Read fon Luki 6 Bible Online

Luki 6 - fon bible

Luki 6

¹ É wá su gbɔjɛzán Jwifu lɛ́ɛ tɔn gbe gbe ɖokpó, bɔ Jezu ɖo jinukúngle ɖé mɛ gbɔn dín wɛ é kpódó ahwanvú tɔn lɛ́ɛ kpán. Ée yě ɖo yiyi wɛ ɔ́, ahwanvú tɔn lɛ́ɛ jɛ jinukún lɛ́ɛ ba jí, bó nɔ́ nyínyɛ́, lobo nɔ ɖu.

²Falizyɛn ɖé lɛ́ɛ ka mɔ yě, bó kanbyɔ́ yě ɖɔ: “Étɛ́wú mi ka ɖo nǔ e sɛ́n ɔ́ gbɛ́ ɖɔ è ma wa gbɔjɛzán gbe ó ɔ́ wa wɛ?”

³ Jezu ka yí gbe nú yě ɖɔ: “Nǔ e Davídi wa hwenu e xovɛ́ sin é kpódó mɛ e kpó é kpó zɔn lɛ́ɛ kpán ɔ́, mi mɔ xa kpɔ́n gbeɖé ǎ cé? É byɔ́ sinsɛnxɔ mɛ, lobɔ wɔ̌xúxú e è sɔ́ xwlé Mawu, bɔ ɖo sɛ́n ɔ́ mɛ ɔ́ mɛɖé ma ɖó ná ɖu zɛ vɔ̌sánú-xwlémawutɔ́ lɛ́ɛ wú ǎ ɔ́, é sɔ́, bó ɖu, lobo lɛ́ ná ahwan tɔn lɛ́ɛ, bɔ yě ɖu.”

⁴

⁵Jezu ka lɛ́ ɖɔ nú yě ɖɔ: “Nyɛ Gbɛtɔ́ví ɔ́ wɛ kpa acɛ dó gbɔjɛzán ɔ́ nu.”

⁶É wá su gbɔjɛzán gbe ɖěvo, bɔ Jezu yi kplɔ́ngbasá, bó ɖo nǔ kplɔ́n mɛ wɛ. Nya ɖé ká ɖo fínɛ́, bɔ alɔ tɔn ɖisí ɔ́ kú.

⁷Sɛ́nkplɔ́nmɛtɔ́ lɛ́ɛ kpódó Falizyɛn lɛ́ɛ kpó ká jɛ Jezu cɔ́ jí ɖɔ é ná gbɔ azɔn nú mɛ gbɔjɛzán gbe wɛ a jí, bó ná mɔ nǔ e wú yě ná ɖó dó, bó ná sixú ɖó hwɛ n'i é.

⁸Lo ɔ́, Jezu ka tunwun nǔ e lin wɛ yě ɖe ɔ́, bó ɖɔ nú nya alɔkúnánɔ ɔ́ ɖɔ: “Sí te, bó wá jɛ tɛ́ntin fí.” Bɔ nya ɔ́ sí te, bó wá nɔ te ɖo tɛ́ntin yětɔn.

⁹Bɔ Jezu ɖɔ nú mɛ lɛ́ɛ ɖɔ: “Sɛ́n mǐtɔn ná gbe ɖɔ è nǐ wa ɖagbe abǐ nyanya gbɔjɛzán gbe a? Mɛ wɛ sɛ́n ɔ́ ɖɔ è nǐ hwlɛ́n gán a, abǐ è nǐ hu mɛ?”

¹⁰É kpɔ́n yě bǐ xaan lɛ́ dó, bó ɖɔ nú nya ɔ́ ɖɔ: “Dlɛ̌n alɔ towe.” Bɔ nya ɔ́ dlɛ́n alɔ, bɔ alɔ ɔ́ jɛ tɛn tɔn mɛ.

¹¹Xomɛ ka sin yě tlala, bɔ yě jɛ wě ɖe dó nǔ e yě ná wa xá Jezu ɔ́ wú jí.

¹²Jezu yi ɖɛ xo gbé gbe ɖokpó ɖo só ɖé jí, bó xo ɖɛ zǎn mɛ káká bɔ ayǐ hɔ́n.

¹³Ée ayǐ wá hɔ́n ɔ́, é ylɔ́ ahwanvú tɔn lɛ́ɛ, bó cyán mɛ wěwe ɖo yě mɛ, bó sun nyǐ yě ɖɔ mɛsɛ́dó:

¹⁴Yě mɛ e é cyán lɛ́ɛ ɖíe: Sinmɔ́ɔ e è sun nyǐ ɖɔ Piyɛ́ɛ é, Andlé Piyɛ́ɛ nɔví ɔ́, Jaki, Jǎan, Filípu, Baatelemíi,

¹⁵Matíe, Tɔmáa, Jaki Alufée ví ɔ́, Sinmɔ́ɔ hunjɛdótojítɔ́[1] ɔ́,

¹⁶Judáa Jaki ví ɔ́, kpódó Judási Isikaliɔ́ti e wá sa Jezu é kpán.

¹⁷Jezu kpódó mɛ e é cyán lɛ́ɛ kpó jɛ te sín só ɔ́ jí wá ayǐkúngban wɛnjɛ jí. Ahwanvú tɔn wɔ̌buwɔ́bú ɖé lɛ́ɛ ɖo fínɛ́, bɔ mɛ gěgé gosín Judée, bó gosín Jeluzalɛ́mu, lobo gosín xutó, ɖo Tíi kpódó Sidɔ́ɔn kpán gbé jí,

¹⁸bó wá ja tó ɖó e gbé, bónú é ná gbɔ azɔn yětɔn lɛ́ɛ nú yě, bɔ mɛ e yɛ nyanya lɛ́ɛ ɖo tagba dó ná wɛ lɛ́ɛ ɔ́, é gbɔ azɔn nú yě.

¹⁹Mɛ lɛ́ɛ bǐ nɔ́ ba ná ɖó alɔ wǔ tɔn, ɖó hlɔ̌nhlɔ́n ɖé nɔ tɔ́n sín lan tɔn mɛ, bó nɔ́ gbɔ azɔn nú yě mɛ bǐ.

²⁰Jezu ka nyi kɔ kpɔ́n ahwanvú tɔn lɛ́ɛ, bó ɖɔ nú yě ɖɔ: “Nǔ nyɔ́ nú mi mɛ e nyí wamamɔnɔ lɛ́ɛ, ɖó midɛɛ lɛ́ɛ jí wɛ Mawu ná ɖu axɔ́sú ɖe.

²¹Nǔ nyɔ́ nú mi mɛ e xovɛ́ ɖo sinsin wɛ din lɛ́ɛ é, ɖó mi ná gɔ́ xo. Nǔ nyɔ́ nú mi mɛ e ɖo avǐ ya wɛ din lɛ́ɛ é, ɖó mi ná ko nǔ.

²² “Nǔ ná nyɔ́ nú mi hwenu e gbɛtɔ́ lɛ́ɛ ná gbɛ́ wǎn nú mi, bó ná gbɛ́ mi, bó ná nɔ́ ɖo mi zun wɛ, bó ná nɔ́ mɔ mi dó mɔ mɛ nyanya ná ɖó nyɛ Gbɛtɔ́ví ɔ́ wútu é.

²³ Mi j'awǎ gbe nɛ́ gbe, bó lɔ́n yi jǐ kpódó xomɛhunhun kpó, ɖó ajɔ mitɔn d'agba ɖo Mawu gɔ́n. Mɔ̌ wɛ tɔ́gbó yětɔn lɛ́ɛ kó wa gbɔn xá gbeyíɖɔ Mawu tɔn lɛ́ɛ é nɛ́.

²⁴Amɔ̌, heelú mi dɔkunnɔ lɛ́ɛ, ɖó mi ko mɔ nyɔ̌ná mitɔn!

²⁵Heelú mi mɛ e ɖu nǔ gɔ́ xo din lɛ́ɛ é, ɖó xovɛ́ ná wá sin mi! Heelú mi mɛ e ɖo nǔ ko wɛ din lɛ́ɛ é, ɖó mi ná wá nɔ aluwɛ mɛ, bó ná ya avǐ!

²⁶Heelú mi hwenu e gbɛtɔ́ lɛ́ɛ bǐ ɖo nǔ mitɔn ɖagbe ɖɔ wɛ é, ɖó mɔ̌ wɛ tɔ́gbó yětɔn lɛ́ɛ ko bló gbɔn nú mɛ e nɔ ylɔ́ yěɖée ɖɔ gbeyíɖɔ Mawu tɔn lɛ́ɛ é nɛ́!”

²⁷“Má ka ɖɔ nú mi mɛ e ɖo tó ɖó mì wɛ lɛ́ɛ é: Mi yí wǎn nú kɛntɔ́ mitɔn lɛ́ɛ; mi wa ɖagbe nú mɛ e gbɛ́ wǎn nú mi lɛ́ɛ.

²⁸Mi xo ɖɛ ɖagbe nú mɛ e nɔ dó nu mi lɛ́ɛ, bó xo ɖɛ ɖagbe nú mɛ e nɔ dó ya nú mi lɛ́ɛ.

²⁹Nú mɛɖé xo tómɛ nú we dó alɔ ɖé xwé hǔn, lǐlɛ́ ɖě ɔ́ n'i; mɛɖé ka hú gǎn we bó yí awu towe ɖaxó ɔ́ hǔn, ma ɖɔ émí ná hwlɛ́n do tɔn ɔ́ xá ɛ ó.

³⁰Mɛ ɖé byɔ́ nǔ we hǔn, nǎ ɛ; mɛɖé klá jɛ dɔkun towe nu hǔn, ma sɔ́ kanbyɔ́ ó.

³¹ Nǔ e mi jló ɖɔ gbɛtɔ́ lɛ́ɛ ní wa nú mi é wɛ mi ná wa nú yě lɔmɔ̌.

³²“Ényí mɛ e yí wǎn nú mi lɛ́ɛ jɛ́n mi nɔ yí wǎn ná ɔ́, nǔgɛ́n tɛ́ mi ka wa, bɔ è nǎ tunwun nú mi? Đó mɛ e ma nɔ nyi Mawusɛ́n ǎ lɛ́ɛ lɔ nɔ yí wǎn nú mɛ e nɔ yí wǎn nú yě lɛ́ɛ.

³³Ényí mɛ e nɔ wa ɖagbe nú mi lɛ́ɛ jɛ́n mi nɔ wa ɖagbe ná ɔ́, nǔgɛ́n tɛ́ wa wɛ mi ka ɖe, bɔ è nǎ tunwun nú mi? Mɛ e ma nɔ xwedó Mawusɛ́n ǎ lɛ́ɛ lɔ nɔ wa mɔ̌.

³⁴Ényí mɛ e sí mi ná lɛ́ wá mɔ nǔ mitɔn yí ɖe ɔ́ jɛ́n mi nɔ hwé nǔ ná ɔ́, nǔgɛ́n tɛ́ mi ka wa, bɔ è nǎ tunwun nú mi? Mɛ e ma nɔ nyi Mawusɛ́n ǎ lɛ́ɛ lɔ nɔ hwé nǔ nú gbɛ̌ yětɔn lɛ́ɛ, bó ná wá mɔ mɔ̌hunkɔtɔn yí ɖo yě sí.

³⁵Lo ɔ́, mi yí wǎn nú kɛntɔ́ mitɔn lɛ́ɛ, bó nɔ́ wa ɖagbe nú yě, bó nɔ́ hwé nǔ nú mɛ, mi ma ka ɖó nukún tɔn ɖɔ émí ná lɛ́ wá mɔ yí ó, énɛ́ ɔ́, ajɔ mitɔn ná tlí, bɔ mi ná nyí Mawu Ajalɔ̌nlɔn ví; ɖó Mawu nɔ́ nyɔ́ xomɛ dó alɔgúdokpɛ́dónúmɛtɔ́ lɛ́ɛ kpódó mɛdídá lɛ́ɛ kpán wú.

³⁶Mi nɔ kú nǔbláwǔ nú mɛ, lě e Mawu Tɔ́ mitɔn nɔ kú nǔbláwǔ nú mɛ gbɔn é.”

³⁷“Mi ma ɖɔ hwɛ xá mɛɖé ó, énɛ́ ɔ́, Mawu ná ɖɔ hwɛ xá mi lɔmɔ̌ ǎ; mi ma ɖó hwɛ nú mɛɖé ó, énɛ́ ɔ́, Mawu ná ɖó hwɛ nú mi lɔmɔ̌ ǎ. Mi sɔ́ hwɛ kɛ mɛ, énɛ́ ɔ́, Mawu ná sɔ́ hwɛ kɛ mi lɔmɔ̌.

³⁸Mi ná nǔ mɛ, énɛ́ ɔ́, Mawu ná ná nǔ mi lɔmɔ̌. É ka wá ja mitɔn ɔ́ ná mi gbé ɔ́, é ná jlɛ́ ganjí, bó ná húnhún, bó ná zín, bɔ é ná túnflá, bɔ é ná sɔ́ dó así nú mi; ɖó nǔ e mi dó jlɛ́ nǔ nú mɛ ɔ́ wɛ Mawu ná dó jlɛ́ nú mi lɔmɔ̌.”

³⁹ Jezu ka lɛ́ wá dó lǒ nú yě ɖɔ jí: “Nukúntíntɔ́nnɔ ɖě nɔ sixú xlɛ́ ali ɖě ɔ́ a? Yě mɛ we lɛ́ɛ ná yi jɛ do mɛ ǎ cé?

⁴⁰ Nǔkplɔ́ntɔ́ nɔ́ hú gǎn mɛ̌si tɔn ǎ; nǔkplɔ́ntɔ́ ɖé ká kplɔ́n nǔ ganjí ɔ́, mɛ̌si tɔn ɖɔhun wɛ é ná cí.”

⁴¹“Nɛ̌ ká gbɔn bɔ a nɔ mɔ nǔywɛ́ e ɖo nɔví towe sín nukún jí ɔ́, bó ma ka nɔ mɔ atínkpo e ɖo towe jí é ǎ?

⁴²Hwi mɛ e ma ɖo atínkpo e ɖo nukún towe jí é mɔ wɛ ǎ ɔ́, nɛ̌ wɛ a ka sixú ɖɔ nú nɔví towe ɖɔ: ‘Nɔví ce, gbɔ nú ma ɖe nǔywɛ́ e ɖo nukún towe jí ɔ́ sín i nú we’ gbɔn? Yɛmɛnúwatɔ́, vɛ̌ to ɖe atínkpo sín nukún jí nú hwiɖée hwɛ̌; énɛ́ ɔ́, a nǎ mɔ nukúnnú, bó sixú ɖe nǔywɛ́ e ɖo nukún jí nú nɔví towe ɔ́ sín i.”

⁴³“Atín ɖagbe ɖé nɔ ná sínsɛ́n nyanya ǎ, mɔ̌ jɛ́n atín nyanya ɖé má ka nɔ́ ná sínsɛ́n ɖagbe ǎ é nɛ́.

⁴⁴Đó nǔ e atín ɖokpó ɖokpó nyí ɔ́, sínsɛ́n tɔn wɛ nɔ ɖe xlɛ́. È nɔ gbɛ yovózɛn ɖo kpɔvɛwun jí ǎ; è ka nɔ gbɛ vǐwun ɖo xɛ́tín jí ǎ.

⁴⁵ Gbɛtɔ́ ɖagbe ɔ́, nǔ ɖagbe wɛ é nɔ ɖe tɔ́n sín nǔ ɖagbe e ɖo ayi tɔn mɛ é mɛ. Gbɛtɔ́ nyanya ka nɔ ɖe nǔ nyanya tɔ́n sín nǔ nyanya e ɖo ayi tɔn mɛ é mɛ; ɖó nǔ e gɔ́ ayi mɛtɔn mɛ ɔ́ wɛ nu nɔ ɖɔ.”

⁴⁶“Aniwú mi nɔ ylɔ́ mì ɖɔ ‘Aklúnɔ, Aklúnɔ’, bó má ká nɔ́ wa nǔ e un ɖɔ lɛ́ɛ ǎ?

⁴⁷Mɛɖěbǔ wá gɔ̌n ce, bó ɖótó xó ce, bó bló ɖ'é jí ɔ́, un ná xlɛ́ mɛ e wú è nǎ jlɛ́ ɛ dó ɔ́ mi.

⁴⁸È nǎ jlɛ́ ɛ dó nya ɖé wú, bɔ é ja xɔ mɛ gbé, bó kun do káká bó yi mɔ awǐnnya, bó dó xɔ ɔ́ do dó awǐnnya ɔ́ jí. Tɔ wá ɖi sin, bó sa yi gba dó xɔ ɔ́ wú, xɔ ɔ́ ka dán wǔ ǎ, ɖó é mɛ ganjí.

⁴⁹Amɔ̌, mɛ e ɖótó xó ce, bó ma bló ɖ'é jí ǎ ɔ́ cí nya e mɛ xɔ nyi ayǐkúngban jí ma kun do, cóbó dó xɔ ɔ́ do ǎ ɔ́ ɖɔhun; ayǐsun wá sa yi gba dó xɔ ɔ́ wú, bɔ tlóló jɛ́n xɔ ɔ́ mu, bó hánnyá bǐ.”