Read fon Mɛsɛ́dó 14 Bible Online

Mɛsɛ́dó 14 - fon bible

Mɛsɛ́dó 14

¹Ée Pɔ́lu kpódó Baanabási kpó jɛ to e è nɔ ylɔ́ ɖɔ Ikoniyɔ́mu ɔ́ mɛ ɔ́, yě yi kplɔ́ngbasá Jwifu lɛ́ɛ tɔn, bó ɖɔ xó nú yě, káká bɔ Jwifu lɛ́ɛ gěgé kpódó Glɛ̌sinu gěgé kpán ɖi nǔ nú Jezu.

²Lo ɔ́, Jwifu e gbɛ́ nǔ ɖi lɛ́ɛ fɔ́n hun dó jǐ nú mɛ e ma nyí Jwifu ǎ lɛ́ɛ, bó zɔ́n bɔ yě jɛ nǔ nyanya lin dó nɔví ɖo Klísu mɛ lɛ́ɛ wú jí.

³Pɔ́lu kpódó Baanabási kpán nɔ fínɛ́ ɖésú. Yě nɔ ɖɔ xó kpódó jiɖiɖe kpó. Aklúnɔ ká ná acɛ yě, bɔ yě nɔ́ ɖo nǔ tɛnmɛ tɛnmɛ jlɛ́ wɛ, bó nɔ́ ɖo nǔdábaɖa lɛ́ɛ jlɛ́ wɛ, bó ná dó ɖe xlɛ́ ɖɔ nǔ e ɖɔ wɛ yě ɖe dó nyɔ̌ná Mawu tɔn wú ɔ́ nǔgbó wɛ é nyí.

⁴Énɛ́ ɔ́, to ɔ́ mɛ nu lɛ́ɛ sɔ́ ɖó gbe kpɔ́ ǎ; mɛ hǎbǔ ɖo Jwifu lɛ́ɛ jí, bɔ hǎbǔ ká ɖo mɛsɛ́dó lɛ́ɛ jí.

⁵Mɛ e ma nyí Jwifu ǎ lɛ́ɛ kpódó Jwifu lɛ́ɛ kpán sɔgbe dó gǎn yětɔn lɛ́ɛ wú, bó ɖo nǔ sɔ́ wɛ, bó ná dó ya nú mɛsɛ́dó lɛ́ɛ, lobo ná hu yě ɖó awǐnnyaglo wú.

⁶Ée Pɔ́lu kpódó Baanabási kpó se mɔ̌ ɔ́, yě hɔn yi Lisitli kpó Dɛɛbe kpó, ɖo Likawoníi gbé jí kpódó to e yá fínɛ́ lɛ́ɛ kpán mɛ,

⁷bó jɛ Wɛn Ɖagbe ɔ́ jlá jí gbɔn fí énɛ́ lɛ́ɛ lɔmɔ̌.

⁸Nya ɖé ɖo to e è nɔ ylɔ́ ɖɔ Lisitli ɔ́ mɛ, bó nɔ́ ɖo ayǐjínjɔ́n, ɖó afɔ tɔn lɛ́ɛ kú; sín hwenu e è ji nya énɛ́ ɔ́ ɖokpóó wɛ afɔ tɔn lɛ́ɛ ko kú, bɔ é ɖi zɔnlin kpɔ́n gbeɖé ǎ.

⁹É ɖo xó e ɖɔ wɛ Pɔ́lu ɖe ɔ́ ɖótó wɛ. Pɔ́lu sín nukún wá yi jɛ jǐ tɔn, bɔ é kpɔ́n ɛ tlítlí, bó mɔ ɖɔ nya énɛ́ ɖó nǔɖiɖi e ná zɔ́n bɔ azɔn tɔn ná gbɔ é.

¹⁰Énɛ́ ɔ́, Pɔ́lu zé gbe yi jǐ, bó ɖɔ n'i ɖɔ: “Sí te bó jlɔ́ ɖo afɔ towe lɛ́ɛ jí.” Bɔ nya ɔ́ lɔ́n sí te, bó jɛ zɔnlin ɖi jí.

¹¹Ée mɛ e ɖo fínɛ́ lɛ́ɛ mɔ nǔ énɛ́ e Pɔ́lu jlɛ́ ɔ́, yě sú xó, bó ɖɔ dó Likawoníi gbe mɛ ɖɔ: “Nǔmɛsɛn lɛ́ɛ ɖíe húzú gbɛtɔ́ bó jɛ te wá mǐ mɛ e.”

¹²Yě ylɔ́ Baanabási ɖɔ Zewúsi, bó ylɔ́ Pɔ́lu ɖɔ Ɛɛmɛsi; ɖó Pɔ́lu wɛ nyí ɖɛ̌mɛnu ɔ́[3].

¹³Vodún Zewúsi e xɔ tɔn ɖo toxo ɔ́ nukɔn ɔ́ sín vodúnnɔ ka sɔ́ folówa bó dó ba acɔ́ nú nyibúsú ɖé lɛ́ɛ, bó dɔn yě wá hɔn lɛ́ɛ nu. É kpódó togun ɔ́ bǐ kpán ɖo nǔ sɔ́ wɛ, bó jló ná xwíyɔ Baanabási kpódó Pɔ́lu kpán.

¹⁴Ée mɛsɛ́dó Baanabási kpódó Pɔ́lu kpán se mɔ̌ ɔ́, yě tlɛ́n awu dó kɔ nú yěɖée, bó dó wezun byɔ́ ahwan ɔ́ mɛ, bó ɖɔ:

¹⁵ “Mɛ ce lɛ́ɛ mi, étɛ́wú mi ka ɖo mɔ̌ wa wɛ? Gbɛtɔ́ mi ɖɔhun jɛ́n mǐ lɔmɔ̌ nyí, bó hɛn Wɛn Ɖagbe ɔ́ wá nú mi, bó dó ɖo ɖiɖɔ nú mi wɛ ɖɔ mi ní lɛ́ kɔ sín nǔ ma ɖi nǔ lɛ́ɛ gúdo, bó jɛ Mawu gbɛɖe ɔ́ gúdo; é wɛ bló jǐnukúnsin kpódó ayǐkúngban kpán, bó bló xu, kpódó nǔ e ɖo yě mɛ lɛ́ɛ bǐ kpán.

¹⁶Xóxó hwenu ɔ́, Mawu jó akɔta lɛ́ɛ bǐ dó, bɔ mɛ ɖokpó ɖokpó nɔ sɔ́ ali e jló e é.

¹⁷Lo ɔ́, é gɔn kúnnu ɖe nú éɖée gbɔn ɖagbe e é nɔ wa lɛ́ɛ gbla mɛ ǎ. É nɔ sɛ́ jǐ dó mi, bó nɔ́ ná jinukún mi dó hwe tɔn nu. É nɔ ná nǔɖuɖu mi túnflá; é nɔ ná xomɛhunhun mi.”

¹⁸Baanabási kpódó Pɔ́lu kpó ɖɔ mɔ̌ có, é fá cóbónú mɛ lɛ́ɛ wá yí gbe nú xó e yě ɖɔ ɔ́, bó jó vɔ̌ e sá nú yě gbé wɛ yě ja ɔ́ dó ǎ.

¹⁹Jwifu ɖé lɛ́ɛ ka gosín Antyɔ́ci e ɖo Pisidíi yíkúngban jí é kpódó Ikoniyɔ́mu kpán wá xwetɔ́n, bó kplɔ́n nǔ mɛ lɛ́ɛ, bɔ yě nyi awǐnnyaglo dó Pɔ́lu káká bɔ é jɛ ayǐ, bɔ yě vɛdó ɖɔ é kú wɛ sín, bó dɔn ɛ yi to ɔ́ gúdo.

²⁰Lo ɔ́, ée ahwanvú lɛ́ɛ lɛ́ lɛ̌ dó e ɔ́, é sí te bo lɛ́ byɔ́ toxo ɔ́ mɛ. Ayǐhɔ́ngbe tɔn ɔ́, é kpódó Baanabási kpán ɖidó to e è nɔ ylɔ́ ɖɔ Dɛɛbe ɔ́ mɛ.

²¹Baanabási kpódó Pɔ́lu kpó jlá Wɛn Ɖagbe ɔ́ ɖo Dɛɛbe, bɔ mɛ gěgé ɖi nǔ nú Jezu. Énɛ́ ɔ́ gúdo ɔ́, yě lɛ́ kɔ yi Lisitli, Ikoniyɔ́mu kpódó Antyɔ́ci Pisidíi tɔn kpán.

²²Yě nɔ dó wǔsyɛ́n lanmɛ nú ahwanvú Jezu tɔn lɛ́ɛ, bó nɔ́ ná akɔ́nkpinkpan yě, nú yě ná lí dǒ ɖo nǔɖiɖi mɛ, bó nɔ́ ɖɔ nú yě ɖɔ: “Ya gěgé wɛ mǐ ɖó nǎ ji, bó ná dó byɔ́ axɔ́súɖuɖu Mawu tɔn mɛ.”

²³Pɔ́lu kpó Baanabási kpó sɔ́ agunnukɔntɔ́ ɖó yě nu, gbɔn agun ɖokpó ɖokpó mɛ. Yě blá nu, bó xo ɖɛ lobo sɔ́ yě dó alɔ mɛ nú Aklúnɔ e yě ɖi nǔ na é.

²⁴Mɛsɛ́dó énɛ́ lɛ́ɛ ka gbɔn Pisidíi wá Panfilíi.

²⁵Yě wá ɖɔ Mawuxó ɖo Pɛɛjée; énɛ́ ɔ́ gúdo ɔ́, yě wǎ Atalya.

²⁶Yě dó tɔjíhún ɖo fínɛ́, bó yi Antyɔ́ci; fínɛ́ wɛ è ko sɔ́ yě dó alɔ mɛ nú wǔjɔmɛ Mawu tɔn ɖe, nú azɔ̌ e yě wa din é.

²⁷Ée yě wá Antyɔ́ci ɔ́, yě kplé agun Klísu tɔn e ɖo fínɛ́ lɛ́ɛ, bó ɖɔ nǔ e Mawu wa gbɔn yě jí ɔ́ bǐ nú yě, bó ka lɛ́ ɖɔ lě e Mawu hun ali nú mɛ e ma nyí Jwifu ǎ lɛ́ɛ gbɔn, bónú yě lɔ na sixú ɖi nǔ nú Jezu é nú yě.

²⁸Yě nɔ fínɛ́ xá mɛ e ɖi nǔ nú Jezu lɛ́ɛ xɔ azǎn gěgé.