Read fon Jǎan 11 Bible Online

Jǎan 11 - fon bible

Jǎan 11

¹ Nya ɖé tíin, bó ɖo azɔn jɛ wɛ, bɔ è nɔ ylɔ́ ɛ ɖɔ Lazáa Betaníi tɔn; Betaníi ɔ́, Mali kpódó nɔví tɔn Maati kpó sín gletoxo wɛ.

² Mali énɛ́ wɛ nyí nyɔ̌nu e sá célu nú Jezu, bó zé ɖa tɔn dó súnsún afɔ tɔn lɛ́ɛ ná é; nɔví tɔn wɛ ka nyí Lazáa e ɖo azɔn jɛ wɛ é.

³Lazáa sín nɔví nyɔ̌nu we lɛ́ɛ ka sɛ́ wɛn dó Jezu bó ɖɔ: “Aklúnɔ, xɔ́ntɔn towe vívɛ́ná ɔ́ ɖo azɔn jɛ wɛ.”

⁴Ée Jezu se mɔ̌ ɔ́, é ɖɔ jí: “Kú wɛ ná ɖu ɖo azɔn élɔ́ jí ǎ; é ná ɖe susu Mawu tɔn xlɛ́, bɔ Mawu ví ɔ́ ná xɔ susu gbɔn gbla tɔn mɛ.”

⁵Jezu ka yí wǎn nú Maati kpódó nɔví tɔn nyɔ̌nu ɔ́ kpó, kpódó Lazáa kpán.

⁶Lo ɔ́, hwenu e Jezu se ɖɔ Lazáa ɖo azɔn jɛ wɛ ɔ́, é lɛ́ nɔ to e mɛ é ɖe ɔ́ nú azǎn we d'é jí.

⁷Énɛ́ ɔ́ gúdo ɔ́, é wá ɖɔ nú ahwanvú tɔn lɛ́ɛ ɖɔ: “Mi nú mǐ ná lɛ́ kɔ yi Judée.”

⁸Ahwanvú tɔn lɛ́ɛ ka ɖɔ n'i ɖɔ: “Mɛ̌si, ayisɔnmɔ tófí jɛ́n wɛ Judéenu lɛ́ɛ ja huhu we gbé kpódó awǐnnyaglo kpó ɖo dɔ̌n, bɔ a nǎ lɛ́ lɛ́ kɔ yi dɔ̌n a?”

⁹Jezu ka ɖɔ nú yě ɖɔ: “Ganxixo wěwe wɛ ɖo kéze ɖokpó mɛ; ényí mɛɖé ɖo yiyi wɛ kéze ɔ́, é nɔ klɛ́n afɔ ǎ, ɖó gbɛ mɛ nɔ za wě.

¹⁰É ka nyí zǎn mɛ wɛ é ɖo yiyi wɛ ɔ́, é nɔ klɛ́n afɔ, ɖó wěziza ɖo é ɖésúnɔ mɛ ǎ.”

¹¹Énɛ́ ɔ́ gúdo ɔ́, é lɛ́ ɖɔ nú yě ɖɔ: “Xɔ́ntɔn mǐtɔn Lazáa ɖo amlɔ dɔ́ wɛ; un ná yi fɔ́n ɛ.”

¹²Énɛ́ ɔ́, ahwanvú tɔn lɛ́ɛ kɛ nu bo ɖɔ: “Aklúnɔ, ényí ɖɔ amlɔ dɔ́ wɛ jɛ́n é ɖe ɔ́, azɔn tɔn ná gbɔ.”

¹³Lazáa ko kú ɖɔ nú yě wɛ Jezu ɖe, cóbɔ yědɛɛ lɛ́ɛ ka vɛdó ɖɔ amlɔ dɔ́ wɛ é ɖe, bó ɖo gbigbɔ jɛ wɛ sín.

¹⁴Bɔ Jezu gbɔ bo ɖɔ nyi wɛn nú yě ɖɔ: “Lazáa kú;

¹⁵fínɛ́ e un ma ka ɖe cóbɔ é kú ǎ ɔ́ víví nú mì ɖó mi wútu; énɛ́ ɔ́ ná zɔ́n bɔ mi ná sixú ɖi nǔ. Mi bo nú mǐ ná yi gɔ̌n tɔn.”

¹⁶Hwenɛ́nu ɔ́, Tɔmáa e è nɔ lɛ́ ylɔ́ ɖɔ hǒxo ɔ́ ɖɔ nú ahwanvú ɖě lɛ́ɛ ɖɔ: “Mi nú mǐ lɔmɔ̌ ná xwedó e hɛn yi, bó ná yi kú xá ɛ.”

¹⁷Ée Jezu wá Betaníi ɔ́, é mɔ ɖɔ è ko ɖi Lazáa, bɔ azǎn tɔn ko yi ɛnɛ.

¹⁸Betaníi yá dó Jeluzalɛ́mu bó ɖo kilomɛ́tlu atɔn mɔ̌ dó e.

¹⁹Bɔ Judéenu lɛ́ɛ gěgé ko wá nǔwamɛgbe dó Maati kpódó Mali kpó gbé ɖó nɔví yětɔn e kú ɔ́ wú.

²⁰Ée Maati se ɖɔ Jezu jǎwe ɔ́, é yi kpé e ɖo alixo; lo ɔ́, Mali cí xwé gbe.

²¹Ée Maati yi mɔ Jezu ɔ́, é ɖɔ: “Aklúnɔ, ényí fí wɛ a ko ɖe ɔ́, nɔví ce ná kú ǎ.

²²Có din ɖésú ɔ́, un tunwun ɖɔ a byɔ́ nǔ ɖěbǔ Mawu ɔ́, é ná ná bǐ we.”

²³Jezu ka ɖɔ n'i ɖɔ: “Nɔví towe ná fɔ́n.”

²⁴Bɔ Maati yí gbe n'i ɖɔ: “Un tunwun ɖɔ é ná fɔ́n ɖo fínfɔ́n sín kú mɛkúkú lɛ́ɛ tɔn hwenu, ɖo azǎn gǔdo gúdo tɔn ɔ́ gbe.”

²⁵Jezu ka ɖɔ n'i ɖɔ: “Nyɛ wɛ nyí fínfɔ́n sín kú, bo lɛ́ nyí gbɛ; mɛ ɖěbǔ ɖi nǔ nú mì ɔ́, é ná bo kú ɔ́, é ná nɔ gbɛ.

²⁶Mɛ e ka ɖo gbɛ bo ɖi nǔ nú mì ɔ́ ná kú gbeɖé ǎ. A ɖi nǔ ɖɔ nǔ ná nyí mɔ̌ a?”

²⁷Maati ka yí gbe n'i ɖɔ: “Ɛɛn Aklúnɔ, un ɖi nǔ ɖɔ hwi wɛ nyí Klísu Mawu ví e ɖó ná wá gbɛ ɔ́ mɛ é.”

²⁸Ée Maati ná xósin énɛ́ ɔ́ Jezu ɔ́, é yi ylɔ́ nɔví tɔn Mali bó ɖe kpá ɛ ɖɔ: “Mɛ̌si wá bo ɖo ylɔ̌ylɔ́ we wɛ.”

²⁹Ée Mali se mɔ̌ ɔ́, é sí te vawun, bo ɖidó Jezu kpé gbé.

³⁰Jezu ko byɔ́ gletoxo ɔ́ mɛ hwenɛ́nu ǎ, é kpo ɖo fí e Maati yi kpé e ɖe é.

³¹Ée Judéenu e wá bo ɖo xwé ɔ́ gbé xá Mali, bo ɖo gbɔ dó n'i wɛ lɛ́ɛ mɔ bɔ é sí te vawun mɔ̌ bo tɔ́n ɔ́, yě xwedó e, ɖó yě vɛdó ɖɔ yɔ ɔ́ jí ya avǐ ɖe gbé wɛ é xwe sín.

³²Ée Mali yi mɔ Jezu ɖo fí e é ɖe ɔ́, é jɛ kpo ɖo nukɔn tɔn, bó ɖɔ n'i ɖɔ: “Aklúnɔ, ényí a ko ɖo fí wɛ ɔ́, nɔví ce ná kú ǎ.”

³³Ée Jezu mɔ ɖɔ é ɖo avǐ ya wɛ, bɔ Judéenu e xwedó e lɛ́ɛ lɔ ɖo avǐ ya wɛ ɔ́, lanmɛ tɔn slɔ́ fún, bɔ ayi tɔn bǐ gbadó;

³⁴bɔ é kanbyɔ́ ɛ ɖɔ: “Fítɛ́ mi ka sɔ́ ɛ ɖó?” Yě ká yí gbe n'i ɖɔ: “Aklúnɔ, wǎ kpɔ́n fí e mǐ sɔ́ ɛ ɖó ɔ́.”

³⁵Bɔ Jezu ya avǐ.

³⁶Ée Judéenu lɛ́ɛ mɔ mɔ̌ ɔ́, yě ɖɔ: “Mi kpɔ́n lě e é yí wǎn n'i sɔ é.”

³⁷Mɛ ɖé lɛ́ɛ ka ɖo yě mɛ bó ɖɔ: “Éyɛ́ mɛ e hun nukún nú nukúntíntɔ́nnɔ ɔ́, é sixú bló bónú nya énɛ́ gɔn kúkú ǎ cé?”

³⁸Wǔ lɛ́ kú Jezu, bɔ é ɖidó yɔdo ɔ́ kɔn; yɔdo ɖé wɛ bó ɖo sóxo mɛ bɔ è blǐ awǐnnya nyi nu.

³⁹Ée Jezu jɛ fínɛ́ ɔ́, é ɖɔ nú mɛ lɛ́ɛ ɖɔ: “Mi blí awǐnnya ɔ́ síin.” Bɔ mɛ e kú ɔ́ sín nɔví nyɔ̌nu Maati ɖɔ nú Jezu ɖɔ: “Aklúnɔ, cyɔ ɔ́ ná ko dó cyɔ mɛ! Đó azǎn ɛnɛ ɖíe ɖokpóó wɛ é ko ɖo fínɛ́.”

⁴⁰Jezu ka ɖɔ n'i ɖɔ: “Un ko ɖɔ nú we ɖɔ nú a ɖi nǔ ɔ́, a ná mɔ susu Mawu tɔn ǎ cé?”

⁴¹Bɔ yě blí awǐnnya ɔ́ síin. Jezu ka zé ta yi jǐ, bó ɖɔ: “Tɔ́ ce, un dó kú nú we, ɖó a ɖǒtó mì.

⁴²Un tunwun ɖɔ a nɔ ɖótó mì tɛgbɛ; amɔ̌, mɛ e lɛ́ lɛ̌ dó mì lɛ́ɛ wútu wɛ un ka ɖo xó ɖɔ wɛ bónú yě ná dó ɖi nǔ ɖɔ hwi wɛ sɛ́ mì dó.”

⁴³Ée Jezu ɖɔ xó énɛ́ vɔ ɔ́, é sú xó syɛ́nsyɛ́n bo ɖɔ: “Lazáa tɔ́n, bó wá.”

⁴⁴Bɔ mɛkúkú ɔ́ tɔ́n sín yɔdo ɔ́ mɛ nǔgbó, bɔ avɔ e è lɛ̌ dó afɔ tɔn lɛ́ɛ kpódó alɔ tɔn lɛ́ɛ kpán é bǐ ɖo mɔ̌, bɔ avɔ e è dǒ blǎ gba n'i ɔ́ ɖo nukún mɛ n'i. Jezu ɖɔ nú yě ɖɔ: “Mi tún gba n'i, bo jó e dó nú é yi.”

⁴⁵Ée Judéenu e wá Mali gɔ́n lɛ́ɛ mɔ nǔ énɛ́ e Jezu jlɛ́ ɔ́, yě mɛ gěgé ɖi nǔ n'i.

⁴⁶Nǔ ɖo mɔ̌ có mɛɖé lɛ́ɛ ɖo yě mɛ, bó yi mɔ Falizyɛn lɛ́ɛ, bó wlí nǔ e Jezu wa é bǐ ɖɔ nú yě.

⁴⁷Bɔ vɔ̌sánú-xwlémawutɔ́gán lɛ́ɛ kpódó Falizyɛn lɛ́ɛ kpó ylɔ́ kplé toxóɖɔtɔ́ lɛ́ɛ tɔn, bó ɖɔ: “Nɛ̌ mǐ ká ná bló gbɔn nú nya élɔ́? Éɖíe ɖo nǔ gěgé jlɛ́ wɛ e.

⁴⁸Ényí mǐ jó e dó, bɔ é ɖo nǔ wa gbɔn mɔ̌ wɛ ɔ́, mɛ bǐ ná ɖi nǔ n'i, bɔ Hlɔ̌manu lɛ́ɛ ná wá gba sinsɛnxɔ mǐtɔn, bó ná gba to ɔ́ dó ta nú mǐ[8].”

⁴⁹Mɛ ɖokpó ka ɖo yě mɛ, bó nɔ́ nyí Kayífu; é wɛ ɖo vɔ̌sánú-xwlémawutɔ́ ɖaxó sín azɔ̌ wa wɛ xwe énɛ́ xwe, bó ɖɔ nú yě ɖɔ: “Mi tunwun nǔɖé ǎ.

⁵⁰Hǔn mi mɔ ɖɔ mɛ ɖokpó géé kú dó mɛ bǐ tamɛ ɔ́, é nyɔ́ hú to ɔ́ bǐ sésé ní vɔ ǎ cé?”

⁵¹É ɖésú wɛ ka ɖo xó énɛ́ ɖɔ wɛ ǎ; lo ɔ́, xwe énɛ́ xwe ɔ́, é wɛ nyí vɔ̌sánú-xwlémawutɔ́ ɖaxó ɔ́, bɔ Mawu ɖɔ xó gbɔn jǐ tɔn ɖɔ Jezu ná kú dó togun ɔ́ bǐ tamɛ.

⁵²É ka nyí ɖɔ togun énɛ́ ɔ́ kɛ́ɖɛ́ tamɛ wɛ é ná kú dó ǎ; é ná lɛ́ kplé Mawu ví e gbadó lɛ́ɛ bǐ ɖó bǔ.

⁵³Sín gbe énɛ́ gbe ɖokpóó wɛ yě ko ɖe gbeta tɔ́n ɖɔ émí ná hu i.

⁵⁴Énɛ́ ɔ́ wútu wɛ Jezu sɔ́ nɔ zé éɖée xlɛ́ Judéenu lɛ́ɛ agbawungba ǎ, bɔ é kpódó ahwanvú tɔn lɛ́ɛ kpó yi cí to e è nɔ ylɔ́ ɖɔ Eflayímu é mɛ, ɖo malín málín mɛ dó gbětótló mɛ.

⁵⁵Dǐndínwáyixwe Jwifu lɛ́ɛ tɔn ko sɛ yá; bɔ to ɔ́ mɛ nu lɛ́ɛ gěgé ko yi Jeluzalɛ́mu bó ná yi slá wǔ, cóbɔ xwe ɔ́ ná wá.

⁵⁶Yě ɖo Jezu ba wɛ, bó jɛ kinkanbyɔ́ yěɖée jí ɖo sinsɛnxɔ ɔ́ mɛ ɖɔ: “É ná wá xwe ɔ́ tɛnmɛ ǎ wɛ a? Étɛ́ mi ka mɔ dó nǔ énɛ́ wú?”

⁵⁷Vɔ̌sánú-xwlémawutɔ́gán lɛ́ɛ kpódó Falizyɛn lɛ́ɛ kpó ɖé gbeta tɔn, bó ɖɔ: “Ényí mɛ ɖěbǔ tunwun fí e é ɖe ɔ́ hǔn, ní wá ɖɔ, bónú è nǎ yi wlí i.”