Read fon Luki 4 Bible Online

Luki 4 - fon bible

Luki 4

¹Jezu lɛ́ kɔ sín Judɛ́ɛn tɔ ɔ́ tó, bɔ Yɛsinsɛn gɔ́ ayi mɛ n'i, bó kplá ɛ yi gbětótló mɛ.

²Fínɛ́ ɔ́, awǒvi tɛ́n ɛ kpɔ́n xɔ azǎn kanɖé (40). Azǎn énɛ́ lɛ́ɛ mɛ ɔ́, é ɖu nǔ ɖěbǔ ǎ, bɔ ée azǎn kanɖé (40) énɛ́ lɛ́ɛ fó ɔ́, xovɛ́ sin i.

³Awǒvi ka ɖɔ n'i ɖɔ: “Ényí Mawu ví jɛ́n a nyǐ nǔgbó hǔn, ɖe gbe dó awǐnnya élɔ́ ní húzú nǔɖuɖu.”

⁴ Jezu ka yí gbe n'i ɖɔ: “É ko wlán dó Mawuxówéma ɔ́ mɛ ɖɔ jí: ‘Nǔɖuɖu kɛ́ɖɛ́ wɛ gbɛtɔ́ nɔ ɖu, bó nɔ́ nɔ gbɛ ǎ.’ ”

⁵Awǒvi ka wá kplá ɛ yi aga fí ɖé, bɔ nukúnxwixwe ɖokpó mɛ ɔ́, é xlɛ́ ɛ axɔ́súɖuto gbɛmɛ fí tɔn lɛ́ɛ bǐ,

⁶lobo ɖɔ n'i ɖɔ: “Un ná ná we to énɛ́ lɛ́ɛ, kpódó dɔkun yětɔn lɛ́ɛ bǐ kpó, ɖó alɔ ce mɛ wɛ è sɔ́ nǔ lɛ́ɛ bǐ dó, bɔ un nɔ ná mɛ e jló mì é.

⁷Nú a ɖe kɔ́ nú mì ɔ́, nǔ énɛ́ lɛ́ɛ bǐ ná nyí towe.”

⁸ Jezu ka yí gbe n'i ɖɔ: “È ko wlán dó Mawuxówéma ɔ́ mɛ ɖɔ jí: ‘Aklúnɔ Mawu towe wɛ a nǎ ɖe kɔ́ ná, lobo ná sɛn é ɖokpónɔ géé.’ ”

⁹Awǒvi ka lɛ́ kplá Jezu yi Jeluzalɛ́mu, bó sɔ́ ɛ ɖó sinsɛnxɔ ɔ́ ta aga ɖéé, bó ɖɔ n'i ɖɔ: “Mawu ví jɛ́n a nyǐ nǔgbó hǔn, lɔ̌n sín fí yi jɛ dodomɛ;

¹⁰ ɖó è ko wlán dó Mawuxówéma ɔ́ mɛ ɖɔ jí: ‘Mawu ná zɔ́n wɛnsagun tɔn lɛ́ɛ ɖɔ yě ní kpé nukún wǔ we.’

¹¹ È ka lɛ́ wlán ɖɔ jí: ‘Yě ná hɛn we dó alɔ mɛ, bónú a ma yi klɛ́n afɔ dó awǐnnya ɖé wú ó.’ ”

¹² Jezu yí gbe n'i ɖɔ: “È lɛ̌ wlán ɖɔ jí: ‘Ma tɛ́n Aklúnɔ Mawu towe kpɔ́n ó.’ ”

¹³Ée awǒvi tɛ́n ɛ kpɔ́n gbɔn ali bǐ nu fó ɔ́, é tó jó e dó hwɛ̌.

¹⁴Jezu lɛ́ kɔ wá yi Galilée, bɔ Yɛsinsɛn sín hlɔ̌nhlɔ́n ɖo kpɔ́ xá ɛ, bɔ nyǐkɔ tɔn gba kpé gbě ɔ́ bǐ jǐ.

¹⁵É nɔ́ ɖo nǔ kplɔ́n mɛ wɛ ɖo kplɔ́ngbasá lɛ́ɛ, bɔ mɛ bǐ nɔ ɖo kpikpa ɛ wɛ.

¹⁶Jezu ka wá Nazalɛ́ti fí e é su ɖe é. É yi kplɔ́ngbasá gbɔjɛzán Jwifu lɛ́ɛ tɔn gbe, lě e é ko nɔ bló gbɔn é. É sí te bó ja Mawuxó xa gbé,

¹⁷bɔ è sɔ́ gbeyíɖɔ Mawu tɔn Ezayíi sín wěma n'i. Ée é vlɔ́n wěma ɔ́ é ɔ́, é mɔ xógbe élɔ́ lɛ́ɛ:

¹⁸ “Yɛ Aklúnɔ tɔn ɖo kpɔ́ xá mì, bɔ Mawu sɔ́ mì nú má yi jlá Wɛn Ɖagbe tɔn wamamɔnɔ lɛ́ɛ; é sɛ́ mì dó, nú má yi ɖɔ nú kannumɔ lɛ́ɛ ɖɔ è jǒ yě; nú má yi ɖɔ nú nukúntíntɔ́nnɔ lɛ́ɛ ɖɔ nukún yětɔn hun, nú má yi hwlɛ́n mɛ e táfú wɛ è ɖe lɛ́ɛ gán.

¹⁹Nú má jlá mɛ bǐ ɖɔ xwe e mɛ Aklúnɔ ná jɔwǔ mɛ dó é wá.”

²⁰É ka mlá wěma ɔ́, bó sɔ́ nú mɛ e nɔ kpé nukún dó kplɔ́ngbasá ɔ́ sín nǔ lɛ́ɛ wú é, lobo jínjɔ́n ayǐ, bó ná kplɔ́n nǔ mɛ. Mɛ e ɖo fínɛ́ lɛ́ɛ bǐ sín nukún ka ɖo jǐ tɔn.

²¹Énɛ́ ɔ́, é jɛ ɖiɖɔ nú yě jí ɖɔ: “Xó e un xa nú mi din ɖo Mawuxówéma ɔ́ mɛ ɔ́ jɛ égbé, hwenu e mi ɖo sise dó wɛ é.”

²²Yě bǐ nɔ ɖe kúnnu ɖagbe n'i, bɔ wǔjɔmɛ xó e nɔ tɔ́n sín nu tɔn mɛ é nɔ́ kpácá yě, bɔ yě nɔ ɖɔ: “Jozɛ́fu ví ɔ́ jɛ́n ka nɛ́ hǔn.”

²³Jezu ka ɖɔ nú yě ɖɔ jí: “Un nywɛ́ dandan ɖɔ mi ná dó lǒ élɔ́ nú mì ɖɔ: ‘Azɔngbɔnúmɛtɔ́, gbɔ azɔn nú hwiɖée. Nǔ tobutóbú e a jlɛ̌ ɖo Kafaanawúmu bɔ mǐ se ɔ́, jlɛ̌ ɖě ɖo to towe mɛ fí.’ ”

²⁴ Énɛ́ ɔ́, Jezu lɛ́ ɖɔ nú yě ɖɔ: “Má ɖɔ nǔgbó nú mi: è nɔ yí gbeyíɖɔ Mawu tɔn ɖé ganjí ɖo to tɔn mɛ ǎ.

²⁵ Má ɖɔ nǔgbó nú mi: ɖo gbeyíɖɔ Mawu tɔn Elíi hwenu ɔ́, akú ɖó xɔ xwe atɔn adaɖé ɖo Izlayɛ́li, bɔ adɔ ɖaxó ɖé tɔ́n gbɔn to ɔ́ bǐ mɛ.

²⁶ Asúkúsi gěgé ka ɖo Izlayɛ́li hwe énɛ́ ɔ́ nu, có Mawu ka sɛ́ Elíi dó ɖokpó yětɔn gɔ́n ǎ; é nyɔ́ wa ɔ́, asúkúsi e ɖo Salɛpúta, ɖo Sidɔ́ɔn yíkúngban jí ɔ́ gɔ́n wɛ Mawu sɛ́ ɛ dó.

²⁷ Mɔ̌ ɖokpó ɔ́, ɖo gbeyíɖɔ Mawu tɔn Elizée hwenu ɔ́, mɛ gěgé ɖo guduzɔn jɛ wɛ ɖo Izlayɛ́li, có azɔn gbɔ nú ɖokpó yětɔn ǎ; Naamáni Silíinu ɔ́ kɛ́ɖɛ́ sín azɔn wɛ gbɔ.”

²⁸Đěe yě se mɔ̌ ɔ́, xomɛ sin yě bǐ ɖo kplɔ́ngbasá ɔ́,

²⁹bɔ yě sí te, bó dɔn ɛ yi to ɔ́ gúdo, bó kplá ɛ yi só e jí to yětɔn ɖe é ta aga ɖéé, bó ná kpíkpé e nyi dodomɛ.

³⁰Jezu ka gbɔn tɛ́ntin yětɔn, bó ɖidó.

³¹Jezu yi Kafaanawúmu ɖo Galilée yíkúngban jí, bó ɖo nǔ kplɔ́n mɛ lɛ́ɛ wɛ gbɔjɛzán Jwifu lɛ́ɛ tɔn gbe.

³² Nǔkplɔ́nmɛ tɔn kpácá mɛ e ɖo tó ɖó e wɛ lɛ́ɛ bǐ, ɖó é nɔ́ ɖɔ xó kpódó acɛkpikpa kpó.

³³Dǎwe ɖé ka ɖo kplɔ́ngbasá ɔ́ hwenɛ́nu, bɔ yɛ nyanya ɖo jǐ tɔn. Dǎwe ɔ́ sú xó tlílí bó ɖɔ:

³⁴“Yěege! Étɛ́ mǐ kpó hwi kpó ká kpédó, Jezu Nazalɛ́tinu? Kún mǐtɔn sú dó gbé wɛ a ja bó wá a? Un tunwun mɛ e a nyǐ é; mɛ mímɛ́ Mawu tɔ́n wɛ a nyǐ.”

³⁵Jezu ka ɖe gbe dó e ɖɔ: “Nɔ abwɛ̌, bó gosín dǎwe élɔ́ jí.” Yɛ nyanya ɔ́ ka zin dǎwe ɔ́ dɛ́ ɖo mɛ bǐ nukún mɛ, bó gosín jǐ tɔn, nǔ ɖěbǔ ka wa dǎwe ɔ́ ǎ.

³⁶É kpácá yě bǐ, bɔ yě nɔ́ kanbyɔ́ yěɖée ɖɔ jí: “Xó tɛ́ ká ɖíe? É nɔ́ ɖe gbe dó yɛ nyanya lɛ́ɛ, kpódó acɛkpikpa kpó, kpódó hlɔ̌nhlɔ́n kpó, bɔ yě nɔ́ se gbe n'i.”

³⁷Bɔ Jezu sín nyǐkɔ gba kpé gbě énɛ́ ɔ́ bǐ jǐ.

³⁸Jezu tɔ́n sín kplɔ́ngbasá ɔ́, bó yi Sinmɔ́ɔ sín xwé gbe. Avivɔ ɖaxó ɖé ká ɖo Sinmɔ́ɔ sín asinɔ jí hwenɛ́nu, bɔ yě ɖɔ xó tɔn nú Jezu.

³⁹Jezu ka sɛkpɔ́ azinzɔnnɔ ɔ́, bó ɖe gbe dó avivɔ ɔ́, bɔ avivɔ ɔ́ kɔ́n n'i, bɔ é sí te azɔn ɖokpó, bó jɛ jǒnɔ yětɔn yí jí.

⁴⁰Ée hwe yi xɔ ɔ́, mɛ e sín mɛ ɖo azɔn tɛnmɛ tɛnmɛ jɛ wɛ lɛ́ɛ kplá azinzɔnnɔ yětɔn lɛ́ɛ wá nú Jezu, bɔ é ɖó alɔ yě wú ɖokpó ɖokpó, bó gbɔ azɔn nú yě.

⁴¹Yɛ nyanya lɛ́ɛ lɔmɔ̌ gosín mɛ gěgé jí, bó nɔ́ sú xó ɖɔ: “Mawu ví wɛ a nyǐ.” Lo ɔ́, Jezu nɔ wa adǎn dó yě, bó nɔ́ lɔn nú yě ní ɖɔ xó ǎ, ɖó yě tunwun ɖɔ é wɛ nyí Klísu ɔ́.

⁴²Ée ayǐ hɔ́n tlóló ɔ́, Jezu tɔ́n yi fí e mɛɖé má ná dó tagba n'i ɖe ǎ é. Mɛ lɛ́ɛ ka jɛ biba ɛ jí. Ée yě wá mɔ ɛ ɔ́, yě hɛn ɛ ɖó te nú é má gosín yě gɔ̌n ó.

⁴³É ka ɖɔ nú yě ɖɔ: “Axɔ́súɖuɖu Mawu tɔn ɔ́, un ɖó ná yi jlá Wɛn Ɖagbe tɔn to ɖě lɛ́ɛ lɔmɔ̌, ɖó nǔ è wú wɛ è sɛ́ mì dó ɔ́ nɛ́.”

⁴⁴É ka nɔ ɖo Mawuxó jlá wɛ gbɔn kplɔ́ngbasá lɛ́ɛ, ɖo Judée yíkúngban jí.