Read fon Jǎan 10 Bible Online

Jǎan 10 - fon bible

Jǎan 10

¹“Má ɖɔ nǔgbó nú mi: mɛ e ma gbɔn hɔnlinu byɔ́ lɛ̌ngbɔ́kpó ɔ́ mɛ ǎ, bó fán nǔ gbɔn fí ɖěvo byɔ́ mɛ ɔ́, mɛ énɛ́ ɔ́, ajotɔ́ axánsúnxó wɛ é nyí.

²Lo ɔ́, mɛ e gbɔn hɔnlinu byɔ́ mɛ ɔ́, é wɛ nyí lɛ̌ngbɔ́nyitɔ́ ɔ́.

³Éyɛ́ wɛ hɔnjínɔtɔ́ nɔ hun hɔn ná, bɔ lɛ̌ngbɔ́ lɛ́ɛ nɔ ɖótó gbe tɔn; é nɔ́ ylɔ́ lɛ̌ngbɔ́ tɔn lɛ́ɛ ɖokpó ɖokpó sín nyǐkɔ, bó nɔ́ ɖe yě tɔ́n.

⁴Ényí é ɖe lɛ̌ngbɔ́ e nyí étɔn lɛ́ɛ bǐ tɔ́n ɔ́, é nɔ́ jɛ nukɔn yětɔn, bɔ lɛ̌ngbɔ́ lɛ́ɛ nɔ xwedó e; ɖó yě se gbe tɔn ɔ́, yě nɔ́ tunwun.

⁵Amɔ̌, yě nɔ xwedó jǒnɔ ǎ; é nyɔ́ wa ɔ́, hɔn wɛ yě nɔ hɔn n'i; ɖó yě tunwun gbe tɔn ǎ.”

⁶Lǒ wɛ nyí bɔ Jezu dó bó dó ɖɔ xó nú yě, yě ká mɔ nukúnnú jɛ nǔ e é jlǒ ná ɖɔ nú yě ɔ́ mɛ ǎ.

⁷Jezu lɛ́ ɖɔ nú yě ɖɔ: “Má ɖɔ nǔgbó nú mi: nyɛ wɛ nyí hɔn nú lɛ̌ngbɔ́ lɛ́ɛ.

⁸Mɛ e ko jɛ nukɔn nú mì lɛ́ɛ bǐ wɛ nyí ajotɔ́ axánsúnxó, lɛ̌ngbɔ́ lɛ́ɛ ka ɖótó yě ǎ.

⁹Nyɛ wɛ nyí hɔn ɔ́. Mɛ e ná gbɔn jǐ ce ɔ́, è nǎ hwlɛ́n ɛ gán; é ná nɔ́ yi, bó ná nɔ́ wá, bó ná nɔ́ mɔ nǔ ɖu.

¹⁰Ajotɔ́ ɔ́, ajogbé wɛ é nɔ́ tɔ́n, bó nɔ́ tɔ́n mɛ hu gbé, bó nɔ́ tɔ́n nǔ hɛn gblé gbé. Nyɛ ɔ́, un wá bónú lɛ̌ngbɔ́ lɛ́ɛ ná mɔ gbɛ, bó mɔ gbɛ dó gbɛ jí.

¹¹“Nyɛ wɛ nyí lɛ̌ngbɔ́nyitɔ́ ɖagbe ɔ́, lɛ̌ngbɔ́nyitɔ́ ɖagbe ɔ́ nɔ́ sɔ́ gbɛ tɔn dó sá vɔ̌ dó lɛ̌ngbɔ́ tɔn lɛ́ɛ tamɛ.

¹²Azɔ̌watɔ́ e ka ɖo lɛ̌ngbɔ́ lɛ́ɛ nyi wɛ ɖó akwɛ́ kɛ́ɖɛ́ wútu, bɔ lɛ̌ngbɔ́ lɛ́ɛ ma nyí étɔn ǎ ɔ́, ényí é mɔ hla jǎwe ɔ́, hɔn wɛ é nɔ hɔn jó lɛ̌ngbɔ́ lɛ́ɛ dó, bɔ hla nɔ byɔ́ yě mɛ, bó nɔ́ wlí ɖě, bó nɔ́ gba ɖě lɛ́ɛ dó.

¹³Mɛ énɛ́ ɔ́ nɔ hɔn, ɖó akwɛ́ kɛ́ɖɛ́ ba wɛ é ɖe. Lɛ̌ngbɔ́ lɛ́ɛ sín gbɛ nɔ vɛ́ n'i ǎ.

¹⁴ Nyɛ wɛ nyí lɛ̌ngbɔ́nyitɔ́ ɖagbe ɔ́. Lě e Tɔ́ ɔ́ tunwun mì, bɔ nyɛ lɔ tunwun i gbɔn ɔ́, un tunwun lɛ̌ngbɔ́ ce lɛ́ɛ, bɔ yě lɔ tunwun mì, bɔ un sɔ́ gbɛ ce dó sá vɔ̌ dó ta yětɔn mɛ.

¹⁶Un lɛ́ ɖó lɛ̌ngbɔ́ ɖěvo lɛ́ɛ bɔ yě ɖo wutó élɔ́ mɛ ǎ; un ɖó ná kplá yě lɔmɔ̌ wá fí, bɔ yě ná se gbe ce, bɔ lɛ̌ngbɔ́hwan ɔ́ ná nyí ɖokpó, bɔ lɛ̌ngbɔ́nyitɔ́ lɔmɔ̌ ná nyí ɖokpó.

¹⁷“Tɔ́ ɔ́ yí wǎn nú mì, ɖó un sɔ́ gbɛ ce dó sá vɔ̌ ná, bó ná sixú lɛ́ vɔ́ yí.

¹⁸Mɛɖěbǔ ná yí gbɛ ce sín así ce ǎ; lo ɔ́, nyɛ ɖésú wɛ jló bó sɔ́ jó; ɖó un ɖó acɛ e sɔ́ gbɛ ce jó é, bó ka lɛ́ ɖó acɛ e lɛ́ vɔ́ yí é. Tɔ́ ce wɛ ná acɛ énɛ́ ɔ́ mì. Lě e Tɔ́ ce zɔ́n mì gbɔn ɔ́ nɛ́.”

¹⁹Gbemanɔkpɔ́ lɛ́ byɔ́ Jwifu e gbɛ́ wǎn nú Jezu lɛ́ɛ mɛ, ɖó xó énɛ́ lɛ́ɛ wútu.

²⁰Bɔ mɛ gěgé ɖo yě mɛ, bó ɖɔ: “Yɛ nyanya wɛ ɖo jǐ tɔn; taɖunɔ wɛ; étɛ́wú mi ka ɖo tó ɖó e wɛ?”

²¹Mɛ ɖěvo lɛ́ɛ ɖɔ: “Mɛ e jí yɛ nyanya ɖe ɔ́ sín xó ɖiɖɔ nɛ́ ǎ; yɛ nyanya ɖě sixú hun nukún nú nukúntíntɔ́nnɔ lɛ́ɛ a?”

²²Hwenɛ́nu ɔ́, Jwifu lɛ́ɛ kplé ɖo Jeluzalɛ́mu, bó ɖo hwenu e yě sɔ́ sinsɛnxɔ yětɔn dó alɔ mɛ nú Mawu ɔ́ sín xwe ɖu wɛ[7]. Avivɔ ɖaxó hwenu wɛ,

²³bɔ Jezu ɖo sa ɖi wɛ gbɔn Salomɔ́ɔ sín agba jí, ɖo sinsɛnxɔ ɔ́ mɛ.

²⁴Jwifu e gbɛ́ wǎn nú Jezu lɛ́ɛ lɛ́ lɛ̌ dó e, bó kanbyɔ́ ɛ ɖɔ: “Káká jɛ hwetɛ́nu a nǎ ɖɔ xó jɔ xó nú mǐ, bɔ mǐ ná gɔn nǔ xokpɔ́n dó? Ényí hwi wɛ nyí Klísu ɔ́ hǔn, ɖɔ nú mǐ tawun.”

²⁵Jezu ka yí gbe nú yě ɖɔ: “Un ko ɖɔ nú mi, mi ka ɖi ǎ. Nǔ e wa wɛ un ɖe ɖo Tɔ́ ce nyǐkɔ mɛ lɛ́ɛ nɔ ɖe kúnnu nú mì.

²⁶Lo ɔ́ mi ka ɖi ǎ, ɖó mi ɖo lɛ̌ngbɔ́ ce lɛ́ɛ mɛ ǎ.

²⁷Lɛ̌ngbɔ́ ce lɛ́ɛ nɔ ɖótó gbe ce, un tunwun yě bɔ yě nɔ xwedó mì.

²⁸Un nɔ ná gbɛ mavɔ mavɔ yě; yě ná kú gbeɖé ǎ; mɛ ɖěbǔ ka ná yí yě sín alɔ ce mɛ ǎ.

²⁹Tɔ́ ce e sɔ́ yě dó así nú mì ɔ́, hú gǎn nǔ bǐ, mɛ ɖěbǔ sixú xo nǔɖé yí sín alɔ tɔn mɛ ǎ.

³⁰Nyɛ kpódó Tɔ́ ɔ́ kpó ɔ́, ɖokpó wɛ mǐ nyǐ.”

³¹Jwifu e gbɛ́ wǎn nú Jezu lɛ́ɛ fɔ awǐnnyaglo bó ná nyi dó hu i ná,

³²bɔ Jezu ɖɔ nú yě ɖɔ: “Nǔ ɖagbe e gosín Tɔ́ ce gɔ́n lɛ́ɛ ɔ́, un ɖe gěgé xlɛ́ mi; ɖě tɛ́ wútu wɛ mi jló ná nyi awǐnnyaglo dó hu mì?”

³³ Yě yí gbe n'i ɖɔ: “Nǔ ɖagbe e a ɖe xlɛ́ mǐ lɛ́ɛ ɖě wútu wɛ mǐ jló ná nyi awǐnnyaglo dó hu we ǎ, nu e a nylǎ dó Mawu wú ɔ́ wútu wɛ. Đó hwi mɛ e nyí gbɛtɔ́ yǎyá ɔ́, a nɔ sɔ́ hwiɖée dó ɖó Mawu ná.”

³⁴ Jezu ka yí gbe nú yě ɖɔ: “È ma wlán dó Mawuxówéma mitɔn mɛ ɖɔ: ‘Un ɖɔ jí: mawu wɛ mi nyí’ ǎ cé?

³⁵Mawuxówéma ɔ́ nɛ́ è ma ka sixú gbídí nǔ ɖěbǔ ɖ'é mɛ ǎ nɛ́. Ényí è ka ylɔ́ mɛ e ɖɔ Mawuxó ná wɛ è ɖe lɛ́ɛ ɖɔ mawu ɔ́,

³⁶étɛ́wú nyɛ mɛ e Mawu ka ɖe ɖó vo, bó sɛ́ mì dó gbɛ ɔ́ mɛ ɔ́, un ɖɔ nú mi ɖɔ Mawu ví wɛ un nyí, bɔ mi ka ɖɔ un nylá nu dó Mawu wú?

³⁷Nú un ma ɖo azɔ̌ e nyí Tɔ́ ce tɔn lɛ́ɛ wa wɛ ǎ hǔn, mi ma ɖi nǔ nú mì ó.

³⁸Ényí un ka ɖo azɔ̌ e nyí étɔn lɛ́ɛ wa wɛ hǔn, mi na bo ma ɖi nǔ nú mì ǎ hǔn, mi bo ɖi nǔ ɖó azɔ̌ énɛ́ lɛ́ɛ wútu. Bónú mi tunwun, bó mɔ nǔ jɛ wú ɖɔ Tɔ́ ɔ́ ɖo nyɛ mɛ, bɔ un ɖo Tɔ́ ɔ́ mɛ.”

³⁹Ée Jezu ɖɔ mɔ̌ ɔ́, yě lɛ́ jló ná wlí i, bɔ é ka hɔn sín yě mɛ.

⁴⁰ É lɛ́ yi Judɛ́ɛn tɔ gúdo, fí e Jǎan lɛ yɛhwesin nú mɛ lɛ́ɛ ɖe ɔ́, bó cí fínɛ́.

⁴¹Gbɛtɔ́ gěgé wá gɔ̌n tɔn bó nɔ́ ɖɔ: “Jǎan Yɛhwesinlɛnúmɛtɔ́ jlɛ́ nǔ ɖěbǔ ǎ; lo ɔ́, nǔ e é ka ɖɔ dó nya élɔ́ wú ɔ́ bǐ wɛ nyí nǔgbó.”

⁴²Bɔ fínɛ́ ɔ́, mɛ gěgé ɖi nǔ nú Jezu.