Read fon Luki 8 Bible Online

Luki 8 - fon bible

Luki 8

¹Énɛ́ ɔ́ gúdo ɔ́, Jezu nɔ ɖo toxo ɖaxó lɛ́ɛ kpódó gletoxo lɛ́ɛ kpán mɛ gbɔn wɛ, bó nɔ́ ɖo axɔ́súɖuɖu Mawu tɔn ɔ́ sín Wɛn Ɖagbe jlá wɛ; ahwanvú tɔn wěwe lɛ́ɛ ka nɔ́ xwedó e.

² Mɔ̌ ɖokpó ɔ́, nyɔ̌nu e jí é nya yɛ nyanya sín lɛ́ɛ, kpódó ée é gbɔ azɔn ná lɛ́ɛ kpó ɖě xwedó e: Mali Magidalanu e jí é nya yɛ nyanya tɛ́nwe sín é,

³Jani e nyí Cúza nǔjíkpɔ́ntɔ́ Elódu tɔn sín asi é, Suzánu, kpódó nyɔ̌nu gěgé ɖěvo ɖé lɛ́ɛ kpán, bɔ yě nɔ́ sɔ́ nǔ e yě ɖó lɛ́ɛ dó dó alɔ Jezu kpódó ahwanvú tɔn wěwe lɛ́ɛ kpán.

⁴Mɛ gěgé gosín to lɛ́ɛ mɛ, to lɛ́ɛ mɛ, bó nyi ahwan wá Jezu gɔ́n. Ée mɛ lɛ́ɛ wá sukpɔ́ ɔ́, é dó lǒ élɔ́ dó ɖɔ xó nú yě, bó ɖɔ:

⁵“Nya ɖé tɔ́n gbe ɖokpó, bó yi nǔkún tɔn hú gbé. Hwenu e é ɖo nǔkún ɔ́ hú gbɔn gle ɔ́ mɛ wɛ ɔ́, ɖě yi jɛ ali jí, bɔ è gbɔn jí, lobɔ xɛ lɛ́ɛ cyán ɖu.

⁶Đě wá jɛ awǐnnyakan mɛ, fí e kɔ́ gěgé ɖé ma ɖe ǎ é; ée yě wú ɔ́, yě fyɔ́ tlóló, ɖó yě mɔ fífá ǎ.

⁷Đě lɛ́ jɛ wundonu, bɔ ée yě jɛ wǔwú jí ɔ́, wun lɛ́ɛ lɔmɔ̌ wú, bó vun blá yě.

⁸Đě wá jɛ ayǐkúngban ɖagbe jí; énɛ́ lɛ́ɛ wú, bó sɛ́n, bɔ nǔkún ɖokpó ná nǔkún mɔ̌hunkɔtɔn donu kanwe ko (100).” Ée Jezu ɖɔ mɔ̌ ɔ́, é zé gbe yi jǐ, bó sú ta nú lǒ ɔ́, bó ɖɔ: “Mɛ e ɖó tó bó ná dó se nǔ ná ɔ́ ní ɖótó bó se.”

⁹Ahwanvú Jezu tɔn lɛ́ɛ ka wá kan nǔ byɔ́ Jezu dó nǔ e ɖɔ wɛ lǒ énɛ́ ɔ́ ɖe ɔ́ wú.

¹⁰ É ka yí gbe nú yě ɖɔ: “Axɔ́súɖuɖu Mawu tɔn sín nǔbúdo lɛ́ɛ ɔ́, midɛɛ lɛ́ɛ wɛ è hun xlɛ́; lo ɔ́, mɛ ɖě lɛ́ɛ ɔ́, lǒ mɛ wɛ è nɔ ɖɔ xó tɔn nú yě dó. Énɛ́ ɔ́, yě ná ɖo nǔ mɔ wɛ, cóbó ná nyí mamɔtɔ́; yě ná ɖo sise wɛ, cóbó ká ná mɔ nukúnnú jɛ mɛ ǎ.”

¹¹“Lǒ e un dó ɔ́, tínmɛ tɔn ɖíe: nǔkún ɔ́, Mawuxó ɔ́ wɛ.

¹²Nǔkún e jɛ ali jí lɛ́ɛ ɔ́, mɛ e nɔ se Mawuxó ɔ́, bɔ awǒvi nɔ́ wá ɖe sín ayi yětɔn mɛ lɛ́ɛ é wɛ; ɖó, yě tá wá ɖi nǔ, bónú Mawu ná hwlɛ́n yě gán.

¹³Nǔkún e jɛ awǐnnyakan mɛ lɛ́ɛ é ɔ́, mɛ e nɔ se Mawuxó ɔ́, lobo nɔ yí kpódó xomɛhunhun kpán lɛ́ɛ wɛ; lo ɔ́, xó ɔ́ nɔ lí dǒ ɖo ayi yětɔn mɛ ǎ, yě nɔ́ ɖi nǔ nú azǎn ɖé; bɔ nǔxámɛ hwenu wá su ɔ́, yě nɔ́ jó agɔ.

¹⁴Nǔkún e jɛ wundonu lɛ́ɛ ɔ́, mɛ e nɔ se Mawuxó ɔ́, bó nɔ́ ɖidó lɛ́ɛ é wɛ; yě nɔ́ jó yěɖée dó, bɔ nǔlinkpɔ́n, dɔkun, kpódó vǐví gbɛmɛ fí tɔn kpó nɔ vun blá xó ɔ́ ɖo ayi yětɔn mɛ, bɔ sínsɛ́n yětɔn nɔ zin ǎ.

¹⁵Nǔkún e jɛ ayǐkúngban ɖagbe jí lɛ́ɛ ɔ́, mɛ e nɔ se Mawuxó ɔ́, bó nɔ́ yí kpódó ayi ɖagbe kpán, kpódó ayijlɔ́jlɔ́ kpán lɛ́ɛ wɛ; lǐnsyɛ́nsyɛ́n yětɔn nɔ́ zɔ́n, bɔ yě nɔ́ ná sínsɛ́n.”

¹⁶ “Mɛ ɖé nɔ́ tá zogbɛ́n bó nɔ́ xwe zɛ̌n dó, abǐ bó nɔ́ sɔ́ dó akánma glɔ́ ǎ; lo ɔ́, nǔta aga wɛ è nɔ sɔ́ ɖó, bónú mɛ e ná byɔ́ xwé gbe lɛ́ɛ ná mɔ wěziza.

¹⁷Đó nǔ ɖěbǔ ɖo nǔglɔ́ ɔ́, é ná wá jɛ wěxo agbawungba; nǔ ɖěbǔ ka nɔ wi mɛ ɔ́, é ná wá wěziza nu.

¹⁸ “Mi nɔ hɛn ayi dó lě e mi nɔ ɖótó nǔ gbɔn ɔ́ wú; ɖó mɛ e ɖó nǔ ɔ́, Mawu ná lɛ́ ná ɛ d'é jí, lo ɔ́, mɛ e ma ɖó nǔɖé ǎ ɔ́, Mawu ná yí kpɛ e é lin ɖɔ émí ɖó ɔ́ sín así tɔn.”

¹⁹Jezu sín nɔ kpódó Jezu sín nɔví lɛ́ɛ kpó ka wá gɔ̌n tɔn; lo ɔ́, yě sixú yi fí e é ɖe ɔ́ ǎ, ɖó gbɛtɔ́ sukpɔ́.

²⁰Mɛ ɖé ka wá ɖɔ nú Jezu ɖɔ: “Nɔ towe kpódó nɔví towe lɛ́ɛ kpó ɖo hɔnto, bó ɖo biba we wɛ.”

²¹Jezu ka ɖɔ nú mɛ e ɖo fínɛ́ lɛ́ɛ ɖɔ: “Mɛ e nɔ se Mawuxó ɔ́, bó nɔ́ bló ɖ'é jí lɛ́ɛ wɛ nyí nɔ ce kpódó nɔví ce lɛ́ɛ kpó.”

²²É ka wá su gbe ɖokpó, bɔ Jezu kpódó ahwanvú tɔn lɛ́ɛ kpó byɔ́ tɔjíhún ɖé mɛ, bɔ é ɖɔ nú yě ɖɔ: “Mi nú mǐ nǎ yi agě ɖě ɔ́ jí,” bɔ yě ɖidó.

²³Hwenu e yě ɖo yiyi wɛ ɖo tɔ ɔ́ jí ɔ́, Jezu wlí amlɔ. Jɔhɔn ɖaxó ɖé ka jɛ nyinyi jí, bó nɔ́ xo sin dó tɔjíhún ɔ́ mɛ, bɔ hǔn ɔ́ jɛ gǐgɔ́ jí, bɔ nǔ nyanya ɖo nǎ jɛ wɛ.

²⁴Yě sɛ yá Jezu, bó fɔ́n ɛ, lobo ɖɔ: “Mɛ̌si! Mɛ̌si! Mǐ ɖo nǎ dɔn wɛ.” Jezu ka fɔ́n, bó wa adǎn dó jɔhɔn ɔ́, kpódó xu e ɖo zǐngídi jí é kpó, bɔ yě bǐ xwɛ, bɔ fí bǐ cí tóó.

²⁵É ka wá kanbyɔ́ yě ɖɔ: “Lě e mi ɖi nǔ gbɔn ɔ́ ɖíe a?” Nǔ énɛ́ ɔ́ kpácá yě, bɔ xɛsi jɛ yě jí, bɔ yě jɛ ɖiɖɔ nú yěɖée jí ɖɔ: “Mɛ nǎhún ka nyí nya élɔ́, bó nɔ́ ɖe gbe dó jɔhɔn kpódó tɔ kpó, bɔ yě nɔ́ se gbe n'i?”

²⁶Yě ká wá jɛ Jelazáanu lɛ́ɛ sín to e kpan nukɔn Galilée é mɛ.

²⁷Ée Jezu jɛ te sín tɔjíhún ɔ́ mɛ wá agě jí ɔ́, nya to ɔ́ mɛ nu ɖé wá kpé e. Nya énɛ́ ɔ́, yɛ nyanya gěgé ɖo jǐ tɔn; é ma sɔ́ dó awu ǎ ɔ́, é ko lín; é sɔ́ nɔ́ nɔ xwé ɖé gbe ǎ; lo ɔ́, sóxo mɛ fí e è nɔ ɖi mɛkúkú lɛ́ɛ dó ɖo to yětɔn mɛ ɔ́ wɛ é nɔ́ nɔ.

²⁸Hwenu e é mɔ Jezu ɔ́, é jɛ xó sú jí, bó jɛ kpo ɖo nukɔn tɔn, bó zé gbe yi jǐ, bó ɖɔ: “Étɛ́ wɛ nyɛ kpódó hwi kpó kpédó, Jezu Mawu Ajalɔ̌nlɔn ví? Kɛnklɛ́n, ma dó ya nú mì ó.”

²⁹Nya ɔ́ ɖɔ mɔ̌, ɖó Jezu ɖe gbe dó yɛ nyanya ɔ́ ɖɔ ní gosín jǐ tɔn. Đó azɔn mɔ̌kpán wɛ yɛ ɔ́ kó zɔn jǐ tɔn, bɔ è nɔ dó gan afɔ n'i, bó nɔ sɔ́ wɔlɔ dó dó gɛdɛ ɛ, nú é ma tɔ́n ó; có é nɔ hɛn gan ɔ́ kpódó wɔlɔ ɔ́ kpó bǐ wɛ̌n, bó nɔ́ jɛ te, bɔ yɛ nyanya ɔ́ nɔ dɔn ɛ yi gbětótló mɛ.

³⁰Jezu ka kanbyɔ́ ɛ ɖɔ: “Nɛ̌ wɛ nyǐkɔ towe nɔ nyí?” Bɔ é yí gbe n'i ɖɔ: “Ahwan wɛ un nyí,” ɖó yɛ nyanya gěgé wɛ ɖo nya ɔ́ jí.

³¹Bɔ yɛ nyanya énɛ́ lɛ́ɛ jɛ vo sa nú Jezu jí ɖɔ é ní má nya émí yi dó do gɔngɔn mɛ ó.

³²Aglǔzahwan ɖaxó ɖé ka ɖo sókan mɛ fínɛ́, bó ɖo nǔ ba ɖu wɛ. Bɔ yɛ nyanya lɛ́ɛ dó kɛnklɛ́n nú Jezu ɖɔ é ní ná gbe émí, bónú émí ná yi byɔ́ aglǔza énɛ́ lɛ́ɛ mɛ, bɔ Jezu ka ná gbe tɔn yě.

³³Azɔn ɖokpó ɔ́, yɛ nyanya lɛ́ɛ gosín dǎwe ɔ́ jí, bó byɔ́ aglǔza lɛ́ɛ mɛ, bɔ aglǔza lɛ́ɛ bɛ́ wezun sín só ɔ́ jí, bó kɔn nyi xu mɛ, bó kú tɔ.

³⁴Ée aglǔzanyitɔ́ lɛ́ɛ mɔ nǔ énɛ́ e jɛ ɔ́, yě hɔn, bó yi ɖɔ nǔ e jɛ nɛ́ lɛ́ɛ nú mɛ lɛ́ɛ ɖo toxo ɔ́ mɛ kpódó gletoxo lɛ́ɛ mɛ kpó.

³⁵Bɔ mɛ lɛ́ɛ tɔ́n, bó wá kpɔ́n nǔ e jɛ é. Ée yě wá Jezu gɔ́n é ɔ́, yě mɔ nya e jí Jezu nya yɛ nyanya lɛ́ɛ sín é ɖo ayǐjínjɔ́n ɖo Jezu kpá, bɔ ayi tɔn wá gbɛ, bɔ é dó awu. Ée yě mɔ ɛ ɔ́, xɛsi jɛ yě jí.

³⁶Mɛ e ɖo tɛn tɔn mɛ bó mɔ lě e Jezu gbɔ azɔn nú yɛnyanyanɔ ɔ́ gbɔn lɛ́ɛ wlí bǐ ɖɔ nú mɛ e wá lɛ́ɛ.

³⁷Lo ɔ́, mɛ e ɖo gbě énɛ́ ɔ́ jí lɛ́ɛ bǐ dó kɛnklɛ́n nú Jezu ɖɔ é ní gosín ayǐkúngban émítɔn jí, ɖó xɛsi ɖaxó ɖé jɛ yě jí. Jezu ka byɔ́ tɔjíhún mɛ, bó gosín yě gɔ̌n.

³⁸Nya e jí yɛ nyanya gosín ɔ́ ka sa vo nú Jezu ɖɔ émí ná xwedó e. Jezu ka lɛ́ kɔ n'i bó ɖɔ:

³⁹“Lɛ̌ kɔ yi xwé towe gbe, bó ɖɔ nǔ e Mawu wa nú we lɛ́ɛ bǐ.” Nya ɔ́ ka ɖidó, bó jɛ nǔ e Jezu wa n'i é bǐ jlá jí gbɔn to ɔ́ bǐ mɛ.

⁴⁰Hwenu e Jezu lɛ́ kɔ wá ɔ́, mɛ lɛ́ɛ nyi ahwan wá kpé e, ɖó yě bǐ wɛ ko ɖo te kpɔ́n ɛ.

⁴¹Dǎwe ɖé ka wá xwetɔ́n, bɔ è nɔ ylɔ́ ɛ ɖɔ Jayilɔ́si, bɔ é nyí kplɔ́ngbasá Jwifu lɛ́ɛ tɔn sín gǎn. É jɛ kpo ɖo Jezu nukɔn, bó sa vo n'i ɖɔ ní wá xwé émítɔn gbe,

⁴²ɖó ɖyɔ̌vǐvú ɖokpó géé é ɖó, bɔ é ko ɖó xwe wěwe mɔ̌ ɔ́ ɖo kúdonu. Hwenu e Jezu xweyǐgbe ɔ́, mɛ e tɛ́ntin é ɖe lɛ́ɛ sukpɔ́ káká, bó ɖo fyɔ́nfyɔ́n ɛ wɛ gbɔn fí bǐ.

⁴³Nǎwe ɖé ka ɖo fínɛ́. Nǎwe énɛ́ kó ɖo hun ɖi wɛ sín xwe wěwe ɖíe ɖokpóó. É ná nǔ e é ɖó ɔ́ bǐ azɔngblétɔ́ lɛ́ɛ, có yě ɖě ká kpé azɔn ɔ́ wú bó gbɔ n'i ǎ.

⁴⁴Nǎwe ɔ́ gbɔn Jezu gúdo, bó wá ɖó alɔ awu tɔn tó, bɔ hun e ɖi wɛ é ɖe ɔ́ gbo ɖo tɛndo ɖokpó ɔ́ mɛ.

⁴⁵Jezu ka kanbyɔ́ ɖɔ: “Mɛ̌ ká ɖó alɔ wǔ ce?” Yě bǐ ka jɛ gbigbɛ jí, bɔ Piyɛ́ɛ ɖɔ: “Mɛ̌si, a mɔ mɛ lɛ́ɛ lɛ́ lɛ̌ dó we, bó ɖo fyɔ́nfyɔ́n we wɛ gbɔn fí bǐ, bɔ a ka nɔ lɛ́ kanbyɔ́ ɖɔ mɛ̌ wɛ ɖó alɔ émí wú a jí.”

⁴⁶Lo ɔ́, Jezu ɖɔ: “Mɛ ɖé ɖó alɔ wú ce dandan; ɖó un tunwun ɖɔ hlɔ̌nhlɔ́n ɖé tɔ́n sín wú ce.”

⁴⁷Ée nyɔ̌nu ɔ́ mɔ ɖɔ nǔ e émí wa ɔ́ gba ɔ́, é jɛ sísɔ́sísɔ́ jí, bó wá jɛ kpo ɖo Jezu nukɔn, bɔ nǔ e wú é ɖó alɔ wǔ tɔn ɔ́, kpódó lě e azɔn gbɔ n'i tlóló gbɔn é kpó ɔ́, é wlí bǐ bó ɖɔ ɖo mɛ bǐ nukún mɛ.

⁴⁸Jezu ka ɖɔ n'i ɖɔ: “Vǐ ce, nǔɖiɖi towe zɔ́n bɔ azɔn towe gbɔ. Yi dó fífá mɛ!”

⁴⁹Xó énɛ́ lɛ́ɛ ɖɔ wɛ Jezu ɖe kɛ́ɖɛ́ bɔ mɛɖé gosín Jayilɔ́si xwé, bó ɖɔ n'i ɖɔ: “Vǐ towe kó kú, ma sɔ́ dó tagba nú mɛ̌si ɔ́ ó.”

⁵⁰Lo ɔ́, ée Jezu se mɔ̌ ɔ́, é ɖɔ nú Jayilɔ́si ɖɔ: “Ma ɖi xɛsi ó, vɛ̌ ko ɖi nǔ kpowun, énɛ́ ɔ́, azɔn na gbɔ nú vǐ towe.”

⁵¹Ée Jezu wá Jayilɔ́si xwé ɔ́, é lɔn nú mɛɖé byɔ́ xɔ ɔ́ mɛ xá ɛ zɛ Piyɛ́ɛ kpó Jǎan kpó Jaki kpó, vǐtɔ́ ɔ́ kpódó vǐnɔ kpó wú ǎ.

⁵²Mɛ bǐ ɖo avǐ ya wɛ, bó ɖo alě ná wɛ ɖó vǐ ɔ́ wútu. Jezu ka ɖɔ: “Mi ma ya avǐ ó, vǐ ɔ́ kú ǎ; lo ɔ́, amlɔ dɔ́ wɛ é ɖe.”

⁵³Yě ká jɛ cícá ɛ ko jí, ɖó yě tunwun ɖɔ vǐ ɔ́ kó kú.

⁵⁴Éyɛ́ ká hɛn vǐ ɔ́ sín alɔ, bó ɖɔ: “Sí te!”

⁵⁵Bɔ vǐ ɔ́ fɔ́n, bó sí te tlóló; bɔ Jezu ná gbe ɖɔ è nǐ ná ɛ nǔɖuɖu.

⁵⁶É kpácá vǐtɔ́ ɔ́ kpó vǐnɔ ɔ́ kpó tlala, Jezu ka dó sɛ́n nú yě ɖɔ nǔ énɛ́ e jɛ ɔ́ yě ní má ɖɔ nú mɛɖé ó.