Read fon Mɛsɛ́dó 1 Bible Online

Mɛsɛ́dó 1 - fon bible

Mɛsɛ́dó 1

¹ Mɛvívɛ́ná ce Teofílu! Nǔ e Jezu wa ɔ́ kpódó nǔ e é kplɔ́n mɛ lɛ́ɛ kpán ɔ́, un kpi bǐ sín tan dó wěma ce nukɔn tɔn ɔ́ mɛ sín bǐbɛ́mɛ,

²káká yi jɛ gbe e gbe Mawu sɔ́ ɛ yi jǐxwé é. Cóbónú é ná yi jǐxwé ɔ́, é kplɔ́n nǔ mɛsɛ́dó e é cyán lɛ́ɛ gbɔn Yɛsinsɛn jí.

³Mɛsɛ́dó énɛ́ lɛ́ɛ wɛ Jezu sɔ́ éɖée xlɛ́ ɖo kú tɔn gúdo, bó ɖe xlɛ́ yě gbɔn ali gěgé nu, ɖɔ émí ɖo gbɛ. Azǎn kanɖé (40) wɛ é tɔ́n dó yě jí xɔ, bó nɔ́ ɖo xó ɖɔ nú yě wɛ dó axɔ́súɖuɖu Mawu tɔn wú.

⁴ Jezu ka wá ɖo nǔ ɖu xá yě wɛ gbe ɖokpó, bó ɖɔ nú yě ɖɔ: “Mi ma sɛ tɛn sín Jeluzalɛ́mu ó, lo ɔ́, mi nɔ te kpɔ́n nǔ e sín akpá Mawu Tɔ́ ɔ́ dó, bɔ un ko ɖɔ xó tɔn nú mi é.

⁵Đó Jǎan ɔ́, sin wɛ é sɔ́ dó lɛ yɛhwesin nú mɛ; lo ɔ́, midɛɛ lɛ́ɛ ɔ́, ɖo malín málín mɛ din ɔ́, Yɛsinsɛn wɛ è nǎ sɔ́ dó lɛ yɛhwesin nú mi.”

⁶Kplékplé mɛ yětɔn kanbyɔ́ Jezu ɖɔ: “Aklúnɔ, hwenɛ́nu wɛ a nǎ lɛ́ vɔ́ axɔ́súɖuɖu Izlayɛ́li tɔn ɔ́ sɔ́ dó alɔ mɛ nú Izlayɛ́li a?”

⁷É ka yí gbe nú yě ɖɔ: “Hwenu e é ná nyí ɔ́, gan e mɛ ka wɛ ɔ́, Mawu Tɔ́ ɔ́ ko to kpódó acɛ tɔn kpán; é nyí xó mitɔn ɖé ǎ.

⁸ Lo ɔ́, mi ná mɔ acɛ yí hwenu e Yɛsinsɛn ná jɛ te wá mi jí é, bɔ mi na nyí kúnnuɖetɔ́ ce, ɖo Jeluzalɛ́mu, gbɔn Judée gbé ɔ́ bǐ jí, kpódó Samalíi kpán, káká yi jɛ fí e gbɛ ɔ́ kponu ɖó é.”

⁹ Ée Jezu ɖɔ xó énɛ́ lɛ́ɛ gúdo ɔ́, yě ɖo kpínkpɔ́n ɛ wɛ, bɔ è sɔ́ ɛ ɖidó jǐ bɔ akpɔ́kpɔ́ ɖé wá bú i.

¹⁰Fínɛ́ wɛ yě ɖe, bó ɖo jǐnukúnsin kpɔ́n sɛ́ dó wɛ hwenu e é ɖo yiyi wɛ ɔ́, bɔ nya we ɖé lɛ́ɛ dó awu wěwé, bó tɔ́n ɖo akpá yětɔn,

¹¹bo ɖɔ nú yě ɖɔ: “Galiléenu e mi! Étɛ́ sín te wɛ mi ka kpo ɖe ɖo fí, bó ɖo jǐnukúnsin kpɔ́n sɛ́ dó wɛ mɔ̌? Jezu énɛ́ e è sɔ́ sín tɛ́ntin mitɔn yi jǐxwé ɔ́ ná lɛ́ wá lě e mi mɔ ɛ, bɔ é yi jǐxwé gbɔn é.”

¹²Énɛ́ ɔ́ gúdo ɔ́, mɛsɛ́dó lɛ́ɛ jɛ te sín olívutín só ɔ́ jí, bó lɛ́ kɔ wá yi Jeluzalɛ́mu; só énɛ́ lín dó toxo ɔ́ ǎ; é ná ɖó kilomɛ́tlu ɖokpó mɔ̌ dó toxo ɔ́.

¹³ Ée yě wá toxo ɔ́ mɛ ɔ́, yě byɔ́ xɔ e mɛ yě ko nɔ́ nɔ ɖ'ayǐ é mɛ, ɖo síngbó ɖé jí. Yě mɛ e wɛ lɛ́ɛ ɖíe: Piyɛ́ɛ, Jǎan, Jaki, Andlé, Filípu, Tɔmáa, Baatelemíi, Matíe, Jaki Alufée ví ɔ́, Sinmɔ́ɔ hunjɛdótojítɔ́ ɔ́[1], kpódó Judi Jaki ví ɔ́ kpó.

¹⁴Yě bǐ sín ayi ɖo bǔ, bɔ yě nɔ́ ɖó kan dó ɖɛxixo wú, yě kpódó nyɔ̌nu lɛ́ɛ kpán, kpódó Mali Jezu sín nɔ kpó, kpódó Jezu sín nɔví lɛ́ɛ kpó.

¹⁵Gbe ɖokpó wá su, bɔ yě nǔɖitɔ́ kantɔn mɔ̌ (120) kplé, bɔ Piyɛ́ɛ sí te ɖo tɛ́ntin yětɔn, bó ɖɔ:

¹⁶“Nɔví ce lɛ́ɛ mi! Judási e nɔ nukɔn nú mɛ e wá wlí Jezu lɛ́ɛ ɔ́, nǔ e Yɛsinsɛn ɖɔ dó wǔtu tɔn gbɔn Davídi nu mɛ, ɖo Mawuxówéma ɔ́ mɛ ɔ́ ɖó ná jɛ.

¹⁷Hǎgbɛ́ mǐtɔn wɛ é kó nyí ɖ'ayǐ, bɔ é lɔmɔ̌ ɖó azɔ̌ tɔn.”

¹⁸Mɛ e xó ɖɔ wɛ Piyɛ́ɛ ɖe ɔ́ ɖíe ka sɔ́ nǔ nyanya e é dó sin ɔ́ sín akwɛ́ dó xɔ ayǐkúngban ɖokpó, lobo sɔ́ kɔ do, bó wú ɖo tɛ́ntin, bɔ adɔ tɔn lɛ́ɛ bǐ tlú e.

¹⁹Nǔ énɛ́ ɔ́, Jeluzalɛ́munu lɛ́ɛ bǐ wɛ se, káká bó nɔ́ ylɔ́ ayǐkúngban ɔ́ dó gbe yětɔn mɛ ɖɔ “Hakeludama” tínmɛ tɔn wɛ nyí “kanjɔyíkúngban.”

²⁰ “È ka wlán dó Ɖɛhanwéma mɛ ɖɔ jí: ‘Xwé tɔn ní wú gbě, bónú mɛɖé ní ma sɔ́ nɔ gbe ó.’ È lɛ́ wlán ɖɔ: ‘Mɛ ɖěvo ní jɛ tɛn tɔn mɛ.’

²¹ “Énɛ́ wú ɔ́, mɛ e xwedó mǐ hwenu e Aklúnɔ Jezu gbɔn to lɛ́ɛ mɛ to lɛ́ɛ mɛ xá mǐ, bɛ́ sín gbe e gbe Jǎan lɛ yɛhwesin n'i ɔ́ káká yi jɛ gbe e gbe è sɔ́ ɛ sín mǐ mɛ yi jǐxwé ɔ́ ɖokpó ɖó ná gɔ́ nú mǐ, bó ná nɔ́ ɖe kúnnu ɖɔ Jezu fɔ́n sín kú.”

²³Énɛ́ ɔ́, yě sɔ́ mɛ we ɖó te: Jozɛ́fu kpó Matyasi kpó; Jozɛ́fu ɔ́ nɔ́ lɛ́ nyí Baasabási, bɔ è nɔ lɛ́ ylɔ́ ɛ ɖɔ Jusitúsi.

²⁴Énɛ́ ɔ́ gúdo ɔ́, yě xo ɖɛ, bó ɖɔ: “Aklúnɔ, hwi mɛ e nɔ mɔ nǔ jɛ mɛ ɖokpó ɖokpó sín ayi mɛ é, xlɛ́ mɛ e a sɔ́ ɖo mɛ we élɔ́ lɛ́ɛ mɛ é mǐ,

²⁵nú é ná nɔ Judási sín tɛn mɛ, bó wa mɛsɛ́dó sín azɔ̌ e Judási jó dó, bó yi tɛn e nyí étɔn ɔ́ mɛ é.”

²⁶Ée yě ɖɔ mɔ̌ ɔ́, yě nyi akɔ, bó sɔ́ Matyasi, bɔ é gɔ́ nú mɛsɛ́dó wǒ-ɖokpó lɛ́ɛ.