Read fon Luki 22 Bible Online

Luki 22 - fon bible

Luki 22

¹ Xwe e è nɔ ylɔ́ ɖɔ Dǐndínwáyixwe, bɔ è nɔ ɖu wɔ̌xúxú e mɛ è ma dó tɔ́n ǎ é ɔ́ kó ɖo sisɛyá wɛ.

²Vɔ̌sánú-xwlémawutɔ́gán lɛ́ɛ, kpódó sɛ́nkplɔ́nmɛtɔ́ lɛ́ɛ kpán ɖo lě e yě ná hu Jezu gbɔn ɔ́ sín wě ɖe wɛ; lo ɔ́, yě ɖo xɛsi ɖi nú to lɛ́ɛ wɛ.

³Satáan ka byɔ́ ayi mɛ nú Judási e è nɔ ylɔ́ ɖɔ Isikaliɔ́ti, bɔ é ɖo ahwanvú Jezu tɔn wěwe lɛ́ɛ mɛ é;

⁴bɔ Judási yi mɔ vɔ̌sánú-xwlémawutɔ́gán lɛ́ɛ kpódó sɔ́jagán lɛ́ɛ kpán, bó ɖɔ xó xá yě dó lě e é ná jó Jezu nú yě gbɔn ɔ́ wú.

⁵Énɛ́ ɔ́, xomɛ hun yě tlala, bɔ yě ɖɔ gbo xá Judási ɖɔ émí ná ná akwɛ́ ɛ,

⁶bɔ Judási yí gbe, bó jɛ hwenu e ná nyɔ́, bɔ é ná jó Jezu nú yě, bɔ mɛ lɛ́ɛ ma ná tunwun ǎ é ba jí.

⁷Wɔ̌xúxú e mɛ è ma dó tɔ́n ǎ é sín xwezán e gbe è nɔ hu lɛ̌ngbɔ́ví dó ɖu Dǐndínwáyixwe ɔ́ ná ɔ́ su.

⁸Jezu ka sɛ́ Piyɛ́ɛ kpódó Jǎan kpó dó, bó ɖɔ nú yě ɖɔ: “Mi yi bló tɛnmɛ ɖó, bó ɖa nǔɖuɖu e mǐ nǎ dó ɖu Dǐndínwáyixwe ɔ́ ná é.”

⁹Yě ká kanbyɔ́ ɛ ɖɔ: “Fítɛ́ a jlǒ ɖɔ mǐ ní yi sɔ́ xwe ɔ́ sín nǔ ɖe?”

¹⁰É ka yí gbe nú yě ɖɔ: “Éɖíe: mi ɖo toxo ɔ́ mɛ ná byɔ́ wɛ ɔ́, mi ná mɔ nya ɖé, bɔ é ná hɛn sin dó tɔyizɛ́n mɛ wá xweyǐgbe; mi xwedó e káká yi xwé e gbe é ná byɔ́ é,

¹¹bó ɖɔ nú xwétɔ́ ɔ́ ɖɔ: ‘Mɛ̌si ɖɔ mǐ ní wá kan xɔ e mɛ émí kpódó ahwanvú émítɔn lɛ́ɛ kpó ná ɖu Dǐndínwáyixwe ɔ́ ɖe ɔ́ byɔ́ we.’

¹²Énɛ́ ɔ́, xwétɔ́ ɔ́ ná xlɛ́ xɔ ɖaxó ɖé mi ɖo síngbó jí, bɔ nǔ bǐ ko sɔgbe ɖ'é mɛ; fínɛ́ wɛ mi ná sɔ́ xwe ɔ́ sín nǔ ɖ'ayǐ ɖe.”

¹³Ahwanvú tɔn we lɛ́ɛ ka yi, bó mɔ nǔ lɛ́ɛ bǐ lě e Jezu ɖɔ gbɔn nú yě ɔ́, bɔ yě ɖa xwe ɔ́ sín nǔɖuɖu ɖo fínɛ́.

¹⁴Ée hwe ɔ́ nu su é ɔ́, Jezu kpódó mɛsɛ́dó tɔn lɛ́ɛ kpán ja nǔ ɖu gbé,

¹⁵bɔ Jezu ɖɔ nú yě ɖɔ: “Un ko jló tlala ɖɔ ma ɖu Dǐndínwáyixwe sín nǔɖuɖu élɔ́ xá mi, cóbó ná jɛ ya ji jí;

¹⁶ɖó ma ɖɔ nú mi: un sɔ́ ɖo ɖě ná ɖu wɛ gbeɖé, káká yi jɛ hwenu e Mawu ná ɖe nǔ e xwe ɔ́ nyí ɔ́ xlɛ́, ɖo axɔ́súɖuɖu tɔn mɛ dó é ǎ.”

¹⁷É ká wá sɔ́ kɔ́fu ɖokpó, bɔ vɛ̌ɛn ɖ'é mɛ, bɔ é dó kú nú Mawu, bó ɖɔ: “Mi yí, bó má nu,

¹⁸ɖó má ɖɔ nú mi, bɛ́ sín din ɔ́, vɛ̌ɛn ɖě sɔ́ ɖo nu ce ná jɛ wɛ káká yi jɛ hwenu e axɔ́súɖuɖu Mawu tɔn ná wá dó é ǎ.”

¹⁹Ée Jezu ɖɔ mɔ̌ ɔ́, é sɔ́ wɔ̌xúxú, bó dó kú nú Mawu, bó kán, bó ná yě bó ɖɔ: “Élɔ́ ɔ́, agbaza ce wɛ; [agbaza ce e un sɔ́ jó dó mi ta mɛ ɔ́ wɛ; mi nɔ bló lě, dó flín mì ná.”

²⁰ Ée yě ɖu nǔ gúdo ɔ́, é sɔ́ vɛ̌ɛn kɔ́fu ɔ́ lɔmɔ̌ nú yě, bó ɖɔ: “Vɛ̌ɛn élɔ́ ɔ́, hun ce wɛ; hun ce e Mawu dó sɔ́ akɔjijɛ yɔ̌yɔ́ ɔ́ sín afɔ ɖó te ná ɔ́ wɛ; é wɛ kɔn nyi ayǐ dó ta mitɔn mɛ.]

²¹ “Mɛ e ka ɖo nǎ sɔ́ mì jó wɛ é ɖíe ɖo nǔ ɖu xá mì wɛ e.

²²Gbɛtɔ́ví ɔ́ ɖó ná kú, lě e Mawu kó ɖɔ gbɔn é, amɔ̌ mɛ e ná sɔ́ ɛ jó ɔ́, heelú i.”

²³Yě ká jɛ kinkanbyɔ́ yěɖée jí ɖɔ mɛ̌ ka ɖo nǔ mɔ̌hunkɔtɔn ná dó sin wɛ ɖo émí mɛ a jí.

²⁴ Yě jɛ nǔ dɔn jí kpó adǎn kpó ɖo yěɖée tɛ́ntin, ɖɔ mɛ̌ ká ɖó ná nyí nǔɖaxó ɖo émí mɛ a jí.

²⁵ Jezu ka ɖɔ nú yě ɖɔ: “Togun e ma nyí Jwifu ǎ lɛ́ɛ sín axɔ́sú lɛ́ɛ nɔ́ kpa acɛ gannaganna nú yě, bɔ mɛ e nyí gǎn lɛ́ɛ nɔ́ ba ɖɔ è nǐ ylɔ́ émí ɖɔ ‘Đagbewatɔ́.’

²⁶ Lo ɔ́, nǔ ná nyí mɔ̌ ɖo midɛɛ lɛ́ɛ mɛ ǎ; é nyɔ́ wa ɔ́, mɛ e nyí nǔɖaxó ɖo mi mɛ é ní cí yɔkpɔ́vú ɖɔhun; mɛ e ka nyí gǎn é ní cí mɛsɛntɔ́ ɖɔhun.

²⁷Đo mɛ e ɖo nǔ ɖu wɛ é kpódó mɛ e ɖo mɛ sɛn wɛ ɔ́ kpán mɛ ɔ́, mɛ̌ wɛ hú gǎn mɛ ɖě? Mɛ e ɖo nǔ ɖu wɛ é wɛ ǎ cé? É ɖo mɔ̌ có, nyɛ ka ɖo mi mɛ mɛsɛntɔ́ ɖɔhun.

²⁸“Midɛɛ lɛ́ɛ ɔ́, mi wɛ nɔ gúdo ce hwebǐnu, ɖo adǎngbomɛ ce lɛ́ɛ mɛ.

²⁹Énɛ́ wú ɔ́, nyɛ ɔ́, un sɔ́ axɔ́súɖuto ɔ́ ɖó te nú mi, lě e Tɔ́ ce sɔ́ ɖó te nú nyɛ gbɔn é,

³⁰bónú mi na ɖu nǔ, bó nu sin xá mì, ɖo axɔ́súɖuto ce mɛ, lobo na jínjɔ́n axɔ́súzinkpo jí, bó na ɖɔ hwɛ xá Izlayɛ́li sín akɔta wěwe lɛ́ɛ.”

³¹“Aklúnɔ ɖɔ: Sinmɔ́ɔ! Sinmɔ́ɔ! Đǒtó; Satáan byɔ́ mi, bó na fún mi lě e è nɔ fún jinukún gbɔn é.

³²Lo ɔ́, un sa vo nú Mawu ɖó ta towe mɛ, bónú nǔɖiɖi má wá hwe dó we ó. Hwenu e a ka ná lɛ́ kɔ wá gɔ̌n ce ɔ́, dǒ wǔsyɛ́n lanmɛ nú nɔví towe lɛ́ɛ.”

³³Piyɛ́ɛ ka ɖɔ n'i ɖɔ: “Aklúnɔ! Un ɖo gbesisɔ mɛ, bó ná xwedó we yi ganxó, bó ná xwedó we yi kú.”

³⁴Jezu ka yí gbe n'i ɖɔ: “Má ɖɔ nú we Piyɛ́ɛ! Kokló ná kó kɔ́ así égbé cóbɔ a nǎ kó gbɛ́ azɔn atɔn ɖɔ émí kún tunwun mì ó ǎ.”

³⁵ Jezu ka ɖɔ nú yě ɖɔ: “Hwenu e un sɛ́ mi dó, bɔ mi ma hɛn akwɛ́kpo ǎ, bó ma ka hɛn nǔbyɔ́ɖutɔ́glo ǎ, lobo ma ka hɛn afɔkpa ǎ ɔ́, mi jɛ nǔɖé dó wɛ a?” Bɔ yě yí gbe n'i ɖɔ: “Éeǒ, mǐ jɛ nǔ ɖěbǔ do ǎ.”

³⁶É ka ɖɔ nú yě ɖɔ: “Amɔ̌, din ɔ́, mɛɖé ɖó akwɛ́kpo hǔn, ní sɔ́ hɛn; mɛɖé ɖó nǔbyɔ́ɖutɔ́glo hǔn, ní sɔ́ hɛn; mɛ e ma ka ɖó hwǐ ǎ é ɔ́, ní sa awu tɔn dó xɔ ná.

³⁷Đó má ɖɔ nú mi: nǔ élɔ́ e è wlǎn ɔ́ ɖó ná jɛ dó jǐ ce. ‘È lɛ̌n ɛ dó dǎkaxotɔ́ lɛ́ɛ sín ahwan mɛ.’ Nǔ e è wlǎn dó wǔ ce lɛ́ɛ ɖó ná jɛ.”

³⁸Yě ká ɖɔ n'i ɖɔ: “Aklúnɔ, hwǐ we ɖíe ɖo fí e.” É ka yí gbe nú yě ɖɔ: “É ko kpé.”

³⁹Jezu tɔ́n, bó ɖidó olívutín só ɔ́ ta, lě e é kó nɔ́ bló gbɔn ɖ'ayǐ é, bɔ ahwanvú tɔn lɛ́ɛ xwedó e.

⁴⁰Ée é jɛ fínɛ́ ɔ́, é ɖɔ nú yě ɖɔ: “Mi xo ɖɛ, bó ma wá jɛ tɛ́nkpɔ́n ɖaxó mɛ ó.”

⁴¹Ée é ɖɔ mɔ̌ ɔ́, é sɛ yi zɔ nú yě, nǎ yi mɛ̌tlukpo gban mɔ̌, bó jɛ kpo, bó jɛ ɖɛ xo jí

⁴²ɖɔ: “Daá! Ényí a jlǒ hǔn, sɛ wǔvɛ́ kɔ́fu élɔ́ dó zɔ nú mì; amɔ̌, ní má nyí jlǒ ce ó, lo ɔ́, ní nyí lě e é jló hwɛ gbɔn é.” [

⁴³Hwenɛ́nu ɔ́, wɛnsagun Mawu tɔn ɖokpó gosín jǐxwé wá tɔ́n dó jǐ tɔn, bó ná ɛ akɔ́nkpinkpan.

⁴⁴Jezu ka ɖo kúsukpɔ xo wɛ, bó lɛ́ ɖo ɖɛ xo wɛ syɛ́nsyɛ́n, bɔ dɛ̌n e jɛ wɛ é ɖe ɔ́ cí hun ɖɔhun, bó nɔ kun kɔn nyi ayǐ.]

⁴⁵Ée é xo ɖɛ gúdo ɔ́, é sí te, bó yi ahwanvú tɔn lɛ́ɛ gɔ́n, bó mɔ yě ɖo amlɔ mɛ wǔbláwúblá,

⁴⁶bó ɖɔ: “Étɛ́! Amlɔ dɔ́ wɛ mi ɖe a? Mi sí te bó xo ɖɛ, bó má wá jɛ tɛ́nkpɔ́n ɖaxó mɛ ó.”

⁴⁷Mɔ̌ ɖɔ wɛ Jezu ɖe kɛ́ɖɛ́, bɔ mɛɖé lɛ́ɛ nyi ahwan wá xwetɔ́n, bɔ mɛ e è nɔ ylɔ́ ɖɔ Judási ɖo ahwanvú tɔn wěwe lɛ́ɛ mɛ ɔ́ zɔn yě nu. Judási sɛ yá Jezu, bó ná kí si n'i,

⁴⁸bɔ Jezu ɖɔ n'i ɖɔ: “Judási, é má nyí si wɛ a kí nú Gbɛtɔ́ví ɔ́ bó dó jó e a?”

⁴⁹Ée mɛ e ɖo Jezu kpá lɛ́ɛ mɔ nǔ e ɖo nǎ jɛ wɛ é ɔ́, yě kanbyɔ́ ɛ ɖɔ: “Aklúnɔ, mǐ ní jɛ hwǐ xú mɛ jí a?”

⁵⁰Mɛ ɖokpó ka ɖo yě mɛ, bó xú hwǐ vɔ̌sánú-xwlémawutɔ́ ɖaxó ɔ́ sín mɛsɛntɔ́, bó kpa tó tɔn ɖisíxwé tɔn ɔ́.

⁵¹Jezu ka ɖɔ: “Mi gbɔ; ní nɔ mɔ̌!” É ka ɖó alɔ tó ɔ́ wú, bɔ tó jɛ tó tɛnmɛ.

⁵²Jezu ka ɖɔ nú vɔ̌sánú-xwlémawutɔ́gán lɛ́ɛ kpódó sinsɛnxɔcɔ́tɔ́ sín gǎn lɛ́ɛ kpó, kpódó tomɛxó e wá gbě tɔn mɛ lɛ́ɛ kpán ɖɔ: “Ajotɔ́ axánsúnxó wɛ un ka nyí, bɔ mi hɛn hwǐ kpódó kpo kpó jɛ gbě ce mɛ a?

⁵³ Ayǐhɔ́ngbe ayǐhɔ́ngbe wɛ nyɛ kpódó mi kpán nɔ́ ɖo sinsɛnxɔ mɛ, bɔ mi ka wlí mì ǎ; lo ɔ́, mi kpódó ablu mɛ hlɔ̌nhlɔ́n lɛ́ɛ kpó sín gan wɛ xo din.”

⁵⁴Ée yě wlí Jezu ɔ́, yě dɔn ɛ yi vɔ̌sánú-xwlémawutɔ́ ɖaxó ɔ́ xwé. Piyɛ́ɛ jɛ gǔdo yětɔn, é ka lɔn bó sɛkpɔ́ yě ǎ.

⁵⁵Mɛ ɖé lɛ́ɛ ka bɔ myɔ ɖo kɔ́xo ɔ́ ta, bó jínjɔ́n ayǐ lɛ́ lɛ̌ dó, bɔ Piyɛ́ɛ wá yi jínjɔ́n yě mɛ.

⁵⁶Nyɔ̌nu mɛsɛntɔ́ ɖokpó mɔ ɛ ɖo ayǐjínjɔ́n ɖo myɔ ɔ́ kɔn; é kpɔ́n ɛ tlítlí, bó ɖɔ: “Mɛ élɔ́ lɔmɔ̌ nɔ zɔn xá ɛ!”

⁵⁷Piyɛ́ɛ ka gbɛ́ bó ɖɔ: “Nyɔ̌nu, un tunwun i ǎ.”

⁵⁸É nɔ zaan, bɔ mɛ ɖěvo lɛ́ wá mɔ ɛ, bó ɖɔ: “Hwi lɔmɔ̌ ɖo mɛ tɔn lɛ́ɛ mɛ!” Piyɛ́ɛ ka gbɛ́, bó ɖɔ: “Éeǒ, un ɖo yě mɛ ɖě ǎ!”

⁵⁹É ná yi gan xixo ɖokpó mɔ̌, bɔ mɛ ɖěvo lɛ́ wá, bó tɛ ɖɛ̌ jí syɛ́nsyɛ́n ɖɔ: “Nya élɔ́ nɔ́ zɔn xá ɛ dandan, ɖó Galilée nu wɛ!”

⁶⁰Piyɛ́ɛ ka ɖɔ: “Nya ce, un mɔ nǔ jɛ nǔ e ɖɔ wɛ a ɖe ɔ́ mɛ ǎ.” Xó énɛ́ ɖɔ wɛ é ɖe kɛ́ɖɛ́ bɔ kokló kɔ́ así.

⁶¹Aklúnɔ ká lílɛ́, bó kpɔ́n Piyɛ́ɛ, bɔ Piyɛ́ɛ flín xó e Aklúnɔ kó ɖɔ n'i ɖ'ayǐ é; é wɛ nyí ɖɔ: “Cóbónú kokló ná kɔ́ así égbé ɔ́, a nǎ kó gbɛ́ azɔn atɔn ɖɔ émí kún tunwun mì ó.”

⁶²Bɔ é tɔ́n jɛ hɔnto, bó ya avǐ kpódó vǐvɛ́ kpó.

⁶³Mɛ e è sɔ́ ɖó Jezu kɔn, bɔ yě ɖo cícɔ́ ɛ wɛ lɛ́ɛ ɖo kiko e wɛ, bó ɖo xixo e wɛ.

⁶⁴Yě sɔ́ avɔ dó blá nukún mɛ n'i, bó ɖɔ n'i ɖɔ: “Đɔ mɛ e dó nǔ we din ɔ́ nú mǐ.”

⁶⁵Yě ɖɔ nǔyá gěgé ɖěvo n'i.

⁶⁶Ayǐ ká wá hɔ́n, bɔ tomɛxó lɛ́ɛ kpódó vɔ̌sánú-xwlémawutɔ́gán lɛ́ɛ kpó, kpódó sɛ́nkplɔ́nmɛtɔ́ lɛ́ɛ kpán wá kplé, bó dɔn Jezu yi hwɛɖɔxɔsá yětɔn ɖaxó ɔ́,

⁶⁷bó ɖɔ n'i ɖɔ: “Ényí hwi wɛ nyí Klísu ɔ́ hǔn, ɖɔ nú mǐ.” Jezu ka yí gbe nú yě ɖɔ: “Un ɖɔ nú mi ɔ́, mi ná ɖi ǎ;

⁶⁸un ka kan nǔ byɔ́ mi ɔ́, mi ná yí gbe nú mì ǎ.

⁶⁹Amɔ̌, sín din ɔ́, nyɛ Gbɛtɔ́ví ɔ́ ná jínjɔ́n Mawu Nǔbǐwúkpétɔ́ ɔ́ sín ɖisíxwé.”

⁷⁰Yě bǐ ka ɖɔ: “Hǔn Mawu ví wɛ nú we nɛ́ hǔn?” É ká yí gbe nú yě ɖɔ: “É jɛ́n nɛ́ mi ɖɔ nɛ́.”

⁷¹Ée Jezu ɖɔ mɔ̌ ɔ́, yě yí xó, bó ɖɔ: “Kúnnuɖetɔ́ tɛ́ ba wɛ mǐ ká sɔ́ kpo ɖe? É ɖésú nɛ́ kó sɔ́ nu tɔn dó ɖɔ ná din bɔ mǐ se nɛ́.”