Read fon Jǎan 6 Bible Online

Jǎan 6 - fon bible

Jǎan 6

¹Énɛ́ ɔ́ gúdo ɔ́, Jezu dó asá Galilée tɔ e è nɔ lɛ́ ylɔ́ ɖɔ Tibɛliadi ɔ́, bó jɛ agě ɖě ɔ́ jí dɔ̌n.

²Ahwan wɔ̌buwɔ́bú ɖé xwedó Jezu, ɖó mɛ lɛ́ɛ mɔ nǔ e jlɛ́ wɛ é ɖe, bó ɖo azɔn gbɔ nú mɛ lɛ́ɛ wɛ é.

³Jezu xá só ɖé jí, lobo jínjɔ́n ayǐ ɖo fínɛ́ é kpódó ahwanvú tɔn lɛ́ɛ kpó.

⁴Jwifu lɛ́ɛ sín xwe e è nɔ ylɔ́ ɖɔ Dǐndínwáyi ɔ́ ko sɛ yá.

⁵Jezu zé ta bó mɔ ahwan wɔ̌buwɔ́bú ɖé ja gɔ̌n tɔn, lobo ɖɔ nú Filípu ɖɔ: “Fítɛ́ mǐ ná mɔ nǔɖuɖu xɔ ɖe, bɔ é ná kpé mɛ énɛ́ lɛ́ɛ bǐ?”

⁶Jezu ɖɔ mɔ̌, bó ná dó kpɔ́n nǔ e Filípu ná ɖɔ ɔ́, ɖó é ɖésúnɔ kó tunwun nǔ e wa gbé é ja é.

⁷Filípu ka yí gbe n'i ɖɔ: “È na bo sɔ́ gankwɛ́ afɔɖé (200) ɖó te[6], bó dó xɔ nǔɖuɖu ná ɔ́, é ná kpé nú yě ɖokpó ɖokpó ná mɔ kpɛɖé kpɛɖé ǎ.”

⁸Ahwanvú Jezu tɔn ɖěvo e è nɔ ylɔ́ ɖɔ Andlé, bɔ é nyí Sinmɔ́ɔ Piyɛ́ɛ sín nɔví ɔ́ ɖɔ n'i ɖɔ:

⁹“Nyaví ɖé ɖo fí, bó hɛn wɔ̌xúxú atɔ́ɔ́n kpódó hweví we kpó; fítɛ́ nǔ énɛ́ ka sixú jɛ nú mɛ tobutóbú élɔ́ lɛ́ɛ?”

¹⁰Jezu ka ɖɔ nú ahwanvú tɔn lɛ́ɛ ɖɔ: “Mi ɖɔ nú mɛ lɛ́ɛ bǐ nú yě ní jínjɔ́n ayǐ.” Gběhan wɛ́lɛ́wɛ́lɛ́ ka sukpɔ́ ɖo tɛn énɛ́ ɔ́ mɛ, bɔ yě bǐ jínjɔ́n jí. Súnnu mɛxó e ɖo yě mɛ lɛ́ɛ ná yi děgba ɖě afatɔ́n (5.000) mɔ̌.

¹¹Jezu ka fɔ wɔ̌xúxú lɛ́ɛ, bó dó kú nú Mawu, bó má nú mɛ e jínjɔ́n ayǐ ɖo fínɛ́ lɛ́ɛ; mɔ̌ ɖokpó ɔ́, é má hweví lɛ́ɛ nú yě, bɔ mɛ ɖokpó ɖokpó yí lě e é jló e gbɔn é.

¹²Đěe yě bǐ ɖu nǔ bó gɔ́ xo ɔ́, Jezu ɖɔ nú ahwanvú tɔn lɛ́ɛ ɖɔ: “Mi bɛ́ nǔ e yě ɖu kpo lɛ́ɛ bǐ, bónú ɖě ma yi gbě ó.”

¹³Ahwanvú tɔn lɛ́ɛ ka bɛ́ nǔ e yě ɖu kpo, ɖo wɔ̌xúxú atɔ́ɔ́n lɛ́ɛ mɛ é bǐ, bɔ é gɔ́ xasun wěwe.

¹⁴Ée mɛ lɛ́ɛ mɔ nǔ énɛ́ e Jezu jlɛ́ ɔ́, yě ɖɔ: “Gbeyíɖɔ Mawu tɔn e ɖó ná wá gbɛ ɔ́ mɛ ɔ́ wɛ é nyí nǔgbó.”

¹⁵Ée Jezu mɔ ɖɔ yě ná wá sɔ́ émí kpó hlɔ̌nhlɔ́n kpó, bó ná sɔ́ émí axɔ́sú ɔ́, é gosín fínɛ́, bó tunta sókan ɔ́ mɛ é ɖokpónɔ.

¹⁶Ée gbadanu wá su ɔ́, ahwanvú Jezu tɔn lɛ́ɛ jɛ te wá Galilée tɔ ɔ́ tó,

¹⁷bó byɔ́ tɔjíhún mɛ, bó tunta Kafaanawúmu; zǎn ko kú, bɔ Jezu ka ko xwedó yě wú ǎ.

¹⁸Tɔ ɔ́ ɖo adǎn jí hwenɛ́nu, ɖó jɔhɔn ɖaxó ɖé ɖo nyinyi wɛ.

¹⁹Hwenu e ahwanvú Jezu tɔn lɛ́ɛ ɖo hǔn ɔ́ kun wɛ, bó ko bló kilomɛ́tlu atɔ́ɔ́n abǐ ayizɛ́n mɔ̌ ɔ́, yě mɔ Jezu, bɔ é ɖo zɔnlin ɖi wɛ gbɔn tɔ ɔ́ jí ja yě gɔ̌n, bɔ xɛsi jɛ yě jí.

²⁰É ka ɖɔ nú yě ɖɔ: “Nyɛ wɛ, mi ma ɖi xɛsi ó.”

²¹Bɔ ée yě jló ná sɔ́ ɛ dó hǔn ɔ́ mɛ ɔ́, tlóló ɔ́, hǔn ɔ́ yi glín dó tɔ ɔ́ tó, fí e yě xwe é.

²²Gbe e gbe Jezu na nǔɖuɖu mɛ ɔ́ sín ayǐhɔ́ngbe ɔ́, mɛ lɛ́ɛ flín ɖɔ tɔjíhún ɖokpó géé jɛ́n wɛ ɖo tɔ ɔ́ jí, bɔ ahwanvú Jezu tɔn lɛ́ɛ sɔ́ bó ɖidó; Jezu ka xwedó yě ǎ, yě ɖokpónɔ wɛ byɔ́ hǔn ɔ́ mɛ.

²³Lo ɔ́, Tibɛliadi sín tɔjíhún ɖé lɛ́ɛ glín ɖo fí e Aklúnɔ zé wɔ̌xúxú bó dó kú nú Mawu bɔ yě ɖu ɖe é.

²⁴Bɔ ée mɛ lɛ́ɛ ma sɔ́ mɔ Jezu ǎ, bó ma ka sɔ́ lɛ́ mɔ ahwanvú tɔn lɛ́ɛ lɔ ǎ ɔ́, yě byɔ́ tɔjíhún énɛ́ lɛ́ɛ mɛ, bó ɖidó Jezu ba gbé ɖo Kafaanawúmu.

²⁵Ée yě wǎ yi mɔ Jezu ɖo tɔ ɔ́ gúdo dɔ̌n ɔ́, yě kanbyɔ́ ɛ ɖɔ: “Mɛ̌si, hwetɛ́nu a ka wá yí dě dó?”

²⁶Jezu ka yí gbe nú yě ɖɔ: “Má ɖɔ nǔgbó nú mi: nǔ e un jlɛ́ bɔ mi mɔ lɛ́ɛ wútu wɛ mi ɖo biba mì wɛ ǎ. Lo ɔ́, wɔ̌xúxú e mi ɖu gɔ́ xo ɔ́ wútu wɛ mi ɖo biba mì wɛ.

²⁷Mi ma nɔ jɛ tagba dó nǔɖuɖu e nɔ gblé ɔ́ tamɛ ó; lo ɔ́, mi ní nɔ jɛ tagba dó nǔɖuɖu e nɔ́ nɔ ayǐ sɔ́yi gbɛ mavɔ mavɔ é tamɛ. Nǔɖuɖu énɛ́ ɔ́, Gbɛtɔ́ví ɔ́ wɛ ná ná mi, ɖó Mawu Tɔ́ ɔ́ ná acɛ tɔn ɛ.”

²⁸Yě ká kanbyɔ́ ɛ ɖɔ: “Nɛ̌ mǐ ká ná bló gbɔn, bó wa mawuzɔ̌ lɛ́ɛ?”

²⁹Jezu ka yí gbe nú yě ɖɔ: “Nǔ e Mawu jló ɖɔ mi ní wa ɔ́ wɛ nyí ɖɔ mi ní ɖi nǔ nú mɛ e é sɛ́ dó é.”

³⁰Yě ká lɛ́ kanbyɔ́ ɛ ɖɔ jí: “Étɛ́ wɛ a nǎ sixú jlɛ́, bɔ mǐ ná mɔ, bó ná dó ɖi nǔ nú we? Azɔ̌ tɛ́ wɛ a nǎ wa?

³¹ Tɔ́gbó mǐtɔn lɛ́ɛ kó ɖu nǔɖuɖu e è nɔ ylɔ́ ɖɔ mǎna ɔ́ ɖo gbětótló mɛ lě e è ko wlán gbɔn ɖo Mawuxówéma ɔ́ mɛ é. É wɛ nyí ɖɔ: ‘É ná nǔɖuɖu e gosín jǐxwé ɔ́ yě, bɔ yě ɖu.’ ”

³²Jezu ka yí gbe nú yě ɖɔ: “Ma ɖɔ nǔgbó nú mi: Mɔyízi wɛ ná nǔɖuɖu e gosín jǐxwé ɔ́ mi ǎ; lo ɔ́, Tɔ́ ce wɛ ɖo nǔɖuɖu titewungbe e gosín jǐxwé ɔ́ ná mi wɛ.

³³Đó nǔɖuɖu e Mawu ná ɔ́ wɛ nyí mɛ e jɛ te sín jǐxwé, bó ná gbɛ jɔ gbɛ ɔ́ é.”

³⁴Yě ká ɖɔ n'i ɖɔ: “Aklúnɔ! Bo nɔ ná nǔɖuɖu énɛ́ mǐ tɛgbɛ.”

³⁵Jezu ka lɛ́ yí gbe nú yě ɖɔ: “Nyɛ wɛ nyí nǔɖuɖu e nɔ ná gbɛ jɔ gbɛ mɛ é. Mɛ e wá gɔ̌n ce ɔ́, xovɛ́ sɔ́ ná sin i gbeɖé ǎ. Mɛ e ka ɖi nǔ nú mì ɔ́, kɔ sɔ́ ná xú i gbeɖé ǎ.

³⁶Lo ɔ́, un ko ɖɔ nú mi; mi ko mɔ mì, cóbɔ mi ka ɖi nǔ nú mì ǎ.

³⁷Mɛ e Tɔ́ ɔ́ ná mì lɛ́ɛ bǐ ná wá gɔ̌n ce; mɛ e ka wá gɔ̌n ce ɔ́, un ná ɖe e tɔ́n ǎ.

³⁸Đó un jɛ te sín jǐxwé, bó ná bló jlǒ ce ǎ; lo ɔ́, nǔ e jló mɛ e sɛ́ mì dó ɔ́ bló gbé un ja bo wá.

³⁹Mɛ e sɛ́ mì dó ɔ́ sín jlǒ wɛ ka nyí ɖɔ un ma hɛn mɛ ɖokpó bú ɖo mɛ e é sɔ́ dó así nú mì lɛ́ɛ mɛ ó; lo ɔ́, nú ma fɔ́n yě bǐ sín kú ɖo azǎn gǔdo gúdo tɔn ɔ́ gbe.

⁴⁰Nǔ e Tɔ́ ce jló ɔ́ wɛ nyí ɖɔ mɛ e mɔ Vǐ ɔ́, bó ɖi nǔ n'i lɛ́ɛ ní mɔ gbɛ mavɔ mavɔ, bónú má fɔ́n yě sín kú azǎn gǔdo gúdo tɔn ɔ́ gbe.”

⁴¹Ée Jwifu e gbɛ́ wǎn nú Jezu lɛ́ɛ se xó énɛ́ ɔ́, yě jɛ nǔ hlún ɖɔ dó Jezu wú jí, ɖó é ɖɔ “Nyɛ wɛ nyí nǔɖuɖu e jɛ te sín jǐxwé é.”

⁴²Énɛ́ ɔ́, yě nɔ́ ɖɔ: “Jezu, Jozɛ́fu ví ɔ́ jɛ́n ka nɛ́ hǔn, bɔ mǐ ka tunwun tɔ́ tɔn kpódó nɔ tɔn kpó nɛ́. Nɛ̌ é ka ná ɖɔ nú mǐ din ɖɔ émí jɛ te sín jǐxwé gbɔn?”

⁴³Jezu yí xó, bó ɖɔ nú yě ɖɔ: “Mi gbɔ nǔ hlún ɖɔ ɖo miɖée tɛ́ntin.

⁴⁴Ényí Tɔ́ e sɛ́ mì dó ɔ́ ma dɔn mɛɖé wá nú mì ǎ ɔ́, é sixú wá gɔ̌n ce ǎ; mɛ e ka ná wá gɔ̌n ce ɔ́, un ná fɔ́n ɛ sín kú azǎn gǔdo gúdo tɔn ɔ́ gbe.

⁴⁵Gbeyíɖɔ Mawu tɔn lɛ́ɛ ko wlán ɖ'ayǐ ɖɔ: ‘Mawu ɖésú wɛ ná kplɔ́n nǔ yě bǐ.’ Mɛ e ɖótó Tɔ́ ɔ́, bó se nǔkplɔ́nmɛ tɔn ɔ́, mɛ énɛ́ ná wá gɔ̌n ce.

⁴⁶É ka nyí ɖɔ mɛɖé mɔ Tɔ́ ɔ́ kpɔ́n ɖɔ wɛ un ɖe ǎ; mɛ e gosín Mawu gɔ́n ɔ́ kɛ́ɖɛ́ jɛ́n mɔ ɛ.”

⁴⁷“Ma ɖɔ nǔgbó nú mi: mɛ e ɖi nǔ nú mì ɔ́ mɔ gbɛ mavɔ mavɔ.

⁴⁸Nyɛ wɛ nyí nǔɖuɖu e nɔ́ ná gbɛ jɔ gbɛ mɛ é.

⁴⁹Tɔ́gbó mǐtɔn lɛ́ɛ ɖu mǎna ɖo gbětótló mɛ, có yě ká kú.

⁵⁰Amɔ̌, nǔɖuɖu élɔ́ e jɛ te sín jǐxwé ɔ́, nǔɖuɖu ɖé wɛ bɔ mɛɖé ɖu ɔ́, é ná kú ǎ.

⁵¹Nyɛ wɛ nyí nǔɖuɖu gbɛɖe e jɛ te sín jǐxwé é. Mɛ e ná ɖu ɖo nǔɖuɖu élɔ́ mɛ ɔ́ ná nɔ gbɛ káká sɔ́yi. Nǔɖuɖu e un ka ná ná mi ɔ́, agbaza ce e un ná sɔ́ jó dó gbɛtɔ́ lɛ́ɛ tamɛ ɔ́ wɛ.”

⁵²Jwifu e gbɛ́ wǎn nú Jezu lɛ́ɛ ka jɛ nǔ dɔn jí syɛ́nsyɛ́n ɖo yěɖée tɛ́ntin bo nɔ ɖɔ: “Nɛ̌ nya élɔ́ ká sixú ná agbaza tɔn mǐ, bɔ mǐ na ɖu gbɔn?”

⁵³Jezu yí gbe nú yě ɖɔ: “Má ɖɔ nǔgbó nú mi: ényí mi ma ɖu nyɛ Gbɛtɔ́ví ɔ́ sín agbaza, bó nu hun ce ǎ ɔ́, gbɛ jɔ gbɛ ɔ́ ná nɔ mi mɛ ǎ.

⁵⁴Mɛ e ɖu agbaza ce, bó nu hun ce ɔ́, mɛ énɛ́ mɔ gbɛ mavɔ mavɔ, bɔ un ná fɔ́n ɛ sín kú azǎn gǔdo gúdo tɔn gbe.

⁵⁵Đó agbaza ce ɔ́, nǔɖuɖu titewungbe ɔ́ wɛ é nyí, bɔ hun ce ka nyí nǔ nunu titewungbe ɔ́.

⁵⁶Mɛ e ɖu agbaza ce, bo nu hun ce ɔ́ ɖo gbɛ ɖo nyɛ mɛ, bɔ nyɛ lɔ ɖo gbɛ ɖo éyɛ́ mɛ.

⁵⁷Tɔ́ ɔ́ e sɛ́ mì dó ɔ́ ɖo gbɛ, bɔ nyɛ ka ɖo gbɛ ɖo acɛ tɔn mɛ. Mɔ̌ ɖokpó ɔ́, mɛɖé ɖu agbaza ce ɔ́, é ná nɔ gbɛ gbɔn acɛ ce mɛ.

⁵⁸Nǔɖuɖu e jɛ te sín jǐxwé ɔ́ ɖíe; é cí ɖěe tɔ́gbó mitɔn lɛ́ɛ ɖu cóbó ka kú ɔ́ ɖɔhun ǎ; mɛ e ɖu nǔɖuɖu élɔ́ ɔ́, é ná nɔ gbɛ tɛgbɛ sɔ́yi.”

⁵⁹Nǔ e Jezu ɖɔ hwenu e é ɖo nǔ kplɔ́n mɛ lɛ́ɛ wɛ ɖo Kafaanawúmu ɖo kplɔ́ngbasá Jwifu lɛ́ɛ tɔn ɔ́ nɛ́.

⁶⁰Ée Jezu sín ahwanvú wɔ̌buwɔ́bú e xwedó e lɛ́ɛ se xó énɛ́ lɛ́ɛ ɔ́, yě mɛ gěgé jɛ ɖiɖɔ jí ɖɔ: “Xó élɔ́ syɛ́n dódó; mɛ ka sixú yí gbe nú xó énɛ́ ɔ́?”

⁶¹Jezu mɔ ɖɔ ahwanvú émítɔn lɛ́ɛ ɖo nǔ hlún ɖɔ dó xó énɛ́ ɔ́ wú wɛ, bó kanbyɔ́ yě ɖɔ: “Xó énɛ́ e un ɖɔ ɔ́ ná nyí afɔklɛ́nnú nú mi wɛ a?

⁶²Ényí mi ka wá mɔ Gbɛtɔ́ví ɔ́ xwe jǐxwé fí e é ko ɖe ɖ'ayǐ ɔ́, nɛ̌ ka ná cí gbɔn nú mi lo?

⁶³Yɛsinsɛn wɛ nɔ ná gbɛ mɛ; hlɔ̌nhlɔ́n gbɛtɔ́ tɔn kpé nǔɖé wú ǎ. Xó e un ɖɔ nú mi lɛ́ɛ wɛ nɔ ná Yɛ Mawu tɔn e nɔ ná gbɛ mɛ é.

⁶⁴Lo ɔ́, mɛɖé lɛ́ɛ ɖo mi mɛ bó ɖi nǔ ǎ.” Đó sín do wɛ Jezu ko tunwun mɛ e ma ɖi nǔ ǎ lɛ́ɛ, kpódó mɛ e ɖo ná sa ɛ ɖu wɛ ɔ́ kpó.

⁶⁵Jezu lɛ́ ɖɔ nú yě ɖɔ jí: “Nǔ e wú un ɖɔ ényí Mawu ma ná gbe tɔn mɛɖé ǎ ɔ́, mɛ ɔ́ kún sixú wá gɔ̌n ce ó é nɛ́.”

⁶⁶Sín hwenɛ́nu ɔ́, ahwanvú Jezu tɔn gěgé lɛ́ kɔ, bó sɔ́ nɔ xwedó e ǎ.

⁶⁷Jezu ka kanbyɔ́ mɛ wěwe lɛ́ɛ ɖɔ: “Mi lɔmɔ̌ mi jló ná yi a?”

⁶⁸ Sinmɔ́ɔ Piyɛ́ɛ ka yí gbe n'i ɖɔ: “Aklúnɔ! Mɛ̌ gɔ́n mǐ ka ná lɛ́ yi? É má nyí nu towe wɛ è nɔ se xó e nɔ ná gbɛ mavɔ mavɔ mɛ ɔ́ ɖe ǎ cé?

⁶⁹Mǐdɛɛ lɛ́ɛ ɔ́, mǐ ɖi nǔ, bó tunwun ɖɔ hwi wɛ nyí Klísu, mɛ mímɛ́ Mawu tɔn.”

⁷⁰Jezu ka lɛ́ ɖɔ nú yě ɖɔ jí: “Nyɛ ɖésú wɛ cyán mi mɛ wěwe lɛ́ɛ, cóbɔ mɛ ɖokpó ka ɖo mi mɛ bó nyí awǒvigbɛtɔ́.”

⁷¹Judási Sinmɔ́ɔ Isikaliɔ́ti ví ɔ́ xó ɖɔ wɛ Jezu ɖe; ɖó é lɔmɔ̌ ɖo ahwanvú wěwe lɛ́ɛ mɛ, cóbó ka ɖo Jezu ná sa wɛ.