Read fon Sɛ́nflínmɛ 23 Bible Online

Sɛ́nflínmɛ 23 - fon bible

Sɛ́nflínmɛ 23

¹Mɛɖé má yí tɔ́ tɔn sín asi ó; mɛ e bló mɔ̌ ɔ́, kɔ́n tɔ́ ɔ́ sín wi.

² Mɛ e è gba ajiglokwín tɔn lɛ́ɛ, abǐ mɛ e è sɛ́n súnnuxwé tɔn ɔ́ sixú nɔ mawusɛntɔ́ lɛ́ɛ sín agun ɔ́ mɛ ǎ.

³ Agaví ɖě ná sixú nɔ mawusɛntɔ́ lɛ́ɛ sín agun ɔ́ mɛ ǎ. Mɛ e nyí agaví ɔ́ káká jɛ vǐ tɔn ví jí yi jijimɛ wǒgɔ́ ɔ́ jí ɖě ná sixú nɔ mawusɛntɔ́ lɛ́ɛ sín agun ɔ́ mɛ ǎ.

⁴Amumɔ́ɔ ví lɛ́ɛ kpó Mɔwabunu lɛ́ɛ kpó ɖě ná sixú nɔ mawusɛntɔ́ lɛ́ɛ sín agun ɔ́ mɛ gbeɖé ǎ. Bɛ́ sín vǐ yětɔn jí káká yi jijimɛ wǒgɔ́ ɔ́ jí lɔmɔ̌ ná sixú nɔ mawusɛntɔ́ lɛ́ɛ sín agun ɔ́ mɛ ǎ.

⁵Đó hwenu e mi gosín Ejípu tomɛ wá xweyǐgbe ɔ́, yě hɛn nǔɖuɖu kpó sin kpó wá nú mi ǎ; é nyɔ́ wa ɔ́, yě dǒ nǔ nu nú nǔkantɔ́ Baláamu, Beɔ́ɔ ví ɔ́, bónú é ná dó nu mi; é gosín Petɔ́ɔ toxo ɔ́ mɛ ɖo Mɛzopotamíi, bó wá.

⁶ Amɔ̌, Mawu Mavɔmavɔ, Mawu mitɔn gbɛ́ Baláamu xó, bó sɔ́ nu e é dó mi ɔ́ dó húzú nyɔ̌ná, ɖó Mawu Mavɔmavɔ yí wǎn nú mi.

⁷Nú mi kpo ɖo gbɛ jɛ́n wɛ ɔ́, mi ma ba fífá nú togun we énɛ́ lɛ́ɛ ó; mi ma ka ba nukɔn yiyi yětɔn gbeɖé ó.

⁸Mi ma gbɛ́ wǎn nú Edɔ́munu lɛ́ɛ ó, nɔví mitɔn wɛ yě nyǐ; mi ma ka gbɛ́ wǎn nú Ejípunu lɛ́ɛ ó, ɖó mi ko nɔ to yětɔn mɛ kpɔ́n.

⁹Togun we énɛ́ lɛ́ɛ e wá ɖo mi mɛ lɛ́ɛ hɛn ɔ́, yě ná byɔ́ mawusɛntɔ́ lɛ́ɛ sín agun ɔ́ mɛ bɛ́ sín vǐvú vivu yětɔn lɛ́ɛ jí káká sɔ́yi.

¹⁰Mi yi ahwan fun xá kɛntɔ́ mitɔn lɛ́ɛ gbé, bó yi ɖó gɔnu ɖó fí ɖé hǔn, mi cɔ́ miɖée, bó má wa nǔ e ná hɛn mi blí lɛ́ɛ ɖě ó.

¹¹Ényí mɛɖé ɖo mi mɛ, bó húzú mɛ blíblí zǎn mɛ, ɖó sin e nɔ gosín súnnuxwé ɔ́ wú ɔ́, é ná tɔ́n sín fí e mi ɖó gɔnu ɖó é, bó sɔ́ ná wá fínɛ́ có zǎn ná kú ǎ.

¹²Lo ɔ́, nú hwe jɛ xɔ yi jí ɔ́, é ná yi lɛ wǔ, bɔ nú hwe ɔ́ yi xɔ ɔ́, é ná wá fí e yě ɖó gɔnu ɖó ɔ́.

¹³Mi ná ɖó fí ɖé, bɔ é ná ɖo zɔ nú fí e mi ɖó gɔnu ɖó é kpɛɖé, bó ná nɔ́ yi afɔ jí ɖe.

¹⁴Mɛ ɖokpó ɖokpó ná ɖó nǔɖé, bɔ nú é sɛ yi zɔ ɔ́, é ná nɔ́ dó kun do, bɔ nú é yi afɔ jí ɔ́ kpé ɔ́, é ná zé dó dɔn kɔ́ d'é jí.

¹⁵Đó Mawu Mavɔmavɔ, Mawu mitɔn ɖésú ná nɔ́ ɖi sa gbɔn fí e mi ɖó gɔnu ɖó é, bó ná hwlɛ́n mi gán ɖo kɛntɔ́ sí, bó ná jó yě nú mi. Hǔn fí e mi ɖe ɔ́ ɖó ná nyí fí mímɛ́ ɖé; é nyɔ́ nú Mawu Mavɔmavɔ, Mawu mitɔn ná mɔ nǔɖé ɖo fínɛ́, bɔ é ná fyɔ́n wǔ n'i, bɔ é ná gɔn fí e mi ɖó gɔnu ɖó é ǎ.

¹⁶Nú kannumɔ ɖé hɔn, bó wá cí xwé mitɔn gbe ɔ́, mi ná kplá ɛ yi jó nú gǎn tɔn ǎ.

¹⁷Toxo e jló e ɔ́ mɛ wɛ é ná nɔ, bó ná nɔ fí e jló e ɔ́ ɖo mi mɛ. Mi ma ka dɔn ɛ zán ó.

¹⁸ Izlayɛ́li ví súnnu abǐ nyɔ̌nu ɖěbǔ ɖó ná nɔ lɛ aga dó sɛn hun ǎ.

¹⁹Mi ma nú mɛ e nɔ wa mɔ̌ lɛ́ɛ ɖě hɛn agakwɛ́ yětɔn lɛ́ɛ ɖě wá Mawu Mavɔmavɔ, Mawu mitɔn xwé gbe bó ná ɖe akpá e yě dó é ná, nú mi yí ó. Đó Mawu Mavɔmavɔ, Mawu mitɔn mɔ walɔ yětɔn énɛ́ lɛ́ɛ dó mɔ hɛ̌n nú.

²⁰ Mi ma nya nǔɖé nú nɔví mitɔn bó yí d'é jí ó; é sixú nyí akwɛ́, é sixú nyí nǔɖuɖu, é sixú nyí nǔ alɔkpa ɖěbǔ, mi ma yí d'é jí ó.

²¹Ényí to ɖěvo mɛ nu wɛ mi nya nǔɖé ná ɔ́, mi sixú yí d'é jí. É ká nyí nɔví mitɔn wɛ ɔ́, mi ná yí d'é jí ǎ. Mi nyi sɛ́n énɛ́ ɔ́ ɖo to e yí gbé mi ja ɔ́ mɛ; énɛ́ ɔ́, Mawu Mavɔmavɔ, Mawu mitɔn ná dó acɛ nǔ e mi ná wa lɛ́ɛ bǐ jí.

²² Ényí mi dó akpá ɖɔ émí ná xwlé nǔníná ɖé Mawu Mavɔmavɔ hǔn, mi yá wǔ ɖe. É má nyí mɔ̌ ǎ ɔ́, Mawu Mavɔmavɔ, Mawu mitɔn ná byɔ́ axɔ́ tɔn mi. Bɔ nǔ énɛ́ ɔ́ ká ná nyí hwɛ bó ná nɔ kɔ nú mi.

²³Lo ɔ́, ényí mi ma dó akpá ǎ ɔ́, é nyí hwɛ nú mi ǎ.

²⁴Ényí mi kɛ nu mitɔn bó dó akpá ɖé nú Mawu Mavɔmavɔ hǔn, mi ɖe akpá ɔ́ pɛ́pɛ́pɛ́, ɖó mi ɖésúnɔ wɛ kɛ nu mitɔn bó dó akpá nú Mawu Mavɔmavɔ, Mawu mitɔn.

²⁵Nú mi ɖo mɛ ɖěvo sín vǐwungbo mɛ gbɔn wɛ ɔ́, mi hɛn ɔ́, mi ná ba bó ɖu lě e é jló mi gbɔn é; amɔ̌, mi ɖó ná gbɛ dó nǔ mɛ hɛn yi ǎ.

²⁶Mɔ̌ ɖokpó ɔ́, nú mi ɖo mɛ ɖěvo sín blěegbo mɛ gbɔn wɛ ɔ́, mi hɛn ɔ́, mi ná ba ɖě ɖó alɔ wú; amɔ̌, mi ná bɔ alǐnnyánú nyi mɛ bó ba ǎ.