Read fon Sɛ́nflínmɛ 11 Bible Online

Sɛ́nflínmɛ 11 - fon bible

Sɛ́nflínmɛ 11

¹Mɔyízi ɖɔ: “Mi yí wǎn nú Mawu Mavɔmavɔ, Mawu mitɔn; mi zé sɛ́n tɔn lɛ́ɛ, gbetakɛ́n tɔn lɛ́ɛ kpó nǔ e é zɔ́n lɛ́ɛ kpó dó wa azɔ̌ ná hwebǐnu.

²Xó élɔ́ e ɖɔ wɛ un ɖe din ɔ́, vǐ mitɔn lɛ́ɛ ɖɔ ná wɛ un ɖe ǎ, ɖó lě e Mawu Mavɔmavɔ ɖe hlɔ̌nhlɔ́n tɔn xlɛ́ gbɔn ɔ́, yě mɔ ǎ, yě ká tunwun do ná ǎ. Midɛɛ lɛ́ɛ wɛ é ɖe xlɛ́; mi wɛ mɔ susu tɔn bó mɔ hlɔ̌nhlɔ́n tɔn e nukɔn nǔɖé má nɔ́ nɔ te ɖe ǎ é.

³ Mi wɛ mɔ nǔ e é jlɛ́ lɛ́ɛ, bó mɔ lě e Mawu Mavɔmavɔ ɖe xomɛsin tɔn xlɛ́ ɖo Ejípu gbɔn é: é ɖe xomɛsin tɔn xlɛ́ Ejípu xɔ́sú ɔ́, kpó to tɔn kpó.

⁴ Mi wɛ mɔ nǔ e é dó sin xá ahwangɔnu Ejípu tɔn é, lě e é wa sɔ́ yětɔn lɛ́ɛ kpó kɛkɛ́ví yětɔn lɛ́ɛ kpó nú gbɔn é. Mi mɔ lě e é dɔn Xu Vɔvɔ ɔ́ cyɔ́n yě gbɔn hwenu e yě ɖo mi nya wɛ é. Mawu Mavɔmavɔ bló bɔ yě cí ahwan bǐ gbídígbídí.

⁵Mi mɔ lě e é nya xɛ ɖo mi jí ɖo gbětótló mɛ, bó kplá mi wá fí gbɔn é.

⁶ Mi mɔ nǔ e é wa xá Eliavu e jɔ ɖo akɔta Hwlibɛ́ni tɔn mɛ ɔ́ sín vǐ Datáni kpó Abilámu kpó é. Mi Izlayɛ́li ví lɛ́ɛ nukún mɛ wɛ ayǐkúngban mi yě kpó asi yětɔn lɛ́ɛ kpó, vǐ yětɔn lɛ́ɛ kpó goxɔ yětɔn lɛ́ɛ kpó, kpódó nǔ e yě hɛn lɛ́ɛ bǐ kpó ɖe.

⁷Nukún mitɔn mɛ wɛ Mawu Mavɔmavɔ bló nǔ ɖaxó ɖaxó énɛ́ lɛ́ɛ ɖe.

⁸Mi bo zé sɛ́n e un dó nú mi égbé din lɛ́ɛ bǐ dó wa azɔ̌ ná. Énɛ́ ɔ́, mi ná mɔ hlɔ̌nhlɔ́n bó ná yí to e mɛ ná byɔ́ wɛ mi ɖe ɔ́,

⁹bó ná dɔ́ ji ɖo to e Mawu Mavɔmavɔ zin alɔ dó akɔ́n ɖɔ émí ná ná tɔ́gbó mitɔn lɛ́ɛ kpó vǐ mitɔn lɛ́ɛ kpó ɔ́ mɛ. To e mɛ nyibúnɔ́sin kpó wǐin kpó nɔ́ sa ɖe é.”

¹⁰Mɔyízi ɖɔ: “To e yí gbé mi ja é cí Ejípu to e mɛ mi gosín ɔ́ ɖɔhun ǎ. Mi lɛ gle ɖo Ejípu to ɔ́ mɛ ɔ́, sin wɛ mi nɔ hú ná mǎgle ɖɔhun.

¹¹Lo ɔ́, to e yí gbé mi xwe ɔ́, só kpó tɔdo kpó ɖo to ɔ́ mɛ kpɔ́, bɔ jǐ nɔ́ ja ganjí ɖo to ɔ́ mɛ.

¹²To ɖé wɛ bɔ Mawu Mavɔmavɔ, Mawu mitɔn kpé nukún d'é wú ganjí, bɔ nukún tɔn ɖ'é wú hwebǐnu sín xwe ɔ́ sín bǐbɛ́ káká yi xwe ɔ́ sín fífó.

¹³ “Ényí mi ɖó kan dó sɛ́n e un xa nú mi égbé din lɛ́ɛ wú, bó nyi ganjí ɔ́, ényí mi yí wǎn nú Mawu Mavɔmavɔ, Mawu mitɔn bó sɛn ɛ kpó ayi mitɔn bǐ kpó, kpódó lǐndɔ̌n mitɔn bǐ kpó ɔ́,

¹⁴é ná bló bɔ jǐ ná ja dó to mitɔn mɛ hwenu e é ɖó ná ja dó é; xwetají ná ja bɔ zǒjí lɔ ná ja, bɔ ji ná jɛ. Mi ná ya blěe ganjí; mi ná mɔ vɛ̌ɛn ganjí, bó ná mɔ ami ganjí.

¹⁵É ná bló bɔ gběhan ná wú nú kanlin mitɔn lɛ́ɛ, nǔɖuɖu ná kpé mi kpo.

¹⁶“Mi bo cɔ́ miɖée, bó má lɔn bónú nǔɖé ní ɖe mi sín Mawu sín ali ɔ́ jí, bónú mi sɛn nǔ ɖěvo lɛ́ɛ bó ɖe kɔ́ nú yě ó.

¹⁷Mi bló mɔ̌ gbeɖé ɔ́, Mawu Mavɔmavɔ ná sin xomɛ dó mi, bó ná sú jǐnukúnsin, bɔ jǐ sɔ́ ná ja ǎ, ayǐkúngban mitɔn sɔ́ ná ná jinukún ɖě ǎ, bɔ mi bǐ ná kú ɖo to ɖagbe e ná mi gbé Mawu Mavɔmavɔ ja é mɛ.

¹⁸Mi ná wlán sɛ́n e un xa nú mi lɛ́ɛ dó ayi mɛ, bó ná nɔ́ lin tamɛ dó yě wú. Mi ná blá yě dó awa abǐ nukɔn, bó má wá wɔn ó.

¹⁹Mi ná kplɔ́n yě vǐ mitɔn lɛ́ɛ; ayǐjínjɔ́n wɛ mi ɖe ɖo xwé mitɔn gbe oo, ali jí wɛ mi ɖe bó ɖo yiyi wɛ oo, ayǐmlɔ́mlɔ́ wɛ mi ɖe oo, fɔ́n wɛ mi fɔ́n oo, mi ná nɔ́ ɖo xó ɖɔ d'é wú wɛ.

²⁰ Mi ná wlán yě ɖó xwé mitɔn lɛ́ɛ wú, hɔnkpo lɛ́ɛ wú, bó wlán ɖó hɔntogbó toxo lɛ́ɛ tɔn sín kpo lɛ́ɛ wú.

²¹Énɛ́ ɔ́, nú jǐnukúnsin ɖo aga bɔ ayǐkúngban ɖo do jɛ́n wɛ ɔ́, mi kpó vǐ mitɔn lɛ́ɛ kpó ná dɔ́ ji ɖo to e Mawu Mavɔmavɔ zin alɔ dó akɔ́n ɖɔ émí ná ná tɔ́gbó mitɔn lɛ́ɛ é mɛ.

²²“Nǔgbó ɖɔ nú mi wɛ un ɖe, mi ɖó kan dó sɛ́n e un xa nú mi lɛ́ɛ wú, bó nyi ganjí. Mi yí wǎn nú Mawu Mavɔmavɔ, Mawu mitɔn; mi wa jlǒ tɔn, bó se tónú n'i, bó nɔ gbejí n'i bǐ.

²³Énɛ́ ɔ́, Mawu Mavɔmavɔ ná nya akɔta e sukpɔ́ bó syɛ́n hú mi lɛ́ɛ ɖo nukɔn mitɔn, bɔ mi ná yí to yětɔn.

²⁴ Fí e mi ná tɛ afɔ ɔ́ bǐ wɛ ná húzú mitɔn: to mitɔn sín dogbó ná bɛ́ sín gbětótló mɛ ɖo tofɔligbé káká yi Libáan só lɛ́ɛ kɔn ɖo totaligbé. Dogbó mitɔn ná bɛ́ sín tɔsisa ɖaxó Efláti tɔn ɔ́ kɔn, ɖo zǎnzǎnhwe jí, káká yi Mɛditɛlanɛ́ɛ xu ɔ́ kɔn ɖo gbadahwe jí.

²⁵Mɛ ɖěbǔ sixú nɔ te nukɔn mitɔn ǎ. Mi jɛ fí ɖěbǔ ɖo to ɔ́ mɛ ɔ́, Mawu Mavɔmavɔ, Mawu mitɔn ná bló, bɔ mɛ lɛ́ɛ ná ɖi xɛsi nú mi, bɔ ado ná nɔ́ hu yě dó mi wú, lě e Mawu Mavɔmavɔ, Mawu mitɔn ko dó akpá tɔn gbɔn nú mi é.

²⁶“Mi ɖótó mì! Égbé din ɔ́, mi ná kpɔ́n ɖɛxodómɛjí Mawu Mavɔmavɔ, Mawu mitɔn tɔn ɔ́ kpó nudómɛ tɔn kpó, bó ná sɔ́ ɖokpó.

²⁷Ényí mi nyi Mawu Mavɔmavɔ, Mawu mitɔn sín sɛ́n e un xa nú mi égbé lɛ́ɛ ɔ́, ɖɛ tɔn ná nɔ mi jí.

²⁸Ényí mi ma ka se tónú nú sɛ́n tɔn lɛ́ɛ ǎ, bó gosín ali e un ɖe nú mi é jí, bó yi sɛn nǔ ɖěvo e mi ma tunwun ǎ lɛ́ɛ ɔ́, nudómɛ tɔn ná nɔ mi jí.

²⁹ “Hwenu e Mawu Mavɔmavɔ, Mawu mitɔn ná kplá mi yi to e ná ná mi wɛ é ɖe ɔ́ mɛ bɔ mi ná yí ɔ́, mi ná nɔ xo ɖɛ dó mɛ jí ɖo Galizímu só jí, bó ná nɔ dó nu mɛ ɖo Ebalu só jí.

³⁰Só énɛ́ lɛ́ɛ ɖo Judɛ́ɛn tɔ ɔ́ gúdo, ɖo ali e gbɔn gbadahwe jí ɔ́ gúdo, ɖo fí e Kanáanu lɛ́ɛ nɔ́ nɔ ɖo Judɛ́ɛn é. Só lɛ́ɛ ɖo zungbó ɖaxó Mɔlée tɔn kpá, bó kpan nukɔn Gilugalu.

³¹Mi ɖíe ɖo Judɛ́ɛn tɔ ɔ́ ná dó asá wɛ, bó ná byɔ́ to e na ná mi wɛ Mawu Mavɔmavɔ, Mawu mitɔn ɖe bɔ é ná nyí mitɔn ɔ́ mɛ e. Mi ná yí to ɔ́, bó ná nɔ mɛ.

³²Mi bo ɖó ayi te, bó nyi sɛ́n Mawu Mavɔmavɔ tɔn lɛ́ɛ kpó gbetakɛ́n tɔn e un xa nú mi égbé din lɛ́ɛ bǐ kpó.”