Read fon Sɛ́nflínmɛ 7 Bible Online

Sɛ́nflínmɛ 7 - fon bible

Sɛ́nflínmɛ 7

¹ Mɔyízi ɖɔ: “Mawu Mavɔmavɔ, Mawu mitɔn ná kplá mi yi byɔ́ to e mi ɖó ná yí ɔ́ mɛ. Hwenu e mi ná ɖo to ɔ́ sɛkpɔ́ wɛ ɔ́, é ná nya togun tobutóbú ɖé lɛ́ɛ ɖo nukɔn mitɔn; togun tɛ́nwe wɛ; yě sukpɔ́ hú mi, bó syɛ́n hú mi. Togun lɛ́ɛ wɛ nyí: Hitíti lɛ́ɛ, Giigacíti lɛ́ɛ, Amɔliti lɛ́ɛ, Kanáanu lɛ́ɛ, Pɛliziti lɛ́ɛ, Hivíti lɛ́ɛ kpódó Jebuzinu lɛ́ɛ kpó.

²Hwenu e Mawu Mavɔmavɔ, Mawu mitɔn ná jó yě nú mi ɔ́, mi ná kpé nǔɖé xá yě ǎ, mi ná kú nǔbláwǔ nú yě ǎ, mi ná ɖu ɖo yě jí, mi ná vívá kún yětɔn.

³Mi ma da yě ó; mi ma ná vǐ mitɔn nyɔ̌nu yě, bónú yě da ó, mi ma da vǐ yětɔn nyɔ̌nu nú vǐ mitɔn lɛ́ɛ ó.

⁴É má nyí mɔ̌ ǎ ɔ́, jǒnɔ énɛ́ lɛ́ɛ ná dɔn vǐ mitɔn lɛ́ɛ, bɔ yě ná jó Mawu Mavɔmavɔ dó, bó jɛ nǔ ɖěvo lɛ́ɛ sɛn jí. Mawu Mavɔmavɔ ka ná sin xomɛ dó mi, bó ná vívá kún mitɔn cɛ́jú mɛ.

⁵ Lě e mi ka ɖó ná wa nǔ xá togun énɛ́ lɛ́ɛ gbɔn é ɖíe: mi ná flí vɔ̌sákpe yětɔn lɛ́ɛ xwe, mi ná gba awǐnnya e yě tun te bó nɔ́ sɛn lɛ́ɛ, mi ná hɔn kpo e yě tun te bó nɔ́ sɛn lɛ́ɛ; mi ná dó bǒcyɔ yětɔn lɛ́ɛ zo.

⁶Đó togun ɖe ɖó vo Mawu Mavɔmavɔ, Mawu mitɔn tɔn wɛ mi nyí. Mawu Mavɔmavɔ, Mawu mitɔn sɔ́ mi bɔ mi ná nyí togun tɔn vívɛ́ná ɖo togun e ɖo ayǐkúngban ɔ́ jí lɛ́ɛ bǐ mɛ.”

⁷Mɔyízi ɖɔ: “Ée Mawu Mavɔmavɔ ɖó kɔ mi wú, bó sɔ́ mi é ɔ́, ényí ɖɔ mi sukpɔ́ hú togun ɖě lɛ́ɛ wú wɛ ǎ; mi sukpɔ́ sɔ togun ɖě lɛ́ɛ ɖěbǔ ǎ.

⁸Lo ɔ́, Mawu Mavɔmavɔ yí wǎn nú mi, lobo ɖe akpá e é zin alɔ dó akɔ́n bó dó nú tɔ́gbó mitɔn lɛ́ɛ é: hlɔ̌nhlɔ́n tɔn e nukɔn nǔɖé má nɔ́ nɔ te ɖe ǎ é wɛ é sɔ́ dó ɖe mi tɔ́n sín Ejípu, fí e mi ɖo Ejípu xɔ́sú ɔ́ sín fɛn mɛ ɖe, bó nyí kannumɔ tɔn é.

⁹ “Mi ní tunwun ganjí ɖɔ Mawu Mavɔmavɔ, Mawu mitɔn wɛ nyí Mawu. Mawu gbejínɔtɔ́ énɛ́ ɔ́, yě mɛ e yí wǎn n'i bó nɔ́ nyi sɛ́n tɔn lɛ́ɛ ɔ́, é nɔ́ nɔ gbejí nú akɔ e é jɛ xá yě ɔ́, bó nɔ́ nyɔ́ xomɛ dó yě wú káká yi jijimɛ afatɔ́ngɔ́ ɔ́ (1.000) jí.

¹⁰Amɔ̌, nú mɛ ɖé gbɛ́ wǎn n'i ɔ́, é nɔ́ hu mɛ ɔ́ dó sú axɔ́ mɛ ɔ́; é nɔ́ ɖó yibowá ná ǎ.

¹¹Hǔn mi bo wlíbo nú gbetakɛ́n lɛ́ɛ kpó sɛ́n lɛ́ɛ kpó, kpó nǔ e Mawu zɔ́n bɔ un ɖɔ nú mi égbé lɛ́ɛ kpó, bó nyi yě ganjí.

¹² “Ényí mi ɖó ayi sɛ́n énɛ́ lɛ́ɛ jí, bó wlíbo nú yě bó nyi ɔ́, Mawu Mavɔmavɔ, Mawu mitɔn ná nɔ gbejí nú akɔ e é zin alɔ dó akɔ́n bó jɛ xá tɔ́gbó mitɔn lɛ́ɛ é, bɔ é ná nyí ɖagbe nú mi.

¹³Mawu Mavɔmavɔ ɔ́, ɖo wǎn yíyí tɔn mɛ ɔ́, é ná dó acɛ mi kpó nǔ mitɔn lɛ́ɛ bǐ kpó jí: mi ná ji vǐ kpɔ́ gégé, mi ná ya jinukún kpɔ́ gégé, vǐwun ná ɖo kpɔ́, ami ná ɖo kpɔ́, nyibú mitɔn lɛ́ɛ kpó gbɔ̌ mitɔn lɛ́ɛ kpó bǐ ná ji bó ná túnflá. Mɔ̌ wɛ nǔ ná nyí gbɔn nú mi ɖo to ɔ́ mɛ, lě e Mawu Mavɔmavɔ zin alɔ dó akɔ́n bó ɖɔ nú tɔ́gbó mitɔn lɛ́ɛ gbɔn é.

¹⁴Mawu Mavɔmavɔ ná dó acɛ mi jí hú togun ɖě lɛ́ɛ bǐ; súnnu mitɔn abǐ nyɔ̌nu mitɔn, abǐ kanlin mitɔn lɛ́ɛ ɖěbǔ ná zun aji ǎ.

¹⁵Mawu Mavɔmavɔ ná ɖó azɔn bǐ zɔ nú mi; awě baɖabaɖa e xo Ejípu bɔ mi tunwun lɛ́ɛ bǐ ná nɔ zɔ nú mi; Mawu Mavɔmavɔ ná sɛ́ azɔn énɛ́ lɛ́ɛ ɖěbǔ dó mi ǎ; mɛ e gbɛ́ wǎn nú mi lɛ́ɛ wɛ ná jɛ azɔn énɛ́ lɛ́ɛ.

¹⁶“Mi ma kú nǔbláwǔ nú togun e Mawu Mavɔmavɔ, Mawu mitɔn ná jó nú mi lɛ́ɛ ó; mi hu bǐ. Mi ma sɛn vodún yětɔn lɛ́ɛ ó; ɖó mɔ wɛ yě nyǐ nú mi.”

¹⁷Mɔyízi ɖɔ: “Mi ná kó ɖo linlin wɛ ɖɔ: ‘Akɔta énɛ́ lɛ́ɛ syɛ́n hú mǐ ɖésú, nɛ̌ mǐ ká ná sixú kpé yě wú gbɔn?’

¹⁸Mi ma ɖi xɛsi nú yě ó. Mi flín nǔ e Mawu Mavɔmavɔ, Mawu mitɔn dó sín xá Ejípu xɔ́sú ɔ́ kpó Ejípu togun ɔ́ bǐ kpó é hwebǐnu; mi ma wɔn gbeɖé ó.

¹⁹Mi mɔ nǔ e Mawu Mavɔmavɔ jlɛ́ lɛ́ɛ, nǔdábaɖa lɛ́ɛ, nǔ hu ado lɛ́ɛ, nǔ syɛ́nsyɛ́n e é bló hwenu e é ɖe mi tɔ́n sín Ejípu é ɖó nukún mitɔn wú. Mɔ̌ wɛ Mawu Mavɔmavɔ, Mawu mitɔn ná nɔ kpɔ́ xá mi gbɔn, ɖo akɔta e ɖi xɛsi ná wɛ mi ɖe lɛ́ɛ nukɔn.

²⁰Mawu Mavɔmavɔ ná sɛ́ gbɔ̌nvɛ dó akɔta énɛ́ lɛ́ɛ mɛ, bɔ yě ná hu mɛ e è ma ko hu ǎ, bɔ yě ɖo hinhɔn bú dó mi wɛ lɛ́ɛ bǐ.

²¹Mi ma sísɔ́ ɖo akɔta énɛ́ lɛ́ɛ nukɔn ó: Mawu Mavɔmavɔ, Mawu mitɔn ɖo tɛ́ntin mitɔn; Mawu ɖaxó wɛ, lobo dó xɛsi.

²²Ényí mi ɖo to ɔ́ sɛkpɔ́ wɛ ɔ́, Mawu Mavɔmavɔ ná jɛ akɔta lɛ́ɛ nya dó zɔ nú mi jí kpɛɖé kpɛɖé. Mi sixú hu yě bǐ kpɔ́ jí ǎ, é má nyí mɔ̌ ǎ ɔ́, gběkanlin lɛ́ɛ ná wá vun blá mi.

²³Amɔ̌, Mawu Mavɔmavɔ, Mawu mitɔn ná wá jó yě nú mi; xɛsi ɖaxó ɖé ná wá jɛ yě jí, bɔ yě bǐ ná yi dɔn.

²⁴Mawu Mavɔmavɔ ná jó axɔ́sú yětɔn lɛ́ɛ nú mi, bɔ mi ná sú kún yětɔn dó, mɛ ɖěbǔ sɔ́ ná flín yě ɖo ayǐkúngban jí ǎ; yě mɛ ɖokpó géé ná kpo ɖo nukɔn mitɔn ǎ; yě bǐ wɛ mi ná hu,

²⁵bó ná dó nǔmɛsɛn yětɔn lɛ́ɛ sín bǒcyɔ zo; amɔ̌, mi ma nú siká kpó kpatágan kpó e ɖo yě wú lɛ́ɛ jló mi ó. Mi ma fɔ yě ó, ɖó suɖunú wɛ yě nyí ɖo Mawu Mavɔmavɔ, Mawu mitɔn nukɔn, bó ná dɔn nǔ nyanya wá nú mi.

²⁶Mi ma zé nǔ mɔ̌hun ɖěbǔ byɔ́ xwé mitɔn lɛ́ɛ gbe ó. Ényí mi zé byɔ́ xwé mitɔn lɛ́ɛ gbe ɔ́, Mawu nǎ sú mi kpó yě kpó sín kún dó. Lo ɔ́, nǔ mɔ̌hunkɔtɔn lɛ́ɛ bǐ wɛ è ɖǒ ná hɛn gblé bǐ dégbédégbé; mi ɖó ná gbɛ́ wǎn nú nǔ énɛ́ lɛ́ɛ, bó ná nɔ́ ba ná mɔ yě ɖó nukún wú vɔ́vɔ́ ǎ.”