Read fon Jǎan 18 Bible Online

Jǎan 18 - fon bible

Jǎan 18

¹Ée Jezu sa vo énɛ́ ɔ́ nú tɔ́ tɔn gúdo ɔ́, éyɛ́ kpódó ahwanvú tɔn lɛ́ɛ kpó dó asá Sedlɔ́n tɔ ɔ́ jɛ agě ɖě ɔ́ jí. Jikpá ɖé ɖo fínɛ́, bɔ yě byɔ́ mɛ.

²Judási e ɖo Jezu ná sa wɛ ɔ́ lɔ tunwun fínɛ́, ɖó Jezu kpódó ahwanvú tɔn lɛ́ɛ kpó nɔ ko kplé ɖo fínɛ́ hwɛhwɛ.

³Énɛ́ ɔ́, Judási kplá sɔ́jahwan lɛ́ɛ kpódó sinsɛnxɔcɔ́tɔ́ e vɔ̌sánú-xwlémawutɔ́gán lɛ́ɛ, kpódó Falizyɛn lɛ́ɛ kpó ná ɛ lɛ́ɛ kpó, bɔ yě yi jikpá ɔ́ mɛ. Yě hɛn zogbɛ́n, bó hɛn zohwín kpódó alǐnnyánú kpó alɔ nu.

⁴Jezu ka ko tunwun nǔ e ɖo nǎ gbo e wɛ é bǐ, bó sɛ yi nukɔn yětɔn, bó ɖɔ: “Mɛ̌ ba wɛ mi ka ɖe?”

⁵Yě yí gbe n'i ɖɔ: “Jezu Nazalɛ́tinu ɔ́ ba wɛ mǐ ɖe.” É ka ɖɔ nú yě ɖɔ: “Nyɛ ɖíe.” Judási e ɖo sisa ɛ ɖu wɛ ɔ́ lɔ ɖo yě mɛ.

⁶Ée Jezu yí gbe nú yě ɖɔ nyɛ wɛ ɔ́, yě bǐ j'agɔ yi gúdo, bó yi jɛ ayǐ.

⁷Jezu lɛ́ kanbyɔ́ yě azɔn wegɔ́ ɔ́ ɖɔ: “Mɛ̌ ba wɛ mi ka ɖe?” Bɔ yě lɛ́ yí gbe n'i ɖɔ: “Jezu Nazalɛ́tinu ɔ́ ba wɛ mǐ ɖe.”

⁸Jezu ka ɖɔ nú yě ɖɔ: “Un ko ɖɔ nú mi ɖɔ nyɛ wɛ; ényí nyɛ ba wɛ jɛ́n mi ɖe hǔn, mi jǒ mɛ élɔ́ lɛ́ɛ dó, bónú yě ní yi.”

⁹É ɖɔ mɔ̌, bónú xó e é ɖésú ko ɖɔ ɖ'ayǐ ɔ́ na dó jɛ; é wɛ nyí ɖɔ: “Mɛ e a nǎ mì lɛ́ɛ ɖěbǔ bú ǎ.”

¹⁰Sinmɔ́ɔ Piyɛ́ɛ ka kplá hwǐ bó sún hwǐ tɔn sín akún mɛ, bó xú vɔ̌sánú-xwlémawutɔ́ ɖaxó ɔ́ sín mɛsɛntɔ́ ɖokpó, bó kpa tó tɔn ɖisíxwé tɔn ɔ́. È nɔ ylɔ́ mɛsɛntɔ́ énɛ́ ɖɔ Malukúsi.

¹¹ Jezu ka ɖɔ nú Piyɛ́ɛ ɖɔ: “Sɔ́ hwǐ towe dó akún. Wǔvɛ́ kɔ́fu e Tɔ́ ɔ́ ɖɔ nyɛ ní nu ɔ́, un ná nu ǎ wɛ a?”

¹²Énɛ́ gúdo ɔ́, sɔ́jahwan lɛ́ɛ kpódó mɛ e ɖo yě nu ɔ́ kpó, kpódó sinsɛnxɔcɔ́tɔ́ Jwifu lɛ́ɛ tɔn kpó wlí Jezu, bó blá ɛ.

¹³Yě tó kplá ɛ hɛn yi Hanna gɔ́n hwɛ̌. Hanna énɛ́ wɛ nyí asitɔ́ nú Kayífu e ɖo vɔ̌sánú-xwlémawutɔ́ ɖaxó nyí wɛ xwe énɛ́ xwe é.

¹⁴ Kayífu énɛ́ wɛ ko kplɔ́n nǔ Jwifugán lɛ́ɛ ɖ'ayǐ ɖɔ jí: “Mɛ ɖokpó kú dó to ɔ́ bǐ tamɛ ɔ́, é nyɔ́ hú to ɔ́ bǐ ní kú.”

¹⁵Sinmɔ́ɔ Piyɛ́ɛ kpódó ahwanvú ɖěvo kpó xwedó Jezu. Ahwanvú énɛ́ ɔ́, vɔ̌sánú-xwlémawutɔ́ ɖaxó ɔ́ tunwun i; énɛ́ wútu wɛ éyɛ́ xwedó Jezu byɔ́ xwé ɔ́ gbe.

¹⁶Piyɛ́ɛ ka cí hɔntogbó jí; énɛ́ ɔ́, ahwanvú e vɔ̌sánú-xwlémawutɔ́ ɖaxó ɔ́ tunwun ɔ́ lɛ́ kɔ bó wá ɖɔ xó nú nyɔ̌nu hɔnjínɔtɔ́ ɔ́, bó kplá Piyɛ́ɛ byɔ́ xwé gbe.

¹⁷Nyɔ̌nu hɔnjínɔtɔ́ ɔ́ ka kanbyɔ́ Piyɛ́ɛ ɖɔ: “Hwi lɔmɔ̌ ma ɖo nya énɛ́ sín ahwanvú lɛ́ɛ mɛ ǎ cé?” Bɔ Piyɛ́ɛ gbɛ́ n'i, bó ɖɔ: “Éeǒ, nyɛ ɖo yě mɛ ǎ.”

¹⁸Mɛsɛntɔ́ lɛ́ɛ kpódó sinsɛnxɔcɔ́tɔ́ lɛ́ɛ kpó flɔ́ akán, bó ɖo te lɛ́ lɛ̌ dó, bó ɖo xúxú wɛ, ɖó avivɔ gbɛ́. Piyɛ́ɛ lɔ ɖo te ɖo yě mɛ, bó ɖo myɔ xú wɛ.

¹⁹Vɔ̌sánú-xwlémawutɔ́ ɖaxó ɔ́ kan nǔ byɔ́ Jezu dó ahwanvú tɔn lɛ́ɛ wú, bó lɛ́ kan nǔ byɔ́ ɛ dó nǔ e é nɔ kplɔ́n mɛ ɔ́ wú.

²⁰Bɔ Jezu ka yí gbe n'i ɖɔ: “Agbawungba wɛ un ɖɔ xó nú mɛ lɛ́ɛ bǐ ɖe. Tɛgbɛ wɛ un ka nɔ ɖo nǔ kplɔ́n mɛ lɛ́ɛ wɛ ɖo kplɔ́ngbasá lɛ́ɛ, kpódó sinsɛnxɔ mɛ kpó, fí e Jwifu lɛ́ɛ bǐ nɔ kplé ɖe é. Un ɖɔ nǔ ɖěbǔ ɖo nǔglɔ́ ǎ.

²¹Aniwú wɛ a ka ɖo nǔ kanbyɔ́ mì wɛ? Kan nǔ e un ɖɔ ɔ́ byɔ́ mɛ e un ɖɔ xó ná lɛ́ɛ, ɖó yědɛɛ lɛ́ɛ tunwun nǔ e un kplɔ́n yě lɛ́ɛ.”

²²Ée Jezu ɖɔ mɔ̌ ɔ́, sinsɛnxɔcɔ́tɔ́ ɖokpó ɖo fínɛ́, bó xo tó mɛ n'i, bó ɖɔ: “Mɔ̌ wɛ a nǎ yí gbe nú vɔ̌sánú-xwlémawutɔ́ ɖaxó ɔ́ gbɔn a?”

²³Jezu ka yí gbe n'i ɖɔ: “Ényí nǔ wɛ un ɖɔ nyi do hǔn, ɖe nǔ e un ɖɔ nyi do ɔ́ xlɛ́; é ka nyí xó ganjí wɛ un ɖɔ ɔ́, étɛ́wú a ka xo tó mɛ nú mì?”

²⁴Jezu ɖo blǎblá mɔ̌, bɔ Hanna nyi i sɛ́ dó Kayífu vɔ̌sánú-xwlémawutɔ́ ɖaxó ɔ́ gɔ́n.

²⁵Sinmɔ́ɔ Piyɛ́ɛ ɖo te, bó ɖo myɔ xú wɛ ɖo fínɛ́, bɔ yě kanbyɔ́ ɛ ɖɔ: “Hwi lɔmɔ̌ má ɖo ahwanvú nya énɛ́ tɔn mɛ ǎ cé?” É ka gbɛ́, bó ɖɔ: “Éeǒ, nyɛ ɖo yě mɛ ɖě ǎ!”

²⁶Vɔ̌sánú-xwlémawutɔ́ ɖaxó ɔ́ sín mɛsɛntɔ́ e Piyɛ́ɛ kpa tó ná ɔ́ sín mɛ ɖokpó kanbyɔ́ Piyɛ́ɛ ɖɔ jí: “Un ma mɔ hwi kpó nya énɛ́ kpó ɖo jikpá ɔ́ mɛ a?”

²⁷Piyɛ́ɛ ka lɛ́ gbɛ́, bɔ tlóló ɔ́, kokló kɔ́ así.

²⁸Yě kplá Jezu sín Kayífu xwé, bó kplá ɛ hɛn yi tokpɔngán Hlɔ̌manu lɛ́ɛ tɔn sín hɔnmɛ zǎnzǎn tɛɛn. Lo ɔ́, Jwifu lɛ́ɛ byɔ́ hɔn ɔ́ mɛ ǎ, ɖó yě táá wá ɖu su, bónú xwe ɖuɖu ná gló yě.

²⁹Énɛ́ wú wɛ Pilátu gbɔ bo tɔ́n, bó wá mɔ yě, bó kanbyɔ́ yě ɖɔ: “Hwɛ tɛ́ dó nya élɔ́ wɛ mi ka ɖe?”

³⁰Yě yí gbe n'i ɖɔ: “É ma ko nyí nǔnyanyawatɔ́ ǎ ɔ́, mǐ ná kplá ɛ wá nú we ǎ.”

³¹Énɛ́ ɔ́, Pilátu ɖɔ nú yě ɖɔ: “Mi ɖésúnɔ mi bo kplá ɛ, bó ɖɔ hwɛ xá ɛ lě e sɛ́n mitɔn jló gbɔn é.” Jwifugán lɛ́ɛ ka yí gbe n'i ɖɔ jí: “Mǐ ɖó acɛ e hu mɛ é ǎ.”

³² Nǔ cí mɔ̌, bónú xó e Jezu ɖésú ko ɖɔ ɖ'ayǐ dó kú alɔkpa e é ná kú é wú ɔ́ ná dó jɛ.

³³Pilátu ka lɛ́ kɔ yi hɔn ɔ́ mɛ, bó ylɔ́ Jezu, bó kanbyɔ́ ɛ ɖɔ: “Hwi wɛ nyí Jwifu lɛ́ɛ sín axɔ́sú ɔ́ a?”

³⁴Jezu ka yí gbe n'i ɖɔ: “Xó énɛ́ e a kanbyɔ́ mì ɔ́, hwi ɖésúnɔ sín xomɛ wɛ é tɔ́n sín a, abǐ mɛ ɖěvo wɛ ɖɔ xó ce nú we?”

³⁵Pilátu ka yí gbe n'i ɖɔ: “Nyɛ ɔ́, Jwifu wɛ un nyí a? To towe mɛ nu lɛ́ɛ kpódó vɔ̌sánú-xwlémawutɔ́gán lɛ́ɛ kpó wɛ kplá we wá nú mì. Étɛ́ a ka wa?”

³⁶Jezu ka yí gbe n'i ɖɔ: “Axɔ́súɖuɖu ce nyí gbɛ mɛ fí tɔn ǎ; ényí gbɛ mɛ fí tɔn wɛ é ko nyí ɔ́, ahwanvú ce lɛ́ɛ ná ko fun ahwan, nú è ma jó mì nú Jwifugán lɛ́ɛ ó; axɔ́súɖuɖu ce ka nyí gbɛ mɛ fí tɔn ǎ.”

³⁷Pilátu lɛ́ kanbyɔ́ ɛ ɖɔ: “Hǔn axɔ́sú wɛ a nyí nɛ́ hǔn?” Bɔ Jezu yí gbe n'i ɖɔ: “Hwi wɛ ɖɔ un nyí axɔ́sú. È ji mì, bɔ un wá gbɛ ɔ́ mɛ, bó ná ɖe kúnnu nú nǔgbó ɔ́. Mɛ e nɔ xwedó nǔgbó ɔ́ bǐ wɛ nɔ ɖótó xó ce.”

³⁸Pilátu kanbyɔ́ ɛ ɖɔ: “Ani ka nyí nǔgbó ɔ́?” Ée Pilátu kan mɔ̌ byɔ́ Jezu ɔ́, é lɛ́ tɔ́n, bó yi ɖɔ nú Jwifu e gbɛ́ wǎn nú Jezu lɛ́ɛ ɖɔ: “Un mɔ nǔ e wú un ná ɖó hwɛ nú nya élɔ́ é ɖě ǎ.

³⁹Lo ɔ́, walɔ mitɔn wɛ é ko nyí, bɔ un nɔ jó gantɔ́ ɖokpó nú mi Dǐndínwáyixwe ɔ́ hwenu. Mi jló nú má jó Jwifu lɛ́ɛ xɔ́sú ɔ́ nú mi a?”

⁴⁰Yě bǐ ka sú xó, bó ɖɔ jí: “Gbeɖé, é wɛ a nǎ jǒ nú mǐ ǎ, Balabási wɛ a nǎ jó nú mǐ!” Ajotɔ́ axánsúnxó ɖokpó wɛ ka nyí Balabási ɔ́.