Read fon Luki 7 Bible Online

Luki 7 - fon bible

Luki 7

¹Ée Jezu ɖɔ xó énɛ́ lɛ́ɛ bǐ nú mɛ e ɖo tó ɖó e wɛ lɛ́ɛ vɔ ɔ́, é yi Kafaanawúmu.

²Đo fínɛ́ ɔ́, sɔ́ja kanwekogán Hlɔ̌ma tomɛ tɔn ɖé ka ɖó mɛsɛntɔ́ vívɛ́ná ɖokpó, bɔ mɛsɛntɔ́ ɔ́ ɖo azɔn jɛ wɛ, bó ɖo kúdonu.

³Ée è ɖɔ Jezu sín xó bɔ é se ɔ́, é sɛ́ tomɛxó Judée tɔn ɖé lɛ́ɛ dó gɔ̌n tɔn, nú yě ní sa vo n'i ɖɔ ní kɛnklɛ́n bó wá hwlɛ́n mɛsɛntɔ́ émítɔn.

⁴Ée yě wá Jezu gɔ́n ɔ́, yě sa vo n'i ɖaxó ɖɔ jí: “É jɛ xá ɖɔ a nǐ ná ɛ nǔ e byɔ́ wɛ é ɖe ɔ́,

⁵ɖó é yí wǎn nú akɔta mǐtɔn; é wɛ gbá kplɔ́ngbasá mǐtɔn nú mǐ.”

⁶Jezu ka xwedó yě, bó kó sɛ yá xwé ɔ́, bɔ sɔ́ja kanwekogán ɔ́ sɛ́ xɔ́ntɔn tɔn ɖé lɛ́ɛ dó, nú yě yi ɖɔ n'i ɖɔ: “Aklúnɔ, ma xaji jɛ tagba ó, ɖó un nyí mɛɖé nú a nǎ wá xwé ce gbe ǎ.

⁷Énɛ́ ɔ́ wú wɛ un mɔ ɖɔ un kún nyí mɛɖé, bó sixú wá gɔ̌n towe ó. Bo kɛ nu ɖokpó kpowun, bónú azɔn ná gbɔ nú mɛsɛntɔ́ ce.

⁸Đó nyɛ ɖésúnɔ ɔ́, mɛɖomɛglɔ́ wɛ nú mì, bɔ sɔ́ja ka ɖo acɛ ce mɛ; un ɖɔ nú mɛ ɖě ɖɔ: ‘Yi’ ɔ́, é nɔ́ yi; un ɖɔ nú mɛ ɖěvo ɖɔ: ‘Wǎ’ ɔ́, é nɔ wá; un ka ɖɔ nú mɛsɛntɔ́ ce ɖɔ: ‘Blǒ lě’ ɔ́, é nɔ́ bló.”

⁹Ée Jezu se xó énɛ́ lɛ́ɛ ɔ́, sɔ́ja kanwekogán ɔ́ sín nǔ nyɔ́ nukún tɔn mɛ káká, bɔ é lílɛ́ kpan nukɔn ahwan e xwedó e ɔ́, bó ɖɔ nú yě ɖɔ: “Ma ɖɔ nú mi, ɖo Izlayɛ́li ɖésú ɔ́, un mɔ mɛɖé, bɔ é ɖó nǔɖiɖi lěhunkɔtɔn ǎ.”

¹⁰Ée mɛ e sɔ́ja kanwekogán ɔ́ sɛ́ dó lɛ́ɛ lɛ́ kɔ wá yi xwé ɔ́, yě mɔ mɛsɛntɔ́ ɔ́, bɔ azɔn ko gbɔ n'i bǐ sésé.

¹¹Énɛ́ gúdo ɔ́, Jezu wá xwe to e è nɔ ylɔ́ ɖɔ Nayinu é mɛ. Ahwanvú tɔn lɛ́ɛ kpódó mɛ gěgé ɖěvo lɛ́ɛ kpó ka zɔn xá ɛ.

¹²Hwenu e é wá ja to ɔ́ hɔn nukɔn jɛ gbé ɔ́, é mɔ è xwe cyɔ ɖé ɖi gbé, bɔ é nyí vǐɖokpónɔ asúkúsi ɖé tɔn, bɔ to ɔ́ mɛ nu lɛ́ɛ gěgé nyi ahwan xwedó asúkúsi ɔ́.

¹³Ée Aklúnɔ mɔ asúkúsi ɔ́ é ɔ́, nǔ tɔn blá wǔ n'i, bɔ é ɖɔ n'i ɖɔ: “Ma sɔ́ ya avǐ ɖě ó.”

¹⁴Jezu ka sɛ yá nǔ e jí è sɔ́ cyɔ ɔ́ mlɔ́ é, bó ɖó alɔ wú, bɔ mɛ e hɛn cyɔ ɔ́ lɛ́ɛ nɔ te. Jezu ka ɖɔ: “Dɔ̌nkpɛvú, sí te, un ɖe gbe tɔn nú we.”

¹⁵Dɔ̌nkpɛvú e kú ɔ́ ka fɔ́n jínjɔ́n ayǐ, bó jɛ xó ɖɔ jí, bɔ Jezu ɖɔ nú nɔ tɔn ɖɔ: “Vǐ towe ɖíe.”

¹⁶Xɛsi jɛ mɛ lɛ́ɛ bǐ jí, bɔ yě nɔ kpa susu nú Mawu, bó nɔ́ ɖɔ: “Gbeyíɖɔ Mawu tɔn ɖaxó ɖokpó ɖíe tɔ́n ɖo mǐ mɛ e; Mawu wá ba togun tɔn kpɔ́n.”

¹⁷Nǔ énɛ́ e Jezu wa ɔ́ sín xó gba kpé Judée gbé ɔ́ bǐ jǐ, bó lɛ́ gba kpé to e lɛ́ lɛ̌ dó e lɛ́ɛ bǐ mɛ.

¹⁸Jǎan sín ahwanvú lɛ́ɛ wlí nǔ énɛ́ lɛ́ɛ bǐ sésé ɖɔ n'i; é ka ylɔ́ mɛ we ɖo yě mɛ,

¹⁹bó sɛ́ yě dó Aklúnɔ gɔ́n, nú yě yi kanbyɔ́ ɛ ɖɔ: “Hwi wɛ nyí mɛ e ɖó ná wá, bɔ mǐ ɖo te kpɔ́n é a, abǐ mɛ ɖěvo wɛ mǐ ná nɔ te kpɔ́n?”

²⁰Ée yě yi gɔ̌n tɔn ɔ́, yě ɖɔ n'i ɖɔ: “Jǎan Yɛhwesinlɛnúmɛtɔ́ wɛ sɛ́ mǐ dó, bónú mǐ ná wá kanbyɔ́ we ɖɔ: ‘Hwi wɛ nyí mɛ e mǐ ɖo te kpɔ́n bɔ é ná wá é a, abǐ mɛ ɖěvo wɛ mǐ ná nɔ te kpɔ́n?’ ”

²¹Hwenɛ́nu ɔ́, Jezu ka gbɔ azɔn nú mɛ gěgé; é gbɔ azɔn nú mɛ e ɖo wǔvɛ́ mɔ wɛ lɛ́ɛ, bó nya yɛ nyanya sín mɛ gěgé jí, lobo hun nukún nú nukúntíntɔ́nnɔ gěgé.

²² É yí gbe nú mɛ e Jǎan sɛ́ dó lɛ́ɛ ɖɔ: “Mi yi ɖɔ nǔ e mi se lɛ́ɛ kpódó nǔ e mi mɔ lɛ́ɛ kpó nú Jǎan: nukúntíntɔ́nnɔ lɛ́ɛ ɖo nukúnnú mɔ wɛ, sékúnɔ lɛ́ɛ ɖo zɔnlin ɖi wɛ, gudunɔ lɛ́ɛ sín wǔtu ɖo te jɛ wɛ, tókúnɔ lɛ́ɛ ɖo nǔ se wɛ, è ɖo mɛkúkú lɛ́ɛ fɔ́n wá gbɛ wɛ, bó ɖo Wɛn Ɖagbe Mawu tɔn jlá wamamɔnɔ lɛ́ɛ wɛ.

²³Nǔ nyɔ́ nú mɛ e sín nǔɖiɖi ma ná jɛ ayǐ ɖó nyɛ wútu ǎ lɛ́ɛ.”

²⁴Ée wɛnsagun Jǎan tɔn lɛ́ɛ ka lɛ́ kɔ ɖidó ɔ́, Jezu jɛ Jǎan xó ɖɔ nú togun ɔ́ jí ɖɔ: “Ani mi ka yi kpɔ́n ɖo gbětótló mɛ? Fántín ɖé wɛ mi mɔ bɔ jɔhɔn ɖo dǐndán wɛ a? Éeǒ.

²⁵Étɛ́ mi ka tɔ́n bó yi kpɔ́n? Mɛ ɖé wɛ bó dó awu xɔ akwɛ́ a? Éɖíe mɛ e nɔ dó awu xɔ akwɛ́, bó nɔ́ ɖo gbɛ ɖu wɛ lɛ́ɛ ɔ́, hɔnmɛ wɛ yě nɔ́ nɔ e.

²⁶Ani wɛ mi ka yi kpɔ́n? Gbeyíɖɔ Mawu tɔn ɖé wɛ a? Ɛɛn! Ma ɖɔ nú mi, mɛ e hú gbeyíɖɔ Mawu tɔn ɔ́ wɛ.

²⁷ Jǎan wɛ nyí mɛ e xó ɖɔ wɛ Mawuxówéma ɖe ɔ́, bó ɖɔ: ‘Wɛnsagun ce ɖíe un sɛ́ dó e, é ná jɛ nukɔn nú we, bó ná bló ali ɖó nú we.’ ”

²⁸Má ɖɔ nǔgbó nú mi: “Mɛ e tɔ́n sín nyɔ̌nu xo mɛ lɛ́ɛ ɔ́, ɖěbǔ hú gǎn Jǎan Yɛhwesinlɛnúmɛtɔ́ ǎ; é ka ɖo mɔ̌ có mɛ e hwe hú mɛ bǐ ɖo axɔ́súɖuɖu Mawu tɔn mɛ ɔ́ hú gǎn Jǎan.

²⁹ Togun ɔ́ bǐ kpódó tokwɛ́yítɔ́ e Jǎan lɛ yɛhwesin ná lɛ́ɛ kpó se xó ɔ́, bó mɔ ɖɔ hwɛjijɔnɔ wɛ nyí Mawu.

³⁰Lo ɔ́, Falizyɛn lɛ́ɛ kpódó sɛ́nkplɔ́nmɛtɔ́ lɛ́ɛ kpán ka gbɛ́ nǔ e Mawu jló nú yě é, lobo lɔn nú Jǎan lɛ yɛhwesin nú yě ǎ.”

³¹Jezu lɛ́ ɖɔ: “Mɛ̌ wú wɛ un ka ná jlɛ́ gbɛtɔ́ din tɔn lɛ́ɛ dó? Mɛ̌ wɛ yě ɖi?

³²Yě ɖi yɔkpɔ́vú e nɔ jínjɔ́n tokplétɛn bó nɔ́ ɖo ɖiɖɔ sɛ́ dó gbɛ̌ yětɔn ɖě lɛ́ɛ wɛ ɖɔ: ‘Mǐ kún kpete dó ji awǎjijɛ han, bɔ mi gbɛ́ we ɖú; mǐ ji nǔwamɛ han, bɔ mi gbɛ́ avǐ ya.’

³³Đó Jǎan Yɛhwesinlɛnúmɛtɔ́ wá, é nɔ ɖu nǔ ǎ, é ka nɔ nu vɛ̌ɛn ǎ, bɔ mi nɔ ɖɔ: ‘Yɛ nyanya wɛ ɖo jǐ tɔn.’

³⁴Nyɛ Gbɛtɔ́ví ɔ́ ká wá, bó nɔ́ ɖu nǔ, bó nɔ́ nu vɛ̌ɛn, bɔ mi ɖɔ: ‘Nya élɔ́ ɔ́, adɔtɔ́nɔ wɛ, vɛ̌ɛnnutɔ́ wɛ, tokwɛ́yítɔ́ lɛ́ɛ kpódó gbɛnyanyazántɔ́ lɛ́ɛ kpó sín xɔ́ntɔn wɛ.’

³⁵Lo ɔ́, mɛ e nyí nǔnywɛ́ ví lɛ́ɛ nɔ́ gbo gbě nú nǔnywɛ́.”

³⁶Falizyɛn ɖé ka wá ylɔ́ Jezu ɖɔ é ní wá ɖu nǔ ɖo émí gɔ́n. Jezu ka yi Falizyɛn ɔ́ xwé, bó sɔ́ tɛnmɛ, bó ná ɖu nǔ.

³⁷ Nyɔ̌nu gbɛnyanyazántɔ́ ɖé ka ɖo to ɔ́ mɛ; ée é se ɖɔ Jezu ɖo nǔ ɖu wɛ ɖo Falizyɛn ɔ́ xwé ɔ́, é hɛn célu wǎnɖagbenɔ go ɖokpó wá. Awǐnnya e è nɔ ylɔ́ ɖɔ alubatlu ɔ́ wɛ è dǒ bló go ɔ́ ná.

³⁸É wá cí Jezu gúdo, ɖo afɔ tɔn lɛ́ɛ kpá, bó ɖo avǐ ya wɛ. Đasin é ɖésúnɔ tɔn nɔ ja kɔn nyi Jezu sin afɔ lɛ́ɛ jí, bɔ é nɔ́ dɔn ɖa tɔn dó súnsún afɔ tɔn lɛ́ɛ ná, bó nɔ́ kí si ná, bó nɔ́ kɔn célu ɔ́ dó afɔ tɔn lɛ́ɛ wú.

³⁹Ée Falizyɛn e ylɔ́ Jezu ɔ́ mɔ mɔ̌ ɔ́, é ɖɔ dó xomɛ ɖɔ: “Ényí nya élɔ́ ko nyí gbeyíɖɔ Mawu tɔn wɛ ɔ́, nyɔ̌nu e ɖo alɔ ɖó wǔ tɔn wɛ nɛ́ ɔ́, é ná kó tunwun mɛ alɔkpa e é nyí é; é ná kó tunwun ɖɔ nyɔ̌nu gbɛnyanyazántɔ́ wɛ.”

⁴⁰Jezu ka yí xó, bó ɖɔ n'i ɖɔ: “Sinmɔ́ɔ, un ɖó xó ɖé bó ná ɖɔ nú we.” Sinmɔ́ɔ ka yí gbe n'i ɖɔ: “Mɛ̌si, bo ɖɔ xó ɔ́.”

⁴¹Jezu ɖɔ: “Nya ɖé tíin, bɔ mɛ we ɖu axɔ́ dó e. Mɛ nukɔntɔn ɔ́ ɖu gankwɛ́ afɔwe kanwe ko (500) dó e; mɛ wegɔ́ ɔ́, ɖu gankwɛ́ kanɖé wǒ (50) dó e.

⁴²Yě ká ɖó nǔ e yě ná dó sú axɔ́ énɛ́ ɔ́ ná é ǎ, bɔ nya ɔ́ sɔ́ akwɛ́ ɔ́ kɛ yě mɛ we lɛ́ɛ. Đo mɛ we énɛ́ lɛ́ɛ mɛ ɔ́, mɛ̌ ka ná yí wǎn nú nya ɔ́ hú mɛ ɖě?”

⁴³Sinmɔ́ɔ ka yí gbe ɖɔ: “Nyɛ mɔ ɖɔ mɛ e é zě axɔ́ gěgé kɛ é wɛ.” Jezu ka ɖɔ n'i ɖɔ: “A yǐ gbe ɖó ganjí.”

⁴⁴Jezu ka lílɛ́ kpan nukɔn nyɔ̌nu ɔ́, bó ɖɔ nú Sinmɔ́ɔ ɖɔ: “A ma mɔ nyɔ̌nu élɔ́ a? Ée un byɔ́ xwé towe gbe ɔ́, a nǎ sin mì nú má dó klɔ́ afɔ ná ǎ, lo ɔ́, éyɛ́ kɔn ɖasin tɔn dó afɔ ce lɛ́ɛ jí, lobo dɔn ɖa tɔn dó súnsún ná.

⁴⁵A kí si nú mì ǎ, lo ɔ́, éyɛ́ ɔ́, sín hwenu e un ko byɔ́ fí ɔ́, é gɔn si kí nú afɔ ce lɛ́ɛ ǎ.

⁴⁶A kɔn ami dó ta nú mì ǎ, éyɛ́ ka kɔn célu wǎnɖagbenɔ dó afɔ ce lɛ́ɛ wú.

⁴⁷Énɛ́ ɔ́ wú ɔ́, ma ɖɔ nú we: è sɔ́ hwɛ tobutóbú e é hu lɛ́ɛ kɛ ɛ, ɖó wǎn yíyí ɖaxó e é ɖó ɔ́ wútu. Lo ɔ́, ényí Mawu sɔ́ hwɛ kpɛɖé kɛ mɛɖé ɔ́, wǎn yíyí kpɛɖé wɛ mɛ énɛ́ ɔ́ nɔ́ ɖó.”

⁴⁸Jezu ka ɖɔ nú nyɔ̌nu ɔ́ ɖɔ: “È sɔ́ hwɛ towe lɛ́ɛ kɛ we.”

⁴⁹Mɛ e ɖo nǔ ɖu xá Jezu wɛ lɛ́ɛ ka jɛ ɖiɖɔ dó xomɛ jí ɖɔ: “Mɛ̌ ka nyí mɛ élɔ́, bó nɔ́ sɔ́ hwɛ kɛ mɛ?”

⁵⁰Jezu ka ɖɔ nú nyɔ̌nu ɔ́ ɖɔ: “Nǔ e a ɖi ɔ́ hwlɛ́n we gán. Yi, bónú fífá Mawu tɔn ní nɔ kpɔ́ xá we.”