Read fon Jǎan 20 Bible Online

Jǎan 20 - fon bible

Jǎan 20

¹Aklúnɔzán gbe zǎnzǎn hwenu e zǐnflú kpo ɖo te ɔ́, Mali Magidalanu ɔ́ yi Jezu sín yɔdo kɔn, bó mɔ ɖɔ è ɖe awǐnnya e ɖo Jezu sín yɔdo nu ɔ́ síin.

²Énɛ́ ɔ́, é kán wezun yi mɔ Piyɛ́ɛ, kpódó ahwanvú ɖě ɔ́ e Jezu yí wǎn ná é kpó, bó ɖɔ nú yě ɖɔ: “Yě ɖe Aklúnɔ sín yɔdo tɔn mɛ, bɔ mǐ tunwun fí e è sɔ́ ɛ yi ɔ́ ǎ.”

³Bɔ Piyɛ́ɛ kpódó ahwanvú ɖě ɔ́ kpó tɔ́n, bó ɖidó yɔdo ɔ́ kɔn.

⁴Yě mɛ we lɛ́ɛ bǐ wɛ bɛ́ wezun; ahwanvú ɖě ɔ́ ka zɛ Piyɛ́ɛ wú, bó yi yɔdo ɔ́ kɔn jɛ nukɔn.

⁵É fɛ, bó kpɔ́n yɔdo ɔ́ mɛ, bó mɔ avɔ e è lɛ̌ dó e lɛ́ɛ ɖo fínɛ́; é ka byɔ́ mɛ ǎ.

⁶Sinmɔ́ɔ Piyɛ́ɛ wá wá gbɔn gǔdo, bó byɔ́ yɔdo ɔ́ mɛ, bó mɔ avɔ e è lɛ̌ dó e lɛ́ɛ ɖo fínɛ́;

⁷é lɛ́ mɔ avɔ e è bǔ dó ta nú Jezu ɔ́; é ka ɖo ɖě lɛ́ɛ mɛ ǎ; é ɖo mlǎmlá ɖo vo.

⁸Énɛ́ ɔ́ gúdo ɔ́, ahwanvú ɖě ɔ́ e jɛ nukɔn nú Piyɛ́ɛ wá yɔdo ɔ́ kɔn ɔ́ lɔmɔ̌ byɔ́ mɛ; é mɔ bó ɖi nǔ.

⁹Nǔ e ɖɔ wɛ Mawuxówéma ɔ́ ɖe bó ɖɔ Jezu ná fɔ́n sín kú ɔ́, yě ko mɔ nǔ jɛ mɛ ǎ;

¹⁰bɔ ahwanvú we énɛ́ lɛ́ɛ lɛ́ kɔ yi xwé yětɔn lɛ́ɛ gbe.

¹¹Mali ɖo te ɖo yɔdo ɔ́ kɔn, bó ɖo avǐ ya wɛ, bɔ hwenu e é ɖo avǐ ya wɛ ɔ́, é fɛ, bó kpɔ́n yɔdo ɔ́ mɛ sɛ́ dó.

¹²É mɔ wɛnsagun Mawu tɔn we ɖo fí e è sɔ́ Jezu sín cyɔ ɖó ɔ́, bɔ yě dǒ nǔ wěwé; mɛ ɖokpó jínjɔ́n afɔligbé, bɔ mɛ ɖokpó jínjɔ́n taligbé;

¹³bɔ yě kanbyɔ́ ɛ ɖɔ: “Nyɔ̌nu! Étɛ́ sín avǐ ya wɛ a ka ɖe?” É ka yí gbe nú yě ɖɔ: “Yě ɖe Aklúnɔ ce síin, bɔ un tunwun fí e è sɔ́ ɛ ɖó ɔ́ ǎ.”

¹⁴Ée é ɖɔ mɔ̌ ɔ́, é lílɛ́, bó mɔ Jezu ɖo te; é ka tunwun ɖɔ é wɛ ǎ.

¹⁵Jezu ka ɖɔ n'i ɖɔ: “Nyɔ̌nu! Étɛ́ sín avǐ ya wɛ a ka ɖe? Mɛ̌ ba wɛ a ɖe?” Mali ka vɛdó ɖɔ jikpájíkpɔ́ntɔ́ ɔ́ wɛ sín, bó ɖɔ n'i ɖɔ: “Mɛɖaxó! Ényí hwi wɛ sɔ́ ɛ sín fí hǔn, ɖɔ fí e a sɔ́ ɛ ɖó ɔ́ nú mì, nú má yi sɔ́ ɛ.”

¹⁶Bɔ Jezu ylɔ́ ɛ bó ɖɔ: “Mali!” Bɔ é lílɛ́, bó ylɔ́ ɛ dó Ebléegbe mɛ ɖɔ: “Hlabúni”; (tínmɛ tɔn wɛ nyí Mɛ̌si.)

¹⁷Jezu ɖɔ n'i ɖɔ: “Ma hɛn mì ɖó te ó, ɖó un ko yi Tɔ́ ɔ́ gɔ́n ɖo sɛ́xwé ǎ; lo ɔ́, yi ɖɔ nú nɔví ce lɛ́ɛ ɖɔ un xwe Tɔ́ ce e nyí Tɔ́ mi lɔ tɔn é gɔ́n; un xwe Mawu ce e nyí Mawu mi lɔ tɔn é gɔ́n.”

¹⁸Bɔ Mali Magidalanu ɔ́ yi ɖɔ nú ahwanvú Jezu tɔn lɛ́ɛ ɖɔ: “Un mɔ Aklúnɔ!” Bó dó wɛn e Jezu dó e ɔ́ yě.

¹⁹Gbe énɛ́ gbe aklúnɔzán gbe gbadanu ɔ́, Jezu sín ahwanvú lɛ́ɛ yi sú hɔn dó ta; ɖó yě ɖo xɛsi ɖi nú Jwifugán lɛ́ɛ wɛ, bɔ Jezu wá nɔ te, ɖo tɛ́ntin yětɔn, bó ɖɔ nú yě ɖɔ: “Fífá ní nɔ kpɔ́ xá mi!”

²⁰Ée é ɖɔ mɔ̌ nú yě gúdo ɔ́, é xlɛ́ alɔ tɔn lɛ́ɛ kpódó adaja tɔn kpó yě. Ée yě mɔ Aklúnɔ yětɔn ɔ́, xomɛ hun yě tlala.

²¹Jezu lɛ́ vɔ́ ɖɔ nú yě ɖɔ: “Fífá ní nɔ kpɔ́ xá mi. Lě e Tɔ́ ɔ́ sɛ́ mì dó ɔ́, nyi lɔ sɛ́ mi dó.”

²²Ée é ɖɔ mɔ̌ ɔ́, é fún funfún dó yě jí, bó ɖɔ nú yě ɖɔ: “Mi yí Yɛsinsɛn.

²³ Mi sɔ́ hwɛ kɛ mɛɖé ɔ́, é ná gosín kɔ n'i; mi ma ka sɔ́ hwɛ kɛ mɛɖé ǎ ɔ́, é ná nɔ kɔ n'i.”

²⁴Mɛ e nyí Tɔmáa ɖo ahwanvú Jezu tɔn wěwe lɛ́ɛ mɛ bɔ è nɔ lɛ́ ylɔ́ ɛ ɖɔ hǒxo ɔ́ ɖo kpɔ́ xá yě hwenu e Jezu wá ɔ́ ǎ.

²⁵Ahwanvú ɖě lɛ́ɛ wá ɖɔ n'i ɖɔ: “Mǐ mɔ Aklúnɔ!” Tɔmáa ka yí gbe nú yě ɖɔ: “Ényí un ma mɔ hǔnjɛ́nkpa e ɖo alɔ tɔn mɛ lɛ́ɛ, bó sɔ́ alɔví ce d'é mɛ, bó mɔ hwǎnkpa e ɖo adaja tɔn mɛ ɔ́, bó zé alɔ ce dó adaja tɔn mɛ ǎ ɔ́, un ná ɖi ǎ.”

²⁶Azǎn tɔn tántɔngɔ́ ɔ́ gbe ɔ́, ahwanvú Jezu tɔn lɛ́ɛ ko lɛ́ sú hɔn dó ta, ɖo fí ɖokpó ɔ́, bɔ Tɔmáa ɖo yě mɛ gbe énɛ́ gbe. Hɔn ɔ́ ɖo súsú có Jezu wá nɔ te ɖo tɛ́ntin yětɔn, bó ɖɔ: “Fífá ní nɔ kpɔ́ xá mi.”

²⁷É ka ɖɔ nú Tɔmáa ɖɔ: “Dlɛ̌n alɔví towe ɖó fí, bó kpɔ́n alɔ ce lɛ́ɛ. Dlɛ̌n alɔ towe, bó sɔ́ dó adaja ce mɛ; gɔn nǔ xokpɔ́n, bó ɖi nǔ.”

²⁸Tɔmáa yí gbe n'i ɖɔ: “Aklúnɔ ce, Mawu ce!”

²⁹Jezu ka ɖɔ n'i ɖɔ: “É ma nyí ée a mɔ mì ɔ́ wútu wɛ a ɖi nǔ nú mì a? Nǔ nyɔ́ nú mɛ e ma mɔ ǎ, bó ka ɖi nǔ lɛ́ɛ.”

³⁰Jezu jlɛ́ nǔ gěgé ɖěvo lɛ́ɛ ɖo ahwanvú tɔn lɛ́ɛ nukɔn; è ka wlán yě dó wěma élɔ́ mɛ ǎ.

³¹Amɔ̌, è wlǎn élɔ́ lɛ́ɛ, bónú mi ná ɖi nǔ ɖɔ Jezu wɛ nyí Klísu Mawu ví ɔ́, bónú mi ɖi nǔ ɔ́, mi ná mɔ gbɛ gbɔn jǐ tɔn.