Read fon Mɛsɛ́dó 10 Bible Online

Mɛsɛ́dó 10 - fon bible

Mɛsɛ́dó 10

¹Nya ɖé ɖo Sezalée, bɔ è nɔ ylɔ́ ɛ ɖɔ Kɔnɛ́yi; sɔ́ja kanwekogán wɛ é nyí, ɖo ahwangbɛ́ e è nɔ ylɔ́ ɖɔ Italíi tɔn ɔ́ mɛ.

²Nya énɛ́ ɔ́ nɔ́ xwedó Mawusɛ́n, bɔ é kpódó mɛ e ɖo hɛ̌n tɔn nu lɛ́ɛ bǐ kpán nɔ́ ɖó sísí nú Mawu. É nɔ́ ná nǔ gěgé Jwifu wamamɔnɔ lɛ́ɛ, bó nɔ́ xo ɖɛ hwebǐnu.

³Gbe ɖokpó wá su, ɖo hwelɛ́kɔ xwe gan atɔn mɛ mɔ̌, bɔ é mɔ nǔ, bó mɔ wɛnsagun Mawu tɔn ɖokpó céɖécéɖé, bɔ wɛnsagun ɔ́ byɔ́ xwé tɔn gbe, bó ɖɔ n'i ɖɔ: “Kɔnɛ́yi.”

⁴Ée Kɔnɛ́yi mɔ wɛnsagun ɔ́, xɛsi jɛ jǐ tɔn; é ká kpɔ́n ɛ tlítlí, bó kanbyɔ́ ɛ ɖɔ: “Nɛ̌ ká gbɔn Aklúnɔ?” Bɔ wɛnsagun ɔ́ yí gbe n'i ɖɔ: “Đɛ e a nɔ xo lɛ́ɛ, kpódó nǔ e a nɔ ná wamamɔnɔ lɛ́ɛ kpán ɔ́, bǐ wɛ Mawu yí, bó flín we.

⁵Din ɔ́, sɛ́ mɛ dó Jopée, nú è yi ylɔ́ Sinmɔ́ɔ e è nɔ ylɔ́ ɖɔ Piyɛ́ɛ ɔ́ wá.

⁶É ɖo nya anyǔzɔ́watɔ́ ɖé xwé; è nɔ ylɔ́ nya ɔ́ ɖɔ Sinmɔ́ɔ, bɔ xwé tɔn ɖo xutó.”

⁷Ée wɛnsagun e ɖɔ xó n'i ɔ́ yi tlóló ɔ́, Kɔnɛ́yi ylɔ́ mɛsɛntɔ́ tɔn we, kpó sɔ́ja e nɔ wa azɔ̌ n'i lɛ́ɛ ɖokpó kpó; sɔ́ja énɛ́ nɔ́ xwedó Mawusɛ́n ɔ́;

⁸Kɔnɛ́yi tín nǔ e jɛ ɔ́ bǐ mɛ nú yě, lobo sɛ́ yě dó Jopée.

⁹Ayǐhɔ́ngbe tɔn ɔ́, yě ɖo ali jí xweyǐgbe, bó kó sɛ yá Jopée. Đo Jopée dɔ̌n ɔ́, Piyɛ́ɛ xá xɔ ta hwenɛ́nu ɖo gan wěwe mɛ ɖɔhun mɔ̌, bó ná xo ɖɛ.

¹⁰Xovɛ́ sin i, bɔ é jló ná ɖu nǔ. Hwenu e è ɖo nǔɖuɖu ɔ́ bló wɛ ɔ́, é ba éɖée kpo,

¹¹bó mɔ jǐnukúnsin kɛ, bɔ nǔ avɔ ɖaxó ɖɔhun ɖé gosín jǐ ja dodomɛ, bɔ tó tɔn ɛnɛ lɛ́ɛ ɖo sinsin;

¹²bɔ kanlin alɔkpa alɔkpa ɖ'é mɛ: ée nɔ́ zɔn afɔ ɛnɛ jí lɛ́ɛ, ée nɔ́ sá gbɔn kɔ́ mɛ lɛ́ɛ, kpódó xɛ alɔkpa alɔkpa lɛ́ɛ kpán ɖ'é mɛ.

¹³É ká se gbe ɖé, bɔ gbe ɔ́ ɖɔ n'i ɖɔ: “Piyɛ́ɛ! Sí te, hu, bó ɖu.”

¹⁴Piyɛ́ɛ ka yí gbe ɖɔ jí: “Éeǒ Aklúnɔ; ɖó nǔ e nyí nǔvɛ́mɛ é kpódó nǔ e nɔ hɛn mɛ blí é kpó ɔ́, un ɖu ɖě kpɔ́n gbeɖé ǎ.”

¹⁵Gbe ɔ́ ká lɛ́ ɖɔ n'i azɔn wegɔ́ ɔ́ ɖɔ: “Nǔ e Mawu ɖɔ è hɛn ɔ́, è nǎ ɖu ɔ́, hwɛ ma ɖɔ é vɛ́ mɛ ó.”

¹⁶Azɔn atɔn wɛ nǔ énɛ́ jɛ. Énɛ́ gúdo tlóló ɔ́, nǔ avɔ ɖaxó ɖɔhun ɔ́ kpódó nǔ e ɖ'é mɛ lɛ́ɛ bǐ kpán lɛ́ kɔ yi jǐxwé.

¹⁷Piyɛ́ɛ ɖo nǔ énɛ́ lɛ́ɛ e é mɔ lɛ́ɛ sín tínmɛ kanbyɔ́ éɖée wɛ. Énɛ́ linkpɔ́n wɛ é ɖe kɛ́ɖɛ́, bɔ mɛ e Kɔnɛ́yi sɛ́ dó e lɛ́ɛ kan Sinmɔ́ɔ xwé byɔ́, bó wá jɛ hɔntogbó jí.

¹⁸Yě zé gbe yi jǐ, bó kanbyɔ́ ɖɔ fínɛ́ wɛ Sinmɔ́ɔ e è nɔ ylɔ́ ɖɔ Piyɛ́ɛ ɔ́ jɛ ají.

¹⁹Piyɛ́ɛ ka kpo ɖo tamɛ lin dó nǔ e é mɔ ɔ́ wú wɛ, bɔ Yɛsinsɛn ɖɔ n'i ɖɔ: “Đǒtó; mɛ atɔn ɖé lɛ́ɛ nɛ́ ɖo biba we wɛ nɛ́.

²⁰Sí te, jɛ te, bó xwedó yě; ma xokpɔ́n ó, ɖó nyi wɛ sɛ́ yě dó.”

²¹Piyɛ́ɛ ka jɛ te wá mɔ mɛ lɛ́ɛ, bó ɖɔ nú yě ɖɔ: “Nyɛ mɛ e ba wɛ mi ɖe ɔ́ ɖíe; étɛ́ ka hɛn mi wá?”

²²Yě ka yí gbe n'i ɖɔ: “Sɔ́ja kanwekogán Kɔnɛ́yi wɛ sɛ́ mǐ dó; nya énɛ́ ɔ́, gbɛtɔ́ ɖagbe ɖé wɛ; é nɔ́ sí Mawu, bɔ Jwifu lɛ́ɛ bǐ nɔ́ ɖe kúnnu ɖagbe n'i. Wɛnsagun Mawu tɔn ɖé tɔ́n dó jǐ tɔn, bó ɖɔ n'i ɖɔ ní ylɔ́ we wá xwé tɔn gbe, bó ɖótó xó e a nǎ ɖɔ n'i é.”

²³Piyɛ́ɛ ka kplá yě byɔ́ xwé gbe, lobo ɖó tɛnmɛ nú yě. Ayǐhɔ́ngbe tɔn ɔ́, é kpódó yě kpán wá jɛ ali; nɔví e ɖo Jopée lɛ́ɛ ɖě ka xwedó e.

²⁴Yě wá Sezalée ayǐhɔ́ngbe tɔn. Kɔnɛ́yi ka ɖo te kpɔ́n wǐwá yětɔn, bó ylɔ́ hɛ̌nnumɔ tɔn lɛ́ɛ, kpódó xɔ́ntɔn tɔn vívɛ́ná lɛ́ɛ kpán.

²⁵Hwenu e Piyɛ́ɛ ɖo xwé ɔ́ gbe byɔ́ wɛ ɔ́, Kɔnɛ́yi wá kpé e, bó húzú jɛ kpo ɖo nukɔn tɔn, bó ɖe kɔ́.

²⁶Lo ɔ́, Piyɛ́ɛ sɔ́ ɛ sí te, bó ɖɔ: “Sí te, gbɛtɔ́ wɛ nyɛ lɔmɔ̌ nyí.”

²⁷Bɔ é kpódó Piyɛ́ɛ kpó jɛ xó ɖɔ jí, bó byɔ́ xwé ɔ́ gbe, bɔ Piyɛ́ɛ mɔ ɖɔ mɛ gěgé kó kplé ɖo fínɛ́,

²⁸bó ɖɔ nú yě ɖɔ: “Mi tunwun ganjí ɖɔ, ɖo mǐ mɛ Jwifu lɛ́ɛ sín sɛ́n mɛ ɔ́, Jwifu ɖé kún ɖó ná dó gbɛ̌ xá mɛ e ma nyí Jwifu ǎ é gbeɖé ó; é kún ka ɖó ná byɔ́ ɖě xwé ó. Lo ɔ́, Mawu ɖe xlɛ́ mǐ din ɖɔ un kún ɖó ná ylɔ́ mɛ ɖěbǔ ɖɔ mɛ blíblí abǐ mɛ e un ma sixú dó gbɛ̌ xá ǎ é ó.

²⁹Nǔ e wú wɛ hwenu e a ylɔ̌ mì ɔ́, un ma xokpɔ́n cóbó wá ǎ é nɛ́. Din ɔ́, nǔ e wú a ylɔ̌ mì ɔ́, bó ɖɔ nú mì.”

³⁰Kɔnɛ́yi ka yí xó, bó ɖɔ: “Azǎn ɛnɛ ɖíe wɛ un ɖo xwé ce gbe, ɖo gan atɔn mɛ hwelɛ́kɔ lěhwenu, bó ɖo ɖɛ xo wɛ; tlóló kpowun ɔ́, nya ɖé jɛ́n wá tɔ́n ɖo nukɔn ce, bó dó awu ɖé, bɔ awu ɔ́ nɔ́ kɔ́n.

³¹Nya ɔ́ ɖɔ nú mì ɖɔ: ‘Kɔnɛ́yi, Mawu yí ɖɛ towe, bó flín nǔ e a nɔ ná wamamɔnɔ lɛ́ɛ é.

³²Sɛ́ mɛ dó Jopée, nú è yi ylɔ́ Sinmɔ́ɔ e è nɔ lɛ́ ylɔ́ ɖɔ Piyɛ́ɛ é wá. Anyǔzɔ́watɔ́ Sinmɔ́ɔ e xwé tɔn ɖo xutó ɔ́ sín xwé gbe wɛ é jɛ.’

³³Un ka sɛ́ mɛ dó azɔn ɖokpó, ɖɔ è nǐ yi ylɔ́ we wá, bɔ a ka yí gbe bo wá nǔgbó. Din ɔ́, mǐ bǐ ɖíe ɖo Mawu nukɔn e, bó ná se nǔ e Mawu zɔ́n we ɖɔ a nǐ ɖɔ nú mǐ é.”

³⁴ Piyɛ́ɛ yí xó, bó ɖɔ: “Un mɔ din nǔgbó ɖɔ Mawu kún nɔ́ ɖe mɛɖé ɖó vo ɖo mɛɖé mɛ ó.

³⁵Lo ɔ́, ɖo akɔta ɖěbǔ mɛ ɔ́, mɛ e nɔ ɖó sísí n'i, bó nɔ́ xwedó hwɛjijɔ ɔ́, mɛ énɛ́ sín nǔ nɔ́ nyɔ́ nukún tɔn mɛ.

³⁶Mi tunwun xó e Mawu ɖɔ sɛ́ dó Izlayɛ́li ví lɛ́ɛ, bó dó Wɛn Ɖagbe e nɔ ná fífá mɛ ɔ́ yě gbɔn Jezu Klísu e nyí mɛ bǐ sín Aklúnɔ ɔ́ jí é.

³⁷Hwenu e Jǎan jlá Mawuxó ɔ́, bó lɛ yɛhwesin nú mɛ lɛ́ɛ gúdo ɔ́, mi tunwun nǔ e jɛ ɖo Galilée hwɛ̌ cóbó lɛ́ wá jɛ gbɔn Judée gbé ɔ́ bǐ jí é.

³⁸Mi tunwun lě e Mawu gba Yɛsinsɛn sín hlɔ̌nhlɔ́n dó Jezu Nazalɛ́tinu ɔ́ jí gbɔn é; mi lɛ́ tunwun lě e Jezu gbɔn to ɔ́ mɛ, bó wa ɖagbe nú mɛ lɛ́ɛ, bó gbɔ azɔn nú mɛ e ɖo awǒvi sín acɛ mɛ lɛ́ɛ bǐ gbɔn é, ɖó Mawu ɖo kpɔ́ xá ɛ.

³⁹Nǔ e é wa ɖo Jwifu lɛ́ɛ yíkúngban jí, kpódó Jeluzalɛ́mu kpó ɔ́ bǐ wɛ mǐ mɔ; yě ká ɛ nyi aklúzu jí, bó hu i.

⁴⁰Mawu ka fɔ́n ɛ sín kú azǎn tɔn atɔngɔ́ ɔ́ gbe, bó ɖe e xlɛ́.

⁴¹Togun ɔ́ bǐ wɛ é ka ɖe e xlɛ́ ǎ; lo ɔ́, mǐ mɛ e Mawu kó cyán ɖ'ayǐ, bɔ mǐ ná nyí kúnnuɖetɔ́ tɔn lɛ́ɛ wɛ é ɖe e xlɛ́; mǐ ɖu nǔ, bó nu ahan xá ɛ hwenu e Mawu fɔ́n ɛ sín kú wá gbɛ é gúdo.

⁴²É ka zɔ́n ɖɔ mǐ ní jlá togun ɔ́ bǐ, bó ɖe kúnnu ná ɖɔ émí wɛ nyí mɛ e Mawu sɔ́ bɔ é ná ɖɔ hwɛ xá mɛ e ɖo gbɛ kpó mɛ e ko kú lɛ́ɛ kpó é.

⁴³É wɛ gbeyíɖɔ Mawu tɔn lɛ́ɛ bǐ ɖe kúnnu ná ɖɔ jí: ‘Mɛ e ná ɖi nǔ n'i lɛ́ɛ ɔ́, Mawu ná sɔ́ hwɛ yětɔn lɛ́ɛ kɛ yě, gbɔn hlɔ̌nhlɔ́n e Jezu sín nyǐkɔ ɖó ɔ́ gbla mɛ.’ ”

⁴⁴Piyɛ́ɛ kpo ɖo xó énɛ́ lɛ́ɛ ɖɔ wɛ, bɔ Yɛsinsɛn jɛ te wá mɛ e ɖo tó ɖó e wɛ lɛ́ɛ bǐ jí.

⁴⁵Ée Jwifu e ɖi nǔ nú Jezu, bó xwedó Piyɛ́ɛ wá lɛ́ɛ mɔ ɖɔ Yɛsinsɛn e Mawu nɔ́ ná mɛ ɔ́ gba kɔn nyi mɛ e ma nyí Jwifu ǎ lɛ́ɛ lɔmɔ̌ jí ɔ́, é kpácá yě tlala.

⁴⁶Đó yě se bɔ yě ɖo xó ɖɔ wɛ dó gbe e yě ma se ǎ lɛ́ɛ mɛ, bó ɖo susu kpa nú Mawu wɛ. Piyɛ́ɛ ka yí xó, bó ɖɔ:

⁴⁷“Mɛ élɔ́ lɛ́ɛ e Mawu ná Yɛsinsɛn lě e é ná mǐ lɔmɔ̌ gbɔn ɔ́, è sixú gbɛ́ ɖɔ è ma lɛ yɛhwesin nú yě kpó sin kpó ó a?”

⁴⁸Ée é ɖɔ mɔ̌ ɔ́, é ná gbe ɖɔ è lɛ yɛhwesin nú yě, ɖo Jezu Klísu nyǐkɔ mɛ. Énɛ́ ɔ́ gúdo ɔ́, yě dó kɛnklɛ́n n'i ɖɔ é ní nɔ émí gɔ́n xɔ azǎn yɔywɛ ɖé.