Read fon Jǎan 1 Bible Online

Jǎan 1 - fon bible

Jǎan 1

¹Cóbónú Mawu ná ɖó gbɛ ɔ́, xó ɔ́ kó tíin[1]; é kó ɖe kpódó Mawu kpó, bó nyí Mawu.

²Xó énɛ́ kó ɖe tɛgbɛ xá Mawu ɖo bǐbɛ́mɛ.

³É jí wɛ è gbɔn bó bló nǔ e ɖo gbɛ ɔ́ mɛ lɛ́ɛ bǐ; è blǒ nǔ ɖěbǔ é mɛ vo ǎ.

⁴É mɛ wɛ gbɛ ɖe, bɔ gbɛ ɔ́ ka nɔ ná wěziza gbɛtɔ́.

⁵Wěziza ɔ́ ɖo hǐnhɔ́n wɛ ɖo zǐnflú mɛ, bɔ zǐnflú ɔ́ ka sixú wa nǔɖé n'i ǎ.

⁶ Mawu sɛ́ mɛɖé dó, bɔ nyǐkɔ tɔn nyí Jǎan[2].

⁷É wá ɖe kúnnu nú wěziza ɔ́, bónú mɛ bǐ ná dó ɖi nǔ nú wěziza ɔ́, gbɔn kúnnuɖiɖe tɔn gbla mɛ.

⁸É ɖésú wɛ nyí wěziza ɔ́ ǎ; lo ɔ́, é wá, bó ná ɖe kúnnu nú wěziza ɔ́.

⁹Wěziza énɛ́ ɔ́ wɛ nyí wěziza nǔgbó e wá gbɛ ɔ́ mɛ, bó hɔ́n dó gbɛtɔ́ lɛ́ɛ bǐ jí é.

¹⁰Xó ɔ́ kó ɖo gbɛ ɔ́ mɛ; é jí wɛ è blǒ gbɛ ɔ́ gbɔn cóbɔ gbɛtɔ́ lɛ́ɛ ka tunwun i ǎ.

¹¹É wá mɛ tɔn lɛ́ɛ gɔ́n, bɔ mɛ tɔn lɛ́ɛ ka yí i ǎ.

¹²Nǔ ɖo mɔ̌ có mɛɖé lɛ́ɛ ka yí i, bó ɖi nǔ n'i. É ná acɛ mɛ énɛ́ lɛ́ɛ, nú yě ná húzú Mawu ví.

¹³Yě nyí vǐ gbɔn hun gbla mɛ ǎ; yě ká nyí vǐ gbɔn jlǒ agbaza tɔn gbla mɛ ǎ; yě ká nyí vǐ gbɔn gbɛtɔ́ sín jlǒ gbla mɛ ǎ; lo ɔ́, Mawu wɛ nyí Tɔ́ nú yě.

¹⁴Xó ɔ́ húzú gbɛtɔ́, bó wá nɔ mǐ mɛ; é ɖe fɛ́nú kpódó nǔgbó kpó xlɛ́ mǐ, bɔ mǐ mɔ susu tɔn, susu e Tɔ́ nɔ ná Vǐɖokpónɔ tɔn é.

¹⁵Jǎan ɖe kúnnu n'i, bó sú xó ɖɔ: “Mɛ e xó un ɖɔ nú mi bó ɖɔ: ‘Mɛ ɖokpó ɖo gǔdo ce jǎwe; mɛ énɛ́ hú gǎn mì, ɖó é kó ɖe cóbɔ è wǎ ji mì’ ɔ́ ɖíe.”

¹⁶Nyɔ̌ná tɔn mɛ wɛ mǐ bǐ mɔ dɔkun e nyí mǐtɔn ɔ́ yí ɖe, bó mɔ fɛ́nú yí dó fɛ́nú jí.

¹⁷Đó Mɔyízi jí wɛ Mawu gbɔn, bó ná sɛ́n lɛ́ɛ mǐ, bó gbɔn Jezu Klísu jí, bó ná fɛ́nú kpódó nǔgbó kpán mǐ.

¹⁸Mɛ ɖěbǔ mɔ Mawu kpɔ́n gbeɖé ǎ; lo ɔ́, Vǐɖokpónɔ e nyí Mawu bó ɖo akɔ́n tɔn mɛ ɔ́ wɛ wá ɖe e xlɛ́.

¹⁹Jwifugán e ɖo Jeluzalɛ́mu lɛ́ɛ sɛ́ vɔ̌sánú-xwlémawutɔ́ lɛ́ɛ kpódó Levíi ví lɛ́ɛ kpó dó, bónú yě ní yi kanbyɔ́ Jǎan ɖɔ mɛ nǎhún wɛ é ka nyí a jí.

²⁰Ée yě kan nǔ byɔ́ ɛ ɔ́, Jǎan gbɛ́ ǎ; é ɖɔ tawun ɖo mɛ bǐ nukɔn ɖɔ: “Nyɛ wɛ nyí Klísu ɔ́ ǎ.”

²¹ Bɔ yě kanbyɔ́ ɛ ɖɔ: “Mɛ̌ wɛ a ka nyí lo? Hwi wɛ nyí Elíi ɔ́ a?” Bɔ é gbɛ́ nú yě ɖɔ: “Éeǒ, nyɛ wɛ ǎ.” Yě lɛ́ kanbyɔ́ ɛ ɖɔ: “Gbeyíɖɔ Mawu tɔn ɔ́ wɛ a nyí a?” Bɔ é gbɛ́ nú yě ɖɔ: “Éeǒ.”

²²Yě ká wá kanbyɔ́ ɛ ɖɔ: “Bɔ mɛ nǎhún a ka nyí tawun? Mǐ ɖó ná yi ɖó gbe nú mɛ e sɛ́ mǐ dó lɛ́ɛ; étɛ́ hwi ɖésú ká nyí bó tunwun?”

²³ Jǎan yí gbe nú yě ɖɔ: “Nyɛ wɛ nyí mɛ e ɖo xó sú wɛ ɖo gbětótló mɛ é: ‘Mi bló Aklúnɔ sín ali ɖó.’ ” (Nǔ e gbeyíɖɔ Mawu tɔn Ezayíi ɖɔ é nɛ́.)

²⁴Falizyɛn lɛ́ɛ lɔmɔ̌ ɖo mɛ e è sɛ́ dó Jǎan gɔ́n lɛ́ɛ mɛ.

²⁵Bɔ yě kan xó élɔ́ byɔ́ ɛ: “Nú a ma nyí Klísu ɔ́ ǎ, bó ma nyí Elíi ǎ, bó ma ka nyí gbeyíɖɔ Mawu tɔn ɔ́ ǎ ɔ́, étɛ́wútu a ka nɔ lɛ yɛhwesin nú mɛ lɛ́ɛ lo?”

²⁶Jǎan yí gbe nú yě ɖɔ: “Nyɛ ɔ́, sin wɛ un sɔ́ dó ɖo yɛhwesin lɛ nú mi wɛ; lo ɔ́, mɛ ɖokpó ɖo mi tɛ́ntin, bɔ mi tunwun mɛ e é nyí ɔ́ ǎ.

²⁷Mɛ énɛ́ wɛ nyí mɛ e ɖo gǔdo ce jǎwe ɔ́, bɔ un nyí mɛɖé bó sixú tún afɔkpakan tɔn lɛ́ɛ vɔ́vɔ́ ǎ.”

²⁸Nǔ énɛ́ lɛ́ɛ jɛ ɖo Betaníi, ɖo Judɛ́ɛn tɔ ɔ́ gúdo, fí e Jǎan ɖo yɛhwesin lɛ nú mɛ ɖe wɛ é.

²⁹Ayǐhɔ́ngbe tɔn ɔ́, Jǎan mɔ Jezu jǎwe bó ɖɔ: “Mi kpɔ́n! Lɛ̌ngbɔ́ví Mawu tɔn e nɔ sɔ́ hwɛ kɛ gbɛtɔ́ lɛ́ɛ ɔ́ ɖíe.

³⁰Mɛ e xó un ɖɔ nú mi bo ɖɔ: ‘Mɛ ɖé ɖo gǔdo ce jǎwe; mɛ énɛ́ hú gǎn mì, ɖó é ko ɖe cóbɔ è wá ji mì ɔ́ nɛ́.’

³¹Mɛ e é ná nyí ɔ́, nyɛ ɖésúnɔ ko tunwun ɖ'ayǐ ǎ; lo ɔ́, bónú Izlayɛ́li togun ɔ́ ná dó tunwun i wú wɛ un wá sɔ́ sin dó ɖo yɛhwesin lɛ nú mɛ wɛ.”

³²Jǎan ɖe kúnnu ɖɔ: “Un mɔ Yɛ Mawu tɔn gosín jǐxwé wá jɛ te dó jǐ tɔn ahwannɛ́ ɖɔhun, bó cí jǐ tɔn.

³³Mɛ e é ná nyí ɔ́, nyɛ ɖésúnɔ ko tunwun ɖ'ayǐ ǎ. Lo ɔ́, mɛ e sɛ́ mì dó, bónú má wá sɔ́ sin dó lɛ yɛhwesin nú mɛ ɔ́, ko ɖɔ nú mì ɖ'ayǐ ɖɔ: ‘Mɛ e jí a nǎ mɔ Yɛ Mawu tɔn ná jɛ te dó, bó ná cí jǐ tɔn ɔ́, mɛ énɛ́ wɛ ná sɔ́ Yɛsinsɛn dó lɛ yɛhwesin nú mɛ.’

³⁴Nyi ɖésú wɛ mɔ nǔ e jɛ ɔ́, bó ɖe kúnnu ná ɖɔ é wɛ nyí Mawu ví.”

³⁵Ayǐhɔ́ngbe tɔn ɔ́, Jǎan ko lɛ́ ɖo fí ɖokpó ɔ́, kpódó ahwanvú tɔn we kpó.

³⁶Ée é mɔ Jezu wá xweyǐgbe ɔ́, é ɖɔ: “Mi kpɔ́n! Lɛ̌ngbɔ́ví Mawu tɔn ɔ́ ɖíe.”

³⁷Ée ahwanvú Jǎan tɔn we lɛ́ɛ se xó énɛ́ ɔ́, yě jɛ Jezu gúdo.

³⁸Jezu lílɛ́ kpan nukɔn yě, bó mɔ ɖɔ yě xwedó émí, lobo kanbyɔ́ yě ɖɔ: “Ani ba wɛ mi ɖe?” Bɔ yě kanbyɔ́ ɛ ɖɔ: “Fítɛ́ wɛ a nɔ́ nɔ, Hlabi?” Hlabi sín tínmɛ wɛ nyǐ Mɛ̌si.

³⁹Jezu ka yí gbe nú yě ɖɔ: “Mi wá kpɔ́n fí e un nɔ nɔ ɔ́.” Yě ká xwedó e, bo yi mɔ fí e é nɔ́ nɔ ɔ́, bó nɔ gɔ̌n tɔn gbe énɛ́ gbe. (Hwelɛ́kɔ gan ɛnɛ mɛ mɔ̌ wɛ nǔ énɛ́ ɔ́ ɖo jijɛ wɛ.)

⁴⁰Andlé e nyí Sinmɔ́ɔ Piyɛ́ɛ sín nɔví ɔ́ lɔ ɖo mɛ we e se Jǎan sín xó, bo xwedó Jezu lɛ́ɛ mɛ.

⁴¹Nǔ nukɔntɔn e Andlé bló ɔ́, é wɛ nyí ɖɔ é yi mɔ nɔví tɔn Sinmɔ́ɔ, bo ɖɔ n'i ɖɔ: “Mǐ mɔ Mɛsíya ɔ́.”

⁴²Bɔ Andlé kplá nɔví tɔn Sinmɔ́ɔ yi Jezu gɔ́n. Jezu kpɔ́n Sinmɔ́ɔ, bó ɖɔ: “Hwi wɛ nyí Sinmɔ́ɔ, Jǎan sín vǐ ɔ́; amɔ̌, è nǎ nɔ ylɔ́ we ɖɔ Sefási (nyǐkɔ énɛ́ ɔ́ sín tínmɛ wɛ nyí awǐnnya.)”

⁴³Ayǐhɔ́ngbe tɔn ɔ́, Jezu sɔ́ nǔ, bó xwe Galilée. É kpé Filípu, bó ɖɔ n'i ɖɔ: “Xwedó mì!”

⁴⁴(Filípu ɔ́, Bɛtisayidanu wɛ, Andlé kpódó Piyɛ́ɛ kpó ɖɔhun.)

⁴⁵Filípu yi mɔ Natanayɛ́li, bó ɖɔ n'i ɖɔ: “Mɛ e wú Mɔyízi sín sɛ́n lɛ́ɛ kpódó gbeyíɖɔ Mawu tɔn lɛ́ɛ kpó ɖɔ xó dó ɔ́, mǐ mɔ ɛ. Jezu Nazalɛ́ti tɔn Jozɛ́fu ví ɔ́ wɛ.”

⁴⁶Natanayɛ́li ka kanbyɔ́ ɛ ɖɔ: “Nǔ ɖagbe ɖě ká sixú tɔ́n sín Nazalɛ́ti a?” Filípu ka ɖɔ n'i ɖɔ: “Wǎ, bó wá kpɔ́n.”

⁴⁷Đěe Jezu mɔ Natanayɛ́li jǎwe ɔ́, é ɖɔ dó wútu tɔn ɖɔ: “Mi kpɔ́n! Izlayɛ́li ví titewungbe ɖokpó ɖíe; é nɔ hízí nǔ ǎ.”

⁴⁸Đěe Natanayɛ́li se xó e Jezu ɖɔ dó wútu tɔn nɛ́ ɔ́, é kanbyɔ́ ɛ ɖɔ: “Nɛ̌ a ka wa gbɔn bó tunwun mì?” Bɔ Jezu yí gbe n'i ɖɔ: “Hwenu e a kpo ɖo fígitínsá dɔ̌n ɔ́, un ko mɔ we, cóbɔ Filípu wá ylɔ́ we.”

⁴⁹Natanayɛ́li yí gbe n'i ɖɔ: “Mɛ̌si, hwi wɛ nyí Mawu ví ɔ́ nǔgbó; hwi wɛ nyí Izlayɛ́li xɔ́sú.”

⁵⁰Jezu ka yí gbe n'i ɖɔ: “Ée un ɖɔ nú we ɖɔ un mɔ we ɖo fígitínsá ɔ́ wútu wɛ a ɖi nǔ; a ka ko mɔ nǔɖé ǎ; a nǎ lɛ́ wá mɔ nǔ e hú gǎn mɔ̌ lɛ́ɛ.”

⁵¹ Jezu lɛ́ ɖɔ n'i ɖɔ: “Ma ɖɔ nǔgbó nú mi: mi ná mɔ jǐnukúnsin ná hun, bɔ wɛnsagun Mawu tɔn lɛ́ɛ ná nɔ ɖo jǐ yi wɛ, bó ná nɔ ɖo te jɛ wɛ dó nyɛ Gbɛtɔ́ví ɔ́ jí.”