Read fon Sɛ́nflínmɛ 4 Bible Online

Sɛ́nflínmɛ 4 - fon bible

Sɛ́nflínmɛ 4

¹Mɔyízi ɖɔ: “Din ɔ́, Izlayɛ́li ví lɛ́ɛ e mi, mi xwedó sɛ́n e un kplɔ́n mi lɛ́ɛ kpó nǔ e Mawu zɔ̌n mi lɛ́ɛ kpó. Mi zé yě dó wa azɔ̌ ná. Mi bló mɔ̌ ɔ́, mi ná nɔ gbɛ, bó ná yí to e ná mi wɛ Mawu Mavɔmavɔ, Mawu tɔ́gbó mitɔn lɛ́ɛ tɔn ɖe é.

² Mi ma gɔ́ nǔ ɖěbǔ nú nǔ e Mawu Mavɔmavɔ, Mawu mitɔn zɔ́n mi bɔ un ɖɔ nú mi lɛ́ɛ é ó; mi ma ɖe ɖěbǔ kpo ó; mi zé bǐ dó wa azɔ̌ ná.

³ Mi mɔ lě e Mawu Mavɔmavɔ, Mawu mitɔn wa nǔ gbɔn hwenu e vodún Baalu-Peɔ́ɔ sín xó wá é kpó nukún mitɔn kpó: Mawu Mavɔmavɔ, Mawu mitɔn sú mɛ e sɛn vodún Baalu-Peɔ́ɔ ɖo tɛ́ntin mitɔn lɛ́ɛ bǐ sín kún dó.

⁴Lo ɔ́, mi mɛ e nɔ gbejí nú Mawu Mavɔmavɔ, Mawu mitɔn lɛ́ɛ ɔ́, mi bǐ kpo ɖo gbɛ égbé din.

⁵“Éɖíe, un kplɔ́n sɛ́n lɛ́ɛ kpó nǔ e Mawu zɔ́n lɛ́ɛ kpó mi lě e Mawu Mavɔmavɔ, Mawu ce ɖɔ nyɛ ní bló gbɔn é, bónú mi ná zé yě dó wa azɔ̌ ná, ɖo to e ná yí wɛ mi ɖe é mɛ.

⁶Ényí mi wlíbo nú sɛ́n lɛ́ɛ bó nyi ganjí ɔ́, akɔta ɖě lɛ́ɛ e ná tunwun sɛ́n énɛ́ lɛ́ɛ ná mɔ mi dó mɔ gbɛtɔ́ nǔnywɛ́tɔ́, gbɛtɔ́ bíbí, bó ná nɔ́ ɖɔ: ‘Nǔnywɛ́ tɛ́ ɖíe, bǐbí tɛ́ ɖíe ɖo akɔta ɖaxó élɔ́ mɛ e.’

⁷Mǐ ylɔ́ Mawu Mavɔmavɔ, Mawu mǐtɔn hweɖěbǔnu ɔ́, é nɔ́ sɔ nú mǐ a cé? Akɔta ɖaxó tɛ́ ká tíin tawun, bó ylɔ́ vodún tɔn ɔ́, é nɔ́ sɔ n'i mɔ̌?

⁸Sɛ́n e un ná mi égbé din é sɔgbe a cé? Akɔta ɖaxó tɛ́ ká ɖe, bó ɖó sɛ́n bɔ é sɔgbe mɔ̌?”

⁹Mɔyízi ɖɔ: “Nǔ ɖokpó e mi ná bló é wɛ nyí ɖɔ mi ná nɔ acéjí, bɔ ayi mitɔn ná ɖo te hwebǐnu, bó má wɔn nǔ e nukún mitɔn lɛ́ɛ mɔ é ó. Mi kplɔ́n yě vǐ mitɔn lɛ́ɛ kpó vǐvú mitɔn lɛ́ɛ kpó.

¹⁰“Mi flín gbe e gbe mi yi Mawu Mavɔmavɔ, Mawu mitɔn nukɔn ɖo Holɛ́bu só jí, bɔ é ɖɔ xó nú mì é. É ɖɔ nú mì ɖɔ: ‘Kplé togun ɔ́ bǐ nú mì, un jló ná ná sɛ́n ce lɛ́ɛ yě, bɔ yě ná tunwun lě e yě ná nɔ́ sí mì gbɔn ɖo gbɛ hwenu yětɔn ɖo ayǐkúngban jí fí é, bó ná lɛ́ tunwun lě e yě ná nɔ́ kplɔ́n sɛ́n ce lɛ́ɛ vǐ yětɔn lɛ́ɛ gbɔn é.’

¹¹ Hwenɛ́nu ɔ́, mi sɛkpɔ́ só ɔ́, bó wá cí só ɔ́ kpá. Myɔ hɛhɛ ɖé vun blá só ɔ́, bó hun káká yi jǐxwé, ɖo zǐnflú kpó, akpɔ́kpɔ́ kpó, kpódó ahǔn kpó mɛ.

¹²Mawu Mavɔmavɔ ɖɔ xó nú mi sín myɔ ɔ́ mɛ; mi se gbe tɔn, mi ka mɔ ɛ ɖó nukún wú ǎ, gbe tɔn kɛ́ɖɛ́ se wɛ jɛ́n mi ɖe.

¹³ É ɖe akɔ e é jɛ xá mi ɔ́ xlɛ́. É byɔ́ ɖɔ mi ní se tónú nú sɛ́n wǒ e émí wlán ɖó awǐnnyatɛ we jí dó jɛ akɔ xá mi lɛ́ɛ.

¹⁴ Hwe énɛ́ nu ɖokpó ɔ́, Mawu Mavɔmavɔ lɛ́ ná gbe mì ɖɔ nyi ní kplɔ́n sɛ́n lɛ́ɛ kpó nǔ e é zɔ́n lɛ́ɛ kpó mi, bónú mi ná zé dó wa azɔ̌ ná ɖo to e yí gbé mi ja ɔ́ mɛ.”

¹⁵Mɔyízi ɖɔ: “Xó tají ɖokpó ɖíe, bɔ mi ɖó ná wɔn ǎ; gbe e gbe Mawu Mavɔmavɔ nɔ myɔ tɛ́ntin, bó ɖɔ xó nú mi ɖo Holɛ́bu só jí é ɔ́, mi mɔ é ɖésú ǎ;

¹⁶ hǔn mi ma lí vodún ó; mi ma bló nǔ ɖěbǔ sín akpajlɛ́ bó sɛn ó; mi bló mɔ̌ ɔ́, mi ná hu hwɛ, mi ma bló súnnu abǐ nyɔ̌nu sín akpajlɛ́ ɖé ó.

¹⁷ Mi ma bló kanlin lɛ́ɛ abǐ xɛ lɛ́ɛ ɖě sín akpajlɛ́ bó sɛn ó.

¹⁸Mi ma bló kanlin e nɔ sá lɛ́ɛ, abǐ hweví lɛ́ɛ ɖě sín akpajlɛ́ bó sɛn ó.

¹⁹Mi ma kpɔ́n hwe kpó sun kpó, kpó sunví lɛ́ɛ kpó, kpódó nǔbúdo tobutóbú e ɖo jǐxwé lɛ́ɛ bǐ kpó bó jɛ yě sɛn jí ó, yě ní má dɔn mi, bónú mi jɛ kpo ɖo nukɔn yětɔn bó sɛn yě ó; ɖó nǔ énɛ́ lɛ́ɛ ɔ́, togun e ɖo gbɛ ɔ́ mɛ lɛ́ɛ wɛ Mawu Mavɔmavɔ, Mawu mitɔn ná, bɔ yě ná wa azɔ̌ yětɔn.

²⁰ Lo ɔ́, midɛɛ lɛ́ɛ ɔ́, Mawu Mavɔmavɔ sɔ́ mi bó ɖe mi tɔ́n sín Ejípu, kúgan mɛ, bónú mi ná húzú togun tɔn lě e mi ɖe gbɔn égbé din é.

²¹ “Mawu Mavɔmavɔ ka sin xomɛ dó mì, ɖó mi wú. É gblɔ́n adǎn ɖɔ nyɛ kún ná dó asá Judɛ́ɛn tɔ ɔ́ ó, nyɛ kún ká ná byɔ́ to ɖagbe e ná mi wɛ émí ɖe ɔ́ mɛ ó.

²²Hǔn nyɛ ná kú ɖo to élɔ́ mɛ; un ná dó asá Judɛ́ɛn tɔ ɔ́ gbeɖé ǎ; midɛɛ lɛ́ɛ ná dó asá Judɛ́ɛn tɔ ɔ́, bó ná yí to ɖagbe énɛ́ e ɖo tɔ ɔ́ gúdo é.

²³Amɔ̌, mi cɔ́ miɖée bó má wɔn akɔ e Mawu Mavɔmavɔ, Mawu mitɔn jɛ xá mi é ó. Mi ma gba ó, mi ma lí vodún ó, mi ma bló nǔ ɖěbǔ sín akpajlɛ́ bó sɛn ó.

²⁴ Đó Mawu Mavɔmavɔ, Mawu mitɔn ɔ́, zo e nɔ hɛn nǔ gblé é wɛ. É nɔ́ ba gbeɖé ɖɔ è nǐ sɛn nǔ ɖěvo zɛ éyɛ́ wú ǎ.

²⁵“Hwenu e mi ná ɖo to ɔ́ mɛ, bɔ é ná ko lín, bɔ mi ná kó ji vǐ bó ɖó vǐvú ɔ́, mi ma lí vodún ó, mi ma bló akpajlɛ́ nǔ alɔkpa ɖěbǔ tɔn ó, mi ma wa nǔ e má nɔ́ nyɔ́ Mawu Mavɔmavɔ, Mawu mitɔn nukún mɛ ǎ, bó nɔ́ dó xomɛsin n'i lɛ́ɛ ɖěbǔ ó. Ényí mi dó nǔ mɔ̌hunkɔtɔn sin gbeɖé ɔ́,

²⁶un ɖo ɖiɖɔ nú mi wɛ égbé agbawungba, un xwlé jǐxwé kpó dodomɛ kpó nú mi, é ná lín cóbɔ mi bǐ ná gbadó sín to e mi ná yí ɖo Judɛ́ɛn tɔ ɔ́ gúdo é mɛ ǎ; mi ná nɔ fínɛ́ vo ɖé ǎ; è nǎ za mi sín to ɔ́ mɛ.

²⁷ Mawu Mavɔmavɔ ná gba mi dó gbɔn togun lɛ́ɛ mɛ, bɔ mi mɛ kpɛɖé jɛ́n ná gán ɖo akɔta e tɛ́ntin Mawu Mavɔmavɔ ná kplá mi yi é mɛ.

²⁸Fínɛ́ ɔ́, mi ná sɛn nǔmɛsɛn e gbɛtɔ́ zé atín abǐ awǐnnya dó kpa ná lɛ́ɛ. Nǔmɛsɛn énɛ́ lɛ́ɛ nɔ́ mɔ nǔ ǎ, yě nɔ́ se nǔ ǎ, yě nɔ́ ɖu nǔ ǎ, yě ká nɔ́ se nǔ wán ǎ.

²⁹ Hwenɛ́nu lo ɔ́, mi ná ba Mawu Mavɔmavɔ, Mawu mitɔn ɖo to énɛ́ lɛ́ɛ mɛ; ényí mi ka ba ɛ kpó ayi mitɔn bǐ kpó, kpódó linlin mitɔn bǐ kpó ɔ́, mi ná mɔ ɛ.

³⁰Hwenu e nǔ e un ɖɔ nú mi lɛ́ɛ bǐ ná jɛ, bɔ mi ná ɖo aluwɛ mɛ ɔ́, mi ná lɛ́ kɔ wá Mawu Mavɔmavɔ, Mawu mitɔn gɔ́n, bó ná lɛ́ jɛ tónú se n'i jí.

³¹Nǔgbó ɔ́, Mawu Mavɔmavɔ, Mawu mitɔn ɔ́, Mawu nǔbláwǔkúnúmɛtɔ́ wɛ; é ná jó mi dó ǎ, é ná sú kún mitɔn dó ǎ, é ká ná wɔn akɔ e é jɛ xá tɔ́gbó mitɔn lɛ́ɛ é gbeɖé kpɔ́n ǎ.”

³²Mɔyízi ɖɔ: “Mi lin tamɛ dó nǔ e ko jɛ ɖ'ayǐ xóxó lɛ́ɛ é wú. Nǔ e ɖo jijɛ wɛ sín hwenu e Mawu kó ɖó gbɛtɔ́ ɖó ayǐkúngban jí, káká wá jɛ mi jí ɔ́, mi lin tamɛ d'é wú. Mi lin tamɛ dó nǔ e jɛ ɖo wɛ̌kɛ́zo ɛnɛ lɛ́ɛ jí ɔ́ wú. Nǔ ɖaxó lěhun jɛ kpɔ́n gbeɖé a? È se nǔ lěhun kpɔ́n gbeɖé a?

³³Togun ɖé tíin, bó se Mawu sín gbe ɖo myɔ tɛ́ntin, lě e mi se gbɔn é, lobo nɔ gbɛ a?

³⁴Nǔmɛsɛn tɛ́ ka tíin, bó sí te bó zán hlɔ̌nhlɔ́n bǐ, bó jlɛ́ nǔ, bó wa nǔjíwǔ, bó wa nǔ hu ado, nǔ syɛ́nsyɛ́n bǐ dó yí togun tɔn sín kɛntɔ́ sín acɛ mɛ kpɔ́n? É ɖe kpɔ́n ǎ; lo ɔ́, Mawu Mavɔmavɔ, Mawu mitɔn kɛ́ɖɛ́ wɛ nyí Mawu e yí mi gbɔn mɔ̌ ɖo Ejípu, bɔ mi gosín kannumɔgbénu lě e mi ɖésú mɔ gbɔn kpó nukún mitɔn kpó é.

³⁵ Mawu jɔwǔ mi, bɔ mi mɔ énɛ́, bó ná dó tunwun ɖɔ Mawu Mavɔmavɔ ɖokpó wɛ nyí Mawu, ɖɔ Mawu ɖé kún tíin zɛ éyɛ́ wú ó.

³⁶É ɖɔ xó nú mi sín jǐxwé bónú mi ná se tónú. É xlɛ́ myɔ ɖaxó ɖé mi, bɔ mi se gbe tɔn sín myɔ ɔ́ tɛ́ntin.

³⁷Wǎn wɛ Mawu Mavɔmavɔ yí nú tɔ́gbó mitɔn lɛ́ɛ, bó sɔ́ mi vǐ lɛ́ɛ; énɛ́ wú wɛ é zé hlɔ̌nhlɔ́n tɔn e nukɔn nǔɖé má nɔ́ nɔ te ɖe ǎ é dó ɖe mi tɔ́n sín Ejípu.

³⁸Din ɔ́, é nya akɔta e sukpɔ́ hú mi, bó syɛ́n hú mi lɛ́ɛ ɖo nukɔn mitɔn, bó kplá mi byɔ́ to yětɔn mɛ, bó ɖo to yětɔn ná mi wɛ lě e mɔ gbɔn wɛ mi ɖe égbé é.

³⁹Mi ní tunwun sín égbé, bó hɛn ayi mɛ ganjí ɖɔ Mawu Mavɔmavɔ ɖokpó géé wɛ nyí Mawu ɖo jǐxwé kpó dodomɛ kpó, bó tunwun ɖɔ Mawu ɖé kún sɔ́ ɖe zɛ éyɛ́ wú ó.

⁴⁰Mi zé sɛ́n kpó gbeta kpó e un ná mi égbé din lɛ́ɛ dó wa azɔ̌ ná; énɛ́ ɔ́, nǔ ná nyɔ́ nú mi kpó vǐ mitɔn lɛ́ɛ kpó, bɔ mi ná dɔ́ ji ɖo to e na ná mi wɛ Mawu Mavɔmavɔ, Mawu mitɔn ɖe, bɔ é ná nyí mitɔn káká sɔ́yi é mɛ.”

⁴¹ Énɛ́ ɔ́ gúdo wɛ Mɔyízi sɔ́ toxo atɔn ɖo Judɛ́ɛn tɔ ɔ́ sín zǎnzǎnhwe jí,

⁴²bɔ toxo énɛ́ lɛ́ɛ ná nyí bibɛtɛn nú mɛ e ma tunwun ǎ, bó hu nɔzo tɔn é; nɔzo tɔn ɔ́ sín nǔ ká vɛ́ wǔ tɔn ɖ'ayǐ ǎ. Ényí nǔ cí mɔ̌ ɔ́, mɛ e hu mɛ ɔ́ hɛn ɔ́, é ná hɔn yi cí toxo énɛ́ lɛ́ɛ ɖokpó mɛ, bó gán.

⁴³Toxo énɛ́ lɛ́ɛ wɛ nyí: Bɛsɛ́ɛ, ɖo gbětótló mɛ, ɖo ayǐkúngban wɛnjɛ jí, bó nyí Hwlibɛ́ni ví lɛ́ɛ tɔn. Toxo ɖěvo nyí Hlamɔti, ɖo Galadi, bó nyí Gadi ví lɛ́ɛ tɔn. Đěvo nyí Goláni, ɖo Basáni, bó nyí Manasée ví lɛ́ɛ tɔn.

⁴⁴Mɔyízi xa Mawusɛ́n ɔ́ nú Izlayɛ́li ví lɛ́ɛ.

⁴⁵Ée yě tɔ́n sín Ejípu ɔ́, Mɔyízi ɖɔ su e yě ná nyi lɛ́ɛ, nǔ e yě ná wa lɛ́ɛ, nǔ e Mawu zɔ́n lɛ́ɛ nú yě.

⁴⁶Hwenɛ́nu ɔ́, Izlayɛ́li ví lɛ́ɛ ɖo Judɛ́ɛn tɔ ɔ́ sín zǎnzǎnhwe jí, ɖo tɔdo e kpan nukɔn Bɛti-Peɔ́ɔ é mɛ, ɖo Amɔliti lɛ́ɛ sín axɔ́sú Sihɔ́ni to mɛ. Axɔ́sú Sihɔ́ni ɖo Hɛcibɔ́ni, hwenu e Mɔyízi kpó Izlayɛ́li ví lɛ́ɛ kpó tɔ́n sín Ejípu é. Yě fun ahwan xá ɛ, bó ɖu ɖo jǐ tɔn.

⁴⁷Yě yí to tɔn, bó lɛ́ yí axɔ́sú Basáni tɔn Ɔgu sín to lɔmɔ̌. Amɔliti lɛ́ɛ sín axɔ́sú we énɛ́ lɛ́ɛ bǐ wɛ ɖo Judɛ́ɛn tɔ ɔ́ gúdo ɖo zǎnzǎnhwe jí.

⁴⁸Izlayɛ́li ví lɛ́ɛ sín ayǐkúngban wɛ bɛ́ sín Alowɛ́ɛ ɖo Aanɔ́ni tɔ ɔ́ tó, káká yi Sinyɔ́ɔ, só e è nɔ ylɔ́ ɖɔ Ɛmɔ́ɔ é kɔn.

⁴⁹Ayǐkúngban yětɔn wɛ nyí éé ɖo zǎnzǎnhwe jí nú Judɛ́ɛn tɔdo ɔ́, bó zɔn mɔ̌ káká wá Xu Kúkú ɔ́ kɔn ɖo Pisiga só kpá é.