Read fon Luki 17 Bible Online

Luki 17 - fon bible

Luki 17

¹Jezu ɖɔ nú ahwanvú tɔn lɛ́ɛ ɖɔ: “Mɛ dɔn dó nǔ nyanya mɛ sixú hán ǎ; amɔ̌, heelú mɛ e ná dɔn mɛ dó nǔ nyanya mɛ é;

²è gbɔ bó sin sé ɖaxó ɖokpó dó kɔ nú mɛ énɛ́ ɔ́, bó kpíkpé e nyi xu mɛ ɔ́, é nyɔ́ n'i hú nyladó e ɖo te kpɔ́n mɛ e na dɔn yɔkpɔ́vú ɖo nǔɖiɖi mɛ élɔ́ lɛ́ɛ ɖokpó géé dó nǔ nyanya mɛ é.

³ Mi bo cɔ́ miɖée! “Ényí nɔví towe hu hwɛ hǔn, gbɛ̌ nǔ n'i; ényí é ka lɛ́ kɔ sín hwɛ tɔn lɛ́ɛ gúdo hǔn, sɔ́ kɛ ɛ.

⁴É na bó hu hwɛ dó we azɔn tɛ́nwe ɖo kéze ɖokpó ɔ́ mɛ, lobo wá gɔ̌n towe azɔn tɛ́nwe mɔ̌, bó ɖɔ nú we ɖɔ: ‘Nǔ e un wa nyi do nú we ɔ́ vɛ́ nú mì’ hǔn, sɔ́ kɛ ɛ.”

⁵Mɛsɛ́dó lɛ́ɛ ɖɔ nú Aklúnɔ ɖɔ: “Dǒ nǔɖiɖi nǔɖiɖi jí nú mǐ.”

⁶Jezu ka ɖɔ nú yě ɖɔ: “Ényí nǔɖiɖi mitɔn na bo sɔ atínkwín kpɛví ɖé, bónú mi ɖɔ nú atín élɔ́ ɖɔ: ‘Hɔn hwiɖée bó yi tun te ɖo xu mɛ’ ɔ́, é ná se gbe nú mi.”

⁷“Mɛ̌ ká ɖo mi mɛ, bó ná ɖó mɛsɛntɔ́ ɖokpó, bɔ é nɔ́ lɛ gle n'i, abǐ é nɔ́ nyi kanlin n'i, bó ná gosín gle mɛ wá xwé, bɔ mɛ ɔ́ ná ɖɔ n'i ɖɔ: ‘Yǎ wǔ wá jínjɔ́n ayǐ bó ɖu nǔ?’

⁸Éeǒ; é nyɔ́ wa ɔ́, ɖɔ wɛ é ná ɖɔ n'i ɖɔ: ‘Blǒ nǔɖuɖu nú mì, bó húzú kan bó sɛn mì káká nú ma ɖu nǔ, bó nu ahan; énɛ́ ɔ́ gúdo ɔ́, hwi lɔ ná wá ɖu nǔ, bó nu ahan.’

⁹Mɛsɛntɔ́ ɔ́ ka bló nǔ e é zɔ́n ɛ lɛ́ɛ bǐ ɔ́, gǎn ɔ́ ná dó kú tɔn n'i wɛ a?

¹⁰Mɔ̌ ɖokpó ɔ́, ényí mi lɔmɔ̌ mi wa nǔ e Mawu zɔ́n mi lɛ́ɛ bǐ hǔn, mi ɖɔ: ‘Mɛsɛntɔ́ kpowun wɛ mǐ nyí; nǔ e mǐ ɖó ná wa é jɛ́n mǐ wa.’ ”

¹¹Jezu wá ɖo ali jí xwe Jeluzalɛ́mu, bó gbɔn Samalíi kpódó Galilée kpó tɛ́ntin.

¹²Ée é ɖo gletoxo ɖé mɛ byɔ́ wɛ ɔ́, azinzɔnnɔ wǒ ɖé lɛ́ɛ wá kpé e; guduzɔn ɖé jɛ wɛ yě ɖe. Yě nɔ te ɖo zɔ,

¹³bó zé gbe yi jǐ, bó jɛ Jezu ylɔ́ jí, bó ɖɔ: “Jezu, Mɛ̌si, kɛnklɛ́n kú nǔbláwǔ mǐtɔn.”

¹⁴ Ée Jezu mɔ yě ɔ́, é ɖɔ nú yě ɖɔ: “Mi yi sɔ́ miɖée xlɛ́ vɔ̌sánú-xwlémawutɔ́ lɛ́ɛ;” bɔ hwenu e yě sɔ́ ali bó xweyǐgbe ɔ́, azɔn gbɔ nú yě.

¹⁵Mɛ ɖokpó ka ɖo yě mɛ, bɔ ée éyɛ́ mɔ ɖɔ azɔn gbɔ nú émí ɔ́, é lɛ́ kɔ, bó jɛ susu kpa nú Mawu jí, kpódó xósúsú kpó.

¹⁶É wá jɛ kpo ɖo Jezu nukɔn, bó ɖe kɔ́, lobo dó kú n'i. Nya énɛ́ ɔ́, Samalíinu ka wɛ.

¹⁷Jezu yí xó, bó ɖɔ: “Mɛ wǒ lɛ́ɛ bǐ wɛ azɔn gbɔ ná ǎ cé? Mɛ tɛ́nnɛ ɖě lɛ́ɛ lo? Fítɛ́ yě ká ɖe?

¹⁸Hǔn mɛɖé sɔ́ ɖo yě mɛ, bó ná lɛ́ kɔ wá kpa susu nú Mawu zɛ toɖévomɛnu élɔ́ wú ǎ cé?”

¹⁹É ka ɖɔ nú nya e wá dó kú n'i ɔ́ ɖɔ: “Sí te, bó yi; nǔ e a ɖi ɔ́ zɔ́n bɔ Mawu gbɔ azɔn nú we.”

²⁰Falizyɛn lɛ́ɛ ka wá kan nǔ byɔ́ Jezu dó hwenu e axɔ́súɖuɖu Mawu tɔn na wa dó é wu, bɔ é yí gbe nú yě ɖɔ: “Axɔ́súɖuɖu Mawu tɔn nyí nǔ e è nǎ sixú mɔ dó nukún wú ɔ́ ǎ.

²¹È sixú ɖɔ: ‘Éɖíe ɖo fí e; abǐ énɛ́ ɖo dɔ̌n nɛ́’ ǎ. Đó mi ní nywɛ́ ɖɔ axɔ́súɖuɖu Mawu tɔn ko ɖo mi mɛ.”

²²É lɛ́ ɖɔ nú ahwanvú tɔn lɛ́ɛ ɖɔ: “Hwe ɖé nu ná wá su, bɔ mi na ba ná mɔ nyɛ Gbɛtɔ́ví ɔ́ sín azǎn lɛ́ɛ ɖě, bó ka na ba kpo.

²³È nǎ ɖɔ nú mi ɖɔ: ‘Éɖíe ɖo fí e, abǐ énɛ́ ɖo dɔ̌n nɛ́!’ Mi ma ka xwedó yě ó.

²⁴Đó, lě e jǐ nɔ́ kɛwun, bɔ jǐnukúnsin nɔ za wě sín akpá ɖě xwé, káká yi akpá ɖěvo xwé gbɔn ɔ́, mɔ̌ ɖokpó ɔ́ wɛ é ná nyí gbɔn nú nyɛ Gbɛtɔ́ví ɔ́ ɖo azǎn ce gbe.

²⁵Amɔ̌, ya wɛ un ná tó jí káká, bɔ gbɛtɔ́ din tɔn lɛ́ɛ na tó gbɛ́ mì hwɛ̌.

²⁶ Nǔ e jɛ ɖo Nɔwée hwenu ɔ́ ɖokpó ɔ́ jɛ́n na lɛ́ jɛ ɖo nyɛ Gbɛtɔ́ví ɔ́ sín azǎn lɛ́ɛ gbe.

²⁷ Nɔwée hwenu ɔ́, gbɛtɔ́ lɛ́ɛ ɖo nǔ ɖu wɛ, bó ɖo ahan nu wɛ; súnnu lɛ́ɛ ɖo asi kplá wɛ, bɔ nyɔ̌nu lɛ́ɛ ɖo asúxwé yi wɛ káká yi jɛ gbe e gbe Nɔwée byɔ́ tɔjíhún ɖaxó ɔ́ mɛ é; jǐ ɖaxó ɖé ja káká, bɔ sin vɔ yě bǐ.

²⁸ Mɔ̌ ɖokpó ɔ́, nǔ e jɛ ɖo Lɔ̌ti hwenu ɔ́ wɛ na lɛ́ jɛ: gbɛtɔ́ lɛ́ɛ ɖo nǔ ɖu wɛ, bó ɖo ahan nu wɛ; yě ɖo nǔ xɔ wɛ, bó ɖo nǔ sa wɛ; yě ɖo nukún dó wɛ, bó ɖo xɔ gbá wɛ,

²⁹bɔ gbe e gbe Lɔ̌ti wá tɔ́n sín Sodɔ́mu ɔ́, Mawu zɔ́n, bɔ zo kpódó hwemí kpó ja sín jǐxwé jǐ ɖɔhun, bó vɔ yě bǐ.

³⁰Hwenu e nyɛ Gbɛtɔ́ví ɔ́ ná ɖe susu ce xlɛ́ ɔ́, lě e é ná nyí gbɔn ɔ́ nɛ́.

³¹ “Azǎn énɛ́ gbe ɔ́, mɛ e ná ɖo xɔ ta bɔ nǔ tɔn lɛ́ɛ ka ná ɖo xɔ mɛ ɔ́, ní ma jɛ te bó yi fɔ ó. Mɔ̌ ɖokpó ɔ́, mɛ e ná ɖo gle mɛ ɔ́ má lɛ́ kɔ wá xwé gbe ó.

³² Mi flín Lɔ̌ti sín asi ɔ́.

³³ Mɛ e ná ba ná hwlɛ́n gbɛ éɖée tɔn gán ɔ́, gbɛ tɔn ná bú dó e. Mɛ e ka ná hɛn gbɛ tɔn bú ɔ́ ná lɛ́ vɔ́ mɔ gbɛ tɔn sɔ́ ɖó tɛn tɔn mɛ.

³⁴Má ka ɖɔ nú mi: zǎn énɛ́ mɛ ɔ́, mɛ we ná ɖo zan ɖokpó ɔ́ jí, bɔ è nǎ sɔ́ mɛ ɖokpó, bó ná jó mɛ ɖokpó dó.

³⁵Nyɔ̌nu we ná ɖo nǔ li wɛ, bɔ è nǎ sɔ́ mɛ ɖokpó, bó ná jó mɛ ɖokpó dó. [

³⁶Súnnu we ná ɖo gleta, bɔ è nǎ sɔ́ mɛ ɖokpó, bó ná jó mɛ ɖokpó dó.”]

³⁷Ahwanvú tɔn lɛ́ɛ ka yí xó, bó kanbyɔ́ ɛ ɖɔ: “Aklúnɔ! Fítɛ́ nǔ énɛ́ lɛ́ɛ ka ná jɛ ɖe?” Jezu ka yí gbe nú yě ɖɔ: “Fí e nǔ kúkú ɖe ɔ́, fí e aklasú lɛ́ɛ nɔ kplé ɖe é nɛ́[5].”