Read fon Luki 16 Bible Online

Luki 16 - fon bible

Luki 16

¹Jezu ka lɛ́ ɖɔ nú ahwanvú tɔn lɛ́ɛ ɖɔ: “Nya dɔkunnɔ ɖé tíin, bó ɖó nǔjíkpɔ́ntɔ́ ɖokpó; è ka wá slɛ́ ɛ n'i ɖɔ é nɔ zán nǔ tɔn lɛ́ɛ nyi do.

²Nya ɔ́ ka ylɔ́ ɛ, bó ɖɔ n'i ɖɔ: ‘Étɛ́ se dó wú towe wɛ un ɖe nɛ́? Wǎ xa nǔ ce lɛ́ɛ nú mì, ɖó a sɔ́ sixú nɔ nǔ ce lɛ́ɛ nu ǎ.’

³Nǔjíkpɔ́ntɔ́ ɔ́ ka ɖɔ dó xomɛ ɖɔ: ‘Nɛ̌ un ka na wa gbɔn din? Gǎn ce ɖíe gbɛ́ ɖɔ un kún sɔ́ na nɔ nǔ émítɔn lɛ́ɛ nu ó e. Gle wɛ un ná yi lɛ a? Hlɔ̌nhlɔ́n tɔn ɖo wú ce ǎ. Nǔ wɛ un ka na yi byɔ́ ɖu a? É na hu winnyá nú mì.

⁴Un ko tunwun nǔ e un ná wa, bɔ mɛɖé ná yí mì dó xwé tɔn gbe, hwenu e gǎn ce na nya mì sín nǔ tɔn lɛ́ɛ nu é.’

⁵Bɔ é wá ylɔ́ mɛ e ɖu axɔ́ dó gǎn tɔn lɛ́ɛ é ɖokpó ɖokpó wá, bó kanbyɔ́ mɛ nukɔn tɔn ɔ́ ɖɔ: ‘Axɔ́ nabí a ka ɖu dó gǎn ce?’

⁶Nya ɔ́ yí gbe n'i ɖɔ: ‘Un ɖu ami gbǎ kanwe ko (100) xɔ.’ Nǔjíkpɔ́ntɔ́ ɔ́ ka ɖɔ n'i ɖɔ: ‘Wěma towe ɖíe; jǐnjɔ́n ayǐ, bó yá wǔ wlán kanɖé wǒ (50).’

⁷É ɖɔ nú mɛ ɖěvo ɖɔ: ‘Hwɛ ɔ́ nabí a ɖu?’ Bɔ é yí gbe ɖɔ: ‘Jinukún ati kanwe ko (100),’ bɔ nǔjíkpɔ́ntɔ́ ɔ́ ɖɔ ní ɖɔ: ‘Wěma towe ɖíe, wlǎn kanwe (80).’

⁸Gǎn ɔ́ kpa bǐbí nú nǔjíkpɔ́ntɔ́ ayihízíhízínɔ énɛ́; ɖó gbɛmɛ fí ví lɛ́ɛ nɔ tunwun ayi e yě ná zán xá yětɔn ɖɔhun lɛ́ɛ hú mɛ e ɖo wěziza mɛ lɛ́ɛ.”

⁹Jezu ɖɔ: “Nyɛ ɔ́, má ka ɖɔ nú mi: dɔkun nɔ wa jlǒ Mawu tɔn ǎ; mi ka zán dó zun xɔ́ntɔn ná, lobo nú gbe e gbe é ná wá vɔ dó mi ɔ́, è nǎ yí mi dó xwé e ná ɖo te tɛgbɛ é gbe.

¹⁰Mɛ e nɔ gbejí ɖo nǔ kpɛví kɔn é ɔ́, é ná nɔ gbejí ɖo nǔ ɖaxó kɔn; mɛ e ka hízí nǔ ɖo nǔ kpɛví kɔn é ɔ́, é ná hízí nǔ, ɖo nǔ ɖaxó lɔmɔ̌ kɔn.

¹¹Ényí mi ma nɔ gbejí ɖo dɔkun gbɛmɛ fí tɔn lɛ́ɛ kɔn ǎ ɔ́, mɛ̌ ka ná sɔ́ dɔkun jɔ dɔkun dó alɔ mɛ nú mi?

¹²Ényí mi ma nɔ gbejí ɖo mɛɖěvo nú kɔn ǎ ɔ́, mɛ̌ ka ná ná ée nyí mitɔn ɔ́ mi?

¹³ “Mɛsɛntɔ́ ɖé sixú sɛn gǎn we ǎ: ɖó é ná gbɛ́ wǎn nú mɛ ɖě, bó na yí wǎn nú mɛ ɖě; abǐ é ná se tónú nú mɛ ɖě, bó ná vɛ́ tóli nú mɛ ɖě. Mi sixú sɛn Mawu, bó lɛ́ sɛn dɔkun ǎ.”

¹⁴Ée Falizyɛn lɛ́ɛ se xó énɛ́ ɔ́, yě jɛ slǎmɛ ɖɔ Jezu wú jí, ɖó yědɛɛ lɛ́ɛ yí wǎn nú akwɛ́.

¹⁵Jezu ka ɖɔ nú yě ɖɔ: “Midɛɛ lɛ́ɛ wɛ nɔ ɖe xlɛ́ ɖo gbɛtɔ́ lɛ́ɛ nukún mɛ ɖɔ émí nyí hwɛjijɔnɔ; lo ɔ́, Mawu tunwun ayi mitɔn. Đó nǔ e gbɛtɔ́ lɛ́ɛ nɔ mɔ dó mɔ nǔgɛ́n ɔ́, nǔ wɛ é nyí bɔ Mawu gbɛ́ wǎn na ɖésú.”

¹⁶ Nǔ e Mɔyízi sɛ́n ɔ́ zɔ́n lɛ́ɛ kpódó nǔ e gbeyíɖɔ Mawu tɔn lɛ́ɛ ɖɔ lɛ́ɛ kpán wɛ ɖo te káká bɔ Jǎan Yɛhwesinlɛnúmɛtɔ́ ɔ́ wá; bɛ́ sín hwenu e é wá ɔ́, mɛ lɛ́ɛ jɛ Wɛn Ɖagbe e ɖɔ xó dó axɔ́súɖuɖu Mawu tɔn wú ɔ́ jlá mɛ lɛ́ɛ jí; bɔ mɛ ɖokpó ɖokpó nɔ ɖo gǎn dó wɛ, bó na byɔ́ axɔ́súɖuɖu Mawu tɔn mɛ.

¹⁷ Jǐnukúnsin kpódó ayǐkúngban kpán ná vɔ ɔ́, é ná bɔkun hú wěkwín kpɛví ɖokpó géé ní hwe sín sɛ́n ɔ́ mɛ.

¹⁸ Mɛ ɖěbǔ gbɛ́ asi tɔn, bó da ɖěvo hǔn, aga wɛ é lɛ; mɛ e ka da nyɔ̌nu e asú tɔn nya ɔ́, aga wɛ élɔ́ lɛ.

¹⁹Nya dɔkunnɔ ɖé tíin, bó nɔ dó akwɛ́núvɔ vɔvɔ ɖagbe ɖagbe lɛ́ɛ, bó nɔ ɖo acɔ́ mɛ hwebǐnu, lobo nɔ ɖo agɔ̌ ɖu wɛ ayǐhɔ́ngbe ayǐhɔ́ngbe.

²⁰Wamamɔnɔ ɖé mɔ̌ ka tíin, bɔ è nɔ ylɔ́ ɛ ɖɔ Lazáa, bɔ akpa kpé wǔtu tɔn bǐ, bɔ é nɔ ɖo ayǐmlɔ́mlɔ́ ɖo dɔkunnɔ ɔ́ sín hɔntogbó kpá.

²¹É nɔ ba ɖɔ émí lo ko mɔ nǔ e nɔ hlɛ́n kɔn nyi ayǐ hwenu e dɔkunnɔ ɔ́ ɖo nǔ ɖu wɛ é; avǔn lɛ́ɛ nɔ wá ɖíɖɔ́ akpa tɔn lɛ́ɛ mɛ.

²²Wamamɔnɔ ɔ́ wá kú, bɔ wɛnsagun Mawu tɔn lɛ́ɛ zé e yi Ablaxámu kpá; dɔkunnɔ ɔ́ lɔ wá kú, bɔ è ɖi i.

²³Hwenu e dɔkunnɔ ɔ́ ɖo kútomɛ, bó ɖo wǔvɛ́ mɔ wɛ ɖésú ɔ́, é zé ta yi jǐ, bó mɔ Ablaxámu sɛ́ dó, bɔ Lazáa ɖo akɔ́n tɔn mɛ;

²⁴bɔ é sú xó, bó ɖɔ: “Daá Ablaxámu, kú nǔbláwǔ ce, bó sɛ́ Lazáa dó, ní sɔ́ alɔvínu tɔn dó sin mɛ, bó wá fá ɖɛ̌ ta nú mì, ɖó un ɖo wǔvɛ́ mɔ wɛ ɖésú ɖo zo élɔ́ mɛ.”

²⁵Ablaxámu ka yí gbe n'i ɖɔ: “Vǐ ce, flín ɖɔ ɖagbe e nyí towe ɔ́, a ko mɔ yí ɖo gbɛ towe hwenu. Lazáa ɔ́, ya wɛ éyɛ́ ka ji, bɔ din ɔ́, é vo ɖo fí, bɔ hwɛ ka ɖo ya ji wɛ.

²⁶Énɛ́ ɔ́ kɛ́ɖɛ́ wú wɛ ǎ; do gɔngɔn ɖé ɖo mǐ kpódó mi kpán tɛ́ntin, bɔ mɛɖé jló ná gosín fí yi dɔ̌n ɔ́, é ná kpé wú ǎ; mɛɖé ka sigǎn gosín dɔ̌n wá mǐ gɔ̌n ǎ.”

²⁷Dɔkunnɔ ɔ́ ka yí gbe ɖɔ: “Daá, bo kɛnklɛ́n bó sɛ́ Lazáa dó tɔ́ ce xwé.

²⁸Đó un ɖó nɔví súnnu atɔ́ɔ́n ɖo fínɛ́; ní yi kplɔ́n nǔ yě, bónú yě ma wa nǔ nyɛ ɖɔhun, bó wá tɔ́n ɖo yagbénu fí ó.”

²⁹Ablaxámu ka yí gbe n'i ɖɔ: “Nǔ e Mɔyízi kpódó gbeyíɖɔ Mawu tɔn lɛ́ɛ kpán wlán lɛ́ɛ ɖo dɔ̌n nú yě; yě ní nɔ xwedó.”

³⁰Dɔkunnɔ ɔ́ ka ɖɔ: “Éeǒ daá Ablaxámu. Ényí mɛɖé gosín kútomɛ, bó yi mɔ yě ɔ́, yě ná húzú ayi.”

³¹Ablaxámu ka ɖɔ n'i ɖɔ: “Ényí yě má xwedó nǔ e Mɔyízi kpódó gbeyíɖɔ Mawu tɔn lɛ́ɛ kpán wlán lɛ́ɛ ǎ ɔ́, mɛ ɖěbǔ na bó fɔ́n sín kútomɛ fí, bó yi ɖɔ xó nú yě ɔ́, yě ɖo nǎ se wɛ ǎ.”