Read fon Luki 9 Bible Online

Luki 9 - fon bible

Luki 9

¹Jezu kplé ahwanvú tɔn wěwe lɛ́ɛ gbe ɖokpó, bó ná yě hlɔ̌nhlɔ́n kpódó acɛ kpó, bónú yě ná nɔ nya yɛ nyanya lɛ́ɛ sín mɛ lɛ́ɛ jí, bó ná nɔ́ gbɔ azɔn nú azinzɔnnɔ lɛ́ɛ.

²É sɛ́ yě dó, nú yě ná yi jlá axɔ́súɖuɖu Mawu tɔn sín xó, bó gbɔ azɔn nú azinzɔnnɔ lɛ́ɛ.

³ É ɖɔ nú yě ɖɔ: “Mi jɛ ali hǔn, mi ma hɛn nǔ ɖěbǔ ó: mi ma hɛn kpogɛ ó, mi ma hɛn nǔbyɔ́ɖutɔ́ glo ó, mi ma hɛn nǔɖuɖu ó, mi ma hɛn akwɛ́ ó, mi ɖě ma ka hɛn awu we ó.

⁴Mi jɛ xwé ɖé gbe hǔn, mi nɔ fínɛ́ káká yi jɛ hwenu e mi na tɔ́n sín to ɔ́ mɛ dó é.

⁵Ényí mɛ lɛ́ɛ ma ka yí mi ǎ, bónú mi ja to ɔ́ mɛ tɔ́n sín gbe hǔn, mi xúxú afɔkɔ́ mitɔn[2], bó dó ɖe xlɛ́ yě ɖɔ yě wa nǔ nyi do.”

⁶Mɛsɛ́dó lɛ́ɛ ka yi, bó nɔ gbɔn fí bǐ ɖo gletoxo lɛ́ɛ mɛ, bó nɔ jlá Wɛn Ɖagbe Mawu tɔn ɔ́, bó nɔ gbɔ azɔn nú mɛ lɛ́ɛ gbɔn fí bǐ.

⁷ Tokpɔngán Elódu se nǔ énɛ́ lɛ́ɛ e ɖo jijɛ wɛ lɛ́ɛ, bó sɔ́ tunwun lě e é ná bló gbɔn ɔ́ ǎ, ɖó mɛ ɖé lɛ́ɛ nɔ ɖɔ: “Jǎan Yɛhwesinlɛnúmɛtɔ́ ɔ́ wɛ fɔ́n sín kú.”

⁸Mɛ ɖé lɛ́ɛ ka nɔ ɖɔ: “Elíi wɛ lɛ́ kɔ wá.” Mɛ ɖěvo lɛ́ɛ nɔ ɖɔ: “Gbeyíɖɔ Mawu tɔn xóxó lɛ́ɛ ɖě wɛ fɔ́n wá gbɛ.”

⁹Elódu ka ɖɔ: “Jǎan ɔ́, un ka ko gbo ta ɛ nɛ́! Mɛ nǎhún wɛ ka nyí mɛ e wú un ɖo nǔ énɛ́ lɛ́ɛ se dó wɛ é?” Bɔ é ɖo biba ná mɔ mɛ ɔ́ wɛ.

¹⁰Ée mɛsɛ́dó lɛ́ɛ lɛ́ kɔ wá ɔ́, yě ɖɔ nǔ e yě wa lɛ́ɛ bǐ nú Jezu. É ka kplá yě jɛ zɔ ɖo to e è nɔ ylɔ́ ɖɔ Bɛtisayida é sín awa jí.

¹¹Ée mɛ lɛ́ɛ mɔ mɔ̌ ɔ́, yě jɛ gúdo tɔn. Jezu ka yí yě ganjí, bó ɖɔ xó nú yě dó axɔ́súɖuɖu Mawu tɔn ɔ́ wú, lobo lɛ́ gbɔ azɔn nú azinzɔnnɔ lɛ́ɛ.

¹²Hwe ɖo xɔ na yi wɛ, bɔ mɛsɛ́dó wěwe lɛ́ɛ sɛ yá ɛ, bó ɖɔ n'i ɖɔ: “Nyi mɛ lɛ́ɛ, nú yě ní yi gletoxo lɛ́ɛ mɛ, abǐ gle e yá fí lɛ́ɛ é ta, bó na yi ba fí ɖé nɔ, bó na yi ba nǔɖé xɔ ɖu, ɖó gblǒlǒ mɛ wɛ mì ɖe ɖo fí.”

¹³Jezu ka ɖɔ nú yě ɖɔ: “Mi ɖésúnɔ ní ná nǔɖuɖu yě.” Yě ká ɖɔ n'i ɖɔ: “Wɔ̌xúxú atɔ́ɔ́n kpódó hweví we kpán jɛ́n ɖo mǐ sí. Mǐ ná yi xɔ nǔɖuɖu nú mɛ tobutóbú élɔ́ lɛ́ɛ ɖɔ wɛ a ɖe a?”

¹⁴Đó mɛxó súnnu děgba ɖě afatɔ́n (5.000) mɔ̌ wɛ ɖo mɛ lɛ́ɛ mɛ. Jezu ka ɖɔ nú ahwanvú tɔn lɛ́ɛ ɖɔ: “Mi ɖɔ nú mɛ lɛ́ɛ nú yě jínjɔ́n ayǐ sonu sonu, kanɖé wǒ (50) kanɖé wǒ (50).”

¹⁵Yě ɖɔ nú mɛ lɛ́ɛ bɔ yě bǐ sésé jínjɔ́n ayǐ.

¹⁶Jezu ka yí wɔ̌xúxú atɔ́ɔ́n lɛ́ɛ kpódó hweví we lɛ́ɛ kpán, bó kpɔ́n jǐ, bó dó kú nú Mawu, bó kán, lobo sɔ́ nú ahwanvú tɔn lɛ́ɛ, nú yě ní má nú mɛ lɛ́ɛ.

¹⁷Yě bǐ ɖu nǔ, bó gɔ́ xo, bɔ nǔ e yě ɖu kpo ɔ́, è kplé bɔ é gɔ́ xasun wěwe.

¹⁸É wá su gbe ɖokpó, bɔ Jezu ɖo ɖɛ xo wɛ é ɖokpónɔ, bɔ ahwanvú tɔn lɛ́ɛ wá gɔ̌n tɔn, bɔ é kanbyɔ́ yě ɖɔ: “Mɛ̌ un ka nyí bɔ mɛ lɛ́ɛ nɔ ɖɔ?”

¹⁹ Bɔ yě yí gbe n'i ɖɔ: “Mɛ ɖě nɔ ɖɔ hwi wɛ nyí Jǎan Yɛhwesinlɛnúmɛtɔ́, mɛ ɖěvo lɛ́ɛ ka nɔ ɖɔ hwi wɛ nyí Elíi, mɛ ɖě ká nɔ ɖɔ gbeyíɖɔ Mawu tɔn xóxó lɛ́ɛ ɖě wɛ fɔ́n sín kú.”

²⁰ É ka lɛ́ kanbyɔ́ yě ɖɔ: “Midɛɛ lɛ́ɛ lo, mɛ̌ un ka nyí bɔ mi nɔ ɖɔ?” Bɔ Piyɛ́ɛ yí xó bó ɖɔ: “Hwi wɛ nyí Klísu Mawu tɔn.”

²¹Jezu ka dó sɛ́n nú yě syɛ́nsyɛ́n ɖɔ yě ní ma ɖɔ mɛ e émí nyí ɔ́ nú mɛɖé cáwún ó.

²²Jezu ka lɛ́ ɖɔ nú yě ɖɔ: “Nyɛ Gbɛtɔ́ví ɔ́ ná ji ya ɖésú; tomɛxó lɛ́ɛ kpódó vɔ̌sánú-xwlémawutɔ́gán lɛ́ɛ kpó, kpódó sɛ́nkplɔ́nmɛtɔ́ lɛ́ɛ kpán ná gbɛ́ mì, lobo ná hu mì. Azǎn tɔn atɔngɔ́ ɔ́ gbe ɔ́, Mawu ka ná fɔ́n mì sín kú.”

²³ Jezu lɛ́ ɖɔ nú yě bǐ ɖɔ: “Ényí mɛɖé jló ná xwedó mì hǔn, ní jó tito é ɖésúnɔ tɔn lɛ́ɛ dó, bó ɖíɖá aklúzu tɔn ayǐhɔ́ngbe ayǐhɔ́ngbe, bó xwedó mì.

²⁴Đó mɛ e jló ná hwlɛ́n gbɛ éɖée tɔn gán ɔ́, gbɛ tɔn ná bú dó e; mɛ e ka ná hɛn gbɛ tɔn bú ɖó nyɛ wútu ɔ́ ná hwlɛ́n gbɛ tɔn gán.

²⁵Ényí mɛɖé ka ɖó nǔ e ɖo gbɛ élɔ́ mɛ ɔ́ bǐ, lobo ka dɔn, abǐ gbɛ é ɖésúnɔ tɔn ka bú dó e ɔ́, le tɛ́ wɛ ɖ'é mɛ n'i?

²⁶Mɛ e nyɛ kpódó xó ce lɛ́ɛ kpó ná nyí winnyánú ná ɔ́, mɛ ɔ́ lɔmɔ̌ ná nyí winnyánú nú nyɛ Gbɛtɔ́ví ɔ́ hwenu e un ná lɛ́ kɔ wá ɖo susu ce mɛ, ɖo susu Tɔ́ ɔ́ tɔn mɛ, kpódó susu wɛnsagun Mawu tɔn lɛ́ɛ kpó tɔn mɛ é.

²⁷Má ɖɔ nǔgbó nú mi: mɛ ɖé lɛ́ɛ ɖo mi mɛ fí din, bó ná kó kú cóbó ná mɔ axɔ́súɖuɖu Mawu tɔn ɔ́ ǎ.”

²⁸ Ée Jezu ɖɔ xó énɛ́ lɛ́ɛ gúdo ɔ́, azǎn ná yi tántɔn mɔ̌, bɔ é kplá Piyɛ́ɛ kpódó Jǎan kpó, kpódó Jaki kpán, bó xá só ɖé jí, bó ná yi xo ɖɛ.

²⁹Hwenu e é ɖo ɖɛ xo wɛ ɔ́, nukún tɔn mɛ sín ninɔmɛ húzú, bɔ awu e é dó ɔ́ húzú wěwé tété, bó nɔ kɔ́n,

³⁰bɔ mɛ we ɖé lɛ́ɛ ɖo xó ɖɔ xá ɛ wɛ: Mɔyízi kpódó Elíi kpán wɛ.

³¹Yě wá tɔ́n ɖo susu Mawu tɔn mɛ, bó ɖo xó ɖɔ xá Jezu wɛ, dó lě e é ná gosín gbɛmɛ fí gbɔn ɖo Jeluzalɛ́mu ɔ́ wú.

³²Piyɛ́ɛ kpódó hǎgbɛ́ tɔn lɛ́ɛ kpán ɖo sɛnmlɔ mɛ; ée yě wá fɔ́n ɔ́, yě mɔ Jezu ɖo susu tɔn mɛ, kpódó mɛ we e ɖo akpá tɔn lɛ́ɛ kpán.

³³Hwenu e mɛ we énɛ́ lɛ́ɛ ɖo nǎ yi wɛ ɔ́, Piyɛ́ɛ ɖɔ nú Jezu ɖɔ: “Mɛ̌si, fí e mǐ wá din ɔ́ nyɔ́ mɛ! Mǐ ná gbá goxɔ atɔn: towe ɖokpó, Mɔyízi tɔn ɖokpó, Elíi tɔn ɖokpó.” Piyɛ́ɛ ka tunwun nǔ e ɖɔ wɛ é ɖe ɔ́, cóbó ɖo ɖiɖɔ wɛ ǎ.

³⁴Mɔ̌ ɖɔ wɛ Piyɛ́ɛ ɖe kɛ́ɖɛ́ bɔ akpɔ́kpɔ́ ɖé wá cyɔ́n yě bǐ; ée ahwanvú lɛ́ɛ mɔ mɔ̌ ɔ́, xɛsi jɛ yě jí.

³⁵ È se gbe ɖé sín akpɔ́kpɔ́ ɔ́ mɛ ɖɔ: “Mɛ élɔ́ ɔ́, vǐ ce e un sɔ́ é wɛ; mi ɖótó e.”

³⁶Ée è se gbe énɛ́ gúdo ɔ́, é wá kpo Jezu ɖokpónɔ. Nǔ énɛ́ e ahwanvú lɛ́ɛ ka mɔ ɔ́, yě hɛn dó ayi mɛ, bó ɖɔ xó ɖěbǔ nú mɛ ɖé sín hwenɛ́nu ǎ.

³⁷Ayǐhɔ́ngbe tɔn hwenu e yě ɖo te jɛ sín só ɔ́ jí wɛ ɔ́, mɛ gěgé ɖé lɛ́ɛ nyi ahwan wá kpé Jezu.

³⁸Dǎwe ɖé ká ɖo mɛ lɛ́ɛ mɛ, bó sú xó bó ɖɔ: “Mɛ̌si, kɛnklɛ́n, nyi kɔ kpɔ́n vǐ súnnu ce, ɖó vǐ ɖokpó géé e un ɖó ɔ́ nɛ́.

³⁹Yɛ nyanya ɖé nɔ wá zɔn jǐ tɔn; é zɔn jǐ tɔn lě tlóló ɔ́, é nɔ́ jɛ xó sú jí; yɛ nyanya ɔ́ nɔ húnhún i kpódó hlɔ̌nhlɔ́n kpó, bɔ é nɔ́ jɛ afúntúnkplɔ̌ tún jí. É nɔ́ fá cóbɔ yɛ nyanya ɔ́ nɔ́ wá jó e dó ǎ, bɔ vǐ ɔ́ sín lanmɛ bǐ nɔ túlú.

⁴⁰Un sa vo nú ahwanvú towe lɛ́ɛ ɖɔ yě ní nya yɛ nyanya ɔ́ sín jǐ tɔn; yě ká kpé wú ǎ.”

⁴¹Jezu ka ɖɔ nú ahwanvú tɔn lɛ́ɛ ɖɔ: “Mi gbɛtɔ́ nyanya, nǔmaɖitɔ́ e mi, káká jɛ hwetɛ́nu wɛ mi ka ná nɔ kɔ jí nú mì yi jɛ?” Bo ka ɖɔ nú vǐtɔ́ ɔ́ ɖɔ: “Kplá vǐ towe wá fí.”

⁴²Ée vǐ ɔ́ ɖo sisɛyá Jezu wɛ ɔ́, yɛ nyanya ɔ́ sɔ́ ɛ hudɛ́, bó hunhun i kpódó hlɔ̌nhlɔ́n kpó. Jezu ka wa adǎn dó yɛ nyanya ɔ́, bɔ é gosín vǐ ɔ́ jí, bɔ vǐ ɔ́ sín azɔn gbɔ, lobɔ Jezu kplá ɛ jó nú tɔ́ tɔn.

⁴³Lě e hlɔ̌nhlɔ́n Mawu tɔn d'agba sɔ ɔ́ nyí nǔɖé, bó kpácá yě tawun. Nǔ énɛ́ e Jezu jlɛ́ lɛ́ɛ bǐ ɖo mɛ ɖokpó ɖokpó kpácá wɛ, bɔ é ɖɔ nú ahwanvú tɔn lɛ́ɛ ɖɔ:

⁴⁴“Midɛɛ lɛ́ɛ ɔ́, mi ɖótó xó élɔ́ ganjí: è nǎ wá jó nyɛ Gbɛtɔ́ví ɔ́ nú mɛ lɛ́ɛ.”

⁴⁵Ahwanvú tɔn lɛ́ɛ ka mɔ nǔ jɛ xó énɛ́ mɛ ǎ; Mawu sɔ́ hwlá dó yě, bónú yě ma mɔ nǔ jɛ mɛ ó, bɔ yě ká glá kan nǔɖé byɔ́ Jezu dó xó énɛ́ ɔ́ wú ǎ.

⁴⁶ Ahwanvú Jezu tɔn lɛ́ɛ ɖo nǔ dɔn wɛ dó mɛ e nyí nǔ ɖaxó ɖo yě mɛ ɔ́ jí.

⁴⁷Jezu ka mɔ nǔ jɛ nǔ e lin wɛ yě ɖe ɔ́ wú, bó dɔn yɔkpɔ́vú ɖokpó dó akpá,

⁴⁸bó ɖɔ nú yě ɖɔ: “Mɛ ɖěbǔ yí yɔkpɔ́vú élɔ́ ɖo nyǐ ce tamɛ ɔ́, nyɛ ɖésúnɔ wɛ é yí. Mɛ e ka yí mì ɔ́, mɛ e sɛ́ mì dó ɔ́ wɛ é yí; ɖó mɛ e nɔ sɔ́ éɖée hwe hú mɛ bǐ ɖo mi mɛ ɔ́, mɛ énɛ́ wɛ ná nyí nǔɖaxó.”

⁴⁹Jǎan ɖɔ nú Jezu ɖɔ: “Mɛ̌si, mǐ mɔ mɛɖé, bɔ é nɔ́ ylɔ́ nyǐkɔ towe dó nya yɛ nyanya lɛ́ɛ ná, bɔ mǐ gbɛ́ n'i, ɖó é ɖo ahwan mǐtɔn mɛ ǎ.”

⁵⁰Jezu ka ɖɔ n'i ɖɔ: “Mi ma gbɛ́ n'i ó, ɖó mɛ e ma gbɛ́ wǎn nú mi ǎ ɔ́, mɛ mitɔn wɛ.”

⁵¹Hwenu e Mawu na sɔ́ Jezu sín gbɛmɛ fí ɔ́ ɖo susu wɛ, bɔ Jezu ɖidó Jeluzalɛ́mu, kpódó akɔ́nkpinkpan kpó.

⁵²É sɛ́ wɛnsagun lɛ́ɛ dó bɔ yě jɛ nukɔn n'i, bó yi gletoxo ɖé mɛ, ɖo Samalíi gbé jí, bó na bló tɛnmɛ ɖó n'i.

⁵³Lo ɔ́, mɛ lɛ́ɛ yí i ǎ, ɖó Jeluzalɛ́mu e é xwe ɔ́ wútu.

⁵⁴ Ée ahwanvú tɔn Jaki kpódó Jǎan kpó mɔ mɔ̌ ɔ́, yě ɖɔ n'i ɖɔ: “A jlǒ nú mǐ ní ná gbe nú zo jɛ te sín jǐxwé, bó fyɔ́ yě a?”

⁵⁵Jezu ka lílɛ́ kpan nukɔn yě, bó wa adǎn dó ta nú yě,

⁵⁶bɔ yě ɖidó gletoxo ɖěvo mɛ.

⁵⁷Ée yě ɖo ali jí xweyǐgbe ɔ́, mɛɖé ɖɔ nú Jezu ɖɔ: “Un ná xwedó we yi fí e a na yi lɛ́ɛ bǐ.”

⁵⁸Jezu ka yí gbe n'i ɖɔ: “Ayǐsájɛ lɛ́ɛ ɖó nɔtɛn yětɔn, bɔ xɛ e nɔ zɔn gbɔn jɔ mɛ lɛ́ɛ ɖó adɔ̌ yětɔn; lo ɔ́, nyɛ Gbɛtɔ́ví ɔ́ ka ɖó fí e un ná mlɔ́, bó ná gbɔjɛ́ ɔ́ ǎ.”

⁵⁹É ka ɖɔ nú mɛ ɖěvo ɖɔ: “Xwedó mì.” Mɛ ɔ́ ka yí gbe n'i ɖɔ: “Aklúnɔ, gbɔ nú ma tó yi ɖi tɔ́ ce hwɛ̌.”

⁶⁰Jezu ka yí gbe n'i ɖɔ: “Jǒ mɛkúkú lɛ́ɛ dó nú yě ní ɖi cyɔ yětɔn lɛ́ɛ. Amɔ̌, hwɛ yi jlá Wɛn Ɖagbe e ɖɔ xó dó axɔ́súɖuɖu Mawu tɔn wú é.”

⁶¹ Mɛ ɖěvo ka lɛ́ ɖɔ n'i ɖɔ: “Un ná xwedó we Aklúnɔ; lo ɔ́, gbɔ nú ma yi dó yibowá nú mɛ ce lɛ́ɛ hwɛ̌.”

⁶²Jezu ka yí gbe n'i ɖɔ: “Mɛ e sɔ́ glelɛmɔ e nyibú nɔ dɔn ɔ́ dó ɖo gle lɛ ná wɛ, bó ɖo gǔdo kpɔ́n wɛ ɔ́ jɛ xá axɔ́súɖuɖu Mawu tɔn ǎ.”