Read fon Jǎan 13 Bible Online

Jǎan 13 - fon bible

Jǎan 13

¹Dǐndínwáyixwe kpo sɔ, bɔ Jezu tunwun ɖɔ gan e mɛ émí ná gosín gbɛ mɛ fí, bó ná yi Mawu gɔ́n dó ɔ́ xo. É yí wǎn nú mɛ e nyí étɔn ɖo gbɛ ɔ́ mɛ lɛ́ɛ bó ɖó wǎn yíyí nú yě káká yi kú.

²Jezu kpódó ahwanvú tɔn lɛ́ɛ kpó ɖo gbada nǔɖuɖu ɖu wɛ. Awǒvi ka ko sɔ́ linlin nyanya dó ayi mɛ nú Judási Sinmɔ́ɔ Isikaliɔ́ti ví ɔ́, ɖɔ ní sa Jezu.

³Ée Jezu ka tunwun ɖɔ Mawu ko sɔ́ nǔ bǐ dó alɔ mɛ nú émí, bɔ gɔ̌n tɔn wɛ e mi gosín, bó ka lɛ́ lɛ́ kɔ xwe gɔ̌n tɔn ɔ́,

⁴é sí te sín nǔɖuɖu ɔ́ kɔn, bó ɖe awu tɔn lɛ́ɛ, bó sɔ́ avɔ ɖé sin dó alin.

⁵Énɛ́ gúdo ɔ́, é wún sin dó gannú mɛ, bó jɛ afɔ klɔ́ nú ahwanvú tɔn lɛ́ɛ jí ɖokpó ɖokpó, bó nɔ́ dɔn avɔ e é sin dó alin ɔ́ dó súnsún afɔ nú yě.

⁶É wá jɛ Sinmɔ́ɔ Piyɛ́ɛ jí, bɔ éyɛ́ ɖɔ: “Aklúnɔ, hwi wɛ ná klɔ́ afɔ nú mì a?”

⁷Jezu ka yí gbe n'i ɖɔ: “Nǔ e wa wɛ un ɖe ɔ́, a ko tunwun din ǎ; amɔ̌, a nɔ káká ɔ́, a nǎ wá tunwun.”

⁸Piyɛ́ɛ lɛ́ ɖɔ nú Jezu ɖɔ: “A nǎ klɔ́ afɔ nú mì gbeɖé ǎ!” Bɔ Jezu ɖɔ n'i ɖɔ: “Ényí un ma klɔ́ afɔ nú we ǎ ɔ́, hǔn a sɔ́ nyí ahwanvú ce ǎ.”

⁹Énɛ́ ɔ́, Sinmɔ́ɔ Piyɛ́ɛ ɖɔ n'i ɖɔ: “Nú ényí mɔ wɛ hǔn Aklúnɔ, é ní ma nyí ɖɔ afɔ ce lɛ́ɛ kɛ́ɖɛ́ wɛ a nǎ klɔ́ ó; klɔ́ alɔ ce lɛ́ɛ, bó klɔ́ ta ce lɔmɔ̌ d'é jí.”

¹⁰Jezu ka yí gbe n'i ɖɔ: “Mɛ e ko lɛ wǔ ɔ́, afɔ kɛ́ɖɛ́ jɛ́n kpo n'i bɔ é ná klɔ́, bó ná mɛ́; ɖó mǐmɛ́ jí wɛ mi ko ɖe; amɔ̌ mi bǐ ka wɛ ǎ.”

¹¹Jezu ɖɔ mɔ̌, ɖó é ko tunwun mɛ e ɖo nǎ sa ɛ ɖu wɛ ɖo yě mɛ é; nǔ e wú é ɖɔ é kún nyí yě bǐ wɛ nyí mɛ mímɛ́ ó ɔ́ nɛ́.

¹² Ée é klɔ́ afɔ nú yě bǐ yi fó ɔ́, é lɛ́ sɔ́ awu tɔn lɛ́ɛ dó, bó yi jínjɔ́n tɛn tɔn mɛ ɖo nǔɖuɖu ɔ́ kɔn, bó kanbyɔ́ yě ɖɔ: “Mi ka mɔ nǔ jɛ nǔ e un bló nú mi din ɔ́ mɛ a?

¹³Mi nɔ ylɔ́ mì ɖɔ ‘Mɛ̌si’, bó nɔ́ ylɔ́ mì ɖɔ ‘Aklúnɔ’; hwɛ mitɔn jɔ, ɖó nǔ e un nyí ɔ́ nɛ́.

¹⁴Hǔn, ényí nyɛ mɛ e nyí Aklúnɔ mitɔn, bó nyí Mɛ̌si mitɔn ɔ́ ka klɔ́ afɔ nú mi ɔ́, é jɛ xá ɖɔ mi ná nɔ́ klɔ́ afɔ nú miɖée.

¹⁵Đó kpɔ́ndéwú ɖé wɛ é nyí, bɔ un ná mi, bónú mi lɔmɔ̌ ná nɔ́ bló lě e un bló gbɔn nú mi é.

¹⁶ Má ɖɔ nǔgbó nú mi: mɛsɛntɔ́ nɔ hú gǎn gǎn tɔn ǎ; mɔ̌ ɖokpó ɔ́, wɛnsagun nɔ hú gǎn mɛ e sɛ́ ɛ dó ɔ́ ǎ.

¹⁷Nǔ lɛ́ɛ bǐ mɛ nɛ́ mi mɔ nukúnnú jɛ nɛ́; ényí mi bló ɖ'é jí ɔ́, é ná nyɔ́ nú mi.

¹⁸ Mi bǐ xó ɖɔ wɛ un ka ɖe ǎ, ɖó un tunwun mɛ e un cyán lɛ́ɛ; nǔ e Mawuxówéma ɔ́ ka ko ɖɔ ɔ́ ɖó ná jɛ. É wɛ nyí ɖɔ: ‘Mɛ e nɔ ɖu nǔɖuɖu ce ɔ́ húzú kpan nukɔn mì.’

¹⁹Un ɖo ɖiɖɔ nú mi wɛ din, cóbónú é ná wá jɛ; bónú é wá jɛ ɔ́, mi na ɖi nǔ ɖɔ nyɛ wɛ nyí mɛ e un nyí é.

²⁰ Má ɖɔ nǔgbó nú mi: mɛ e yí mɛ e un sɛ́ dó ɔ́ ɖěbǔ sín jǒnɔ ɔ́, nyɛ ɖésúnɔ wɛ é yí, bɔ mɛ e ka yí mì ɔ́, mɛ e sɛ́ mì dó ɔ́ wɛ é yí.”

²¹Ée Jezu ɖɔ xó énɛ́ lɛ́ɛ gúdo ɔ́, ayi tɔn bǐ gbadó, bɔ é ɖɔ: “Má ɖɔ nǔgbó nú mi: mɛ ɖokpó ɖo mi mɛ, bó ná sa mì.”

²²Ahwanvú tɔn lɛ́ɛ ka tunwun mɛ e xó ɖɔ wɛ é ɖe ɖo yě mɛ ɔ́ ǎ, bɔ yě jɛ yěɖée kpɔ́n jí.

²³Ahwanvú Jezu tɔn e é ɖó wǎn yíyí ná tlala ɔ́ ka ɖo akpá tɔn ɖo nǔɖuká ɔ́ kɔn.

²⁴Sinmɔ́ɔ Piyɛ́ɛ sɔ́ ta dó ɖɔ xó n'i ɖɔ ní kanbyɔ́ Jezu ɖɔ mɛ xó ɖɔ wɛ é ɖe ají.

²⁵Éyɛ́ ka nya dó Jezu sín akɔ́nnu, bó kanbyɔ́ ɛ ɖɔ: “Aklúnɔ, mɛ̌ ka nyí mɛ ɔ́?”

²⁶Bɔ Jezu yí gbe n'i ɖɔ: “Mɛ e un ná sɔ́ wɔ̌xúxú gǒ ɖokpó, bó sún nǔsúnnú, bó sɔ́ ná ɔ́, mɛ ɔ́ wɛ.” Nǔgbó ɔ́, Jezu sɔ́ wɔ̌xúxú gǒ ɖokpó, bó sún nǔsúnnú, bó sɔ́ nú Judási Sinmɔ́ɔ Isikaliɔ́ti ví ɔ́.

²⁷Ée Judási yí wɔ̌xúxú ɔ́, Satáan wá ayi tɔn mɛ, bɔ Jezu ɖɔ n'i ɖɔ: “Nǔ e ná bló wɛ a ɖe ɔ́, yǎ wǔ bló.”

²⁸Yě mɛ e ɖo nǔ ɖu xá Jezu wɛ lɛ́ɛ ɖěbǔ mɔ nǔ jɛ nǔ e wú Jezu ɖɔ xó énɛ́ nú Judási ɔ́ mɛ ǎ.

²⁹Ée é ka nyí Judási wɛ nɔ hɛn akwɛ́ yětɔn ɔ́, mɛɖé lɛ́ɛ vɛdó ɖɔ é ní yi xɔ nǔ e è nǎ dó ɖu xwe ɔ́ ná ɔ́, abǐ é ní ná nǔɖé wamamɔnɔ lɛ́ɛ ɖɔ n'i wɛ é ɖe sín.

³⁰Ée Judási yí wɔ̌xúxú ɔ́, é tɔ́n tlóló. Zǎn ko kú hwenɛ́nu.

³¹Ée Judási tɔ́n ɔ́, Jezu yí xó bó ɖɔ: “Din ɔ́, Gbɛtɔ́ví ɔ́ ko xɔ susu, bɔ Mawu ko xɔ susu gbɔn jǐ tɔn.

³²Ée Mawu xɔ susu gbɔn vǐ tɔn gbla mɛ ɔ́, Mawu lɔ ná sɔ́ vǐ tɔn su ɖo é ɖésúnɔ gɔ́n; é ka ná sɔ́ ɛ su ɖo malín málín mɛ.

³³ Yɔkpɔ́ ce lɛ́ɛ mi, un sɔ́ ɖo mi gɔ́n ná nɔ wɛ gěgé ɖé ǎ. Mi ná ba mì. Xó ɖokpó e un ko ɖɔ nú Jwifugán lɛ́ɛ ɔ́ ɖɔ nú mi lɔmɔ̌ wɛ un ɖe. É wɛ nyí ɖɔ: ‘Fí e un xwe ɔ́, mi ɖě sixú yi ǎ.’

³⁴ Un ɖo sɛ́n yɔ̌yɔ́ ɖokpó ná mi wɛ: mi yí wǎn nú miɖée. Mi ɖó ná yí wǎn nú miɖée lě e un yí wǎn nú mi gbɔn é.

³⁵Wǎn yíyí e mi ná ɖó nú miɖée ɔ́, wɛ ná ɖe xlɛ́ mɛ lɛ́ɛ bǐ ɖɔ mi nyí ahwanvú ce nǔgbó.”

³⁶Sinmɔ́ɔ Piyɛ́ɛ kanbyɔ́ Jezu ɖɔ: “Aklúnɔ, fítɛ́ a ka xwe?” Jezu ka yí gbe n'i ɖɔ: “Fí e un xwe ɔ́, a sixú xwedó mì yi din ǎ; lo ɔ́, é ko wá yá ɔ́, a nǎ xwedó mì yi.”

³⁷Piyɛ́ɛ lɛ́ kanbyɔ́ Jezu ɖɔ: “Aklúnɔ, étɛ́wútu un ma ka sixú xwedó we yi din ǎ? Un ɖo gbesisɔ mɛ, bó ná kú ɖó ta towe mɛ.”

³⁸Jezu ka yí gbe n'i ɖɔ: “A ɖo gbesisɔ mɛ bó ná kú ɖó ta ce mɛ nǔgbó a? Má ɖɔ nǔgbó nú we: cóbónú kokló ná kɔ́ así ɔ́, a nǎ ko gbɛ́ azɔn atɔn ɖɔ émí kún tunwun mì ó.”