Read fon Sɛ́nflínmɛ 1 Bible Online

Sɛ́nflínmɛ 1 - fon bible

Sɛ́nflínmɛ 1

¹Xó e Mɔyízi ɖɔ nú Izlayɛ́li ví lɛ́ɛ é wɛ ɖo wěma élɔ́ mɛ. Hwenɛ́nu ɔ́, Izlayɛ́li ví lɛ́ɛ ɖo ayǐkúngban wɛnjɛ ɖé jí ɖo gbětótló mɛ, ɖo Judɛ́ɛn tɔ ɔ́ sín zǎnzǎnhwe jí, ɖo Súfu kpá, ɖo Paláni, kpó Tofɛ́li kpó Lavani kpó Haselɔ́ti, kpódó Di-Zaxávu kpó tɛ́ntin.

²Ényí è gosín Holɛ́bu só ɔ́ kɔn, bó wlí ali e wá Seyíi só kan mɛ é, bó ná yi Kadɛ́ci-Baanɛ́ya ɔ́, è nɔ zun zɔnlin nú azǎn wǒ-ɖokpó.

³Izlayɛ́li ví lɛ́ɛ gosín Ejípu ɔ́, é bló xwe kanɖé (40); sun wǒ-ɖokpógɔ́ ɔ́ e ɖo xwe kanɖégɔ́ énɛ́ ɔ́ mɛ ɔ́ sín azǎn nukɔntɔn gbe wɛ Mɔyízi ɖɔ nǔ e Mawu Mavɔmavɔ ɖɔ é ní ɖɔ nú Izlayɛ́li ví lɛ́ɛ ɔ́ nú yě.

⁴ Hwenɛ́nu ɔ́, Mɔyízi ko ɖu ɖo Amɔliti lɛ́ɛ sín axɔ́sú Sihɔ́ni kpó Basáni xɔ́sú Ɔgu kpó jí, có bó ɖɔ xó e Mawu Mavɔmavɔ ɖɔ é ní ɖɔ nú Izlayɛ́li ví lɛ́ɛ é. Axɔ́sú Sihɔ́ni ɔ́ nɔ́ nɔ Hɛcibɔ́ni, bɔ axɔ́sú Ɔgu ɔ́ nɔ́ nɔ Acitalɔ́ti. Edlɛyi wɛ Mɔyízi ɖu ɖo axɔ́sú Ɔgu jí ɖe.

⁵Mɔyízi jɛ Mawusɛ́n ɔ́ kplɔ́n mɛ jí ɖo Mɔwabu, ɖo Judɛ́ɛn tɔ ɔ́ sín zǎnzǎnhwe jí. Xó e é ɖɔ lɛ́ɛ ɖíe:

⁶Hwenu e mǐ ɖo Holɛ́bu só kɔn ɔ́, Mawu Mavɔmavɔ, Mawu mǐtɔn ɖɔ nú mǐ ɖɔ: “Mi ɖo só élɔ́ kpá din ɔ́, é kó lín.

⁷Din ɔ́, mi wlí ali, bó yi sókan mɛ fí e Amɔliti lɛ́ɛ ɖe ɔ́. Mi gba kpé ayǐkúngban e sɛkpɔ́ yě lɛ́ɛ bǐ jí: mi yi ayǐkúngban wɛnjɛ Judɛ́ɛn tɔn ɔ́ jí, mi yi sókan mɛ, mi yi tofɔligbé, mi yi xutó, mi yi Kanáanu lɛ́ɛ sín to mɛ, bó yi Libáan. Mi gba kpé fí énɛ́ lɛ́ɛ bǐ káká yi tɔ ɖaxó Efláti tɔn ɔ́ tó.

⁸Éɖíe, un ná to ɔ́ mi. Mi yi yí, ɖó to e sín akpá nyɛ Mawu Mavɔmavɔ dó nú tɔ́gbó mitɔn Ablaxámu, kpó Izáki kpó Jakɔ́bu kpó ɖɔ un ná ná vǐ yětɔn lɛ́ɛ nɛ́.”

⁹Mɔyízi dlɛ́n xó ɔ́ d'é nú, bó ɖɔ: “Hwenɛ́nu ɔ́, un ɖɔ nú mi ɖɔ nyi ɖokpónɔ kún sɔ́ sixú nɔ mi nu ó.

¹⁰Mawu Mavɔmavɔ, Mawu mitɔn bló bɔ mi gba kún, bó sukpɔ́ din sunví ɖɔhun.

¹¹É jló mì ɖɔ Mawu Mavɔmavɔ, Mawu tɔ́gbó mitɔn lɛ́ɛ tɔn ní bló bónú mi ní lɛ́ sukpɔ́, bó yi mɔ̌hun donu afatɔ́n (1.000), bónú é ní dó acɛ mi jí, lě e é dó akpá tɔn gbɔn é.

¹²Lo ɔ́, mi ní ká tunwun ɖɔ nyɛ ɖokpó kún sixú ɖɔ nǔ e ɖo mi gbo wɛ ɔ́ xá mi ó, nyɛ ɖokpónɔ kún sixú wa nǔ e ba wɛ mi ɖe ɔ́ nú mi ó, nyɛ ɖokpónɔ kún sixú ɖɔ hwɛ gbo nú mi ó.

¹³Mi kpɔ́n akɔta ɖokpó ɖokpó mɛ, bó cyán gbɛtɔ́ nǔnywɛ́tɔ́, gbɛtɔ́ e mɔ nukúnnú jɛ nǔ mɛ é, gbɛtɔ́ e è sixú ɖe kúnnu ɖagbe ná lɛ́ɛ, bónú má sɔ́ yě gǎn ɖó togun ɔ́ nu.

¹⁴Ée un ɖɔ mɔ̌ nú mi ɔ́, mi yí gbe nú mì ɖɔ xó jɔ xó wɛ un ɖɔ.

¹⁵Énɛ́ ɔ́, un cyán gbɛtɔ́ nǔnywɛ́tɔ́, gbɛtɔ́ e è sixú ɖe kúnnu ɖagbe ná, bɔ yě kó ɖó azɔ̌, bó nɔ́ wa ɖo akɔta mitɔn lɛ́ɛ mɛ lɛ́ɛ. Un zé mɛ ɖě ɖó gbɛtɔ́ afatɔ́n (1.000) nu, bó zé mɛ ɖě ɖó gbɛtɔ́ kanwe ko (100) nu; mɛ ɖě kpa acɛ dó gbɛtɔ́ kanɖé wǒ (50) abǐ wǒ nu? Un zɔ́n mɛ ɖě lɛ́ɛ ɖɔ yě ní cɔ́ mɛ lɛ́ɛ ɖo akɔta ɖokpó ɖokpó mɛ.

¹⁶Énɛ́ ɔ́, un kplɔ́n nǔ mɛ énɛ́ lɛ́ɛ e nyí hwɛɖɔtɔ́ mitɔn lɛ́ɛ; un ɖɔ lě e yě ná ɖɔ hwɛ gbɔn é nú yě; é ɖɔ nú yě ɖɔ: ‘Mi wlí tó hwɛ e nɔví mitɔn lɛ́ɛ ná wá jɛ nú mi lɛ́ɛ wú ganjí, bó hɛn ayi dó xó e ná dɔn Izlayɛ́li ví kpó nɔví tɔn ɖě kpó, abǐ to ɖěvo mɛ nu ɖé kpó wá hwɛ nukɔn ɔ́ wú, bó ɖɔ gbo ganjí.

¹⁷Mi ma nɔ mɛ ɖěbǔ jí ó; mi kú hǔn, bó ɖótó gǎn kpó ahwan kpó bǐ. Mi ma nú mɛ ɖěbǔ ván nukún dó mi ó, Mawu gbe wɛ mi ná xo bó ná ɖɔ hwɛ. Ényí xó ɖé ná hú gǎn mi hǔn, mi wá ɖɔ nú mì bónú má gbéjé kpɔ́n.’

¹⁸Hwenɛ́nu ɔ́, un ɖɔ lě e mi ná wa nǔ gbɔn ɔ́ bǐ nú mi.”

¹⁹Énɛ́ ɔ́ gúdo ɔ́, Mawu Mavɔmavɔ, Mawu mǐtɔn ná gbe mǐ, bɔ mǐ gosín Holɛ́bu bó gbɔn gbětótló ɖaxó e dó xɛsi bɔ mi bǐ tunwun ganjí ɔ́ mɛ dín, lobo wlí ali e yi Amɔliti lɛ́ɛ sín sókan mɛ é. Ée mǐ wá jɛ Kadɛ́ci-Baanɛ́ya é ɔ́,

²⁰un ɖɔ nú mi ɖɔ: “Mi ɖíe ɖo Amɔliti lɛ́ɛ sín só e ná ná mǐ wɛ Mawu Mavɔmavɔ, Mawu mǐtɔn ɖe ɔ́ ná sɛkpɔ́ wɛ e.

²¹Mi kpɔ́n, Mawu Mavɔmavɔ, Mawu mitɔn sɔ́ to élɔ́ dó acɛ mitɔn mɛ. Mi yá wǔ wlí ali bó yí to ɔ́, lě e Mawu Mavɔmavɔ, Mawu tɔ́gbó mitɔn lɛ́ɛ tɔn dó akpá tɔn nú mi gbɔn é. Mi kpan akɔ́n, mi ma ɖi xɛsi ó.”

²²Lo ɔ́, mi mɛ bǐ wá mɔ mì bó ɖɔ: “Mi nú mǐ ná sɛ́ gbɛtɔ́ dó to ɔ́ mɛ, nú yě ná yi kpɔ́n ayǐ nú mǐ. Azɔ̌ e yě ná wa é wɛ nyí ɖɔ yě ná ɖɔ ali e mǐ nǎ gbɔn lɛ́ɛ, kpó toxo e mɛ mǐ nǎ gbɔn lɛ́ɛ kpó nú mǐ.”

²³Xó mitɔn nyɔ́ nukún ce mɛ. Énɛ́ ɔ́ wú wɛ un cyán mɛ ɖokpó ɖokpó gbɔn akɔta lɛ́ɛ ɖokpó ɖokpó mɛ, bɔ yě bló mɛ wěwe.

²⁴Yě wlí ali e gbɔn sókan mɛ ɔ́ ɖidó, bó yi tɔdo Ɛcikɔ́lu tɔn mɛ, bó ba do ná.

²⁵Yě gbɛ atínsínsɛ́n e ɖo to ɔ́ mɛ lɛ́ɛ wá nú mǐ. Yě ɖɔ to e na ná mǐ wɛ Mawu Mavɔmavɔ, Mawu mǐtɔn ɖe ɔ́ nyɔ́ ɖésú.

²⁶ Lo ɔ́, mi gbɛ́ ɖɔ émí kún ná yi to ɔ́ mɛ ó, mi se tónú nú Mawu Mavɔmavɔ, Mawu mitɔn ǎ.

²⁷Mi nɔ goxɔ mitɔn lɛ́ɛ mɛ, bó húnhún nǔ ɖɔ bó ɖɔ: “Wǎn wɛ Mawu Mavɔmavɔ gbɛ́ nú mǐ wú wɛ é ɖe mǐ tɔ́n sín Ejípu. É jló ná jó mǐ nú Amɔliti lɛ́ɛ, bɔ yě ná hu mǐ wú wɛ é bló mɔ̌.

²⁸Étɛ́wú wɛ mǐ ká ná yi dɔ̌n tawun? Mǐ ɖǒ akɔ́nkpinkpan mɔ̌hun ǎ. Nɔví mǐtɔn lɛ́ɛ ɖésú kó ɖɔ nú mǐ ɖɔ to ɔ́ mɛ nu lɛ́ɛ jɔ asú, bó ɖó hlɔ̌nhlɔ́n hú mǐ, bɔ toxo yětɔn lɛ́ɛ lɔ d'agba, bɔ è mɛ ahohó lɛ́ lɛ̌ dó, bɔ é yi jǐ ɖésú. Yě lɛ́ mɔ Anáki ví, gbɛtɔ́ jangan jangan nɛ́ lɛ́ɛ ɖo toxo ɔ́ mɛ.”

²⁹Un ka ɖɔ nú mi ɖɔ: “Ado ma hu mi ó. Mi ma ɖi xɛsi nú yě ó.

³⁰Mawu Mavɔmavɔ, Mawu mitɔn e ɖo ali xlɛ́ mi wɛ ɔ́ ná fun ahwan nú mi, lě e é kó bló gbɔn bɔ mi mɔ ɖo Ejípu,

³¹bó lɛ́ mɔ ɖo gbětótló mɛ é. Mi ɖésú mɔ ganjí ɖɔ é hɛn mi awa mɛ lě e tɔ́ nɔ́ hɛn vǐ tɔn awa mɛ é ɖɔhun; mɔ̌ wɛ é hɛn mi gbɔn sín dɔ̌n káká wá fí.”

³² Mi ka ɖeji dó Mawu Mavɔmavɔ, Mawu mitɔn wú hwenɛ́nu ǎ.

³³É ká ɖo mɔ̌ có, é wɛ nɔ́ nɔ nukɔn nú mi ɖo ali jí, bó nɔ́ ba fí e mi ná ɖó gɔnu ɖó ɔ́ nú mi; zǎn kú ɔ́, é nɔ́ nɔ nukɔn mitɔn ɖo myɔ ɖé mɛ, bó nɔ xlɛ́ ali mi; kéze ɔ́, é nɔ́ nɔ nukɔn mitɔn ɖo akpɔ́kpɔ́ ɖaxó ɖé mɛ.

³⁴ Mawu Mavɔmavɔ se nǔ e húnhún ɖɔ wɛ mi ɖe lɛ́ɛ, bó sin xomɛ bó ɖɔ:

³⁵“Mi vǐ baɖabaɖa élɔ́ lɛ́ɛ ɔ́, mɛ ɖěbǔ ɖo mi mɛ, bó ná byɔ́ to ɖagbe e sín akpá un dó nú tɔ́gbó mitɔn lɛ́ɛ é mɛ ǎ. Un ɖɔ bó tɛ afɔ jí.

³⁶Kalɛ́bu Yefunnɛ́ɛ ví ɔ́ kɛ́ɖɛ́ wɛ ná mɔ to ɔ́. Un ná ná ɛ to e mɛ é tɛ afɔ é, bɔ é ná nyí é kpódó vǐ tɔn lɛ́ɛ kpó tɔn. Đó é nɔ gbejí nú nyɛ Mawu Mavɔmavɔ, bɔ nǔ bǐ vɔ ɖ'é wú.”

³⁷Mi wú wɛ Mawu Mavɔmavɔ sin xomɛ dó nyi lɔmɔ̌, bó ɖɔ nú mì ɖɔ: “Hwi lɔmɔ̌ ná byɔ́ to ɔ́ mɛ ǎ.

³⁸Amɔ̌, mɛsɛntɔ́ towe Jozuwée Nuni ví ɔ́ ná byɔ́ to ɔ́ mɛ. Nǎ ɛ akɔ́nkpinkpan, ɖó é wɛ ná kplá Izlayɛ́li ví lɛ́ɛ bɔ yě ná yí to ɔ́.”

³⁹Énɛ́ ɔ́ gúdo ɔ́, Mawu Mavɔmavɔ ɖɔ nú mi mɛ bǐ ɖɔ: “Mi nɔ ɖɔ mɛ e ná ɖu ɖo émí jí lɛ́ɛ ná bɛ́ vǐ mitɔn lɛ́ɛ. Din ɔ́, vǐ mitɔn énɛ́ lɛ́ɛ e má kó tunwun nǔ ɖagbe kpó nǔ nyanya kpó ǎ lɛ́ɛ wɛ ná byɔ́ to ɔ́ mɛ. Yě wɛ ná yí to ɔ́ bɔ é ná nyí yětɔn.

⁴⁰Lo ɔ́, midɛɛ lɛ́ɛ ɔ́, mi bo lɛ́ kɔ bó gbɔn gbětótló mɛ, bó tunta Xu Vɔvɔ ɔ́ wá jí.”

⁴¹Ée Mawu Mavɔmavɔ ɖɔ mɔ̌ ɔ́, mi ɖɔ nú mì ɖɔ: “Mǐ hu hwɛ dó Mawu Mavɔmavɔ. Amɔ̌, din ɔ́, mǐ jló ná yi ahwan fun gbé lě e Mawu Mavɔmavɔ, Mawu mǐtɔn ɖɔ gbɔn nú mǐ é.” Ée mi ɖɔ mɔ̌ ɔ́, mi mɛ ɖokpó ɖokpó sɔ́ ahwan nú, bó vɛdó ɖɔ toxo e ɖo sókan mɛ ɔ́ ná yí ɔ́, nǔ fífá wɛ nyí sín.

⁴²Mawu Mavɔmavɔ ka ɖɔ nú mì ɖɔ: “Đɔ nú yě ɖɔ yě má yi ahwan fun gbé ó, ɖó un ɖo kpɔ́ xá yě ǎ. Yě má sɔ́ yěɖée yi jó, bónú kɛntɔ́ yětɔn lɛ́ɛ hu yě ó.”

⁴³Ée Mawu Mavɔmavɔ ɖɔ mɔ̌ ɔ́, nyi lɔ ka gbɛ́ nú mi, bɔ mi jló ná ɖótó mì ǎ. Mi se tónú nú Mawu Mavɔmavɔ ǎ, bó syɛ́n ta bó yi só ɔ́ jí.

⁴⁴Bɔ Amɔliti lɛ́ɛ gosín káká só yětɔn ta fí e yě ɖe ɔ́, bó wá kpé mi ɖo Seyíi gbé jí, bó vun blá mi wǐin ɖɔhun, bó nya mi káká wá Hɔ́ɔma.

⁴⁵Ée mi lɛ́ kɔ ɔ́, mi yi Mawu Mavɔmavɔ gɔ́n bó sa vo n'i; é ká jló ná se gbe mitɔn ǎ; é wlí tó xó mitɔn wú ǎ.

⁴⁶Énɛ́ ɔ́, mi cí Kadɛ́ci-Baanɛ́ya fínɛ́ káká bɔ é cikɔ.