Read fon Luki 15 Bible Online

Luki 15 - fon bible

Luki 15

¹ Tokwɛ́yítɔ́ lɛ́ɛ bǐ kpódó gbɛnyanyazántɔ́ ɖěvo lɛ́ɛ kpó sɛ yá Jezu, bó ja tó ɖó e gbé,

²bɔ Falizyɛn lɛ́ɛ kpódó sɛ́nkplɔ́nmɛtɔ́ lɛ́ɛ kpó jɛ nǔ hlún ɖɔ jí ɖɔ: “Nya élɔ́ nɔ́ yí gbɛnyanyazántɔ́ lɛ́ɛ ganjí, bó nɔ ɖu nǔ xá yě.”

³Jezu ka dó lǒ nú yě ɖɔ:

⁴“Mɛ̌ ká ɖo mi mɛ, bónú é ɖó lɛ̌ngbɔ́ kanwe ko (100), bɔ ɖokpó bú ɖ'é mɛ ɔ́, é ma ná jó lɛ̌ngbɔ́ kanwe afɔtɔn-nukún-ɛnɛ (99) ɖě lɛ́ɛ dó nyi amagbo mɛ fí e ɖu nǔ ɖe wɛ yě ɖe é, bó ná jɛ ɖokpó e bú é gbé mɛ, káká bó ná yi mɔ ɛ ǎ?

⁵Ée é mɔ ɛ ɔ́, xomɛ hun i, bɔ é sɔ́ ɛ nyi kɔlivla mɛ

⁶wá xwé gbe, bó kplé xɔ́ntɔn tɔn lɛ́ɛ, kpódó mɛ e ɖo xwé tɔn kpá lɛ́ɛ kpó, bó ɖɔ nú yě ɖɔ: ‘Mi j'awǎ xá mì, ɖó un mɔ lɛ̌ngbɔ́ ce e bú é.’

⁷Mɔ̌ ɖokpó ɔ́, má ɖɔ nú mi, ényí hwɛhutɔ́ ɖokpó géé lɛ́ kɔ sín hwɛ tɔn lɛ́ɛ gúdo ɔ́, awǎ e è nɔ jɛ dó ta tɔn mɛ ɖo sɛ́xwé ɔ́ nɔ hú ée è nɔ jɛ dó hwɛjijɔnɔ kanwe afɔtɔn-nukún-ɛnɛ (99) e kɔ lɛ́ sín hwɛ yětɔn lɛ́ɛ gúdo nú ma hu dó ǎ lɛ́ɛ tamɛ é.”

⁸“Abǐ nyɔ̌nu tɛ́ ká ná ɖó gankwɛ́ wǒ[4], bó hɛn ɖokpó bú ɖ'é mɛ ɔ́, é má ná tá zogbɛ́n, bó za xwé gbe, lobo xwetɛ́, bó ba káká bó mɔ ǎ?

⁹Ée é mɔ ɔ́, é kplé xɔ́ntɔn tɔn lɛ́ɛ, kpódó mɛ e ɖo xwé tɔn kpá lɛ́ɛ kpó, bó ɖɔ nú yě ɖɔ: ‘Mi j'awǎ xá mì, ɖó un mɔ akwɛ́ ce e un hɛn bú é.’

¹⁰Mɔ̌ ɖokpó ɔ́, má ɖɔ nú mi: ényí hwɛhutɔ́ ɖokpó géé lɛ́ kɔ sín hwɛ tɔn lɛ́ɛ gúdo ɔ́, lě e wɛnsagun Mawu tɔn lɛ́ɛ nɔ j'awǎ gbɔn ɔ́ nɛ́.”

¹¹Jezu ka lɛ́ ɖɔ: “Nya ɖé ɖó vǐ súnnu we.

¹²Yɔkpɔ́vú ɔ́ ka ɖɔ nú tɔ́ tɔn gbe ɖokpó ɖɔ: ‘Daá, nǎ gǔ e ná nyí ce ɔ́ mì;’ bɔ tɔ́ ɔ́ ka má dɔkun tɔn nú yě.

¹³Azǎn ɖé jɛ ǎ, bɔ yɔkpɔ́vú ɔ́ xo nǔ tɔn lɛ́ɛ bǐ kplé, bó yi to línlín ɖé mɛ, bó zán nǔ tɔn lɛ́ɛ dó akpa mɛ.

¹⁴Hwenu e é zán nǔ tɔn lɛ́ɛ bǐ vɔ ɔ́, adɔ ɖaxó ɖé tɔ́n ɖo to ɔ́ mɛ, bɔ é jɛ ya ji jí.

¹⁵É gbɔ bó yi jɛ kɔ nú to ɔ́ mɛ nu ɖokpó, bɔ nya ɔ́ sɛ́ ɛ dó gle tɔn ta, nú é ná nɔ́ ná nǔɖuɖu aglǔza lɛ́ɛ.

¹⁶Nǔɖuɖu e aglǔza lɛ́ɛ nɔ ɖu ɔ́, ɖuɖu tɔn nɔ jló e, mɛɖé ka nɔ ná ɛ ǎ.

¹⁷É wá dó ayi do, bó ɖɔ dó xomɛ ɖɔ: ‘Azɔ̌watɔ́ gěgé wɛ ɖo daá ce xwé, bɔ nǔɖuɖu kpé yě kpo, bɔ nyɛ ka wá ɖo adɔ ná kú wɛ ɖo fí.

¹⁸Un ná sɔ́ nǔ, bó lɛ́ kɔ yi daá ce gɔ́n, bó na ɖɔ n'i ɖɔ: Daá! Un hu hwɛ dó Mawu, bó hu hwɛ dó we;

¹⁹un sɔ́ nyí mɛ bónú a na ylɔ́ mì ɖɔ vǐ ǎ; yǐ mì dó azɔ̌watɔ́ towe lɛ́ɛ mɛ.’

²⁰É ka sɔ́ nǔ nǔgbó, bó lɛ́ kɔ ɖidó tɔ́ tɔn gɔ́n. “Hwenu e é ɖo zɔ jǎwe ɔ́, tɔ́ tɔn mɔ ɛ sɛ́ dó, bɔ nǔ tɔn blá wǔ n'i, bɔ é bɛ́ wezun, bó yi zunfán ɛ, bó kí si n'i.

²¹Vǐ ɔ́ ka ɖɔ n'i ɖɔ: ‘Daá, un hu hwɛ dó Mawu, bó hu hwɛ dó we; un sɔ́ nyí mɛ nú a nǎ ylɔ́ mì ɖɔ vǐ ǎ.’

²²Lo ɔ́, tɔ́ ɔ́ ɖɔ nú mɛsɛntɔ́ tɔn lɛ́ɛ ɖɔ: ‘Mi yá wǔ yi sɔ́ awu gaga e nyɔ́ ɖɛkpɛ hú ɖě lɛ́ɛ bǐ ɔ́ wá dó n'i; mi sɔ́ alɔkɛ́ dó n'i, bó dó afɔkpa n'i.

²³Mi yi sɔ́ nyibú wínnyáwínnyá e è sɔ́ ɖó vo, bɔ nǔɖuɖu kpé e ganjí ɔ́ wá, bó hu, nú mǐ ná ɖu agɔ̌, bó ná j'awǎ;

²⁴ɖó vǐ ce élɔ́ ɔ́, kú wɛ é ko kú; é ka lɛ́ wá gbɛ. É ko bú bɔ è ka lɛ́ wá mɔ ɛ;’ bɔ yě jɛ xwe ɖu jí.

²⁵“Vǐ tɔn mɛxó ɔ́ ka ɖo gleta hwenɛ́nu. Ée é lɛ́ kɔ bó sɛ yá xwé gbe ɔ́, é se bɔ è ɖo hǔn xo wɛ, bó ɖo we ɖú wɛ.

²⁶Énɛ́ ɔ́, é ylɔ́ mɛsɛntɔ́ lɛ́ɛ ɖokpó, bó kan nǔ e ɖo jijɛ wɛ é byɔ́.

²⁷Mɛsɛntɔ́ ɔ́ ka yí gbe n'i ɖɔ: ‘Nɔví towe wɛ lɛ́ kɔ wá xwé, bɔ tɔ́ towe hu nyibú wínnyáwínnyá e è sɔ́ ɖó vo, bɔ nǔɖuɖu kpé ganjí é, ɖó é mɔ ɛ ɖo ganjí.’

²⁸Vǐmɛxó ɔ́ ka wlí xomɛsin, bó gbɛ́ xwé gbe byɔ́, bɔ tɔ́ ɔ́ tɔ́n, bó wá sa vo n'i ɖɔ ní byɔ́ xwé gbe.

²⁹Lo ɔ́, é yí gbe nú tɔ́ ɔ́ ɖɔ: ‘Sín xwe mɔ̌kpán ɖíe wɛ un ɖo sinsɛn we wɛ; un dó asá gbe towe gbeɖé ǎ; a ka ná gbɔ̌ ɖokpó mì gbeɖé nú ma dó ɖu agɔ̌ xá xɔ́ntɔn ce lɛ́ɛ ǎ.

³⁰Vǐ towe énɛ́ ka yi sɔ́ dɔkun towe dó ɖu gbɛ xá agalɛtɔ́ lɛ́ɛ, bó lɛ́ kɔ wá, bɔ a hu nyibú wínnyáwínnyá e è sɔ́ ɖó vo, bɔ nǔɖuɖu kpé ganjí é n'i.’

³¹Tɔ́ ɔ́ ka ɖɔ n'i ɖɔ: ‘Vǐ ce, hwɛ ɔ́, tɛgbɛ wɛ a ɖo kpɔ́ xá mì, bɔ nǔ e un ɖó lɛ́ɛ bǐ nyí towe,

³²lo ɔ́, xwe wɛ mǐ ló kó ɖu, bó j'awǎ, bɔ é nyɔ́; ɖó nɔví towe élɔ́ ɔ́, kú wɛ é ko kú; é ka lɛ́ wá gbɛ; é ko bú, un ka lɛ́ wá mɔ ɛ.’ ”