Read fon Mɛsɛ́dó 15 Bible Online

Mɛsɛ́dó 15 - fon bible

Mɛsɛ́dó 15

¹ Mɛ ɖé lɛ́ɛ gosín Judée gbé jí, bó wá Antyɔ́ci, bó nɔ ɖo nǔ kplɔ́n nɔví ɖo Klísu mɛ lɛ́ɛ wɛ ɖɔ: “Ényí è ma gbo ada nú mi lě e Mɔyízi sɛ́n ɔ́ zɔ́n gbɔn é ǎ ɔ́, Mawu ná hwlɛ́n mi gán ǎ.”

²Pɔ́lu kpódó Baanabási kpó ka gbɛ́ xó yětɔn, bó dɔn nǔ xá yě ɖ'é kɔn tlala. Énɛ́ ɔ́, nɔví ɖo Klísu mɛ lɛ́ɛ wá ɖe gbeta tɔ́n, ɖɔ Pɔ́lu kpódó Baanabási kpó, kpódó nɔví ɖo Klísu mɛ ɖě lɛ́ɛ kpó ná yi Jeluzalɛ́mu bó ná ɖɔ xó énɛ́ gbo xá mɛsɛ́dó lɛ́ɛ kpódó agunnukɔntɔ́ lɛ́ɛ kpán.

³Nǔɖitɔ́ lɛ́ɛ nyi yě, bɔ yě wlǐ ali, bó gbɔn Fenisíi kpódó Samalíi kpán gbé jí bó nɔ́ ɖo lě e mɛ e ma nyí Jwifu ǎ lɛ́ɛ jɛ Mawu li jí gbɔn é jlá wɛ, bɔ é nɔ nyí xomɛhunhun ɖaxó nú nɔví ɖo Klísu mɛ lɛ́ɛ.

⁴Hwenu e yě wá Jeluzalɛ́mu ɔ́, agun nǔɖitɔ́ lɛ́ɛ tɔn, kpódó mɛsɛ́dó e ɖo fínɛ́ lɛ́ɛ kpó, kpódó agunnukɔntɔ́ lɛ́ɛ kpó yí yě, bɔ yě wá gbɔn yě jí, bó wlí nǔ e Mawu wa é bǐ ɖɔ nú yě;

⁵lo ɔ́, mɛɖé lɛ́ɛ sí te ɖo Falizyɛn e ɖi nǔ nú Jezu lɛ́ɛ mɛ, bó ɖɔ è ɖǒ ná gbo ada nú yě mɛ e ma nyí Jwifu ǎ, bó ka ɖi nǔ nú Jezu lɛ́ɛ, bó ná ɖɔ nú yě ɖɔ yě ɖǒ ná nyi Mɔyízisɛ́n ɔ́ dandan.

⁶Mɛsɛ́dó lɛ́ɛ kpódó agunnukɔntɔ́ lɛ́ɛ kpán kplé, bó ná gbéjé xó énɛ́ kpɔ́n.

⁷ Ée yě dɔn nǔ ɖ'é kɔn káká ɔ́, Piyɛ́ɛ sí te bó ɖɔ: “Nɔví ce lɛ́ɛ mi, mi nywɛ́ ɖɔ é kó lín din, bɔ Mawu ɖe mì ɖó vo ɖo mi mɛ, nú ma jlá Wɛn Ɖagbe ɔ́ mɛ e ma nyí Jwifu ǎ lɛ́ɛ, nú yě ná se, lobo ɖi nǔ.

⁸ Mawu e nɔ mɔ nǔ jɛ mɛ xomɛ ɔ́ ná yě Yɛsinsɛn lě e é ná mǐ gbɔn é, bó dó ɖe xlɛ́ ɖɔ émí yí yě.

⁹Mawu ɖe mɛɖé ɖó vo ɖo yě kpó mǐ mɛ e nyí Jwifu lɛ́ɛ kpó mɛ ǎ; é lɛ ayixa yětɔn wé ɖó yě ɖi nǔ.

¹⁰Hǔn din ɔ́, aniwú mi ka nɔ ɖíɖá agban e tɔ́gbó mitɔn lɛ́ɛ kpódó mi ɖésúnɔ kpó ma kpé wú bó hɛn ǎ ɔ́ ahwanvú lɛ́ɛ, bó dó ɖo do ba nú Mawu wɛ?

¹¹Lo ɔ́, mǐ ɖi nǔ ɖɔ Mawu hwlɛ́n mǐ gán gbɔn xomɛ e Aklúnɔ Jezu nyɔ́ dó mǐ wú é gbla mɛ, lě e é hwlɛ́n yě lɔmɔ̌ gán gbɔn é.”

¹²Énɛ́ ɔ́, agun ɔ́ bǐ nɔ abwɛ̌ tóó, bó ɖótó Baanabási kpódó Pɔ́lu kpán, bɔ yě wlǐ nǔ e Mawu jlɛ́ ɔ́, kpódó nǔdábaɖa e é ɖe xlɛ́ gbɔn yě jí, ɖo mɛ e ma nyí Jwifu ǎ lɛ́ɛ tɛ́ntin é bǐ ɖɔ.

¹³Ée Pɔ́lu kpódó Baanabási kpó ɖɔ xó vɔ ɔ́, Jaki yí xó, bó ɖɔ: “Nɔví ce lɛ́ɛ e mi, mi ɖótó mì.

¹⁴Sinmɔ́ɔ ɖɔ lě e Mawu kpé nukún dó mɛ e ma nyí Jwifu ǎ lɛ́ɛ wú gbɔn, bó sɔ́ togun ɖokpó ɖo yě mɛ, bɔ é nyí étɔn sín do é;

¹⁵nǔ énɛ́ sɔgbe xá xó élɔ́ e gbeyíɖɔ Mawu tɔn lɛ́ɛ kó wlán é; é wɛ nyí ɖɔ:

¹⁶ Aklúnɔ ɖɔ: ‘Énɛ́ ɔ́ gúdo ɔ́, un ná lɛ́ kɔ wá, bó ná vɔ́ xwédo Davídi tɔn e ko mu ɔ́ fɔ́n sí te; un ná vɔ́ dǒglin tɔn lɛ́ɛ mɛ, bó ná lɛ́ fɔ́n xwé ɔ́ sí te,

¹⁷nú mɛ e kpo lɛ́ɛ bǐ ná ba Aklúnɔ; mɔ̌ ɖokpó ɔ́, mɛ e ma nyí Jwifu ǎ, bɔ un ylɔ́ nú yě ná nyí ce lɛ́ɛ bǐ ná ba Aklúnɔ.’

¹⁸Nǔ e Aklúnɔ e ko sɔ́ nǔ énɛ́ lɛ́ɛ xlɛ́ sín xóxó hwenu ɔ́ ɖɔ é nɛ́.”

¹⁹Jaki lɛ́ ɖɔ: “Nǔ é wútu nyɛ mɔ ɖɔ é kún nyɔ́ nú è nǎ dó tagba nú yě mɛ e ma nyí Jwifu ǎ, bó ka wá Mawu gɔ́n lɛ́ɛ ó é nɛ́.

²⁰ Amɔ̌, nǔ e mǐ ná wlán sɛ́ dó yě kpowun ɔ́ wɛ nyí ɖɔ: yě ní má ɖu kanlin e è xwlé vodún lɛ́ɛ ɖě sín lan ó; yě ní ma ɖó xó xá nɔ yětɔn ó, yě ní má ɖó xó xá tɔ́ yětɔn sín asi ó; yě ní má ɖó xó xá vǐ yětɔn abǐ nɔví yětɔn ó; yě má ɖu kanlin e è glɔ̌n agbɔ̌n ná bó hu lɛ́ɛ ɖě sín lan ó, yě ma ka ɖu hun ó.

²¹Đó, xóxó hwenu ɖokpóó wɛ mɛ lɛ́ɛ nɔ ɖo Mɔyízisɛ́n ɔ́ jlá wɛ gbɔn to ɖokpó ɖokpó mɛ, bɔ è nɔ xa ɖo kplɔ́ngbasá Jwifu lɛ́ɛ tɔn, ɖo gbɔjɛzán gbe lɛ́ɛ bǐ.”

²²Énɛ́ gúdo ɔ́, mɛsɛ́dó lɛ́ɛ kpódó agunnukɔntɔ́ lɛ́ɛ kpán, kpódó agun nǔɖitɔ́ lɛ́ɛ tɔn ɔ́ bǐ sésé kpán ɖó gbe kpɔ́, bó ɖe mɛɖé lɛ́ɛ ɖo yěɖée mɛ, bó sɛ́ yě dó Antyɔ́ci, yě kpó Pɔ́lu kpó, kpó Baanabási kpó; mɛ énɛ́ lɛ́ɛ wɛ nyí Judási e è sun nyǐ ɖɔ Baasabási é kpódó Silási kpán; gbɛtɔ́ nukúnɖéjí wɛ yě nyǐ, ɖo nɔví ɖo Klísu mɛ lɛ́ɛ mɛ.

²³Yě bló wěma ɖokpó dó así nú yě, bó ɖɔ dó wéma ɔ́ mɛ ɖɔ: “Mǐ nɔví mitɔn mɛsɛ́dó lɛ́ɛ, kpódó agunnukɔntɔ́ lɛ́ɛ kpán dó gbe sɛ́ dó mi mɛ e má nyí Jwifu ǎ, bó ka nyí nɔví mǐtɔn ɖo Klísu mɛ, bó ɖo Antyɔ́ci, bó ɖo tokpɔn Silíi tɔn kpódó Silisíi tɔn kpó mɛ lɛ́ɛ.

²⁴Mǐ se ɖɔ mɛɖé lɛ́ɛ gosín mǐ gɔ̌n, bó wá dɔn hunnyahunnya byɔ́ mi mɛ, gbɔn xó e yě ɖɔ nú mi lɛ́ɛ gbla mɛ, lobo gba ayi dó nú mi; mǐ ká zɔ́n nǔɖé yě ǎ.

²⁵Énɛ́ ɔ́ wú wɛ mǐ bǐ ɖó gbe kpɔ́, bó ɖe mɛɖé lɛ́ɛ ɖo mǐ mɛ, bó sɛ́ yě dó mi; yě xwedó nɔví mǐtɔn vívɛ́ná Baanabási kpódó Pɔ́lu kpán.

²⁶Adǎn gěgé kó gbo Baanabási kpódó Pɔ́lu kpó, bɔ yě ko ɖibla kú dó Aklúnɔ mǐtɔn Jezu Klísu sín nyǐkɔ tamɛ.

²⁷Mǐ sɛ́ Judási kpódó Silási kpán dó, nú yě ɖésúnɔ ná wá ɖɔ nǔ e mǐ wlán sɛ́ dó mi din ɔ́ nú mi.

²⁸Yɛsinsɛn kpódó mǐ kpó mɔ ɖɔ mǐ kún sɔ́ ná zɔ́n azɔ̌ ɖěvo mi zɛ ée ɖo tají bɔ mi ɖó ná wa é wú ó; é wɛ nyí ɖɔ:

²⁹mi ma ɖu nǔ e è xwlé vodún é ɖě ó; mi ma ɖu hun ó; mi ma ɖu kanlin e è glɔ̌n agbɔ̌n ná bó hu lɛ́ɛ ɖě sín lan ó; mi ma ka lɛ aga ó; ényí mi bló gbɔn mɔ̌ ɔ́, é ná nyɔ́. É su gbeɖé.”

³⁰È jǒ yě dó, bɔ yě ɖidó Antyɔ́ci. Ée yě jɛ dɔ̌n ɔ́, yě kplé nɔví ɖo Klísu mɛ e ɖo fínɛ́ lɛ́ɛ bǐ, bó sɔ́ wěma ɔ́ jó nú yě.

³¹Ée yě xa wěma ɔ́, xomɛ hun yě, ɖó xó e ɖo wěma ɔ́ mɛ lɛ́ɛ ná akɔ́nkpinkpan yě.

³²Judási kpódó Silási kpán ɔ́, gbeyíɖɔ Mawu tɔn wɛ yě lɔmɔ̌ nyǐ; yě ɖɔ xó gěgé nú nɔví ɖo Klísu mɛ lɛ́ɛ, bó dó ná akɔ́nkpinkpan kpódó lanmɛsyɛ́nsyɛ́n kpán yě.

³³Yě nɔ fínɛ́ nú azǎn yɔywɛ ɖé, bɔ nɔví ɖo Klísu mɛ lɛ́ɛ nyi yě sɛ́ dó mɛ e sɛ́ yě dó lɛ́ɛ gɔ́n, bó ɖɔ yě na yi ɖagbe. [

³⁴Lo ɔ́, Silási ɖɔ émí ná cí fínɛ́.]

³⁵Pɔ́lu kpódó Baanabási kpó ka cí Antyɔ́ci, bɔ yě kpódó mɛ gěgé ɖěvo lɛ́ɛ kpán nɔ ɖo nǔ kplɔ́n mɛ lɛ́ɛ wɛ, bó nɔ́ ɖo Wɛn Ɖagbe Aklúnɔ tɔn jlá wɛ.

³⁶Ée azǎn ɖé jɛ ɔ́, Pɔ́lu wá ɖɔ nú Baanabási ɖɔ: “Mǐ ná lɛ́ kɔ yi kpɔ́n nɔví mǐtɔn lɛ́ɛ ɖo to e mɛ mǐ jlá Aklúnɔxó ɔ́ gbɔn lɛ́ɛ bǐ, bó ná kpɔ́n lě e yě ɖe gbɔn é.”

³⁷Baanabási ka jló ná kplá Jǎan e è sun nyǐ ɖɔ Maki ɔ́;

³⁸ Pɔ́lu ka mɔ ɖɔ è kún ná kplá ɛ ó, ɖó é ko jó yě dó ɖo Panfilíi ɖokpóó, bó sɔ́ nɔ́ xwedó yě yi azɔ̌ wa gbé ǎ.

³⁹Nǔ dindɔn ɔ́ syɛ́n káká, bɔ Pɔ́lu kpódó Baanabási kpó klán. Baanabási ka kplá Maki, bɔ yě dó tɔjíhún, bó ɖidó tɔtɛ́ntinto e è nɔ ylɔ́ ɖɔ Cíplu ɔ́ gbé jí.

⁴⁰Pɔ́lu kplá Silási bo ɖidó, bɔ nɔví ɖo Klísu mɛ lɛ́ɛ sɔ́ Pɔ́lu dó alɔ mɛ nú wǔjɔmɛ Aklúnɔ tɔn.

⁴¹É gbɔn Silíi gbé jí, bó gbɔn Silisíi gbé jí, bó dó wǔsyɛ́n lanmɛ nú agun Klísu tɔn lɛ́ɛ.