Read fon Jǎan 16 Bible Online

Jǎan 16 - fon bible

Jǎan 16

¹“Un ɖɔ xó énɛ́ lɛ́ɛ bǐ nú mi din, bónú nǔɖiɖi mitɔn ní ma jɛ ayǐ ó.

²È nǎ wá ɖe mi sín kplɔ́ngbasá lɛ́ɛ. Gan ɔ́ ko ɖo nǎ xo wɛ lɔ, bɔ mɛ ɖěbǔ hu mi ɔ́, mɛ ɔ́ ná vɛdó ɖɔ Mawu sín azɔ̌ wa wɛ émí ɖe nɛ́ sín.

³Yě ná wa nǔ gbɔn mɔ̌, ɖó yě tunwun Tɔ́ ce ǎ; yě ká tunwun nyɛ lɔmɔ̌ ǎ.

⁴Hǔn, un ɖo xó élɔ́ lɛ́ɛ ɖɔ nú mi wɛ, bónú gan tɔn wá xo ɔ́, mi ná flín ɖɔ un ko ɖɔ xó énɛ́ lɛ́ɛ nú émí ɖ'ayǐ.” “Un ɖɔ xó élɔ́ lɛ́ɛ nú mi sín do ǎ, ɖó un ɖo kpɔ́ xá mi.

⁵Amɔ̌, din ɔ́, un xwe mɛ e sɛ́ mì dó ɔ́ gɔ́n, bɔ mɛ ɖěbǔ ka ɖo mi mɛ, bó kanbyɔ́ mì ɖɔ fítɛ́ a xwe ají ǎ.

⁶Ée un ɖɔ mɔ̌ nú mi ɔ́, wǔ jɛ́n kú mi,

⁷có nǔgbó ɖɔ nú mi wɛ un ɖe: yiyi ce ná ɖó le nú mi hú; ɖó ényí un ma yi ǎ ɔ́, gbɔdónúmɛtɔ́ ɔ́ ná wá mi gɔ́n ǎ. Un ka yi ɔ́, un ná sɛ́ ɛ dó mi.

⁸Nú é ko wá ɔ́, é ná ɖe xlɛ́ gbɛtɔ́ lɛ́ɛ ɖɔ linlin e yě ɖó dó hwɛhuhu wú, bó ɖó dó jlǒ Mawu tɔn kpódó hwɛɖiɖɔ kpán wú ɔ́ kún sɔgbe ó.

⁹Linlin e yě ɖǒ dó hwɛhuhu wú ɔ́ kún sɔgbe ó; ɖó yě ɖi nǔ nú mì ǎ.

¹⁰Linlin e yě ɖǒ dó jlǒ Mawu tɔn wú ɔ́ sɔgbe ǎ, ɖó un xwe Tɔ́ ce gɔ́n, bɔ mi sɔ́ ná mɔ mì ɖě ǎ.

¹¹Linlin e yě ɖǒ dó hwɛɖiɖɔ Mawu tɔn wú ɔ́ sɔgbe ǎ, ɖó Mawu ko ɖó hwɛ nú axɔ́sú gbɛmɛ fí tɔn ɔ́.

¹²“É kpo nǔ gěgé, bɔ un ɖó ná ɖɔ nú mi; lo ɔ́, mi sixú mɔ nukúnnú jɛ yě mɛ ǎ.

¹³Hwenu e Yɛ e nɔ ɖe nǔgbó Mawu tɔn xlɛ́ ɔ́ ná wá ɔ́, é ná bló, bɔ mi ná tunwun nǔgbó ɔ́ bǐ; ɖó acɛ é ɖésúnɔ tɔn mɛ wɛ é ná ɖɔ xó dó ǎ; lo ɔ́, nǔ e é se ɔ́ wɛ é ná ɖɔ, bó ná ɖɔ nǔ e ɖo na jɛ wɛ lɛ́ɛ nú mi.

¹⁴É ná sɔ́ mì su, ɖó nǔ e un ɖɔ n'i ɔ́ wɛ é ná ɖɔ nú mi.

¹⁵Nǔ e nyí Tɔ́ ɔ́ tɔn ɔ́ bǐ wɛ nyí ce. Énɛ́ wútu wɛ un ɖɔ nú mi ɖɔ: nǔ e un ɖɔ n'i ɔ́ wɛ é ná ɖɔ nú mi.”

¹⁶“Zaanɖé din ɔ́, mi na ba mì kpo; é ka nɔ zaanɖé ɔ́, mi ná mɔ mì, ɖó un xwe Tɔ́ ce gɔ́n.”

¹⁷Ée Jezu ɖɔ mɔ̌ ɔ́, ahwanvú tɔn lɛ́ɛ ɖěe jɛ nǔ kanbyɔ́ yěɖée jí, bo nɔ ɖɔ: “Étɛ́ ɖɔ nú mǐ wɛ é ka ɖe, bo ɖɔ: ‘Zaanɖé din ɔ́, mi na ba mì kpo; zaanɖé din ɔ́, mi ná mɔ mì; bo ka lɛ́ ɖɔ: ɖó un xwe Tɔ́ ɔ́ gɔ́n!’

¹⁸Ani ka nyí: ‘Zaanɖé din’ ɔ́? Mǐ ma mɔ nǔ jɛ xó e ɖɔ nú mǐ wɛ é ɖe ɔ́ mɛ nɛ́!”

¹⁹Jezu ka tunwun ɖɔ yě jló ná kan nǔ byɔ́ émí, bó ɖɔ nú yě ɖɔ: “Ée un ɖɔ nú mi ɖɔ zaanɖé din ɔ́, mi ná ba mì kpo, é ka lɛ́ nɔ zaanɖé ɔ́ mi ná mɔ mì ɔ́, wú kan nǔ byɔ́ miɖée dó wɛ mi ɖe a?”

²⁰Má ɖɔ nǔgbó nú mi: mi ná nɔ́ ɖo avǐ ya wɛ, bó ná nɔ́ ɖo alě ná wɛ, bɔ mɛ e nyí gbɛmɛ fí tɔn lɛ́ɛ ka ná nɔ́ ɖo awǎ jɛ wɛ. Mi ná nɔ aluwɛ mɛ, lo ɔ́, aluwɛ mitɔn ná wá húzú awǎjijɛ nú mi.

²¹Nyɔ̌nu ja vǐ ji gbé ɔ́, wǔ nɔ́ kú i, ɖó wǔvɛ́ mimɔ tɔn sín gan wɛ xo; é ka ji vǐ ɔ́ gúdo ɔ́, é sɔ́ nɔ́ flín wǔvɛ́ e é mɔ lɛ́ɛ ǎ, xomɛ nɔ hun i ɖó vǐ e wá gbɛ ɔ́ wú.

²²Mɔ̌ ɖokpó ɔ́, mi lɔmɔ̌ ɖo aluwɛ mɛ din; lo ɔ́, un ná lɛ́ wá mɔ mi, bɔ mi ná mɔ awǎjijɛ, bɔ mɛ ɖěbǔ sɔ́ ná sixú ɖe awǎjijɛ énɛ́ sín ayi mitɔn mɛ ǎ.

²³“Azǎn énɛ́ gbe ɔ́, mi sɔ́ ná kan nǔ ɖěbǔ byɔ́ mì ǎ. Má ɖɔ nǔgbó nú mi: nǔ e mi ná byɔ́ Tɔ́ ɔ́, é ná ná bǐ mi ɖó nyǐkɔ ce mɛ.

²⁴Amɔ̌, káká wá jɛ din ɔ́, mi ko byɔ́ nǔ ɖěbǔ ɖo nyǐkɔ ce mɛ ǎ; mi byɔ́, bó ná mɔ yí, bónú awǎjijɛ mitɔn ɔ́, nǔ bǐ na vɔ ɖ'é wú.”

²⁵“Lǒ wɛ un dó, bo dó ɖɔ xó énɛ́ lɛ́ɛ bǐ nú mi; lo ɔ́, é ná wá jɛ hweɖénu, bɔ un sɔ́ ná dó lǒ ɖě dó ɖɔ xó nú mi ǎ. Hwenɛ́nu ɔ́, un ná ɖɔ Tɔ́ ɔ́ sín xó nú mi sɔ́ nyi wɛn.

²⁶Azǎn énɛ́ gbe ɔ́, mi ná nɔ́ ylɔ́ nyǐkɔ ce dó byɔ́ nǔ Tɔ́ ɔ́. Ényí un ná sa vo nú Tɔ́ ɔ́ dó ta mitɔn mɛ ɖɔ wɛ un ɖe ǎ.

²⁷Đó é ɖésúnɔ yí wǎn nú mi, ɖó mi yí wǎn nú mì, bó ka ɖi nǔ ɖɔ Mawu wɛ sɛ́ mì dó.

²⁸Un gosín Tɔ́ ɔ́ gɔ́n, bó wá gbɛ mɛ fí; din ɔ́, un ɖo gbɛ ɔ́ mɛ gosín wɛ, bó xwe Tɔ́ ɔ́ gɔ́n.”

²⁹Ahwanvú tɔn lɛ́ɛ ka ɖɔ n'i ɖɔ: “Din ɔ́, a nɔ ɖɔ xó sɔ́ nyi wɛn, bo sɔ́ nɔ dó lǒ ǎ.

³⁰Mǐ mɔ din ɖɔ a tunwun nǔ bǐ; é sɔ́ byɔ́ ɖɔ mɛ ɖěbǔ ní kan nǔɖé byɔ́ we ǎ. Énɛ́ ɔ́ wɛ zɔ́n bɔ mǐ ɖi nǔ ɖɔ a gosín Mawu gɔ́n nǔgbó.”

³¹Jezu ka ɖɔ nú yě ɖɔ: “Mi ɖi nǔ lo a?

³²Hwenu ɖo nǎ su wɛ; hwe ɔ́ nu jɛ́n ka ko ɖíe, bɔ è nǎ gba mi dó, bɔ mɛ ɖokpó ɖokpó ná yi xwé tɔn gbe, bó ná jó nyɛ ɖokpónɔ dó; amɔ̌, un ɖo nyɛ ɖokpónɔ ǎ, ɖó Tɔ́ ɔ́ ɖo kpɔ́ xá mì.

³³Un ɖɔ nǔ énɛ́ lɛ́ɛ nú mi, bónú mi ná ɖó vivo ɖo nyɛ mɛ. Mi ná mɔ wǔvɛ́ ɖo gbɛ ɔ́ mɛ; lo ɔ́, mi kpan akɔ́n, ɖó un ko ɖu ɖo gbɛ ɔ́ jí.”