Read fon Sɛ́nflínmɛ 17 Bible Online

Sɛ́nflínmɛ 17 - fon bible

Sɛ́nflínmɛ 17

¹Mi ma zé nyibú abǐ gbɔ̌ azinzɔnnɔ abǐ kanlin e ɖó blɔ̌ ɖo wǔ é ɖěbǔ dó sá vɔ̌ nú Mawu Mavɔmavɔ, Mawu mitɔn ó, ɖó walɔ mɔ̌hunkɔtɔn nɔ́ vɛ́ mɔ n'i.

²Ayǐ ɖokpó sixú wá hɔ́n ɖo toxo e Mawu Mavɔmavɔ, Mawu mitɔn ná ná mi lɛ́ɛ é ɖě mɛ, bɔ súnnu ɖé abǐ nyɔ̌nu ɖé sixú dó nǔ e Mavɔmavɔ gbɛ́ lɛ́ɛ ɖě sin bó gba akɔ e é jɛ xá mi é.

³ É sixú nyí vodún to ɖěvo mɛ tɔn lɛ́ɛ ɖě wɛ é jɛ kpo bó ɖe kɔ́ ná, abǐ hwe, sun abǐ nǔɖíɖó jǐxwé tɔn lɛ́ɛ ɖě wɛ é jɛ kpo bó ɖe kɔ́ ná. Mawu Mavɔmavɔ ka ɖɔ mi ní jɛ kpo nú nǔ énɛ́ lɛ́ɛ gbeɖé kpɔ́n ǎ!

⁴Ényí mɛɖé dó nǔ mɔ̌hun sin bónú mi se hǔn, mi ba do ná céɖécéɖé. Nú mi mɔ nǔgbó ɖɔ nǔ baɖabaɖa mɔ̌hun jɛ ɖo Izlayɛ́li hǔn,

⁵mi dɔn mɛ e hu hwɛ mɔ̌hunkɔtɔn ɔ́ jɛ toxo ɔ́ sín hɔntogbó jí, lobo nyi awǐnnyaglo dó e káká nú é kú. Mɛ ɔ́ sixú nyí súnnu, é sixú nyí nyɔ̌nu.

⁶ Cóbónú è nǎ ɖó kúhwɛ nú mɛɖé ɔ́, mɛ we abǐ mɛ atɔn wɛ ná ɖe kúnnu ɖɔ mɛ ɔ́ wa nǔ nyi do nǔgbó; mɛ ɖokpó géé sín kúnnuɖiɖe kpé ǎ.

⁷ Kúnnuɖetɔ́ lɛ́ɛ wɛ ná nyi awǐnnyaglo dó e jɛ nukɔn, bɔ togun ɔ́ bǐ ná nyi awǐnnyaglo dó e, bó ná hu i. Lě e mi ná sú walɔ nyanya kún dó gbɔn, ɖo to mitɔn mɛ é nɛ́.

⁸Ényí hwɛ ɖé ɖe, bó gló hwɛɖɔxɔsá e ɖo toxo ɔ́ mɛ lɛ́ɛ ɔ́, mi ná dɔn yi tɛn e Mawu Mavɔmavɔ, Mawu mitɔn ná sɔ́ bó ná nɔ́ ɖe susu tɔn xlɛ́ ɖe ɔ́ mɛ: é sixú nyí mɛhuhu, wǔgblémɛ, nǔdindɔn alɔkpa ɖěbǔ sín hwɛ.

⁹Mi ná yi ɖó xó ɔ́ te nú Levíi ví vɔ̌sánú-xwlémawutɔ́ lɛ́ɛ kpódó hwɛɖɔtɔ́ e jí azɔ̌ ɖe ɖo Mawu xwé gbe hwenɛ́nu é kpó, bɔ yě ná kplé bó ná ɖɔ lě e è nǎ gbo xó ɔ́ gbɔn é.

¹⁰Lě e yě ná gbo hwɛ ɔ́ gbɔn ɖo fínɛ́ ɔ́ wɛ mi ná xwedó, bó ná bló nǔ e yě ɖɔ nú mi é pɛ́pɛ́pɛ́.

¹¹Mi xwedó sɛ́n e yě ná dó nú mi lɛ́ɛ, bó bló nǔ e yě ná ɖɔ nú mi lɛ́ɛ é. Mi ma jó ɖěbǔ dó ó.

¹²Vɔ̌sánú-xwlémawutɔ́ ɖo Mawu Mavɔmavɔ xwé gbe bó ɖo azɔ̌ tɔn wa wɛ; hwɛɖɔtɔ́ lɔ ɖo fínɛ́ bó ɖo azɔ̌ tɔn wa wɛ. Ényí mɛ ɖé syɛ́n ta bó má ké ya nú xó yětɔn ǎ ɔ́, è ɖǒ ná hu mɛ ɔ́. Lě e mi ná sú walɔ nyanya kún dó gbɔn ɖo tɛ́ntin mitɔn, ɖo Izlayɛ́li é nɛ́.

¹³Énɛ́ ɔ́, togun ɔ́ bǐ ná se nǔ e jɛ ɔ́, bɔ xɛsi ná jɛ yě jí, bɔ mɛ ɖěbǔ sɔ́ ná syɛ́n ta mɔ̌ ǎ.

¹⁴ Ée mi ná tɛ afɔ to e Mawu Mavɔmavɔ, Mawu mitɔn ná ná mi é mɛ, bó ná yí to ɔ́, bó ná cí fínɛ́ ɔ́, mi sixú wá ɖó jlǒ ɖɔ émí lɔ ná sɔ́ axɔ́sú, akɔta e lɛ́ dó mi lɛ́ɛ é ɖɔhun.

¹⁵Ényí nǔ nyí mɔ̌ hǔn, mi ma sɔ́ to ɖěvo mɛ nu axɔ́sú ó. Izlayɛ́li ví wɛ mi ná sɔ́. Mɛ e Mawu Mavɔmavɔ, Mawu mitɔn ɖésú zé ɔ́ wɛ mi ná sɔ́ axɔ́sú.

¹⁶ Mɛ e mi ná sɔ́ axɔ́sú ɔ́ ɖó ná ba ná ɖó sɔ́ gěgé ǎ, é ká ná sɛ́ mɛ dó Ejípu, bó ná xɔ sɔ́ dó éé ɖo así tɔn lɛ́ɛ jí ǎ, ɖó Mawu Mavɔmavɔ ko ɖɔ nú mi ɖɔ mi kún sɔ́ ná lɛ́ kɔ yi Ejípu ó.

¹⁷ É ní má ɖó asi gěgé ó; é táá jó Mawu dó. É ní má kplé kpatágan kpó siká kpó kɔn nyi kpɔ́ gégé ó.

¹⁸Ée é ká ná yi zinkpo jí ɔ́, é ná yí sɛ́n énɛ́ ɔ́ ɖo Levíi ví vɔ̌sánú-xwlémawutɔ́ lɛ́ɛ sí, bó ná wlán lobo hɛn.

¹⁹É ná hɛn sɛ́nwéma ɔ́, bó ná nɔ́ xa hwebǐnu ɖo gbɛzán tɔn bǐ mɛ. Énɛ́ wɛ ná zɔ́n bɔ é ná sixú ɖó sísí nú Mawu Mavɔmavɔ, Mawu mitɔn, bó ná kpé nukún dó sɛ́n lɛ́ɛ kpódó gbetakɛ́n lɛ́ɛ kpó wú, bó ná nyi bǐ.

²⁰Énɛ́ ná zɔ́n bɔ é sɔ́ ná mɔ ɖɔ émí wɛ nyí nǔ hú mɛ e ɖo togun ɔ́ mɛ é bǐ, bó ná gɔn xwi jí nɔ nú sɛ́n ɔ́ ǎ. Énɛ́ ɔ́, é ɖésú kpódó vǐ tɔn lɛ́ɛ kpó ná ɖu axɔ́sú ɖo Izlayɛ́li togun ɔ́ nu káká.