Read fon Sɛ́nflínmɛ 31 Bible Online

Sɛ́nflínmɛ 31 - fon bible

Sɛ́nflínmɛ 31

¹Mɔyízi ɖɔ nú Izlayɛ́li ví lɛ́ɛ bǐ ɖɔ:

² “Xwe kantɔn (120) ɖó wɛ un ɖe din, un sɔ́ ɖó hlɔ̌nhlɔ́n bó ná ɖo mi kplá wɛ bɔ mǐ nǎ ɖo yiyi wɛ ǎ. Mawu Mavɔmavɔ ka ko ɖɔ nú mì lɔ ɖɔ nyi kún ná dó asá Judɛ́ɛn tɔ ɔ́ ó.

³Mawu Mavɔmavɔ, Mawu mitɔn ɖésú ná nɔ mi nu, é ɖésú ná vívá kún nú akɔta e ɖo Judɛ́ɛn tɔ ɔ́ gúdo lɛ́ɛ bǐ, bɔ mi ná yí to yětɔn. Jozuwée wɛ ka ná nɔ nu mitɔn lě e Mawu Mavɔmavɔ ɖɔ gbɔn é.

⁴ Lě e Mawu Mavɔmavɔ wa Amɔliti lɛ́ɛ xɔ́sú Sihɔ́ni kpó Ɔgu kpó sín nǔ gbɔn, bó gba to yětɔn ɔ́, nǔ ɖokpó ɔ́ wɛ é ná bló xá akɔta énɛ́ lɛ́ɛ.

⁵Mawu Mavɔmavɔ ná jó yě nú mi, bɔ mi ná wa nǔ yětɔn lě e un ko ɖɔ gbɔn nú mi é.

⁶Mi bo kpan akɔ́n, bó dó gǎn! Ado ma hu mi ó, mi ma ɖi xɛsi ɖo nukɔn yětɔn ó. Đó Mawu Mavɔmavɔ, Mawu mitɔn ɖésú ná zɔn xá mi; é ná jó mi dó ǎ, é ná ɖe alɔ sín kan mitɔn mɛ ǎ.”

⁷Énɛ́ ɔ́ gúdo ɔ́, Mɔyízi ylɔ́ Jozuwée bó ɖɔ n'i ɖo Izlayɛ́li ví lɛ́ɛ bǐ nukɔn ɖɔ: “Kpan akɔ́n, bó dó gǎn; hwi wɛ ná kplá togun élɔ́ byɔ́ to e Mawu Mavɔmavɔ dó akpá nú tɔ́gbó mǐtɔn lɛ́ɛ ɖɔ émí ná ná yě ɔ́ mɛ. Hwi wɛ ná yí to ɔ́ nú yě.

⁸ Mawu Mavɔmavɔ ɖésú ná nɔ nukɔn nú we, é ɖésú ná nɔ kpɔ́ xá we, é ná jó we dó ǎ, é ná ɖe alɔ sín kan towe mɛ ǎ. Ma ɖi xɛsi ó, ado ma hu we ó.”

⁹Mɔyízi wlán sɛ́n ɔ́ bó zé dó así nú Levíi ví vɔ̌sánú-xwlémawutɔ́ lɛ́ɛ; yě wɛ nɔ ɖíɖá akɔjijɛgbá Mawu Mavɔmavɔ tɔn ɔ́. Yě kpó tomɛxó Izlayɛ́li tɔn lɛ́ɛ kpó wɛ Mɔyízi zé sɛ́n ɔ́ jó ná.

¹⁰ Bó ɖɔ nú yě ɖɔ: “Xwe tɛ́nwe mɛ tɛ́nwe mɛ tɛgbɛ ɔ́, xwe e xwe è nɔ zé axɔ́ kɛ mɛ ɔ́, xwe e xwe è nɔ ɖu azavaxwe ɔ́ wá hweɖěbǔnu ɔ́,

¹¹mi ná zé gbe dó jǐ bó xa sɛ́n ɔ́ nú Izlayɛ́li ví e wá kplé ɖo Mawu Mavɔmavɔ nukɔn lɛ́ɛ bǐ ɖo tɛn e Mawu Mavɔmavɔ ná sɔ́ é mɛ.

¹²Mi ná kplé togun ɔ́ bǐ: mɛxó súnnu kpó mɛxó nyɔ̌nu kpó, kpó yɔkpɔ́vú kpó bǐ ná kplé, mɛ e nyí jǒnɔ bó ɖo to mitɔn mɛ lɛ́ɛ lɔmɔ̌ ná wá, bɔ mɛ bǐ ná ɖótó sɛ́n e xa wɛ è ɖe é, bó ná tunwun lě e è ɖǒ ná ɖó sísí nú Mawu Mavɔmavɔ, bó ná nyi sɛ́n tɔn gbɔn é.

¹³Vǐ yětɔn e ma ko tunwun sɛ́n ɔ́ ǎ lɛ́ɛ lɔmɔ̌ ná se, bó ná kplɔ́n lě e è nǎ ɖó sísí nú Mawu Mavɔmavɔ, Mawu mitɔn gbɔn é, ɖo to e ná yí wɛ mi ɖe ɖo Judɛ́ɛn tɔ ɔ́ gúdo é mɛ.”

¹⁴Mawu Mavɔmavɔ ɖɔ nú Mɔyízi ɖɔ: “Hwenu e a nǎ kú é ɖíe ɖo yǐyá wɛ e; ylɔ̌ Jozuwée bónú mi wá goxɔ e mɛ un nɔ kpé togun ce ɖe ɔ́ mɛ. Un ná ná ɛ gbetakɛ́n ce lɛ́ɛ ɖo fínɛ́.” Ée é ɖɔ mɔ̌ ɔ́, Mɔyízi kpó Jozuwée kpó yi goxɔ ɔ́ mɛ.

¹⁵Bɔ Mawu Mavɔmavɔ zɔn akpɔ́kpɔ́ mɛ bó wá. Akpɔ́kpɔ́ ɔ́ wá nɔ te ɖo goxɔ ɔ́ sín ali nu.

¹⁶Mawu Mavɔmavɔ ɖɔ nú Mɔyízi ɖɔ: “Zaanɖé din ɔ́, a nǎ yi su tɔ́gbó towe lɛ́ɛ. Hwenu e a ma sɔ́ ná ɖo fí ǎ é ɔ́, Izlayɛ́li togun ɔ́ ná jɛ nǔmɛsɛn e ɖo to e mɛ yě xwe lɛ́ɛ sɛn jí. Yě ná jó mì dó, bó ná hɛn akɔ e un jɛ xá yě ɔ́ gblé.

¹⁷Gbe nɛ́ gbe su ɔ́, un ná sin xomɛ dó yě titewungbe. Un ná jó yě dó, un ná ɖe kɔ dó yě. Gbɛ yětɔn ná gblé, azɔn kpó nǔxámɛ kpó ná vun blá yě gbɔn ɖisí amyɔ, bɔ yě ná nɔ́ ɖɔ: ‘Mawu mǐtɔn ka sɔ́ ɖo mǐ tɛ́ntin ǎ wɛ zɔ́n bɔ nǔ élɔ́ lɛ́ɛ ɖo mǐ xá wɛ a?’

¹⁸Lo ɔ́, nyɛ ná ɖe kɔ dó yě hwenɛ́nu, ɖó nǔ ɖěvo e yě ná sɛn, bó ná hu hwɛ dó mì lɛ́ɛ wú.

¹⁹Xó e ɖɔ gbé un ja din ɔ́, wlǎn; han wɛ, bɔ a nǎ kplɔ́n Izlayɛ́li ví lɛ́ɛ. A nǎ tɛ́nkpɔ́n káká bɔ yě ná tunwun. Han énɛ́ ná ɖe kúnnu nú mì ɖo Izlayɛ́li ví lɛ́ɛ nukɔn.

²⁰Đó un ná kplá yě yi to e sín akpá un dó nú tɔ́gbó yětɔn lɛ́ɛ bɔ anɔ̌sin kpó wǐin kpó nɔ́ sa ɖe ɔ́ mɛ. Yě ná mɔ nǔ bó ɖu, bó gɔ́ xo, bó ná vo. Yě ká ná sɛn nǔ ɖěvo lɛ́ɛ. Yě ná gbɛ́ wǎn nú mì, bó ná hɛn akɔ e un jɛ xá yě é gblé.

²¹Hwenɛ́nu lo ɔ́, awě tɛnmɛ tɛnmɛ ná xo yě, nǔ wunmɛ wunmɛ ná gbo yě; bɔ han élɔ́ ná ɖé xlɛ́ ɖɔ yě wa nǔ nyi do. Đó han élɔ́ ná ɖo yě kpó vǐ yětɔn lɛ́ɛ kpó nu. Un tunwun nǔ e ɖo ayi yětɔn mɛ lɛ́ɛ, cóbó kplá yě xwe to e sín akpá un dó nú yě ɔ́ mɛ.”

²²Gbe nɛ́ gbe ɔ́, Mɔyízi wlán han ɔ́, bó kplɔ́n Izlayɛ́li ví lɛ́ɛ.

²³ Énɛ́ ɔ́ gúdo ɔ́, Mawu Mavɔmavɔ ɖɔ nú Jozuwée Nuni ví ɔ́ ɖɔ: “Kpan akɔ́n, bó dó gǎn ɖó hwi wɛ ná kplá Izlayɛ́li ví lɛ́ɛ byɔ́ to e sín akpá un dó nú yě ɔ́ mɛ; nyi ɖésú ká ná nɔ kpɔ́ xá we.”

²⁴Mɔyízi wlán sɛ́n ɔ́ bǐ dó wěma ɖokpó mɛ; éé é wlán fó ɔ́,

²⁵é ɖɔ nú Levíi ví e nɔ́ ɖíɖá akɔjijɛgbá Mawu Mavɔmavɔ tɔn lɛ́ɛ é ɖɔ:

²⁶“Mi zé sɛ́nwéma élɔ́ ɖó akɔjijɛgbá Mawu Mavɔmavɔ, Mawu mitɔn tɔn kpá; mi wa nǔ nyi do ɔ́, é wɛ ná ɖe kúnnu ɖɔ mi wa nǔ nyi do.

²⁷Đó un tunwun ɖɔ gǔ wɛ mi nɔ fɔ́n bó nɔ́ ci tamɛ. Ée un ka ɖo gbɛ ɖo mi tɛ́ntin din, bɔ mi ɖo gǔ fɔ́n dó Mawu Mavɔmavɔ jí wɛ mɔ̌ ɔ́, un ka wá kú ɔ́, nɛ̌ mi ná wa nǔ gbɔn lo?

²⁸Din ɔ́, mi kplé tomɛxó lɛ́ɛ kpó gǎn e ɖo akɔta mitɔn mɛ lɛ́ɛ kpó bǐ nú mì; yě bǐ ní kplé ɖo nukɔn ce; yě nukɔn wɛ un ná ɖɔ xó e ɖo han ɔ́ mɛ lɛ́ɛ ɖe, bɔ jǐxwé kpó ayǐkúngban kpó ná ɖe kúnnu nú mì.

²⁹Đó un tunwun ɖɔ jí un kú ɔ́, mi ná lɛ́ kɔ sín ali e un ɖe nú mi é jí, bó ná jɛ hwɛ hu jí. Énɛ́ ɔ́, nǔ bǐ nǎ jɛ mi gbo jí, ɖó mi ná wa nǔ e má sɔgbe ɖo Mawu Mavɔmavɔ nukún mɛ ǎ é, bɔ é ná sin xomɛ.”

³⁰Xó e ɖo han ɔ́ mɛ lɛ́ɛ ɔ́, Mɔyízi ɖɔ bǐ ɖo kplékplé Izlayɛ́li ví lɛ́ɛ bǐ tɔn nukɔn.