Read fon Jǎan 15 Bible Online

Jǎan 15 - fon bible

Jǎan 15

¹“Nyɛ wɛ nyí vǐwuntín titewungbe ɔ́, bɔ Tɔ́ ce ka nyí vǐwunglejíkpɔ́ntɔ́ ɔ́.

²Ala ɖěbǔ ɖo wú ce, bó ma nɔ ná sínsɛ́n ǎ ɔ́, tɔ́ ce nɔ sɛ́n síin; ée ka nɔ́ ná sínsɛ́n ɔ́, é nɔ́ jlá ala tɔn lɛ́ɛ bónú é ná sixú lɛ́ sɛ́n d'é jí.

³Midɛɛ lɛ́ɛ ɔ́, xó e un ɖɔ nú mi ɔ́ zɔ́n, bɔ mi ko húzú mɛ mímɛ́.

⁴Mi nɔ nyɛ mɛ, lě e nyɛ ɖo mi mɛ ɔ́ ɖɔhun, ɖó vǐwuntín sín ala sixú sɛ́n é ɖóɖó, ma nɔ vǐwuntín dodó ɔ́ wú ǎ; mɔ̌ ɖokpó ɔ́, mi lɔmɔ̌ mi ma nɔ nyɛ mɛ ǎ ɔ́, mi sixú ná sínsɛ́n ɖěbǔ ǎ.

⁵“Nyɛ wɛ nyí vǐwuntín dodó ɔ́, bɔ midɛɛ lɛ́ɛ ka nyí ala lɛ́ɛ. Mɛ e ɖo nyɛ mɛ, bɔ nyɛ lɔ ka ɖo éyɛ́ mɛ ɔ́, é ná sɛ́n gěgé. Đó nyɛ mɛ vo ɔ́, mi sixú kpé nǔ ɖěbǔ wú bo wa ǎ.

⁶Mɛ e ma ɖo nyɛ mɛ ǎ ɔ́, Mawu nɔ sɔ́ ɛ nyi gbě lě e è nɔ sɛ́n atínla, bɔ yě nɔ xú, bɔ è nɔ bɛ́ kɔn nyi myɔ mɛ, bɔ yě nɔ ji zo é ɖɔhun.

⁷Ényí mi nɔ nyɛ mɛ, bónú xó ce lɛ́ɛ jínjɔ́n ayi mɛ nú mi ɔ́, mi byɔ́ nǔ e jló mi ɔ́, mi ná mɔ yí.

⁸Ényí mi ná sínsɛ́n gěgé ɔ́, susu wɛ é ná nyí nú Tɔ́ ce, bɔ mi ná nyí ahwanvú ce.

⁹Lě e Tɔ́ ɔ́ yí wǎn nú mì gbɔn ɔ́, nyɛ lɔ un yí wǎn nú mi; mi bo nɔ wǎn yíyí ce mɛ.

¹⁰Ényí mi nyi sɛ́n ce lɛ́ɛ ɔ́, mi ná nɔ wǎn yíyí ce mɛ, lě e nyɛ nyi Tɔ́ ce sín sɛ́n lɛ́ɛ, bó ɖo wǎn yíyí tɔn mɛ ɔ́ ɖɔhun.

¹¹“Un ɖɔ mɔ̌ nú mi, bónú xomɛ ní hun mi, lě e xomɛ nɔ hun nyɛ gbɔn é, bónú awǎjijɛ mitɔn ɔ́, nǔ bǐ ní vɔ ɖ'é wú.

¹² Sɛ́n ce ka ɖíe: mi yí wǎn nú miɖée, lě e un yí wǎn nú mi gbɔn é.

¹³Wǎn yíyí nú mɛ ɖě sɔ́ hú è sɔ́ gbɛ mɛɖée tɔn dó sá vɔ̌ dó xɔ́ntɔn mɛtɔn lɛ́ɛ tamɛ ǎ.

¹⁴Ényí mi nɔ bló nǔ e un zɔ́n mi lɛ́ɛ ɔ́, xɔ́ntɔn ce wɛ mi nyí.

¹⁵Un sɔ́ nɔ ylɔ́ mi ɖɔ mɛsɛntɔ́ ǎ, ɖó mɛsɛntɔ́ nɔ mɔ do nú nǔ e wa wɛ gǎn tɔn ɖe ɔ́ ǎ. Un nɔ ylɔ́ mi ɖɔ xɔ́ntɔn, ɖó nǔ e un se ɖo Tɔ́ ce nu lɛ́ɛ bǐ wɛ un ɖe xlɛ́ mi.

¹⁶Mi wɛ sɔ́ mì ǎ; lo ɔ́, nyɛ wɛ cyán mi, bó sɛ́ mi dó gbɛ ɔ́ mɛ, bónú mi ná sɛ́n, bó gba kún káká sɔ́yi; énɛ́ ɔ́, mi byɔ́ nǔ ɖěbǔ Tɔ́ ɔ́ ɖo nyǐkɔ ce mɛ ɔ́, é ná ná bǐ mi.

¹⁷Nǔ e zɔ́n mi wɛ un ɖe ɔ́ wɛ nyí ɖɔ mi ní ɖó wǎn yíyí nú miɖée.”

¹⁸“Ényí mɛ e nyí gbɛ ɔ́ tɔn lɛ́ɛ gbɛ́ wǎn nú mi hǔn, mi tunwun ɖɔ yě ko gbɛ́ wǎn nú nyɛ jɛ nukɔn nú mi.

¹⁹Ényí gbɛ ɔ́ tɔn wɛ mi nyí ɔ́, mɛ e nyí gbɛ ɔ́ tɔn lɛ́ɛ na ko yí wǎn nú mi. Lo ɔ́, nyɛ cyán mi, bó ɖe mi sín gbɛ ɔ́ mɛ, bɔ mi sɔ́ nyí gbɛ ɔ́ tɔn ǎ; énɛ́ ɔ́ wútu wɛ mɛ e nyí gbɛ ɔ́ tɔn lɛ́ɛ gbɛ́ wǎn nú mi.

²⁰ Mi vɛ́ nɔ flín xó e un ko ɖɔ nú mi é: ‘Mɛsɛntɔ́ nɔ hú gǎn gǎn tɔn ǎ.’ Ényí yě dó ya nú mì ɔ́, yě ná dó ya nú mi lɔmɔ̌; yě ká xwedó xó ce lɛ́ɛ ɔ́, yě ná xwedó xó mi lɔmɔ̌ tɔn lɛ́ɛ.

²¹Nyɛ wútu wɛ è nǎ wa nǔ énɛ́ lɛ́ɛ bǐ xá mi, ɖó yě tunwun mɛ e sɛ́ mì dó ɔ́ ǎ.

²²Ényí un ma ko wá, bó ɖɔ xó nú yě ǎ ɔ́, yě ná nyí hwɛhutɔ́ ǎ; din e un ka wá, bó ɖɔ xó nú yě ɔ́, yě sɔ́ sixú mɔ nǔ ɖěbǔ ɖɔ, bó dó hwlɛ́n yěɖée gán sín hwɛ yětɔn lɛ́ɛ mɛ ǎ.

²³Mɛ e gbɛ́ wǎn nú mì ɔ́, é gbɛ́ wǎn nú Tɔ́ ce lɔmɔ̌.

²⁴Ényí un ma ko jlɛ́ nǔ e mɛ ɖěbǔ ma jlɛ́ kpɔ́n gbeɖé ɔ́ ɖo nukún yětɔn mɛ ǎ ɔ́, yě ná nyí hwɛhutɔ́ ǎ. Amɔ̌, din ɔ́, yě mɔ nǔjlɛ́jlɛ́ énɛ́ lɛ́ɛ có bó ka gbɛ́ wǎn nú nyɛ, bó lɛ́ gbɛ́ wǎn nú Tɔ́ ce.

²⁵ Lo ɔ́, nǔ e è wlán dó sɛ́nwéma yětɔn mɛ ɔ́ ná dó jɛ wútu wɛ; é wɛ nyí ɖɔ: ‘Yě gbɛ́ wǎn nú mì nǔɖé ma sín nǔɖé wú.’

²⁶“Gbɔdónúmɛtɔ́ ɔ́ ná wá. Yɛ e nyí nǔgbó, bó gosín Tɔ́ ɔ́ gɔ́n ɔ́ wɛ. Un ná sɛ́ ɛ dó mi sín Tɔ́ ɔ́ gɔ́n. Hwenu e é ná wá ɔ́, é ná ɖe kúnnu nú mì;

²⁷bɔ mi lɔmɔ̌ ná ɖe kúnnu nú mì, ɖó mi ko ɖo kpɔ́ xá mì sín bǐbɛ́mɛ.