Read fon Mɛsɛ́dó 12 Bible Online

Mɛsɛ́dó 12 - fon bible

Mɛsɛ́dó 12

¹Hwenɛ́nu ɔ́, axɔ́sú Elódu jɛ ya dó nú mɛɖé lɛ́ɛ jí, ɖo agunví lɛ́ɛ mɛ.

²É zɔ́n bɔ è zě hwǐ dó hu Jaki e nyí Jǎan sín nɔví é ná.

³Ée é mɔ ɖɔ nǔ énɛ́ nyɔ́ Jwifu lɛ́ɛ nukún mɛ ɔ́, é zɔ́n, bɔ è wlǐ Piyɛ́ɛ lɔmɔ̌. (Wɔ̌xúxú e mɛ è ma dó tɔ́n ǎ é sín xwezán hwenu wɛ.)

⁴ Ée Elódu wlí Piyɛ́ɛ ɔ́, é sú i dó gankpá mɛ, bó sɔ́ ɛ dó alɔ mɛ nú sɔ́ja ɛnɛ ɛnɛ gbɛ́ donu ɛnɛ, nú yě ná cɔ́ ɛ, bó ɖo linlin wɛ ɖɔ Dǐndínwáyixwe ɔ́ gúdo ɔ́, émí ná dɔn ɛ wá togun ɔ́ nukɔn, bó ná ɖɔ hwɛ xá ɛ.

⁵Lo ɔ́, hwenu e Piyɛ́ɛ ɖo ganxó ɔ́, agun ɔ́ nɔ́ ɖo ɖɛ xo wɛ syɛ́nsyɛ́n dó ta tɔn mɛ.

⁶Ée é kpo sɔ bɔ Elódu ná kplá Piyɛ́ɛ wá togun ɔ́ nukɔn, bó ná ɖɔ hwɛ xá ɛ ɔ́, Piyɛ́ɛ ɖo amlɔ dɔ́ wɛ zǎn mɛ, ɖo sɔ́ja we tɛ́ntin; wlɔ we wɛ è dó e, bɔ sɔ́ja ɖěvo lɛ́ɛ ka ɖo te ɖo hɔn ɔ́ jí, bó ɖo gankpá ɔ́ cɔ́ wɛ.

⁷Azɔn ɖokpó ɔ́, wɛnsagun Aklúnɔ tɔn ɖokpó wá xwetɔ́n, bɔ wěziza hɔ́n ɖo xɔ ɔ́ mɛ. Wɛnsagun ɔ́ ka ɖó alɔ Piyɛ́ɛ wú, bó fɔ́n ɛ, lobo ɖɔ: “Sí te hawun!” Bɔ wlɔ lɛ́ɛ bǐ jɛ ayǐ sín alɔ tɔn.

⁸Wɛnsagun ɔ́ ka ɖɔ n'i ɖɔ: “Sɔ́ gǒjíblánú towe sin, bó sɔ́ afɔkpa towe lɛ́ɛ dó.” Bɔ é ka bló gbɔn mɔ̌. Wɛnsagun ɔ́ ka lɛ́ ɖɔ n'i ɖɔ: “Sɔ́ awu towe ɖaxó ɔ́ dó, bó xwedó mì.”

⁹Bɔ Piyɛ́ɛ tɔ́n, bó xwedó wɛnsagun ɔ́; lo ɔ́, nǔ e wa wɛ wɛnsagun ɔ́ ɖe ɔ́, Piyɛ́ɛ ɖi ɖɔ nǔgbó wɛ é nyí ǎ; é vɛdó ɖɔ nǔ mɔ wɛ émí ɖe sín.

¹⁰Yě zɛ sɔ́ja nukɔn tɔn lɛ́ɛ wú, bó zɛ wegɔ́ lɛ́ɛ wú, bó yi jɛ ganhɔn e tɔ́n jɛ toxo mɛ ɔ́ jí, bɔ hɔn ɔ́ nɔ é ɖóɖó, bó hun ɖo nukɔn yětɔn, bɔ yě tɔ́n, bó mlɛ́ ali ɖé ɖidó; azɔn ɖokpó ɔ́, wɛnsagun ɔ́ ka jó e dó.

¹¹Piyɛ́ɛ ka mɔ éɖée mɛ, bó ɖɔ: “Un mɔ ganjí din ɖɔ Aklúnɔ wɛ sɛ́ wɛnsagun tɔn dó, bó wá xɔ mì ɖo Elódu kpódó nǔ e nɔ te kpɔ́n wɛ Jwifu lɛ́ɛ ɖe ɔ́ bǐ kpó sí.”

¹²Ée é mɔ mɔ̌ ɔ́, é ɖidó Mali e nyí Jǎan e è nɔ lɛ́ ylɔ́ ɖɔ Maki ɔ́ sín nɔ xwé. Mɛ gěgé ko kplé ɖo fínɛ́, bó ɖo ɖɛ xo wɛ.

¹³É xúxú hɔntogbó, bɔ nyɔ̌nu mɛsɛntɔ́ e è nɔ ylɔ́ ɖɔ Hlodu ɔ́ wá kpɔ́n mɛ e ɖo hɔn xúxú wɛ é.

¹⁴Ée é se mɛ ɔ́ sín gbe ɔ́, é tunwun ɖɔ Piyɛ́ɛ wɛ, bɔ xomɛ hun i káká, bɔ é sɔ́ hun hɔn ɔ́ ǎ, bó kán wezun yi ɖɔ Piyɛ́ɛ wɛ ɖo te ɖo hɔn ɔ́ jí.

¹⁵Yě ka ɖɔ n'i ɖɔ: “A ɖo lugbe ǎ.” Lo ɔ́, Hlodu lɛ́ vɔ́ tɛ ɖɛ̌ jí bó ɖɔ nú yě ɖɔ nǔgbó ɖɔ nú yě wɛ émí ɖe; yě ka ɖɔ: “Sɛ́ tɔn wɛ.”

¹⁶Piyɛ́ɛ ka kpo ɖo hɔn xúxú wɛ jɛ́n wɛ; ée yě wá yi hun hɔn ɔ́, yě mɔ ɛ, bɔ ado hu yě.

¹⁷Piyɛ́ɛ ka bló alɔ nú yě ɖɔ yě ní xwɛ, bó wlí lě e Aklúnɔ ɖe e sín gankpá mɛ gbɔn ɔ́ ɖɔ nú yě. É ka lɛ́ ɖɔ nú yě ɖɔ: “Mi yi ɖɔ nú Jaki, kpódó nɔví mǐtɔn ɖo nǔɖiɖi mɛ lɛ́ɛ kpó.” Énɛ́ ɔ́ gúdo ɔ́, é tɔ́n bó ɖidó fí ɖěvo.

¹⁸Ée ayǐ wá hɔ́n ɔ́, sɔ́ja lɛ́ɛ jɛ jojo dán jí, bó nɔ́ kanbyɔ́ yěɖée ɖɔ: “Étɛ́ ka jɛ dó Piyɛ́ɛ jí?”

¹⁹Elódu yi Piyɛ́ɛ kplá gbé ɖo gankpá mɛ, bó ba ɛ kpo, bó ylɔ́ sɔ́ja lɛ́ɛ, bó kan nǔ byɔ́ yě, lobo ná gbe ɖɔ è nǐ hu yě. Énɛ́ ɔ́ gúdo ɔ́, Elódu gosín Judée, bó yi nɔ Sezalée.

²⁰Elódu sin xomɛ dó Tíinu lɛ́ɛ kpódó Sidɔ́ɔnnu lɛ́ɛ kpán tlala. Yědɛɛ lɛ́ɛ ka ɖó gbe kpɔ́, bó zun xɔ́ntɔn xá gǒmɛgán tɔn Blasitúsi, bó yi mɔ ɛ, bó jló ná dó hwɛ gbɔ xá ɛ, ɖó ayǐkúngban tɔn jí wɛ dɔkun e nɔ hɛn to yětɔn ɔ́ nɔ́ tɔ́n sín.

²¹Ée kplézán ɔ́ sɔgbe ɔ́, Elódu dó axɔ́súwu tɔn lɛ́ɛ, bó jínjɔ́n axɔ́súzinkpo tɔn jí, bó ɖɔ xó nú yě agbawungba,

²²bɔ to ɔ́ bǐ nɔ́ sú xó ɖɔ: “Gbɛtɔ́ wɛ ɖo xó ɖɔ wɛ ǎ; nǔmɛsɛn ɖé wɛ.”

²³Lo ɔ́, tlóló tɛn tɔn mɛ ɔ́, wɛnsagun Aklúnɔ tɔn sín alɔ jɛ wǔ tɔn, ɖó é sɔ́ Mawu su ǎ wútu; bɔ wě ɖu i káká bɔ é kú.

²⁴Mawuxó ɔ́ ká ɖo gbigba kpé d'é jí wɛ.

²⁵Baanabási kpódó Sólu kpán ka wa nǔ e gbé è sɛ́ yě dó é ɖó alɔ te, bó lɛ́ kɔ sín Jeluzalɛ́mu, bó kplá Jǎan e è nɔ ylɔ́ ɖɔ Maki é.