Read fon Sɛ́nflínmɛ 26 Bible Online

Sɛ́nflínmɛ 26 - fon bible

Sɛ́nflínmɛ 26

¹Mi ná yi to e Mawu Mavɔmavɔ, Mawu mitɔn ná ná mi bɔ é ná nyí mitɔn ɔ́ mɛ, bó ná yí to ɔ́. Ée mi ná yi jɛ to ɔ́ mɛ ɔ́,

² jinukún e ná nɔ́ nyɔ́ dó nukɔn ɖo to ɔ́ mɛ lɛ́ɛ ɔ́, mi ná nɔ́ ɖe ɖě ɖó vo bó bɛ́ dó xasun mɛ, bó ná nɔ́ yi fí e Mawu Mavɔmavɔ, Mawu mitɔn ná sɔ́, bó ná ɖe susu tɔn xlɛ́ ɖe é.

³Mi jɛ dɔ̌n ɔ́, mi ná yi vɔ̌sánú-xwlémawutɔ́ e jí azɔ̌ ɖe gbe nɛ́ gbe ɔ́ gɔ́n, bɔ mɛ ɖokpó ɖokpó ná sɔ́ xasun tɔn jó, bó ná ɖɔ: “Un ɖo ɖiɖɔ nú Mawu Mavɔmavɔ, Mawu towe wɛ ɖɔ un wá to e sín akpá é dó nú tɔ́gbó mǐtɔn lɛ́ɛ bó xwlé nǔ d'é jí é mɛ égbé.”

⁴Vɔ̌sánú-xwlémawutɔ́ ɔ́ ná yí xasun ɔ́ ɖo así mitɔn, bó ná sɔ́ ɖó vɔ̌sákpe Mawu Mavɔmavɔ, Mawu mitɔn tɔn nukɔn.

⁵Bɔ mi mɛ ɖokpó ɖokpó ná yí xó ɖo Mawu Mavɔmavɔ, Mawu mitɔn nukɔn, bó ná ɖɔ: “Tɔ́ ce ɔ́, Alamunu wɛ, é ɖó fí ɖé tawun bó nɔ́ nɔ ɖ'ayǐ ǎ. É nɔ́ ɖo yiyi wɛ, bó wá yi Ejípu, bó nyí jǒnɔ ɖo fínɛ́, é kpó mɛ kwín we e é kplá lɛ́ɛ kpó. É ɖo fínɛ́ káká bɔ mɛ tɔn lɛ́ɛ wá sukpɔ́ káká bó húzú togun ɖaxó ɖokpó, bó syɛ́n káká.

⁶Ejípunu lɛ́ɛ ká wá jɛ ya dó nú mǐ jí, bó jɛ mǐ táfú jí, bó nɔ́ sɔ́ azɔ̌ syɛ́nsyɛ́n lɛ́ɛ dó así nú mǐ.

⁷Énɛ́ ɔ́, mǐ sú xó ylɔ́ Mawu Mavɔmavɔ, Mawu tɔ́gbó mǐtɔn lɛ́ɛ tɔn, bɔ Mawu Mavɔmavɔ se gbe mǐtɔn; é mɔ ɖɔ mǐ ɖo ya ji wɛ, é mɔ ɖɔ è ɖo mǐ táfú wɛ; é mɔ ɖɔ nǔ mǐtɔn blá wǔ.

⁸Énɛ́ ɔ́, Mawu Mavɔmavɔ zán hlɔ̌nhlɔ́n bǐ, nǔ hu ado, nǔ syɛ́nsyɛ́n bǐ, nǔjíwǔ kpó nǔjlɛ́jlɛ́ kpó dó ɖe mǐ tɔ́n sín Ejípu.

⁹É kplá mǐ wá fí élɔ́, bó ná to élɔ́ mǐ; to e mɛ wǐin kpó nyibúnɔ́sin kpó nɔ sa ɖe é.

¹⁰Énɛ́ ɔ́ wú wɛ un hɛn jinukún nukɔntɔn e un ya ɖo ayǐkúngban e é ná mì é jí wá n'i.” Énɛ́ ɔ́ gúdo ɔ́, mi mɛ ɖokpó ɖokpó ná bɛ́ nǔ lɛ́ɛ ɖó Mawu Mavɔmavɔ, Mawu mitɔn nukɔn, bó ná ɖe kɔ́ n'i.

¹¹Énɛ́ ɔ́ gúdo ɔ́, mi kpó Levíi ví lɛ́ɛ kpó, jǒnɔ e ɖo to mitɔn mɛ lɛ́ɛ kpó bǐ ná j'awǎ. Mi ná j'awǎ, ɖó ɖagbe e Mawu Mavɔmavɔ, Mawu mitɔn bló nú mi kpó xwédo mitɔn kpó é tamɛ.

¹² Xwe atɔn mɛ atɔn mɛ wɛ mi ná nɔ́ ná mǎɖówǒ. Hǔn xwe atɔn mɛ atɔn mɛ ɔ́, mi mɛ ɖokpó ɖokpó ná nɔ́ ɖe mǎɖówǒ ɖo nǔ e mi dó lɛ́ɛ bǐ jí, bó ná nɔ́ ná Levíi ví lɛ́ɛ, jǒnɔ e ɖo to mitɔn mɛ lɛ́ɛ, tɔ́cyɔvǐ lɛ́ɛ kpó asúkúsi lɛ́ɛ kpó, bɔ yě ná nɔ́ ɖu nǔ gɔ́ xo ɖo gɔ̌n mitɔn.

¹³Mi mɛ ɖokpó ɖokpó ná ɖɔ ɖo Mawu tɔn nukɔn ɖɔ: “Nǔkún e un sɔ́ ɖó vo nú we ɔ́, un ɖe ɖě kpo ǎ, un nǎ Levíi ví lɛ́ɛ, jǒnɔ lɛ́ɛ, tɔ́cyɔvǐ lɛ́ɛ kpó asúkúsi lɛ́ɛ kpó, bɔ é kpé yě lě e a ɖɔ gbɔn é. Un gba sɛ́n e a dǒ lɛ́ɛ ɖě ǎ, un ka wɔn nǔ e a zɔ̌n mì lɛ́ɛ ɖě ǎ.

¹⁴Nǔ e nyí towe ɔ́, un zán ɖě hwenu e un ɖo aluwɛ mɛ é ǎ. Un ka ɖe mǎɖówǒ lɛ́ɛ ɖě hwenu e un nyí mɛ blíblí é ǎ. Un ká zán ɖě hwenu e cyɔ kú mì é ǎ. Un se xó e Mawu Mavɔmavɔ, Mawu ce ɖɔ é, un bló lě e a zɔ̌n mì gbɔn é.

¹⁵Nyi kɔ kpɔ́n mǐ jí sín jǐxwé dɔ̌n. Xo ɖɛ dó Izlayɛ́li togun towe ɔ́ jí; xo ɖɛ dó ayǐkúngban e a nǎ mǐ lě e a ko dó akpá tɔn nú tɔ́gbó mǐtɔn lɛ́ɛ gbɔn é jí. Xo ɖɛ dó to élɔ́ e mɛ wǐin kpó nyibúnɔ́sin kpó nɔ sa ɖe é jí.”

¹⁶Mɔyízi ɖɔ: “Égbé ɔ́, Mawu Mavɔmavɔ, Mawu mitɔn zɔ́n mi ɖɔ mi ní nyi sɛ́n e émí dó lɛ́ɛ, bó wa nǔ e émí zɔ́n lɛ́ɛ. Mi ná ɖó kan dó sɛ́n énɛ́ lɛ́ɛ wú, bó ná nyi kpó ayi mitɔn bǐ kpó, kpó lǐndɔ̌n mitɔn bǐ kpó.

¹⁷Égbé din ɔ́, mi wɛ byɔ́ Mawu Mavɔmavɔ bɔ é dó akpá nú mi ɖɔ émí ná nyí Mawu mitɔn, bɔ mi ná xwedó e, bó ná nyi sɛ́n tɔn lɛ́ɛ, bó ná wa nǔ e é zɔ́n lɛ́ɛ, bó ná xwedó gbeta tɔn lɛ́ɛ, bó ná se tónú n'i.

¹⁸ Mawu Mavɔmavɔ ka byɔ́ mi, bɔ mi dó akpá n'i ɖɔ émí ná nyí togun é ɖokpónɔ géé tɔn, lě e é kó ɖɔ gbɔn é, bó ná bló nǔ e é zɔ́n lɛ́ɛ bǐ.

¹⁹Énɛ́ ɔ́, é ná bló bɔ mi ná hú gǎn togun e é kó bló lɛ́ɛ bǐ ɖo susu mɛ, ɖo ɖɛkpɛ mɛ; nyǐkɔ mitɔn ná nɔ aga nú yě bǐ, bɔ mi ná nyí togun e Mawu Mavɔmavɔ, Mawu mitɔn sɔ́ ɖó vo lě e é kó dó akpá tɔn nú mi gbɔn é.”