Read fon Sɛ́nflínmɛ 13 Bible Online

Sɛ́nflínmɛ 13 - fon bible

Sɛ́nflínmɛ 13

¹ Mi bo ɖó ayi te, bó bló nǔ e ɖɔ nú mi wɛ un ɖe égbé din lɛ́ɛ bǐ; mi ma dó ɖě jí ó, mi ma ka ɖe ɖě kpo ó.

²Ayǐ ɖokpó sixú wá hɔ́n, bɔ gbeyíɖɔ ɖé abǐ amɔɛkantɔ́ ɖé ná ɖo mi mɛ, bó ná ɖɔ nú mi ɖɔ nǔjlɛ́jlɛ́ abǐ nǔdábaɖa ɖaxó ɖokpó ná jɛ.

³Ényí nǔjíjlɛ́ abǐ nǔdábaɖa e xó é ɖɔ ɔ́ jɛ nǔgbó, bónú é wá ɖɔ nú mi ɖɔ mi wá mǐ ná xwedó nǔ ɖěvo bó sɛn nǔ e mi ma tunwun ǎ lɛ́ɛ hǔn,

⁴mi ma yí gbe nú xó tɔn ó; lo ɔ́, mi ní tunwun ɖɔ Mawu Mavɔmavɔ, Mawu mitɔn wɛ ɖo mi dókpɔ́n wɛ mɔ̌, bó ná kpɔ́n ɖɔ mi ka yí wǎn nú émí kpó ayi mitɔn bǐ kpó, kpó lǐndɔ̌n mitɔn bǐ kpó a jí.

⁵Mi ma xwedó nǔ ɖěvo zɛ Mawu Mavɔmavɔ, Mawu mitɔn wú ó; mi ní ɖó sísí n'i, bó ylɔ́ sɛ́n tɔn lɛ́ɛ ɖɔ nǔ, bó se tónú n'i, bó sɛn é ɖokpónɔ géé bó tɛ́ dó wǔ tɔn.

⁶Gbeyíɖɔ abǐ amɔɛkantɔ́ mɔ̌hunkɔtɔn ɔ́, hu wɛ è nǎ hu i, ɖó é kplɔ́n nǔ mi ɖɔ mi ní lɛ́ kɔ sín Mawu Mavɔmavɔ, Mawu mitɔn e yí mi sín mɛ kannu, bó ɖe mi tɔ́n sín Ejípu ɔ́ gúdo. È nǎ hu i, ɖó é jló ná ɖe mi sín ali e Mawu Mavɔmavɔ, Mawu mitɔn ɖɔ mi ní gbɔn é jí. Lě e mi ná ɖe nǔ nyanya sín tɛ́ntin mitɔn gbɔn é nɛ́.

⁷Ayǐ ɖokpó sixú wá hɔ́n, bɔ mɛɖé ná ɖo mi mɛ bɔ nɔví tɔn nɔ tɔn xomɛ ví, abǐ vǐ tɔn súnnu abǐ nyɔ̌nu, abǐ asi tɔn ɖésú, abǐ xɔ́ntɔn tɔn vívɛ́ ɖé ná gbɔn nǔglɔ́, bó ná ɖɔ n'i ɖɔ: “Wǎ mǐ yi sɛn nǔ ɖěvo.” È ka na ɖɔ ɔ́, nǔmɛsɛn énɛ́ lɛ́ɛ ɔ́, tɔ́gbó mitɔn lɛ́ɛ tunwun ǎ, mi lɔmɔ̌ ká tunwun ǎ.

⁸Nǔmɛsɛn énɛ́ lɛ́ɛ wɛ akɔta e lɛ́ lɛ̌ dó mi lɛ́ɛ bǐ nɔ́ sɛn; yě wɛ akɔta e sɛkpɔ́ mi lɛ́ɛ kpó éé ɖo zɔ nú mi lɛ́ɛ kpó, abǐ éé ɖo gbɛ ɔ́ mɛ lɛ́ɛ bǐ nɔ́ sɛn.

⁹Mi ma yí gbe nú mɛ mɔ̌hunkɔtɔn ó; mi ma ɖótó e vɔ́vɔ́ ó. Mɛ e hu hwɛ mɔ̌hunkɔtɔn ɔ́, è nǎ kú nǔbláwǔ n'i kpɛví títí ɖé ǎ; è nǎ nɔ jǐ tɔn ǎ;

¹⁰hu wɛ è ɖǒ ná hu i dandan. Hwi mɛ e é jló ná dɔn dó hwɛ mɛ ɔ́ wɛ ná nyi awǐnnyaglo dó e dó nukɔn, bɔ togun ɔ́ bǐ ná zɔn jǐ tɔn bó hu.

¹¹Mawu Mavɔmavɔ ɖe mi tɔ́n sín Ejípu. Mɛ e ná ɖɔ émí ná lɛ́ kɔ nú mi sín gǔdo tɔn ɔ́, awǐnnyaglo wɛ è nǎ nyi dó mɛ mɔ̌hun káká bɔ é ná kú.

¹²Énɛ́ ɔ́, Izlayɛ́linu lɛ́ɛ bǐ ná se nǔ e jɛ é, bɔ xɛsi ná ɖi yě, bɔ yě sɔ́ ná hu hwɛ mɔ̌hun gbeɖé ǎ.

¹³Ayǐ ɖokpó sixú wá hɔ́n, bɔ mi ná se, bɔ è nǎ ɖɔ dó toxo e Mawu Mavɔmavɔ, Mawu mitɔn ná ná mi bɔ mi ná nɔ mɛ lɛ́ɛ ɖokpó wú ɖɔ:

¹⁴Gbɛtɔ́ nǔvɔ́nɔ ɖé lɛ́ɛ sí te ɖo togun mitɔn mɛ, bó dɔn mɛ e ɖo toxo énɛ́ mɛ lɛ́ɛ ɖɔ: “Mi wá mǐ yi sɛn nǔ ɖěvo.” È ka na ɖɔ ɔ́, mi tunwun nǔmɛsɛn énɛ́ lɛ́ɛ ǎ.

¹⁵Mi ná yi ba do ná, bó ná kan nǔ byɔ́, bó ná gbéjé kpɔ́n, bó ná mɔ nǔ jɛ wú céɖécéɖé; nú mi mɔ nǔgbó ɖɔ nǔ baɖabaɖa mɔ̌hun jɛ ɖo Izlayɛ́li hǔn,

¹⁶mi hu mɛ e ɖo toxo ɔ́ mɛ lɛ́ɛ bǐ, bó hu kanlin yětɔn lɛ́ɛ bǐ. Mi bló mɔ̌ ɔ́, mi ná gba toxo ɔ́ bǐ, bó ná hɛn nǔ e ɖ'é mɛ lɛ́ɛ bǐ gblé.

¹⁷Mi ná kplé dɔkun e ɖo toxo énɛ́ ɔ́ mɛ lɛ́ɛ bǐ ɖó tokplétɛn, bó ná flɔ́ myɔ d'é mɛ, bó ná dó toxo ɔ́ zo. É ná cí vɔ̌ e mi nɔ dó zo nú Mawu Mavɔmavɔ, Mawu mitɔn, lobo nɔ dó sɔ́ ɛ su ɔ́ ɖɔhun. Asangokan jɛ́n ná vun blá toxo énɛ́; è sɔ́ ná bló toxo énɛ́ ɔ́ ɖó gbeɖé ǎ.

¹⁸Mi ma zé nǔ ɖěbǔ ɖo nǔ e ná hɛn gblé wɛ è ɖe lɛ́ɛ mɛ ó; énɛ́ ɔ́, xomɛsin ɖaxó e jí Mawu Mavɔmavɔ, Mawu mitɔn ɖe ɔ́ ná fá, bɔ é ná ɖe xomɛnyínyɔ́ tɔn xlɛ́ mi, bó ná bló bɔ mi ná ji gba, lě e é kó dó akpá tɔn nú tɔ́gbó mitɔn lɛ́ɛ gbɔn é.

¹⁹Ényí mi se tónú n'i, bó nyi sɛ́n tɔn e xa nú mi wɛ un ɖe égbé lɛ́ɛ, bó wa nǔ e nyɔ́ nukún tɔn mɛ lɛ́ɛ ɔ́, é ná bló nǔ énɛ́ lɛ́ɛ bǐ nú mi.