Read fon Jǎan 7 Bible Online

Jǎan 7 - fon bible

Jǎan 7

¹Énɛ́ ɔ́ gúdo ɔ́, Jezu ɖo to e ɖo Galilée gbé jí lɛ́ɛ mɛ gbɔn wɛ; é ka jló ná yi gbɔn Judée ǎ, ɖó Jwifugán lɛ́ɛ ɖo biba ná hu i wɛ.

² Xwe e Jwifu lɛ́ɛ ja ɖuɖu gbé ɔ́, yě nɔ dó azava bó nɔ́ nɔ sá ɔ́ ko sɛ yá.

³Bɔ Jezu sín nɔví lɛ́ɛ ɖɔ n'i ɖɔ: “Yi Judée, bónú ahwanvú towe lɛ́ɛ lɔ ná mɔ azɔ̌ e a nɔ wa lɛ́ɛ.

⁴Đó mɛ ɖěbǔ jló ɖɔ è nǐ tunwun émí ɔ́, mɛ ɔ́ nɔ́ wa nǔ dó nǔglɔ́ ǎ; ée a ko nɔ jlɛ́ nǔ ɔ́, blǒ bónú mɛ bǐ ní tunwun we.”

⁵Đó nɔví tɔn lɛ́ɛ ɖésú ɖi nǔ n'i ǎ.

⁶Jezu ka ɖɔ nú yě ɖɔ: “Gan ce ko xo ǎ; lo ɔ́, midɛɛ lɛ́ɛ ɔ́, hwe lɛ́ɛ bǐ nu wɛ nyɔ́ nú mi.

⁷Gbɛtɔ́ lɛ́ɛ sixú gbɛ́ wǎn nú midɛɛ lɛ́ɛ ǎ; lo ɔ́, yě gbɛ́ wǎn nú nyɛ, ɖó un nɔ ɖe kúnnu ɖɔ nǔwiwa yětɔn lɛ́ɛ kún nyɔ́ ó.

⁸Midɛɛ lɛ́ɛ mi yi ɖu xwe ɔ́; nyɛ xwe xwe ɔ́ ɖu gbé ǎ; ɖó gan e mɛ un ɖó ná yi dó ɔ́ ko xo ǎ.”

⁹Ée Jezu ɖɔ mɔ̌ nú yě ɔ́, é cí Galilée.

¹⁰Ée Jezu sín nɔví lɛ́ɛ yi xwe ɔ́ ɖu gbé gúdo ɔ́, é lɔmɔ̌ wá bɛ yɛ, bó yi xwe ɔ́ tɛn mɛ.

¹¹Jwifugán lɛ́ɛ ba ɛ xwe ɔ́ hwenu káká, yě ká mɔ ɛ ǎ, bó nɔ́ ɖɔ: “Fítɛ́ é ka ɖe ɖo mɛ lɛ́ɛ mɛ tawun?”

¹²Mɛ gěgé ɖo mɛ lɛ́ɛ mɛ, bo zé gbe dó do, bo nɔ ɖo xó ɖɔ dó wútu tɔn wɛ, bó nɔ́ ɖɔ: “Gbɛtɔ́ ɖagbe wɛ nyí nya ɔ́ mɛ!” Mɛɖě ká nɔ ɖɔ: “Éeǒ; mɛblɛ́ɖutɔ́ ɖé kpowun wɛ.”

¹³Lo ɔ́, mɛ e ɖo xó tɔn ɖɔ wɛ lɛ́ɛ ɖě nɔ glá zé gbe dó jǐ ǎ, ɖó yě ɖo xɛsi ɖi nú Jwifugán lɛ́ɛ wɛ.

¹⁴Yě ɖo xwe ɔ́ ɖu wɛ, bó ko vlɔ́ azǎn nabí e yě ná dó ɖu ná ɔ́ ɖó we, bɔ Jezu yi sinsɛnxɔ mɛ, bó jɛ nǔ kplɔ́n mɛ jí.

¹⁵Lě e kplɔ́n nǔ mɛ gbɔn wɛ é ɖe ɔ́ kpácá Jwifugán lɛ́ɛ káká bɔ yě nɔ ɖɔ: “Nya élɔ́ má ka yi wěmaxɔmɛ kpɔ́n nɛ́! Nɛ̌ é ká wa gbɔn bó tunwun Mawuxówéma ɔ́ sɔ mɔ̌?”

¹⁶Jezu ka yí gbe nú yě ɖɔ: “Nyɛ wɛ ɖó nǔ e kplɔ́n mi wɛ un ɖe ɔ́ ǎ; Mawu e sɛ́ mì dó ɔ́ gɔ́n wɛ é gosín.

¹⁷Mɛ e ɖó jlǒ, bó ná wa jlǒ Mawu tɔn ɔ́, ényí nǔkplɔ́nmɛ ce ɔ́, Mawu gɔ́n wɛ é gosín abǐ acɛ nyɛ ɖésúnɔ tɔn wɛ ɔ́, é ná mɔ do ná.

¹⁸Mɛ e ka ɖo é ɖésúnɔ sín susu ba wɛ ɔ́, acɛ é ɖésúnɔ tɔn mɛ wɛ é nɔ ɖɔ xó dó. Lo ɔ́, mɛ e ɖo mɛ e sɛ́ ɛ dó ɔ́ sín susu ba wɛ ɔ́, nǔgbó wɛ é nɔ ɖɔ, bɔ xó tɔn ɖě nɔ́ nyí nǔvú ǎ.

¹⁹Mɔyízi ko ná sɛ́n lɛ́ɛ mi; lo ɔ́, mi mɛ ɖokpó nɔ́ nyi sɛ́n lɛ́ɛ ǎ; bɔ étɛ́ wú mi ka ɖo nǎ hu mì wɛ?”

²⁰Ahwan ɔ́ yí gbe n'i ɖɔ: “Yɛ nyanya wɛ ɖo jǐ towe; mɛ̌ ká ɖo nǎ hu we wɛ?”

²¹Jezu yí gbe nú yě ɖɔ: “Nǔ ɖokpó wɛ un wa, bɔ é kpácá mi sɔ mɔ̌.

²² Mɔyízi hɛn adagbigbo sɛ́n ɔ́ wá nú mi; (é wɛ ka jɛ sɛ́n énɛ́ nyi jí jɛ nukɔn ǎ, tɔ́gbó mǐtɔn lɛ́ɛ wɛ jɛ jí dó nukɔn), có gbɔjɛzán gbe lɛ́ɛ lɔmɔ̌ ɔ́, mi nɔ gbo ada nú mɛ.

²³ É ma nyí Mɔyízisɛ́n ɔ́ nyi wɛ mi ɖe bó nɔ́ gbo ada nú mɛ gbɔjɛzán gbe a? Étɛ́wú mi ka ɖo xomɛ sin dó nyɛ mɛ e gbɔ azɔn nú gbɛtɔ́ blěbǔ ɖokpó gbɔjɛzán gbe ɔ́ wɛ.

²⁴Mi ma nɔ nɔ gbɛtɔ́ jí ó, mi nɔ nɔ xó jí.”

²⁵Jeluzalɛ́munu ɖé lɛ́ɛ nɔ ɖɔ: “É ma nyí nya e wú lɛ́ lɛ̌ dó wɛ yě ɖe bo na hu ɔ́ nɛ́ a?

²⁶É nɛ́ ka ɖo xó ɖɔ wɛ ɖo agbawungba nɛ́; bɔ yě ká sɔ́ ɖo nǔɖé ɖɔ n'i wɛ ǎ; abǐ gǎn mǐtɔn lɛ́ɛ ka wá mɔ do na ɖɔ é wɛ nyí Klísu ɔ́ wútu wɛ è jó e dó a?

²⁷É ka nyí Klísu ɔ́ wɛ ɔ́, mɛɖé ma ka na tunwun fí e é gosín ɔ́ nɛ́? Mǐ ká tunwun fí e nya élɔ́ gosín ɔ́ nɛ́!”

²⁸Hwenu e Jezu ɖo nǔ kplɔ́n mɛ wɛ ɖo sinsɛnxɔ mɛ ɔ́, é sú xó, bó ɖɔ: “Mi tunwun mì, bó tunwun fí e un gosín é. Nyɛ ɖésúnɔ sín acɛ mɛ wɛ un wá dó ǎ, lo ɔ́, mɛ e sɛ́ mì dó ɔ́, nǔgbóɖɔtɔ́ wɛ, bɔ mi ka tunwun i ǎ.

²⁹Nyɛ tunwun i, ɖó gɔ̌n tɔn wɛ un gosín; é wɛ sɛ́ mì dó.”

³⁰Hwenɛ́nu ɔ́, yě jló ná wlí i, mɛ ɖěbǔ sín alɔ ka jɛ wú tɔn ǎ, ɖó gan tɔn ko xo ǎ.

³¹Mɛ gěgé ɖo agun ɔ́ mɛ bó ɖi nǔ n'i, bó nɔ́ ɖɔ: “Nú Klísu ɔ́ na bo wá ɔ́, é sɔ́ ná lɛ́ jlɛ́ nǔ hú nya élɔ́ wɛ a?”

³²Falizyɛn lɛ́ɛ se nǔ e mɛ lɛ́ɛ zé gbe dó do, bó ɖo ɖiɖɔ dó Jezu wú wɛ ɖo agun ɔ́ mɛ é, bɔ yě ɖó gbe kpɔ́ xá vɔ̌sánú-xwlémawutɔ́gán lɛ́ɛ, bó sɛ́ sɔ́ja dó, bó ná wlí Jezu.

³³Jezu ɖɔ nú yě ɖɔ: “Hwenu kpɛɖé jɛ́n kpo, bɔ un ná dó nɔ mi mɛ; énɛ́ ɔ́ gúdo ɔ́, un na lɛ́ kɔ yi mɛ e sɛ́ mì dó ɔ́ gɔ́n.

³⁴Mi ná ba mì, mi ka ná mɔ mì ǎ; ɖó mi ná sixú wá fí e un ɖe ɔ́ ǎ.”

³⁵Bɔ vɔ̌sánú-xwlémawutɔ́gán lɛ́ɛ jɛ ɖiɖɔ jí ɖo yěɖée tɛ́ntin ɖɔ: “Fítɛ́ nya élɔ́ ka jló ná yi, bɔ mǐ ma sɔ́ ná mɔ ɛ ǎ? É jló ná yi gɔ́ nú Jwifu e gba kpé Glɛ̌sinu lɛ́ɛ mɛ lɛ́ɛ, bó ná kplɔ́n nǔ Glɛ̌sinu lɛ́ɛ wɛ a?

³⁶Bɔ étɛ́ ná ɖɔ wɛ é ka ɖe bó ɖɔ: ‘Mi ná ba mì, mi ka ná mɔ mì ǎ, ɖó mi ná sixú wá fí e un ɖe ɔ́ ǎ.’ ”

³⁷ Gbe e gbe yě ná ɖu xwe ɔ́ fó ɔ́ wɛ nyí azǎn tají. Gbe énɛ́ gbe ɔ́, Jezu nɔ te ahwan ɔ́ nukɔn, bó zé gbe yi jǐ bó ɖɔ: “Sinnugblá sin mɛɖé hǔn, ní wá gɔ̌n ce bó wá nu sin.

³⁸ Lě e Mawuxówéma ɔ́ ko ɖɔ gbɔn ɔ́, mɛ e ɖi nǔ nú mì ɔ́, ná húzú tɔjɔtɛn e mɛ sin e nɔ ná gbɛ mɛ ɔ́ nɔ sa sín é.”

³⁹Yɛsinsɛn e mɛ e ɖi nǔ n'i lɛ́ɛ ná mɔ yí ɔ́ xó ɖɔ wɛ Jezu ɖe. Hwenɛ́nu ɔ́, Mawu ko na Yɛsinsɛn mɛɖé ǎ; ɖó Jezu ko byɔ́ susu tɔn mɛ ǎ.

⁴⁰Mɛ gěgé ɖo agun ɔ́ mɛ, bɔ ée yě se xó énɛ́ ɔ́, yě ɖɔ: “Dandan mɛ ɔ́, nya élɔ́ wɛ nyí gbeyíɖɔ Mawu tɔn.”

⁴¹Mɛ ɖé lɛ́ɛ ɖɔ: “Klísu wɛ;” lo ɔ́, mɛ ɖěvo lɛ́ɛ nɔ ɖɔ: “Klísu ɔ́ sixú gosín Galilée ǎ.

⁴² Mawuxówéma ɔ́ ko ɖɔ Davídi ví lɛ́ɛ mɛ wɛ Klísu ɔ́ ɖó ná tɔ́n sín, ɖo Bɛteleyɛ́mu, Davídi tomɛ.”

⁴³Énɛ́ ɔ́, agun ɔ́ klán gbe ɖó Jezu wútu.

⁴⁴Mɛ ɖé lɛ́ɛ ɖo yě mɛ, bo jló ná wlí i; yě mɛ ɖěbǔ sín alɔ ka jɛ wǔ tɔn ǎ.

⁴⁵Hwenu sɔ́ja e è sɛ́ dó Jezu wlí gbé lɛ́ɛ lɛ́ kɔ wá ɔ́, vɔ̌sánú-xwlémawutɔ́gán lɛ́ɛ kpódó Falizyɛn lɛ́ɛ kpó kanbyɔ́ yě ɖɔ: “Étɛ́wú mi ma ka kplá ɛ wá ǎ?”

⁴⁶Bɔ sɔ́ja e è sɛ́ dó lɛ́ɛ yí gbe nú yě ɖɔ: “È se bɔ mɛɖé ɖɔ xó nya énɛ́ ɖɔhun gbeɖé kpɔ́n ǎ.”

⁴⁷Falizyɛn lɛ́ɛ ka kanbyɔ́ yě ɖɔ: “Mi lɔmɔ̌ mi jó miɖée dó n'i bɔ é flú mi wɛ a?

⁴⁸Mi mɔ gǎn mǐtɔn lɛ́ɛ ɖě abǐ Falizyɛn lɛ́ɛ ɖě ɖi nǔ n'i a?

⁴⁹Mɛ tobutóbú élɔ́ lɛ́ɛ e ma ka tunwun Mɔyízi sɛ́n ɔ́ ǎ, bo ɖo xwixwedó e wɛ lɛ́ɛ ɔ́, nu wɛ è ko dó yě.”

⁵⁰ Falizyɛn e ɖo fínɛ́ lɛ́ɛ ɖokpó nɔ nyí Nikodɛ́mu; é wɛ wá mɔ Jezu ɖ'ayǐ; é kanbyɔ́ yě ɖɔ:

⁵¹“Đo sɛ́n mǐtɔn mɛ ɔ́, e nɔ ɖó hwɛ nú mɛɖé má se xó ɖé ɖo nu tɔn, ma ka tunwun nǔ e é wa nyi do ɔ́ a?”

⁵²Bɔ yě yí gbe n'i ɖɔ: “Galiléenu wɛ hwi lɔmɔ̌ nyí a? Kpɔ́n Mawuxówéma ɔ́ mɛ ganjí bo! A ná mɔ ɖɔ gbeyíɖɔ Mawu tɔn ɖě kún gosín Galilée ó.” [

⁵³Énɛ́ ɔ́ gúdo ɔ́, mɛ ɖokpó ɖokpó lɛ́ kɔ yi xwé tɔn gbe.