Read fon Mɛsɛ́dó 13 Bible Online

Mɛsɛ́dó 13 - fon bible

Mɛsɛ́dó 13

¹Đo mɛ e ɖi nǔ nú Jezu lɛ́ɛ sín agun e ɖo Antyɔ́ci ɔ́ mɛ ɔ́, è nɔ mɔ gbeyíɖɔ Mawu tɔn lɛ́ɛ, kpódó nǔkplɔ́nmɛtɔ́ lɛ́ɛ kpó: Baanabási, Simɛ́nyɔ́ɔ e è nɔ ylɔ́ ɖɔ Mɛwi é, Lusiwúsi Silenɛ́ɛnu ɔ́, Manayɛnu e Elódu tokpɔngán ɔ́ sín mɛ lɛ́ɛ hɛn, bɔ é kpó é kpó nɔ kpɔ́ bó su é, kpódó Sólu kpán.

²Gbe ɖokpó ka wá su bɔ yě ɖo Aklúnɔ sɛn wɛ, bó ɖo nu blá wɛ, bɔ Yɛsinsɛn ɖɔ nú yě ɖɔ: “Mi ɖe Baanabási kpódó Sólu kpán ɖó vo nú mì, nú yě ná yi wa azɔ̌ e wú un ylɔ́ yě é.”

³Ée yě blá nu bó xo ɖɛ gúdo ɔ́, yě ɖǒ alɔ Baanabási kpódó Sólu kpán jí, bó nyi yě.

⁴Ée Yɛsinsɛn sɛ́ Baanabási kpódó Sólu kpán dó mɔ̌ ɔ́, yě wá yi Selesíi, bó dó tɔjíhún ɖo fínɛ́ ɖidó to e è nɔ ylɔ́ ɖɔ Cíplu ɔ́ mɛ.

⁵Đěe yě jɛ to e è nɔ ylɔ́ ɖɔ Salamínu ɔ́ mɛ ɔ́, yě yi kplɔ́ngbasá Jwifu lɛ́ɛ tɔn, bó jɛ Mawuxó jlá jí, bɔ Jǎan-Maki ɖo yě gɔ́n, bó ná dó alɔ yě.

⁶Énɛ́ ɔ́ gúdo ɔ́, yě xo tɔtɛ́ntinto ɔ́ bǐ zlɛ́ káká yi jɛ to e è nɔ ylɔ́ ɖɔ Pafɔ́si ɔ́ mɛ; yě mɔ Jwifu majíkiblótɔ́ ɖé ɖo fínɛ́, bɔ è nɔ ylɔ́ ɛ ɖɔ Báa-Jezu, bɔ é sɔ́ éɖée dó ɖó gbeyíɖɔ Mawu tɔn.

⁷Báa-Jezu énɛ́ ka ɖo tokpɔngán e kpa acɛ nú tɔtɛ́ntinto ɔ́ gɔ́n; è nɔ ylɔ́ tokpɔngán ɔ́ ɖɔ Sɛjiwusi Polúsi, bɔ é nyí gbɛtɔ́ nǔnywɛ́tɔ́. Tokpɔngán ɔ́ ka jló ná se Mawuxó, bó zɔ́n ɖɔ è nǐ ylɔ́ Baanabási kpódó Sólu kpó wá nú émí;

⁸lo ɔ́, Elimasi e è nɔ ylɔ́ ɖɔ majíkiblótɔ́ ɔ́, (mɔ̌ wɛ è nɔ ylɔ́ ɛ ɖɔ dó Glɛ̌sigbe mɛ) ka ná tɛn tɔn yě ǎ, é ɖo biba ná ɖe ayi tokpɔngán ɔ́ tɔn sín nǔɖiɖi ɖó nú Jezu Klísu xó e ɖɔ n'i wɛ è ɖe ɔ́ wú wɛ.

⁹Énɛ́ ɔ́, Sólu e è nɔ lɛ́ ylɔ́ ɖɔ Pɔ́lu ɔ́, Yɛsinsɛn gɔ́ ayi mɛ n'i, bɔ é kpɔ́n Elimasi tlítlí,

¹⁰bó ɖɔ: “Ayi hízíhízí, ayidídánɔ wɛ nú we; awǒvi sín vǐ wɛ a nyǐ, bó nyí nǔ ɖagbe lɛ́ɛ sín kɛntɔ́; káká yi jɛ hwetɛ́nu a ka ná gɔn avaja dó tito Aklúnɔ tɔn lɛ́ɛ mɛ dó?

¹¹Din ɔ́, ɖǒtó! Aklúnɔ ná dɔn tó nú we; a nǎ va nukún, bó ná gɔn hwesivɔ́ mɔ káká yi jɛ hwe ɖé nu.” Tlóló tɛn tɔn mɛ ɔ́, Elimasi va nukún, bó jɛ avi dlá jí, lobo ɖo mɛ e ná kplá ɛ ɔ́ ba wɛ.

¹²Ée tokpɔngán ɔ́ mɔ nǔ énɛ́ e jɛ ɔ́, é ɖi nǔ nú Jezu, ɖó nǔ e è kplɔ́n ɛ dó Aklúnɔ wú ɔ́ xo ayi tɔn zlɛ́.

¹³Pɔ́lu kpódó hǎgbɛ́ tɔn lɛ́ɛ kpán ka wá dó tɔjíhún sín Pafɔ́si, bó yi jɛ Pɛɛjée ɖo Panfilíi gbé jí. Jǎan-Maki ka jó yě dó ɖo fínɛ́, bó lɛ́ kɔ yi Jeluzalɛ́mu.

¹⁴Yědɛɛ lɛ́ɛ ka zɛ Pɛɛjée wú, bó yi Antyɔ́ci ɖo Pisidíi gbé jí; yě byɔ́ kplɔ́ngbasá gbɔjɛzán gbe, bó jínjɔ́n ayǐ.

¹⁵Hwenu e yě xa sɛ́n ɔ́, bó xa gbeyíɖɔ Mawu tɔn lɛ́ɛ sín wěma gúdo ɔ́, kplɔ́ngbaságán lɛ́ɛ ɖɔ sɛ́ dó yě ɖɔ: “Nɔví mǐtɔn lɛ́ɛ mi, ényí mi ɖó xó ɖé, bó ná ɖɔ nú togun ɔ́, bó dó ná ɛ akɔ́nkpinkpan hǔn, mi ɖɔ.”

¹⁶Ée é ɖɔ mɔ̌ ɔ́, Pɔ́lu sí te, bó bló alɔ nú yě, bó ɖɔ: “Mi Izlayɛ́li ví lɛ́ɛ kpódó mi mɛ e nɔ sí Mawu lɛ́ɛ kpó e mi, mi ɖótó bó se.

¹⁷ Mawu Izlayɛ́li togun ɔ́ tɔn ɔ́ cyán tɔ́gbó mǐtɔn lɛ́ɛ ɖó vo, bó bló bɔ togun ɔ́ ɖeji hwenu e yě ɖo Ejípu é; é ka wá ɖe yě tɔ́n sín to ɔ́ mɛ, gbɔn hlɔ̌nhlɔ́n tɔn gbla mɛ,

¹⁸ lobo dɛ bó hɛn yě xɔ xwe kanɖé (40) mɔ̌, ɖo gbětótló mɛ.

¹⁹ É ka wá vívá kún nú akɔta tɛ́nwe, ɖo Kanáa yíkúngban jí, bó sɔ́ to yětɔn nú Izlayɛ́li ví lɛ́ɛ, bɔ ayǐkúngban énɛ́ húzú yětɔn.

²⁰ “Énɛ́ ɔ́ gúdo ɔ́, é sɔ́ gǎn lɛ́ɛ ɖó yě nu, nú xwe afɔwe kanɖé wǒ (450) mɔ̌ káká yi jɛ gbeyíɖɔ Mawu tɔn Samuwɛ́li hwenu.

²¹ Yě ɖésúnɔ ka wá byɔ́ axɔ́sú ɖokpó, bɔ Mawu sɔ́ Sawúlu Kícu sín vǐ ɔ́, ɖo Bɛnjamɛ́ɛ ví lɛ́ɛ mɛ, bɔ é ɖu axɔ́sú ɖo yě nu xɔ xwe kanɖé (40).

²² Énɛ́ gúdo ɔ́, Mawu wá ɖe Sawúlu sín axɔ́súzinkpo jí, bó sɔ́ Davídi ɖó tɛn tɔn mɛ. Davídi énɛ́ ɔ́ wɛ Mawu ɖe kúnnu ná ɖɔ: ‘Un mɔ ɖɔ Davídi Jɛsée ví ɔ́, mɛɖé wɛ é nyí, bɔ jijɔ tɔn nyɔ́ nukún ce mɛ, bɔ é ná bló jlǒ ce lɛ́ɛ bǐ.’

²³Vǐ tɔn lɛ́ɛ mɛ wɛ Jezu e Mawu sɔ́ Mɛhwlɛ́ngántɔ́ nú togun Izlayɛ́li tɔn ɔ́ tɔ́n sín, lě e é dó akpá tɔn nú yě gbɔn é.

²⁴ Cóbónú Jezu ná wá ɔ́, Jǎan ko ɖɔ nú Izlayɛ́li togun ɔ́ bǐ ɖɔ yě ní lɛ́ kɔ sín hwɛ yětɔn lɛ́ɛ gúdo, bó lɛ yɛhwesin.

²⁵ Hwenu e Jǎan ka wá ɖo azɔ̌ tɔn ná wa fó wɛ ɔ́, é nɔ ɖɔ jí: ‘Mɛ̌ un ka nyí bɔ mi vɛdó? Nyɛ wɛ nyí mɛ e nɔ te kpɔ́n wɛ mi ɖe ɔ́ ǎ; lo ɔ́, mɛ énɛ́ kpo ɖo gǔdo jǎwe, bɔ un nyí mɛɖé bó sixú ɖe afɔkpa sín afɔ n'i vɔ́vɔ́ ǎ.’

²⁶“Nɔví ce lɛ́ɛ mi, mi mɛ e jɔ ɖo Ablaxámu kúnkan mɛ lɛ́ɛ, kpódó mi mɛ e nɔ sí Mawu lɛ́ɛ kpán e mi; mi wɛ Mawu dó Wɛn Ɖagbe élɔ́ e nɔ hwlɛ́n mɛ gán ɔ́ sɛ́ dó.

²⁷Đó Jeluzalɛ́munu lɛ́ɛ kpódó gǎn yětɔn lɛ́ɛ kpó tunwun mɛ e Jezu nyí ɔ́ ǎ; yě ka mɔ nukúnnú jɛ gbeyíɖɔ Mawu tɔn lɛ́ɛ sín nǔ e è nɔ xa nú yě gbɔjɛzán gbe tɛgbɛ ɔ́ wú ǎ; lo ɔ́, kúhwɛ e yě ɖǒ nú Jezu ɔ́, nǔ e è nɔ xa nú yě ɔ́ wɛ jɛ.

²⁸ Yě mɔ nǔɖé wú ná ɖó dó, bó dó ɖó kúhwɛ n'i ǎ, có yě ka byɔ́ Pilátu ɖɔ ní ná gbe nú è hu i.

²⁹ Ée yě wa nǔ e Mawuxó ɔ́ ɖɔ dó wútu tɔn lɛ́ɛ bǐ xá ɛ vɔ ɔ́, yě wá ɖe cyɔ tɔn sín aklúzu jí, bó sɔ́ ɛ yi ɖi.

³⁰Lo ɔ́, Mawu ka fɔ́n ɛ sín kú,

³¹bɔ é wá ɖe éɖée xlɛ́ mɛ e xwedó e sín Galilée wá Jeluzalɛ́mu lɛ́ɛ xɔ azǎn mɔ̌kpán. Mɛ énɛ́ lɛ́ɛ wɛ wá ɖo kúnnu ɖe n'i wɛ din ɖo Izlayɛ́li togun ɔ́ mɛ,

³²bɔ mǐdɛɛ lɛ́ɛ ɔ́, mǐ wá ɖo Wɛn Ɖagbe ɔ́ dó mi wɛ ɖɔ jí: akpá e Mawu ko dó nú tɔ́gbó mǐtɔn lɛ́ɛ ɔ́,

³³ é ɖe akpá énɛ́ ɔ́ nú mǐ vǐ yětɔn lɛ́ɛ hwenu e é fɔ́n Jezu sín kú lě e è ko wlán gbɔn ɖo Ɖɛhanwéma ɔ́ mɛ, ɖo ta tɔn wegɔ́ ɔ́ mɛ gbɔn ɔ́ ɖɔ jí: ‘Hwi wɛ nyí Vǐ ce; bɛ́ sín égbé ɔ́, un nyí Tɔ́ towe.’

³⁴ Mawu ko ɖɔ ɖ'ayǐ ɖɔ émí ná fɔ́n ɛ sín kú, bónú é ma nyɔ ó. Nǔ énɛ́ ɔ́ ɖɔ gbɔn xó élɔ́ mɛ wɛ é ɖe, bó ɖɔ: ‘Un ná ná mi nyɔ̌ná mímɛ́; nyɔ̌ná gǎnjɛwú e sín akpá un dó nú Davídi é.’

³⁵ Énɛ́ wú wɛ é lɛ́ ɖɔ ɖo akpá ɖěvo xwé ɖɔ jí: ‘A nǎ lɔn nú mɛ mímɛ́ towe ná nyɔ ǎ.’

³⁶Đó hwenu e Davídi nɔ gbɛ, bó bló jlǒ Mawu tɔn gúdo ɔ́, é wá kú, bɔ è ɖi i dó tɔ́gbó tɔn lɛ́ɛ kpá, bɔ cyɔ tɔn nyɔ ɖo yɔdo mɛ.

³⁷Lo ɔ́, mɛ e Mawu fɔ́n sín kú ɔ́, cyɔ éyɛ́ tɔn nyɔ ɖě ǎ.

³⁸Nɔví ce lɛ́ɛ mi, hǔn mi ɖó ná tunwun ɖɔ Jezu jí wɛ è jlǎ Wɛn Ɖagbe hwɛsɔ́kɛmɛ tɔn ɔ́ mi gbɔn.

³⁹Đó mɛ ɖěbǔ ɖi nǔ ɔ́, mɛ ɔ́ nɔ́ gosín hwɛ lɛ́ɛ bǐ sín acɛ mɛ gbɔn jǐ tɔn; hwɛ sín acɛ mɛ e Mɔyízi sɛ́n ɔ́ ma sixú ɖe mi sín ǎ é;

⁴⁰nú nǔ e gbeyíɖɔ Mawu tɔn lɛ́ɛ ko ɖɔ ɔ́ má wá jɛ dó mi jí ó; é wɛ nyí ɖɔ:

⁴¹‘Mi kpɔ́n, mi wǎngbɛ́númɛtɔ́ lɛ́ɛ; ado ní hu mi, mi ní dɔn; ɖó hwe mitɔn nu ɔ́, un ná dó nǔɖé sin, bónú ɖɔ wɛ è wá ɖɔ nú mi ɔ́, mi ná ɖi ǎ.’ ”

⁴²Ée Pɔ́lu kpódó Baanabási kpán tɔ́n sín kplɔ́ngbasá ɔ́, mɛ lɛ́ɛ sa vo nú yě ɖɔ gbɔjɛzán gbe ée ná bɔ d'é wú ɔ́, yě ní wá ɖɔ xó dó nǔ ɖokpó ɔ́ wú.

⁴³Ée yě bló kplé ɔ́ fó ɔ́, Jwifu gěgé, kpódó yě mɛ e byɔ́ Jwifu lɛ́ɛ sín sinsɛn mɛ lɛ́ɛ gěgé kpán xwedó Pɔ́lu kpódó Baanabási kpó. Pɔ́lu kpódó Baanabási kpó ɖɔ xó nǔ yě, bó ná akɔ́nkpinkpan yě ɖɔ yě ní lí dǒ ɖo nyɔ̌ná Mawu tɔn mɛ.

⁴⁴Gbɔjɛzán gbe e jɛ fínɛ́ ɔ́, toxo ɔ́ mɛ nu lɛ́ɛ bǐ ɖibla kplé bó ná se Mawuxó.

⁴⁵Ée Jwifu lɛ́ɛ mɔ lě e mɛ lɛ́ɛ sukpɔ́ sɔ ɔ́, wǔhwinhwan gɔ́ ayi yětɔn mɛ, bɔ yě nɔ́ mɔ xó vo ɖɔ dó Pɔ́lu sín xó wú, bó nɔ zun i.

⁴⁶Pɔ́lu kpódó Baanabási kpó ka ɖɔ xó kpódó jiɖiɖe kpó ɖɔ: “Midɛɛ lɛ́ɛ wɛ è ɖǒ ná ɖɔ Mawuxó ná hwɛ̌; ée mi ka gbɛ́, bó mɔ ɖɔ émí kún jɛ xá gbɛ mavɔ mavɔ ɔ́ ó ɔ́, din ɔ́, mǐ ná gbɔ bó yi mɛ e má nyí Jwifu ǎ lɛ́ɛ gɔ́n.

⁴⁷Đó lě e Aklúnɔ zɔ́n mǐ gbɔn é ɖíe: ‘Un sɔ́ we nú a nǎ nyí wěziza nú akɔta ɖě lɛ́ɛ, nú a nǎ jlá Wɛn Ɖagbe hwlɛngán tɔn ɔ́ káká yi fí e gbɛ ɔ́ kponu ɖó é.’ ”

⁴⁸Ée mɛ e ma nyí Jwifu ǎ lɛ́ɛ se mɔ̌ ɔ́, xomɛ hun yě, bɔ yě jɛ susu kpa nú Aklúnɔxó ɔ́ jí; mɛ e è ko sɔ́ ɖ'ayǐ nú gbɛ mavɔ mavɔ lɛ́ɛ bǐ ɖi nǔ nú Jezu.

⁴⁹Aklúnɔxó ɔ́ nɔ ɖo gbigba kpé wɛ gbɔn gbě ɔ́ bǐ jǐ.

⁵⁰Lo ɔ́, Jwifu lɛ́ɛ kplɔ́n nǔ nyɔ̌nu nukúnɖéjí e nɔ ɖó sísí nú Mawu lɛ́ɛ kpódó mɛjɔmɛ to ɔ́ tɔn lɛ́ɛ kpó, bɔ yě fɔ́n gǔ dó Pɔ́lu kpódó Baanabási kpó jí, bó nya yě sín to yětɔn mɛ.

⁵¹ Pɔ́lu kpódó Baanabási kpó ka xúxú afɔkɔ́ yětɔn kɔn nyi ayǐ nú yě[2], bó yi to e è nɔ ylɔ́ ɖɔ Ikoniyɔ́mu é mɛ.

⁵²Awǎjijɛ kpódó Yɛsinsɛn kpó ká gɔ́ ayi mɛ nú ahwanvú Jezu tɔn lɛ́ɛ ɖo Antyɔ́ci.