Read fon Jǎan 19 Bible Online

Jǎan 19 - fon bible

Jǎan 19

¹Hwenɛ́nu ɔ́, Pilátu ná gbe ɖɔ è ní kplá Jezu bó zé lanbá dó xo e ná;

²bɔ sɔ́ja lɛ́ɛ sɔ́ wun dó lɔn axɔ́súgbákún ɖokpó, bó sɔ́ xwe n'i, bó lɛ́ sɔ́ awu ɖaxó vɔvɔ cɛ́cɛ́ ɖé dó n'i.

³Yě nɔ sɛ yi nukɔn tɔn, bó nɔ ɖɔ: “Mǐ kan xwé byɔ́, Jwifu lɛ́ɛ xɔ́sú.” Bó nɔ́ xo tó mɛ n'i.

⁴Pilátu lɛ́ tɔ́n wá kɔ́xo, bó ɖɔ nú yě ɖɔ: “Mi ɖótó; un ná yi kplá nya mitɔn wá nú mi, bónú mi ná dó tunwun ɖɔ un kún mɔ nǔ e wú un ná ɖó hwɛ n'i é ɖě ó.”

⁵Énɛ́ ɔ́, Jezu tɔ́n, bó ɖo awu vɔvɔ ɖaxó ɔ́ mɛ, bɔ axɔ́súgbákún ɔ́ ɖo ta n'i. Pilátu ɖɔ nú yě ɖɔ: “Nya ɔ́ ɖíe.”

⁶Ée vɔ̌sánú-xwlémawutɔ́gán lɛ́ɛ kpódó sinsɛnxɔcɔ́tɔ́ lɛ́ɛ kpó mɔ ɛ lě ɔ́, yě sú xó, bó ɖɔ: “Ká ɛ nyi aklúzu jí! Ká ɛ nyi aklúzu jí!” Pilátu ka ɖɔ nú yě ɖɔ: “Mi kplá ɛ, bó yi ká ɛ nyi aklúzu jí mi ɖésúnɔ, ɖó nyɛ mɔ nǔ e wú un ná ɖó hwɛ n'i ɔ́ ɖě ǎ.”

⁷Jwifu lɛ́ɛ ka yí gbe n'i ɖɔ: “Mǐ ɖó sɛ́n, bɔ sɛ́n énɛ́ byɔ́ ɖɔ è ní hu i; ɖó é ɖɔ émí nyí Mawu ví.”

⁸Ée Pilátu se mɔ̌ ɔ́, xɛsi lɛ́ ɖi i d'é jí,

⁹bɔ é lɛ́ kplá Jezu byɔ́ hɔn ɔ́ mɛ, bó kanbyɔ́ ɛ ɖɔ: “Fítɛ́ a ka gosín?” Jezu ka kɛ nu ǎ,

¹⁰bɔ Pilátu ɖɔ n'i ɖɔ: “Nyɛ wɛ a tin dó a? A tunwun ɖɔ un ɖó acɛ bó ná ɖe we nyi te, bó lɛ́ ɖó acɛ bó ná ká we nyi aklúzu jí ǎ cé?”

¹¹Jezu ka yí gbe n'i ɖɔ: “Ényí Mawu ma ná gbe tɔn we ǎ ɔ́, a sixú ɖó acɛ ɖěbǔ ɖo jǐ ce ǎ; énɛ́ ɔ́ wú wɛ mɛ e jó mì ɔ́ hu hwɛ hú we.”

¹²Bɛ́ sín hwenɛ́nu ɔ́, Pilátu jɛ lě e é ná wa gbɔn, bó ná ɖe Jezu nyi te ɔ́ ba jí. Jwifu lɛ́ɛ ka jɛ xó sú jí, bó ɖɔ: “Ényí a ɖe nya énɛ́ nyi te hǔn, a nyǐ Dadá Hlɔ̌ma tɔn sín xɔ́ntɔn ǎ; ɖó mɛ e sɔ́ éɖée axɔ́sú ɔ́, gǔ wɛ é fɔ́n dó Dadá Hlɔ̌ma tɔn jí.”

¹³Ée Pilátu se mɔ̌ ɔ́, é ɖe Jezu tɔ́n, lobo wá jínjɔ́n hwɛɖɔzinkpo ɔ́ jí, ɖo tɛn e mɛ è tɛ́ awǐnnya ɖagbe ɖagbe lɛ́ɛ kɔn nyi, bɔ è nɔ ylɔ́ ɖɔ “Gabata” ɖo Ebléegbe mɛ é.

¹⁴Dǐndínwáyixwe kpo sɔ, bɔ yě ko ɖo xwe ɔ́ nú sɔ́ ɖ'ayǐ wɛ, xwe gan wěwe mɛ ɔ́, Pilátu ɖɔ nú Jwifu lɛ́ɛ ɖɔ: “Axɔ́sú mitɔn ɖíe.”

¹⁵Jwifu lɛ́ɛ ka sú xó, bó ɖɔ: “È hu i! È hu i! È ká ɛ nyi aklúzu jí.” Pilátu ka kanbyɔ́ yě ɖɔ: “Má ká axɔ́sú mitɔn nyi aklúzu jí wɛ a?” Vɔ̌sánú-xwlémawutɔ́gán lɛ́ɛ yí gbe n'i ɖɔ: “Mǐ sɔ́ ɖó axɔ́sú ɖěvo zɛ Dadá Hlɔ̌ma tɔn wú ǎ.”

¹⁶Bɔ Pilátu jó Jezu nú yě, bónú yě ná yi ká ɛ nyi aklúzu jí. Yě kplá Jezu ɖidó.

¹⁷Jezu ɖíɖá aklúzu tɔn, bó tɔ́n sín toxo ɔ́ mɛ; é ɖidó fí ɖé, bɔ è nɔ ylɔ́ fí ɔ́ ɖɔ “takágo”, bɔ Eblée lɛ́ɛ nɔ́ ylɔ́ fí énɛ́ ɖɔ Gɔlugɔta.

¹⁸Fínɛ́ wɛ yě ká Jezu nyi aklúzu jí ɖe; è lɛ̌ ká mɛ we ɖěvo ɖó aklúzu jí; mɛ ɖokpó ɖo ɖisí tɔn xwé, mɛ wegɔ́ ɔ́ ɖo amyɔ tɔn xwé, bɔ Jezu ɖo tɛ́ntin mɛ.

¹⁹Pilátu wlán xógbe élɔ́, bó sɔ́ ɖó aklúzu ɔ́ jí aga ɖɔ: “Jezu Nazalɛ́ti tɔn, Jwifu lɛ́ɛ xɔ́sú.”

²⁰Jwifu gěgé mɔ nǔ e è wlǎn énɛ́ ɔ́ xa, ɖó tɛn e mɛ è ká Jezu nyi ɔ́ lín dó toxo ɔ́ ǎ. Xógbe énɛ́ ɔ́, è wlǎn dó Ebléegbe mɛ, bó wlán dó Latɛ́ɛngbe mɛ, bó lɛ́ wlán dó Glɛ̌sigbe mɛ.

²¹Jwifu lɛ́ɛ sín vɔ̌sánú-xwlémawutɔ́gán lɛ́ɛ wá yi ɖɔ nú Pilátu ɖɔ: “Jwifu lɛ́ɛ xɔ́sú wɛ a ɖǒ ná wlán ǎ; nǔ e a ɖǒ ná wlán ɔ́ ɖíe: ‘Nya élɔ́ ɖɔ émí wɛ nyí Jwifu lɛ́ɛ xɔ́sú.’ ”

²²Pilátu ka yí gbe nú yě ɖɔ: “Nǔ e un ko wlán ɔ́, un wlán wɛ.”

²³Ée sɔ́ja lɛ́ɛ ká Jezu nyi aklúzu jí vɔ ɔ́, yě bɛ́ awu tɔn lɛ́ɛ, bó má ɖó donu ɛnɛ, bɔ mɛ ɖokpó ɖokpó sɔ́ étɔn. Yě lɛ́ sɔ́ awu tɔn ɖaxó e má ɖó titɔkpa ɖěbǔ ǎ, bó nyí avɔ ɖokpó sín jǐ káká wá do é.

²⁴ Sɔ́ja lɛ́ɛ ɖɔ ɖo yěɖée tɛ́ntin ɖɔ: “Mǐ ná vún awu élɔ́ ǎ. Mi nú mǐ ná nyi akɔ dó, bó ná tunwun mɛ e tɔn é ná nyí é.” Nǔ nyí mɔ̌, bónú nǔ e Mawuxówéma ɔ́ ɖɔ ɔ́ ná dó jɛ. É wɛ nyí ɖɔ: “Yě má awu ce lɛ́ɛ, bó nyi akɔ dó awu ce ɖaxó ɔ́.” Nǔ e sɔ́ja lɛ́ɛ wa ɔ́ nɛ́.

²⁵Jezu sín nɔ, kpódó nɔ tɔn nɔví nyɔ̌nu Mali e nyí Klopási sín asi ɔ́ kpó, kpódó Mali Magidalanu ɔ́ kpó ɖo te, ɖo aklúzu Jezu tɔn ɔ́ kpá.

²⁶Ée Jezu mɔ nɔ tɔn, bó ka mɔ ahwanvú tɔn e é yí wǎn ná ɔ́ ɖo te ɖo akpá tɔn ɔ́, é ɖɔ nú nɔ tɔn ɖɔ: “Nǎna, vǐ towe nɛ́!”

²⁷Bó ka lɛ́ ɖɔ nú ahwanvú ɔ́ ɖɔ: “Nɔ towe nɛ́!” Sín gbe énɛ́ gbe ɔ́, ahwanvú ɔ́ kplá Jezu sín nɔ dó xwé tɔn gbe.

²⁸ Énɛ́ gúdo ɔ́, ée Jezu tunwun ɖɔ nǔ lɛ́ɛ bǐ fó lo ɔ́, é ɖɔ: “Kɔ xú mì!” Bónú nǔ e è wlǎn dó Mawuxówéma ɔ́ mɛ ɔ́ ná dó jɛ.

²⁹Zɛ̌n ɖé ka ɖo fínɛ́, bɔ vɛ̌ɛn sinvɛ́sinvɛ́ gɔ́, sɔ́ja lɛ́ɛ ka nylɔ́ xumɛtekan d'é mɛ, bó sɔ́ slɔ́ izɔ́pukpo nu, bó dlɛ́n ɖó nu n'i.

³⁰Ée Jezu nu vɛ̌ɛn sinvɛ́sinvɛ́ ɔ́, é ɖɔ: “Nǔ bǐ fó!” Bó dó kɔ do, bó bɔnu.

³¹Gbe énɛ́ gbe ɔ́, gbɔjɛzán Jwifu lɛ́ɛ tɔn kpo sɔ, bó jɛ dó Dǐndínwáyixwe gbe. Jwifugán lɛ́ɛ ka jló nú mɛ e è ká lɛ́ɛ ní nɔ aklúzu jí azǎn énɛ́ gbe ǎ, ɖó azǎn ɖaxó ɖé wɛ nyí azǎn énɛ́ ɔ́. Yě yi byɔ́ gbe Pilátu ɖɔ é ní gba afɔxú nú mɛ e è ká lɛ́ɛ, bó ɖe yě síin.

³²Pilátu ná gbe yě, bɔ sɔ́ja lɛ́ɛ yi gba afɔxú nú mɛ we e è ká nyi aklúzu jí xá Jezu lɛ́ɛ; yě gba afɔxú nú mɛ nukɔn tɔn ɔ́, bó gba nú mɛ wegɔ́ ɔ́.

³³Ée yě wá jɛ Jezu jí ɔ́, yě mɔ ɖɔ é ko kú, bɔ yě sɔ́ xaji bó gba afɔxú n'i ǎ.

³⁴Lo ɔ́, sɔ́ja ɖokpó sɔ́ hwǎn adaja mɛ n'i, bɔ tlóló ɔ́, hun kpódó sin kpó lúlú kɔn nyi ayǐ.

³⁵Mɛ e nɔ tɛn tɔn mɛ, bó mɔ é wɛ ɖe kúnnu ná, bɔ kúnnuɖiɖe tɔn ka nyí nǔgbó. Éyɛ́ tunwun ɖɔ nǔgbó wɛ émí ɖɔ, bónú mi lɔmɔ̌ ná ɖi nǔ.

³⁶ Nǔ énɛ́ lɛ́ɛ bǐ jɛ, bónú nǔ e è ko wlán ɖ'ayǐ ɖo Mawuxówéma ɔ́ mɛ ɔ́ ná dó jɛ; é wɛ nyí ɖɔ: “È nǎ gba xú tɔn ɖokpó géé lě ǎ.”

³⁷ È ka lɛ́ wlán dó akpá ɖěvo xwé ɖo Mawuxówéma ɔ́ mɛ ɖɔ: “Yě ná mɔ mɛ e yě sɔ́ hwǎn é.”

³⁸Énɛ́ ɔ́ gúdo ɔ́, nya ɖé tíin, bɔ è nɔ ylɔ́ ɛ ɖɔ Jozɛ́fu; Alimatéenu wɛ; é lɔmɔ̌ ɖo Jezu sín ahwanvú lɛ́ɛ mɛ. É ka nɔ jló ná ɖe xlɛ́ ɖɔ émí ɖo Jezu sín ahwanvú lɛ́ɛ mɛ ǎ; ɖó é nɔ ɖo xɛsi ɖi nú Jwifugán lɛ́ɛ wɛ. Nya énɛ́ yi mɔ Pilátu, bó byɔ́ ɛ Jezu sín cyɔ, bɔ Pilátu ná ɛ gbe, bɔ é yi zé cyɔ ɔ́.

³⁹ Nikodɛ́mu e zɔn zǎn gbe ɖokpó, bó yi mɔ Jezu ɔ́ lɔmɔ̌ wá Jezu sín cyɔ kɔn. Nikodɛ́mu xo mǐla kpódó alowɛ́si kpó kplé, bó hɛn, bɔ é ná yi kilóo gban mɔ̌.

⁴⁰Yě ɖíɖá Jezu sín cyɔ, bo lɛ́ akwɛ́núvɔ ɖé dó e, bo sá mǐla kpódó alowɛ́si kpó e è xokplé ɔ́ n'i, lě e Jwifu lɛ́ɛ nɔ bló gbɔn nú cyɔ cóbó nɔ ɖi é.

⁴¹Jikpá ɖé ka ɖo fí e è ká Jezu nyi aklúzu jí ɖe é, bɔ yɔdo yɔ̌yɔ́ ɖokpó ɖ'é mɛ, bɔ è ko ɖi mɛ ɖěbǔ d'é mɛ kpɔ́n gbeɖé ǎ.

⁴²Fínɛ́ wɛ yě ɖi Jezu dó, ɖó yɔdo ɔ́ lín dó fínɛ́ ǎ, bɔ Jwifu lɛ́ɛ ka ko ɖo gbɔjɛzán ɔ́ nú sɔ́ wɛ.