Read fon Luki 23 Bible Online

Luki 23 - fon bible

Luki 23

¹Agun ɔ́ bǐ sí te, bó kplá Jezu hɛn yi Pilátu nukɔn.

²Đo fínɛ́ ɔ́, yě jɛ hwɛ xa dó kɔ n'i jí, bó nɔ́ ɖɔ: “Mǐ mɔ nya élɔ́ bɔ é nɔ́ ɖo to ɔ́ dɔn bú wɛ. É nɔ́ gbɛ́ ɖɔ è nǐ má sú takwɛ́ Dadá Hlɔ̌ma tɔn tɔn ó, lobo nɔ ɖɔ émí wɛ nyí Klísu axɔ́sú.”

³Pilátu ka kanbyɔ́ ɛ ɖɔ: “Hwi wɛ nyí Jwifu lɛ́ɛ sín axɔ́sú ɔ́ a?” Jezu ka yí gbe n'i ɖɔ: “Hwi wɛ ɖɔ!”

⁴Pilátu ka wá ɖɔ nú vɔ̌sánú-xwlémawutɔ́gán lɛ́ɛ kpódó agun ɔ́ kpán ɖɔ: “Un mɔ hwɛ ɖě ɖo kɔ nú nya élɔ́ ǎ.”

⁵Yědɛɛ lɛ́ɛ ka lɛ́ tɛ ɖɛ̌ jí, bó nɔ́ ɖɔ: “Nǔ e kplɔ́n mɛ wɛ é ɖe ɔ́ ɖo Judée to ɔ́ bǐ dán wɛ; Galilée yíkúngban jí wɛ é bɛ́ sín, káká wá jɛ fí.”

⁶Ée Pilátu se Galilée xó ɔ́, é kanbyɔ́ ɖɔ Galiléenu wɛ nya ɔ́ nyí a jí.

⁷Ée é mɔ nǔ jɛ wú ɖɔ Elódu sín acɛ mɛ wɛ Jezu ɖe ɔ́, é nyi i sɛ́ dó Elódu, ɖó é lɔmɔ̌ ɖo Jeluzalɛ́mu hwenɛ́nu.

⁸Ée Elódu mɔ Jezu ɔ́, xomɛ hun i tlala; ɖó é kó ɖo biba ná mɔ ɛ wɛ ɔ́, é kó lín, ɖó nǔ e é nɔ́ se dó wǔ tɔn lɛ́ɛ wú, bó ɖo nukún ɖó wɛ ɖɔ é ná jlɛ́ nǔ bɔ émí ná kpɔ́n.

⁹É kan nǔ gěgé byɔ́ ɛ; lo ɔ́, Jezu kɛ nu d'é mɛ n'i ǎ.

¹⁰Vɔ̌sánú-xwlémawutɔ́gán lɛ́ɛ, kpódó sɛ́nkplɔ́nmɛtɔ́ lɛ́ɛ kpán ká ɖo fínɛ́, bó ɖo hwɛ xa dó kɔ n'i wɛ syɛ́nsyɛ́n.

¹¹Elódu kpódó sɔ́ja tɔn lɛ́ɛ kpán ká wa wǎngbɛ́númɛ sín nǔ xá Jezu; yě ko e, lobo sɔ́ awu ɖagbe ɖagbe ɖé dó n'i, bó nyi i sɛ́ dó Pilátu gɔ́n.

¹²Gbe énɛ́ ɔ́ gbe wɛ Elódu kpódó Pilátu kpán gbɔ kɛn e yě ɖe ɖ'ayǐ é, bó húzú xɔ́ntɔn.

¹³Pilátu ka ylɔ́ vɔ̌sánú-xwlémawutɔ́gán lɛ́ɛ kpódó togán lɛ́ɛ kpó, kpódó togun ɔ́ kpán kplé,

¹⁴bó ɖɔ nú yě ɖɔ: “Nya élɔ́ e mi kplá wá nú mì, bó ɖɔ é ɖo to ɔ́ dɔn bú wɛ ɔ́ ɖíe un kan nǔ byɔ́ ɖo mi bǐ nukɔn e; un ka mɔ nǔ e é wa nyi do é ǎ.

¹⁵Elódu lɔ ka mɔ nǔɖé ǎ; énɛ́ ɔ́ wútu wɛ é lɛ́ nyi i sɛ́ dó mǐ; mi ma mɔ din ɖɔ nya élɔ́ kún wa nǔɖé nú è nǎ sixú ɖó kúhwɛ n'i ó a?

¹⁶Hǔn, un ná xo e, bó ná jó e dó.” [

¹⁷Dǐndínwáyixwe hwenu tɛgbɛ ɔ́, Pilátu ɖó ná ɖe gantɔ́ ɖokpó nyi te nú yě.]

¹⁸Yě bǐ ka jɛ xó sú jí ɖɔ: “Hu nya élɔ́, bó ɖe Balabási nyi te nú mǐ.”

¹⁹Balabási énɛ́ ɔ́, gǔ wɛ é fɔ́n dó gǎn lɛ́ɛ jí, lobo hu mɛ, bɔ è wlǐ i dó gan.

²⁰Pilátu ka jló ná ɖe Jezu nyi te; énɛ́ wú wɛ é lɛ́ kan xó byɔ́ yě.

²¹Yě ká sú xó, bó ɖɔ: “Ká ɛ nyi aklúzu jí! Ká ɛ nyi aklúzu jí!”

²²Pilátu ka lɛ́ ɖɔ nú yě azɔn atɔngɔ́ ɔ́ ɖɔ: “Nǔ nyanya tɛ́ é ká wa? Nyɛ mɔ hwɛ ɖě n'i ǎ. Hǔn, un ná xo e, bó ná jó e dó.”

²³Lo ɔ́, yě ɖo xó sú wɛ syɛ́nsyɛ́n, bó ɖo tagba dó nú Pilátu wɛ ɖɔ è ní ká ɛ nyi aklúzu jí; xó e sú wɛ yě ɖe ɔ́ hú gǎn Pilátu,

²⁴bɔ Pilátu gbo xó ɔ́ dó yětɔn jí.

²⁵Mɛ e è wlǐ dó gan ɖó hunnyahunnya dɔn dó to mɛ, kpódó mɛ huhu kpán wú ɔ́, è ɖe éyɛ́ nyi te, lě e yě byɔ́ gbɔn é, lobo ka jó Jezu nú yě, nú yě ná sɔ́ ɛ dó wa nǔ e jló yě ɔ́ ná.

²⁶Hwenu e è kplá Jezu xweyǐgbe ɔ́, nya ɖé tíin, bó lɛ́ kɔ sín gleta; è nɔ ylɔ́ ɛ ɖɔ Sinmɔ́ɔ; Silenɛ́ɛnu wɛ; yě wlí i, bó ɖíɖá ɛ aklúzu ɔ́, bónú é ná hɛn jɛ Jezu gúdo.

²⁷Mɛ lɛ́ɛ ká nyi ahwan xwedó Jezu, bɔ nyɔ̌nu lɛ́ɛ ɖo avǐ ya wɛ, bó ɖo alě ná wɛ.

²⁸Jezu ka lílɛ́ kpan nukɔn yě, bó ɖɔ: “Jeluzalɛ́munu nyɔ̌nu e mi, mi ma ya avǐ nú nyɛ ó; lo ɔ́, mi ya avǐ nú miɖée, bó ya avǐ nú vǐ mitɔn lɛ́ɛ.

²⁹Đó ayǐ ɖé lɛ́ɛ ná wá hɔ́n, bɔ è nǎ ɖɔ: ‘Nǔ nyɔ́ nú wɛnsinɔ lɛ́ɛ, bó nyɔ́ nú mɛ e ma ji vǐ kpɔ́n gbeɖé ǎ lɛ́ɛ, bó nyɔ́ nú mɛ e ma ná anɔ̌ vǐ kpɔ́n gbeɖé ǎ é.’

³⁰ Hwenɛ́nu ɔ́, è nǎ jɛ ɖiɖɔ nú só ɖaxó ɖaxó lɛ́ɛ jí ɖɔ: ‘Mi mu kɔn nyi mǐ jǐ!’ Bó ná ɖɔ nú só kpɛví kpɛví lɛ́ɛ ɖɔ: ‘Mi cyɔ́n mǐ.’

³¹Đó ényí è ɖo atín mǔ sín nǔ wa gbɔn mɔ̌ wɛ ɔ́, nɛ̌ wɛ atín xúxú tɔn ka ná nyí gbɔn?”

³²Yě kplá dǎnúwatɔ́ we dó jǐ tɔn, bó ná yi hu yě kpó é kpó.

³³Ée yě wá yi jɛ tɛn e mɛ è nɔ ylɔ́ ɖɔ “takágo” ɔ́, yě ká Jezu nyi aklúzu jí, bó ká dǎnúwatɔ́ we lɛ́ɛ: è ká mɛ ɖokpó ɖó ɖisí tɔn xwé, bó ká mɛ ɖokpó ɖó amyɔ tɔn xwé.

³⁴ Jezu ka sa vo nú Mawu, bó ɖɔ: “Daá, yě tunwun nǔ e wa wɛ yě ɖe é ǎ; sɔ́ kɛ yě.” Yě ká nyi akɔ dó avɔ tɔn lɛ́ɛ, bó sɔ́ yětɔn yětɔn.

³⁵ Togun ɔ́ ka cí fínɛ́, bó ɖo nǔ kpɔ́n wɛ. Gǎn lɛ́ɛ ka ɖo kiko e wɛ, bó nɔ́ ɖɔ: “É hwlɛ́n mɛ ɖě lɛ́ɛ gán. Ényí Klísu mɛ e Mawu kpɔ́n bó sɔ́ é jɛ́n é nyí nǔgbó hǔn, ní bó hwlɛ́n éɖée gán.”

³⁶ Sɔ́ja lɛ́ɛ lɔmɔ̌ ɖo kiko e wɛ. Yě sɛ yi gɔ̌n tɔn, bó xwlé e vɛ̌ɛn sinvɛ́sinvɛ́,

³⁷bó nɔ ɖɔ: “Ényí axɔ́sú Jwifu lɛ́ɛ tɔn jɛ́n a nyǐ nǔgbó hǔn, hwlɛ̌n hwiɖée gán.”

³⁸È ka wlán xógbe élɔ́ dó ta tɔn nu ɖɔ: “Nya élɔ́ ɔ́, axɔ́sú Jwifu lɛ́ɛ tɔn wɛ.”

³⁹Dǎnúwatɔ́ e è ka nyi aklúzu jí lɛ́ɛ ɖokpó ɖo zunzun i wɛ, bó nɔ́ ɖɔ: “É má nyí hwi wɛ nyí Klísu ǎ cé? Bo hwlɛ́n hwiɖée gán, bó hwlɛ́n mǐ lɔmɔ̌ gán bó!”

⁴⁰Lo ɔ́, mɛ ɖě ɔ́ gbɛ́ nǔ n'i, bó ɖɔ: “Hwɛ nɔ sí Mawu ǎ wɛ a? Hwi mɛ e kpó é kpó è ɖǒ kúhwɛ ɖokpó ɔ́ na é.

⁴¹Mǐdɛɛ lɛ́ɛ ɔ́, nǔ e mǐ wa ɔ́ sín axɔ́ sú wɛ mǐ ɖe, bɔ é sɔgbe; éyɛ́ má ká wa nǔ nyanya ɖěbǔ nɛ́!”

⁴²É ka lɛ́ ɖɔ: “Jezu, hwenu e a nǎ wá ɖu axɔ́sú ɖo gbɛ élɔ́ nu ɔ́, flín mì mɛ!”

⁴³Jezu ka yí gbe n'i ɖɔ: “Má ɖɔ nǔgbó nú we: égbé din ɔ́, a nǎ ɖo Mawu gɔ̌n xá mì[6].”

⁴⁴ Gan wěwe wɛ ɖo na xo wɛ kɛ́ɖɛ́, bɔ hwesivɔ́ cí, bɔ ablu cyɔ́n gbɛ ɔ́ bǐ, káká yi jɛ gan atɔn mɛ, bɔ avɔ ɖaxó e è dó gbo sinsɛnxɔ mɛ ná ɔ́ tlɛ́n ɖó we sín tɛ́ntin.

⁴⁵

⁴⁶ Jezu ka sú xó kpó hlɔ̌nhlɔ́n kpó, bó ɖɔ: “Daá, un sɔ́ lǐndɔ̌n ce dó alɔ mɛ nú we.” Énɛ́ ɔ́ gúdo ɔ́, é bɔnu.

⁴⁷Ée sɔ́ja kanwekogán ɔ́ mɔ nǔ énɛ́ lɛ́ɛ e jɛ lɛ́ɛ ɔ́, é jɛ susu kpa nú Mawu jí ɖɔ: “Dandan mɛ ɔ́, nya élɔ́ ɔ́, xomɛvɔ́nɔ wɛ é nyí nǔgbó.”

⁴⁸Ée mɛ e nyi ahwan wá kpɔ́n nǔ énɛ́ lɛ́ɛ mɔ mɔ̌ ɔ́, yě bǐ jɛ alɔ zin dó akɔ́n jí, dó ɖe xlɛ́ ɖɔ é kú wǔ nú émí, bó lɛ́ kɔ wá yi xwé.

⁴⁹ Jezu sín xɔ́ntɔn lɛ́ɛ bǐ, kpódó nyɔ̌nu e xwedó e sín Galilée lɛ́ɛ bǐ kpan ka nɔ te ɖo zɔ, bó ɖo nǔ e ɖo jijɛ wɛ lɛ́ɛ kpɔ́n wɛ.

⁵⁰Nya nukúnɖéjí ɖokpó ka tíin, bó ɖo toxóɖɔgbɛ́ yětɔn mɛ, bɔ è nɔ ylɔ́ ɛ ɖɔ Jozɛ́fu, bɔ é nyí gbɛtɔ́ ayijlɔ́jlɔ́nɔ, hwɛjijɔnɔ.

⁵¹É ɖo nǔ e mɛ ɖě lɛ́ɛ ɖɔ ɔ́ kpódó nǔ e yě wa ɔ́ kpó ɖěbǔ jí ǎ. Nya énɛ́ ɔ́ Judée to e è nɔ ylɔ́ ɖɔ Alimatée ɔ́ mɛ nu wɛ. É lɔmɔ̌ ɖo te nɔ kpɔ́n axɔ́súɖuɖu Mawu tɔn wɛ.

⁵²É yi mɔ Pilátu, bó byɔ́ ɛ Jezu sín cyɔ.

⁵³É ɖe Jezu sín aklúzu ɔ́ jí, bó lɛ́ akwɛ́núvɔ dó e, lobo sɔ́ ɛ yi ɖi dó yɔdo e è kun dó sóxo mɛ é mɛ; yɔdo énɛ́ ɔ́, è ko ɖi mɛ ɖěbǔ d'é mɛ kpɔ́n ǎ.

⁵⁴Gbe énɛ́ gbe ɔ́, axɔ́súzán gbe wɛ bɔ gbɔjɛzán ɔ́ ko ɖo nǎ bɛ́ wɛ.

⁵⁵Nyɔ̌nu e kplá Jezu sín Galilée lɛ́ɛ xwedó Jozɛ́fu, bó kpɔ́n yɔdo ɔ́ mɛ, bó mɔ lě e è sɔ́ Jezu sín cyɔ ɖó é.

⁵⁶ Yě ká lɛ́ kɔ wá yi xwé, bó yi ba nǔsáwǔ wǎnɖagbenɔ kpódó célu kpó ɖó alɔ jí. Yě gbɔjɛ́ gbɔjɛzán gbe ɔ́ lě e sɛ́n ɔ́ zɔ́n gbɔn é.