Read fon Sɛ́nflínmɛ 20 Bible Online

Sɛ́nflínmɛ 20 - fon bible

Sɛ́nflínmɛ 20

¹Ényí mi sɔ́ ahwan nú, bó xwe ahwan fun xá kɛntɔ́ gbé, bó ná bó mɔ ɖɔ sɔ́ tɔn lɛ́ɛ, ahwankɛkɛ́ví tɔn lɛ́ɛ kpó ahwanfuntɔ́ tɔn lɛ́ɛ kpó sukpɔ́ hú émítɔn lɛ́ɛ hǔn, mi ma ɖi xɛsi nú yě ó, ɖó Mawu Mavɔmavɔ, Mawu mitɔn e ɖe mi tɔ́n sín Ejípu tomɛ ɔ́ ɖo kpɔ́ xá mi.

²Nú é yá nú mi ja ahwan fun gbé ɔ́, vɔ̌sánú-xwlémawutɔ́ ɔ́ ná wá togun ɔ́ nukɔn, bó ná ɖɔ xó n'i.

³É ná ɖɔ: “Izlayɛ́li ví e mi, mi ɖótó mì! Mi ɖíe xwe ahwan fun xá kɛntɔ́ mitɔn lɛ́ɛ gbé égbé e, mi ma nú ado hu mi ó, mi ma ɖi xɛsi ó, mi ma dán jaja ó, mi ma sísɔ́ ɖo nukɔn yětɔn ó.

⁴Đó Mawu Mavɔmavɔ, Mawu mitɔn ná ɖo nukɔn nú mi, bó ná gɔ́ alɔ nú mi, bó ná fun ahwan xá kɛntɔ́ mitɔn lɛ́ɛ, bó ná ná ɖuɖéjí mi.”

⁵Énɛ́ ɔ́ gúdo ɔ́, ahwangán e nɔ́ yí mɛ dó ahwan mɛ lɛ́ɛ ná ɖɔ nú sɔ́ja lɛ́ɛ ɖɔ: “Mɛ ɖé ɖo mi mɛ bó sá xwé yɔ̌yɔ́ bó má kó nɔ mɛ kpɔ́n a? Mɛ mɔ̌hun ɖé ɖo mɛ mɛ hǔn, ní lɛ́ kɔ yi xwé; é má nyí mɔ̌ ǎ ɔ́, é sixú cí ahwan, bɔ mɛ ɖěvo ná nɔ mɛ.

⁶Mɛɖé ɖo mi mɛ bó ɖó vǐwungbo, bó má ko gbɛ sínsɛ́n nukɔn nukɔntɔn lɛ́ɛ ɖu kpɔ́n a? Mɛ ɔ́ ní lɛ́ kɔ yi xwé; é má nyí mɔ̌ ǎ ɔ́, mɛ ɔ́ sixú cí ahwan, bɔ mɛ ɖěvo ná gbɛ vǐwun tɔn lɛ́ɛ.

⁷Mɛ ɖé ɖo mi mɛ bó ɖó asi xɔ́ntɔn, bó má kó da a? Mɛ mɔ̌hun ɖo mɛ mɛ hǔn, ní lɛ́ kɔ bó yi xwé; é má nyí mɔ̌ ǎ ɔ́, é sixú cí ahwan, bɔ súnnu ɖěvo ná da nyɔ̌nu ɔ́.”

⁸Ahwangán lɛ́ɛ ná lɛ́ yí xó, bó ná ɖɔ nú togun ɔ́ ɖɔ: “Mɛɖé ɖo mi mɛ, bó ɖo xɛsi jí, bó má sixú kpan akɔ́n a? Mɛ mɔ̌hun ɖe hǔn, ní lɛ́ kɔ bó yi xwé, bó má gbɔ́jɔ́ kanmɛ nú nɔví tɔn lɛ́ɛ bónú yě bɛ́ xɛsi éyɛ́ ɖɔhun ó.”

⁹Ényí ahwangán lɛ́ɛ ɖɔ xó fó ɔ́, yě ná sɔ́ sɔ́jagán, bɔ yě ná nɔ ahwangɔnu ɔ́ nu.

¹⁰Cóbónú mi ná yi tɔ́n ahwan toxo ɖé ɔ́, mi ná tó dó gbe fífá nú to ɔ́ mɛ nu lɛ́ɛ hwɛ̌.

¹¹Nú yě yí gbe nú mi kpó gbe fífá kpó, bó hun toxo yětɔn sín hɔn lɛ́ɛ nú mi ɔ́, mi ná ɖɔ bɔ mɛ e ɖo toxo ɔ́ mɛ lɛ́ɛ bǐ ná jɛ kan mitɔn nu, bó ná nɔ wa azɔ̌ nú mi.

¹²Amɔ̌, yě má dó gbe fífá nú mi ǎ, bó sí ahwan te ɔ́, mi ná xá toxo ɔ́ bǐ.

¹³Mawu Mavɔmavɔ, Mawu mitɔn ná jó toxo ɔ́ nú mi, bɔ mi ná hu súnnu e ko ɖo toxo ɔ́ mɛ lɛ́ɛ bǐ.

¹⁴Amɔ̌, mi ná bɛ́ nyɔ̌nu lɛ́ɛ, yɔkpɔ́vú lɛ́ɛ, kanlin lɛ́ɛ, kpódó nǔ e mi ná mɔ ɖo toxo ɔ́ mɛ lɛ́ɛ bǐ kpó, bɔ yě ná nyí dɔkun e mi mɔ ɖo ahwangbénu lɛ́ɛ. Dɔkun kɛntɔ́ mitɔn lɛ́ɛ tɔn ná húzú mitɔn, ɖó Mawu Mavɔmavɔ, Mawu mitɔn wɛ ná mi.

¹⁵Lě e mi ná wa nǔ xá toxo e ɖo zɔ vóéé, bó má ɖo to e mɛ ná nɔ wɛ mi ɖe ǎ mɛ lɛ́ɛ gbɔn ɔ́ nɛ́.

¹⁶Amɔ̌, toxo e ɖo ayǐkúngban e Mawu Mavɔmavɔ, Mawu mitɔn ná ná mi lɛ́ɛ jí ɔ́, mi ná jó gbɛtɔ́ ɖokpó dó nyi gbɛ ɖe mɛ ǎ.

¹⁷Hǔn, mi ná hu Hitíti lɛ́ɛ bǐ, Amɔliti lɛ́ɛ bǐ, Kanáanu lɛ́ɛ bǐ, Pɛliziti lɛ́ɛ bǐ, Hivíti lɛ́ɛ bǐ kpó Jebuzinu lɛ́ɛ bǐ kpó lě e Mawu Mavɔmavɔ, Mawu mitɔn zɔ́n mi gbɔn é.

¹⁸É má nyí mɔ̌ ǎ ɔ́, yě ná kplɔ́n nǔ baɖabaɖa e yě nɔ́ dó sin bó nɔ́ nyɔ́ ɖo vodún yětɔn lɛ́ɛ gɔ́n lɛ́ɛ mi, bɔ mi ná hu hwɛ dó Mawu Mavɔmavɔ, Mawu mitɔn.

¹⁹Ényí mi tunwun ɖɔ émí ná yi tɔ́n ahwan toxo ɖé, bó ná xá toxo ɔ́ xɔ azǎn cóbó ná yí hǔn, mi ma gbo atín e è nɔ ɖu sínsɛ́n tɔn lɛ́ɛ ó; mi ná ɖu atínsínsɛ́n lɛ́ɛ; mi ma ka gbo atín lɛ́ɛ ó. Atín e ɖo gběhan mɛ ɔ́ nyí gbɛtɔ́ bɔ mi ná yi tɔ́n ahwan ǎ.

²⁰Atín e mi mɔ ɖɔ è kún nɔ́ ɖu sínsɛ́n tɔn ó lɛ́ɛ kɛ́ɖɛ́ wɛ mi ná gbo, lobo ná zán hwenu e mi ná ɖo ahwan fun wɛ ɔ́, káká bó ná yí toxo ɔ́.