Read fon Luki 3 Bible Online

Luki 3 - fon bible

Luki 3

¹Hwenu e Dadá Hlɔ̌ma tɔn Tibɛ́ɛ ɖo xwe afɔtɔn bló wɛ, ɖo axɔ́súzinkpo tɔn jí ɔ́, Mawu ɖɔ xó nú Jǎan Zakalíi ví ɔ́ ɖo gbětótló mɛ. Hwenɛ́nu ɖokpó ɔ́, Pɔ́nsu Pilátu ɖo tokpɔngán nyí wɛ ɖo Judée. Elódu ka ɖo tokpɔn Galilée tɔn nu, bɔ nɔví tɔn Filípu ɖo tokpɔn Itulée kpódó Tlakonitídi tɔn kpó nu; Lisaniyási ɖo tokpɔn Abilɛ́nu tɔn nu, bɔ Hanna kpódó Kayífu kpó ɖo vɔ̌sánú-xwlémawutɔ́ ɖaxó nyí wɛ hwenɛ́nu;

³Jǎan gbɔn Judɛ́ɛn tɔ gbé jí, bó nɔ́ ɖɔ nú mɛ lɛ́ɛ ɖɔ: “Mi lɛ́ kɔ sín hwɛ mitɔn lɛ́ɛ gúdo, bó wá lɛ yɛhwesin, nú Mawu ná sɔ́ hwɛ kɛ mi.”

⁴ Énɛ́ ɔ́, nǔ e è wlǎn dó gbeyíɖɔ Mawu tɔn Ezayíi sín wěma mɛ ɔ́ jɛ; é wɛ nyí ɖɔ: “Mɛ ɖé ɖo xó sú wɛ ɖo gbětótló mɛ bó nɔ́ ɖɔ: ‘Mi bló ali ɖó nú Aklúnɔ, mi jlɔ́ ali tɔn lɛ́ɛ!

⁵È ɖǒ ná sú do lɛ́ɛ bǐ, bó ná gbígbá só ɖaxó ɖaxó lɛ́ɛ kpódó kpɛví kpɛví lɛ́ɛ bǐ kpó. È ɖǒ ná jlɔ́ ali gɔ́ndɔ́ngɔ́ndɔ́n lɛ́ɛ, bó bló fí e nyí kpóɖědoɖě lɛ́ɛ ɖó.

⁶Énɛ́ ɔ́, mɛ bǐ ná mɔ Mɛhwlɛ́ngántɔ́ e Mawu sɛ́ dó é.’ ”

⁷ Jǎan nɔ ɖɔ nú mɛ e nɔ nyi ahwan wá yɛhwesin lɛ gbé ɖo gɔ̌n tɔn lɛ́ɛ ɖɔ: “Jakpata kúnkan e mi! Mɛ̌ ká kplɔ́n mi ɖɔ mi ní hɔn nú xomɛsin Mawu tɔn e jǎwe é?

⁸ Mi nú walɔ mitɔn lɛ́ɛ ní ɖe xlɛ́ ɖɔ mi lɛ́ kɔ sín hwɛ mitɔn lɛ́ɛ gúdo nǔgbó; bónú mi ka gɔn ɖiɖɔ dó ayi mɛ ɖɔ: ‘Ablaxámu ɖésú wɛ dó kún mitɔn.’ Đó má ɖɔ nú mi, awǐnnya e mɔ wɛ mi ɖe nɛ́ lɛ́ɛ ɔ́, Mawu hɛn ɔ́, é ná sɔ́ yě dó ɖó vǐ nú Ablaxámu.

⁹ Asyɔ́ví ɖíe ko ɖo atín lɛ́ɛ sín ɖɔ wú e; atín e má nɔ́ ná sínsɛ́n ɖagbe ǎ lɛ́ɛ ɔ́, è nǎ gbo yě, bó bɛ́ kɔn nyi myɔ mɛ.”

¹⁰Mɛ lɛ́ɛ ka nɔ kanbyɔ́ Jǎan ɖɔ: “Ani wɛ mǐ ká ɖó ná wa?”

¹¹Bɔ é yí gbe nú yě ɖɔ: “Ényí mɛɖé ɖo mi mɛ, bó ɖó awu we hǔn, ní ná ɖokpó mɛ e ma ɖó ɖě ǎ é. Mɛ ɖé ká ɖo mi mɛ, bó ɖó nǔ e é ná ɖu é hǔn, ní má xá mɛ e ma ɖó ɖě ǎ é.”

¹² Tokwɛ́yítɔ́ lɛ́ɛ lɔmɔ̌ wá yɛhwesin lɛ gbé, bó kanbyɔ́ Jǎan ɖɔ: “Mɛ̌si, étɛ́ mǐ ɖó ná wa?”

¹³Bɔ é yí gbe nú yě ɖɔ: “Mi ma yí akwɛ́ ɖo mɛ ɖěbǔ sí hú gǎn ée è ɖɔ mi ní yí é ó.”

¹⁴Sɔ́ja ɖé lɛ́ɛ lɔmɔ̌ ka kanbyɔ́ ɛ ɖɔ: “Mǐdɛɛ lɛ́ɛ ká lo? Étɛ́ mǐ ka ɖó ná wa?” É yí gbe nú yě ɖɔ: “Mi ma fán asú mɛɖé bó yí akwɛ́ tɔn ó; mi ma ɖó adingban dó mɛɖé nu ó; azɔ̌kwɛ́ e mi nɔ yí ɔ́ ní kpé mi.”

¹⁵Mɛ e ɖo fínɛ́ lɛ́ɛ bǐ wɛ ká ko ɖo nukúnɖíɖó mɛ, bó nɔ́ ɖo linlin wɛ ɖɔ: “Jǎan wɛ ná kó nyí Klísu ɔ́ ǎ cé?”

¹⁶Jǎan ka yí xó, bó ɖɔ nú yě ɖɔ: “Nyɛ ɔ́, sin wɛ un sɔ́ dó ɖo yɛhwesin lɛ nú mi wɛ; amɔ̌, mɛɖé ɖo gǔdo ce jǎwe; mɛ énɛ́ ɔ́ hú gǎn mì, bɔ un nyí mɛɖé, bó ná sixú tún afɔkpakan tɔn lɛ́ɛ vɔ́vɔ́ ǎ; éyɛ́ ɔ́, Yɛsinsɛn kpódó zo kpán wɛ é ná sɔ́ dó lɛ yɛhwesin nú mi.

¹⁷É hɛn atɛ tɔn alɔ mɛ, bó ná fún jinukún tɔn. É ná bɛ́ jinukún ɔ́ dó kɔ́zún mɛ; wɔn lɛ́ɛ ɔ́, é ná bɛ́ yě kɔn nyi zo e ma nɔ cí gbeɖé ǎ é mɛ.”

¹⁸Mɔ̌ wɛ Jǎan ɖɔ xó gěgé, bó dó dó wǔsyɛ́n lanmɛ nú togun ɔ́, bó dó jlá Wɛn Ɖagbe Mawu tɔn nú yě gbɔn é nɛ́.

¹⁹ Jǎan ka wá dó hwɛ Elódu ɖó Elodiadi nɔví tɔn sín asi ɔ́ kpódó nǔ nyanya e é dó sin lɛ́ɛ kpán wútu.

²⁰Ée Jǎan kɛ nu d'é wú n'i gúdo ɔ́, Elódu ka lɛ́ wá dó nǔ e hú gǎn mɔ̌ é sin: é wlí Jǎan dó gan.

²¹Hwenu e Jǎan lɛ yɛhwesin nú mɛ e wá fínɛ́ lɛ́ɛ bǐ gúdo ɔ́, é wá lɛ nú Jezu lɔmɔ̌. Ée Jezu lɛ yɛhwesin gúdo ɔ́, é jɛ ɖɛ xo jí, bɔ jǐnukúnsin hun,

²²bɔ Yɛsinsɛn sɔ́ ahwannɛ́ sín agbaza, bó jɛ te dó jǐ tɔn. Gbe ɖé ká ɖi sín jǐxwé, bó ɖɔ: “Vǐ vívɛ́ná wɛ a nyǐ nú mì, bɔ xomɛ nɔ hun mì dó wútu towe tlala.”

²³Xwe gban (30) mɔ̌ wɛ Jezu ɖó, hwenu e é jɛ azɔ̌ tɔn jí é. Mɛ lɛ́ɛ nɔ lin ɖɔ Jozɛ́fu ví wɛ é nyí, Jozɛ́fu ka nyí Heli ví,

²⁴bɔ Heli nyí Matati ví, bɔ Matati nyí Levíi ví, bɔ Levíi nyí Mɛluci ví, bɔ Mɛluci nyí Ianáyi ví, bɔ Ianáyi nyí Jozɛ́fu ví,

²⁵bɔ Jozɛ́fu nyí Matatiyási ví, Matatiyási ka nyí Amɔ́si ví, bɔ Amɔ́si nyí Nawúmu ví, bɔ Nawúmu nyí Hɛslí ví, bɔ Hɛslí nyí Nagayi ví,

²⁶Nagayi ka nyí Maatu ví, bɔ Maatu nyí Matatiyási ví, bɔ Matatiyási nyí Semɛ́ɛ ví, bɔ Semɛ́ɛ nyí Iwɔsɛ́ki ví, bɔ Iwɔsɛ́ki nyí Iwɔda ví,

²⁷bɔ Iwɔda nyí Iwɔanáni ví, Iwɔanáni ka nyí Hlesa ví, bɔ Hlesa nyí Zolobabɛ́li ví, Zolobabɛ́li ka nyí Calutiyɛ́li ví, bɔ Calutiyɛ́li nyí Nɛli ví,

²⁸Nɛli ka nyí Mɛluci ví, bɔ Mɛluci nyí Adi ví, bɔ Adi nyí Kɔsamu ví, Kɔsamu nyí Ɛlumadámu ví, bɔ Ɛlumadámu nyí Ɛ́ɛ ví,

²⁹Bɔ Ɛ́ɛ nyí Jezu ví, bɔ Jezu nyí Eliɛsɛ́ɛ ví, bɔ Eliɛsɛ́ɛ ka nyí Iwɔlímu ví, bɔ Iwɔlímu nyí Matati ví, bɔ Matati nyí Levíi ví,

³⁰Levíi ka nyí Simɛnyɔ́ni ví, bɔ Simɛnyɔ́ni nyí Judáa ví, bɔ Judáa nyí Jozɛ́fu ví, bɔ Jozɛ́fu nyí Iwɔnámu ví, bɔ Iwɔnámu nyí Eliakímu ví,

³¹bɔ Eliakímu nyí Mɛlea ví, Mɛlea ka nyí Mɛnína ví, bɔ Mɛnína nyí Matatáa ví, bɔ Matatáa nyí Natáni ví, bɔ Natáni nyí Davídi ví.

³²Davídi ka nyí Jɛsée ví, bɔ Jɛsée nyí Ovɛ́di ví, bɔ Ovɛ́di nyí Bowozi ví, bɔ Bowozi nyí Saluma ví, bɔ Saluma nyí Naxicɔ́ni ví,

³³Naxicɔ́ni ka nyí Aminadabu ví, bɔ Aminadabu nyí Adiminu ví, bɔ Adiminu nyí Aani ví, bɔ Aani nyí Ɛslɔ́ni ví, bɔ Ɛslɔ́ni nyí Pɛlɛ́si ví, bɔ Pɛlɛ́si nyí Judáa ví,

³⁴Judáa ka nyí Jakɔ́bu ví, bɔ Jakɔ́bu nyí Izáki ví, bɔ Izáki nyí Ablaxámu ví, bɔ Ablaxámu nyí Tɛláxi ví, bɔ Tɛláxi nyí Naxɔ́ɔ ví,

³⁵Naxɔ́ɔ ka nyí Selúgi ví, bɔ Selúgi nyí Hlewu ví, Hlewu ka nyí Pɛlɛ́gi ví, bɔ Pɛlɛ́gi nyí Ebɛ́ɛ ví, Ebɛ́ɛ ka nyí Cɛláxi ví,

³⁶bɔ Cɛláxi nyí Kayinamu ví, bɔ Kayinamu nyí Aapakisadu ví, Aapakisadu ka nyí Sɛ́mu ví, bɔ Sɛ́mu nyí Nɔwée ví, bɔ Nɔwée nyí Lamɛki ví,

³⁷Lamɛki ka nyí Matusala ví, bɔ Matusala nyí Henɔci ví, bɔ Henɔci nyí Yɛlɛ́di ví, Yɛlɛ́di ka nyí Maxalalɛ́li ví; Maxalalɛ́li ka nyí Kenáni ví,

³⁸bɔ Kenáni nyí Enɔci ví, Enɔci ka nyí Sɛ́ti ví, bɔ Sɛ́ti nyí Adámu ví, bɔ Adámu nyí Mawu ví.