Read fon Jǎan 17 Bible Online

Jǎan 17 - fon bible

Jǎan 17

¹Ée Jezu ɖɔ xó énɛ́ lɛ́ɛ ɔ́, é kpɔ́n jǐ, bó ɖɔ: “Daá, hwe ɔ́ nu ɖíe su e; sɔ́ Vǐ towe su, bónú Vǐ towe lɔ ná sɔ́ we su.

²Đó a nǎ ɛ acɛ ɖo gbɛtɔ́ lɛ́ɛ bǐ jí, bónú é ná ná gbɛ mavɔ mavɔ mɛ e a sɔ́ dó así n'i lɛ́ɛ bǐ sésé.

³Gbɛ mavɔ mavɔ ɔ́ wɛ nyí ɖɔ yě ní tunwun we, bó tunwun ɖɔ hwi wɛ nyí Mawu nǔgbó ɖokpó e tíin é, bó lɛ́ tunwun Jezu Klísu e a sɛ́ dó gbɛ ɔ́ mɛ é.

⁴Un wa azɔ̌ e a zɔ̌n mì ɔ́, un bló yi fó, bó dó sɔ́ we su ɖo ayǐkúngban jí.

⁵Daá! Din ɔ́, bo ná mì susu ce e un ko ɖó ɖo gɔ̌n towe, cóbɔ a ɖǒ gbɛ ɔ́ é.

⁶“Un ɖe we xlɛ́ mɛ e a sɔ́ dó así nú mì ɖo gbɛ ɔ́ mɛ lɛ́ɛ. Towe wɛ yě ko nyí, bɔ a ka sɔ́ yě dó así nú mì, bɔ yě se tónú nú we.

⁷Din ɔ́, yě tunwun ɖɔ nǔ e a nǎ mì ɔ́ bǐ wɛ gosín gɔ̌n towe,

⁸ɖó xó e a sɔ́ dó así nú mì lɛ́ɛ ɔ́, un ɖɔ bǐ nú yě, bɔ yě yí bǐ; yě ɖi nǔ ɖɔ hwi gɔ́n wɛ un gosín nǔgbó.

⁹“Yě tamɛ sa vo nú we dó wɛ un ɖe. Mɛ e nyí gbɛ ɔ́ tɔn lɛ́ɛ tamɛ sa vo dó wɛ un ɖe ǎ; lo ɔ́, mɛ élɔ́ lɛ́ɛ e a sɔ́ dó así nú mi lɛ́ɛ tamɛ sa vo nú we dó wɛ un ɖe, ɖó towe wɛ yě nyí.

¹⁰Nǔ e nyí ce ɔ́ bǐ wɛ nyí towe; nǔ e ka nyí towe ɔ́ bǐ wɛ nyí ce, bɔ è nɔ kpa susu nú mì ɖo yě mɛ.

¹¹Un sɔ́ ɖo gbɛ ɔ́ mɛ ǎ, yědɛɛ lɛ́ɛ ka kpo ɖo gbɛ ɔ́ mɛ, bɔ nyɛ ja gɔ̌n towe. Tɔ́ mímɛ́! Kpɔ́n mɛ e a sɔ́ dó así nú mì lɛ́ɛ jí ɖo nyǐkɔ towe mɛ, bónú yě nyí ɖokpó, lě e hwi kpódó nyɛ kpó nyí ɖokpó gbɔn é.

¹² Hwenu e un ɖo kpɔ́ xá yě ɔ́, un hɛn yě ɖo acɛ e a nǎ mì é mɛ; un kpɔ́n yě jí, bɔ mɛ ɖokpó bú ɖo yě mɛ zɛ mɛ e ɖó ná bú é wú ǎ, bónú xó e Mawuxówéma ɔ́ ɖɔ ɔ́ ná dó jɛ.

¹³Un ko ja gɔ̌n towe; amɔ̌ din e un kpo ɖo gbɛ ɔ́ mɛ ɔ́, un ɖɔ xó énɛ́ lɛ́ɛ nú yě, bónú xomɛhunhun ce ma ɖó blɔ̌ ɔ́ ní nɔ yě mɛ.

¹⁴Un sɔ́ xó towe dó así nú yě, bɔ mɛ e nyí gbɛ ɔ́ tɔn lɛ́ɛ gbɛ́ wǎn nú yě, ɖó yě nyí gbɛ ɔ́ tɔn ǎ, lě e nyɛ lɔmɔ̌ ma nyí gbɛ ɔ́ tɔn ǎ é ɖɔhun.

¹⁵Un byɔ́ we ɖɔ hwi ní ɖe yě sín gbɛ ɔ́ mɛ ǎ; lo ɔ́, hwlɛ̌n yě ɖo awǒvi sí.

¹⁶Yě nyí gbɛ ɔ́ tɔn ǎ, lě e nyɛ lɔ ma nyí gbɛ ɔ́ tɔn ǎ é ɖɔhun.

¹⁷Blǒ bónú yě ní nyí towe gbɔn xó towe e nyí nǔgbó ɔ́ gbla mɛ.

¹⁸Un sɛ́ yě dó gbɛ ɔ́ mɛ, lě e a sɛ́ mì dó gbɛ ɔ́ mɛ é ɖɔhun.

¹⁹Un sɔ́ nyɛ ɖésú bǐ jǒ nú we ɖó yě wú, nú yě lɔmɔ̌ ná sixú nyí towe nǔgbó.

²⁰“Yě kɛ́ɖɛ́ sín tamɛ sa vo dó wɛ un ɖe ǎ; lo ɔ́, mɛ e ná se xó ce lɛ́ɛ ɖo nu yětɔn, bó ná ɖi nǔ nú mì lɛ́ɛ bǐ sín tamɛ sa vo nú we dó wɛ un ɖe;

²¹bónú yě bǐ ní nyí ɖokpó, lě e nyɛ kpódó hwi kpó nyí ɖokpó gbɔn é. Daá, a ɖo nyɛ mɛ, bɔ nyí lɔ ɖo hwi lɔ mɛ; yě ní nɔ bǔ ɖo mǐ mɛ, bónú gbɛtɔ́ lɛ́ɛ ná dó tunwun ɖɔ hwi wɛ sɛ́ mì dó nǔgbó.

²²Susu e a ná mì ɔ́, un ná yě lɔmɔ̌, bónú yě ní nyí ɖokpó, lě e hwi kpódó nyɛ kpó nyí ɖokpó gbɔn é.

²³Nyɛ ɖo yě mɛ, bɔ hwɛ ɖo nyɛ mɛ, nú yě ní nɔ bǔ nǔgbó, bónú gbɛtɔ́ lɛ́ɛ ná dó tunwun ɖɔ a sɛ́ mì dó, bó yí wǎn nú yě, lě e a yí wǎn nú mì gbɔn é.

²⁴“Daá! Un jló ɖɔ fí e un ɖe ɔ́, mɛ e a nǎ mì lɛ́ɛ lɔ ní nɔ fínɛ́ xá mì, bónú yě ní mɔ susu e a nǎ mì ɔ́, ɖó a ko yí wǎn nú mì cóbó wá ɖó gbɛ ɔ́.

²⁵Daá hwɛjijɔnɔ! Gbɛ ɔ́ ma tunwun we nɛ́! Nyɛ ka tunwun we, bɔ mɛ élɔ́ lɛ́ɛ tunwun ɖɔ hwi wɛ sɛ́ mì dó.

²⁶Un ɖe we xlɛ́ yě, bó ka ná lɛ́ ɖe we xlɛ́ hú mɔ̌, bónú wǎn yíyí e a ɖǒ nú mì ɔ́ ní nɔ yě mɛ, bónú nyɛ ɖésú ná nɔ yě mɛ.”