Read fon Sɛ́nflínmɛ 27 Bible Online

Sɛ́nflínmɛ 27 - fon bible

Sɛ́nflínmɛ 27

¹Mɔyízi kpó tomɛxó lɛ́ɛ kpó wá Izlayɛ́li togun ɔ́ nukɔn, bɔ Mɔyízi ɖɔ nú togun ɔ́ ɖɔ: “Sɛ́n e dó nú mi wɛ un ɖe égbé din lɛ́ɛ ɔ́, mi ná nyi bǐ sésé.

² Gbe e gbe mi ná dó asá Judɛ́ɛn tɔ ɔ́ ɖidó to e ná mi wɛ Mawu Mavɔmavɔ, Mawu mitɔn ɖe ɔ́ mɛ ɔ́, mi ná tun awǐnnya ɖaxó ɖaxó te, bó ná sá nǔ wěwé dó,

³bó ná wlán sɛ́n lɛ́ɛ bǐ dó awǐnnya lɛ́ɛ wú. Mɔ̌ wɛ mi ná bló cóbó ná byɔ́ to e ná mi wɛ Mawu Mavɔmavɔ, Mawu mitɔn ɖe ɔ́ mɛ, bɔ é ná nyí mitɔn lě e é kó dó akpá tɔn nú tɔ́gbó mitɔn lɛ́ɛ gbɔn é; to énɛ́ mɛ ɔ́, wǐin kpó nyibúnɔ́sin kpó wɛ nɔ́ sa tɔ ɖ'é mɛ.

⁴Nú mi dó asá Judɛ́ɛn tɔ ɔ́, mi ná tun awǐnnya e xó un ɖɔ nú mi lɛ́ɛ te ɖo Ebalu só ɔ́ jí, bó ná sá nǔ wěwé dó.

⁵ Fínɛ́ ɖokpó ɔ́ wɛ mi ná mɛ vɔ̌sákpe ɖe nú Mawu Mavɔmavɔ, Mawu mitɔn; awǐnnya e wú alǐnnyánú ɖěbǔ má jɛ kpɔ́n gbeɖé ǎ lɛ́ɛ wɛ mi ná dó mɛ vɔ̌sákpe ɔ́ ná.

⁶Awǐnnya e wú è má dó akpa ɖo fí ɖěbǔ ǎ lɛ́ɛ wɛ mi ná dó mɛ vɔ̌sákpe Mawu Mavɔmavɔ, Mawu mitɔn tɔn ná. Fínɛ́ wɛ mi ná nɔ́ sá vɔ̌ e è nɔ dó zo lɛ́ɛ nú Mawu Mavɔmavɔ, Mawu mitɔn ɖe.

⁷Mi ná sá kɔnɖókpɔ́ vɔ́ ɔ́, bó ná ɖu mitɔn ɔ́ ɖo fínɛ́, bó ná j'awǎ ɖo Mawu Mavɔmavɔ, Mawu mitɔn nukɔn.

⁸Mi ná wlán sɛ́n e un xa nú mi lɛ́ɛ bǐ ɖó awǐnnya e mi tun te lɛ́ɛ wú, bɔ é ná ɖi wun ganjí.”

⁹Énɛ́ ɔ́ gúdo ɔ́, Mɔyízi kpó vɔ̌sánú-xwlémawutɔ́ Levíi ví lɛ́ɛ kpó wá togun ɔ́ nukɔn, bɔ Mɔyízi ɖɔ: “Izlayɛ́li ví e mi, mi nɔ tóó bó se. Égbé din ɔ́, mi húzú togun Mawu Mavɔmavɔ, Mawu mitɔn tɔn.

¹⁰Hǔn mi bo ɖótó Mawu Mavɔmavɔ, Mawu mitɔn, bó nyi sɛ́n tɔn e un xa nú mi égbé lɛ́ɛ bǐ.”

¹¹Gbe énɛ́ gbe ɖokpó ɔ́, Mɔyízi ɖɔ nú togun ɔ́ ɖɔ:

¹² Ée mi ná dó asá Judɛ́ɛn tɔ ɔ́, akɔta e ná yi nɔ Galizímu só ɔ́ jí, bó ná xo ɖɛ tɔn dó togun ɔ́ jí lɛ́ɛ ɖíe: Akɔta Sinmɛnyɔ́ɔ tɔn, Levíi tɔn, Judáa tɔn, Isakáa tɔn, Jozɛ́fu tɔn kpó Bɛnjamɛ́ɛ tɔn kpó.

¹³Akɔta e ka ná yi nɔ Ebalu só ɔ́ jí, bó ná dó nu togun ɔ́ lɛ́ɛ ɖíe: Akɔta Hwlibɛ́ni tɔn, Gadi tɔn, Acɛ́ɛ tɔn, Zabulɔ́ɔn tɔn, Dan tɔn kpó Nɛfutali tɔn kpó.

¹⁴Levíi ví lɛ́ɛ ná yí xó, bó ná zé gbe d'aga bó ná ɖɔ xó élɔ́ lɛ́ɛ nú Izlayɛ́li ví súnnu lɛ́ɛ bǐ:

¹⁵ “Heelú mɛ e kpa bǒcyɔ, abǐ mɛ e sínsín gan dó kɔn bǒcyɔ bó nɔ́ sɛn ɖo nǔglɔ́ lɛ́ɛ! Mawu Mavɔmavɔ gbɛ́ wǎn nú nǔ e gbɛtɔ́ nɔ́ bló bó nɔ́ sɛn lɛ́ɛ.” Bɔ togun ɔ́ bǐ ná ɖɔ: “Amǐ.”

¹⁶ “Heelú mɛ e dó vɛ̌ nú tɔ́ tɔn kpó nɔ tɔn kpó é!” Bɔ togun ɔ́ bǐ ná yí gbe ɖɔ: “Amǐ.”

¹⁷ “Heelú mɛ e sɛ tɛn nú nɔzo tɔn sín dogbó lɛ́ɛ é!” Bɔ togun ɔ́ bǐ ná ɖɔ: “Amǐ.”

¹⁸ “Heelú mɛ e dɔn nukúntíntɔ́nnɔ bú ali é!” Bɔ togun ɔ́ bǐ na ɖɔ: “Amǐ.”

¹⁹ “Heelú mɛ e nɔ dó hwɛ agɔ nú jǒnɔ abǐ tɔ́cyɔvǐ, abǐ asúkúsi é!” Bɔ togun ɔ́ bǐ ná ɖɔ: “Amǐ.”

²⁰ “Heelú mɛ e ba tɔ́ ɔ́ si é! Heelú i ɖó é kɔ́n tɔ́ ɔ́ sín wi.” Bɔ togun ɔ́ bǐ ná yí gbe ɖɔ: “Amǐ.”

²¹ “Heelú mɛ e ɖó xó xá kanlin é!” Bɔ togun ɔ́ bǐ ná ɖɔ: “Amǐ.”

²² “Heelú mɛ e ɖó xó xá nɔ tɔn, abǐ tɔ́ tɔn sín vǐ é!” Bɔ togun ɔ́ bǐ ná ɖɔ: “Amǐ.”

²³ “Heelú mɛ e ɖó xó xá asi tɔn nɔ é!” Bɔ togun ɔ́ bǐ ná ɖɔ: “Amǐ.”

²⁴“Heelú mɛ e hu mɛ ɖo nǔglɔ́ é!” Bɔ togun ɔ́ bǐ ná ɖɔ: “Amǐ.”

²⁵“Heelú mɛ e yí gbe bó ɖu nǔ ɖo nǔ mɛ, bó hu xomɛvɔ́nɔ é!” Bɔ togun ɔ́ bǐ ná yí gbe ɖɔ: “Amǐ.”

²⁶ “Heelú mɛ e ma ná nyi sɛ́n e un xa nú mi lɛ́ɛ bǐ ǎ é!” Bɔ togun ɔ́ bǐ ná ɖɔ: “Amǐ.”