ́ éɖée dó nǔ e sɔgbe bɔ é ɖo ná wa ɔ́ wú ǎ?

⁵⁸Ényí mɛɖé dó hwɛ we, bó kplá we xwe hwɛ nukɔn hǔn, tɛ́nkpɔ́n, bó dó hwɛ gbɔ xá ɛ hwenu e mi kpo ɖo alixo é; é má nyí mɔ̌ ǎ ɔ́, é ná kplá we yi jó nú hwɛɖɔtɔ́, bɔ hwɛɖɔtɔ́ ná jó we nú sɔ́jagán ɔ́, bɔ sɔ́jagán ɔ́ ná sɔ́ we dó gan.

⁵⁹Má ɖɔ nǔgbó nú we: ényí ɖɔ nǔ nyǐ mɔ̌ ɔ́, hwɛ e è ɖǒ nú we ɔ́, bǐ sín axɔ́ wɛ a nǎ sú; é ná kpo ɖěbǔ ɖo kɔ towe cóbɔ a nǎ tɔ́n sín gankpá ɔ́ mɛ ǎ.”