Read fon Mɛsɛ́dó 16 Bible Online

Mɛsɛ́dó 16 - fon bible

Mɛsɛ́dó 16

¹Pɔ́lu ka wá Dɛɛbe, bó gosín fínɛ́ wá Lisitli. Ahwanvú Jezu tɔn ɖé ka ɖo fínɛ́, bɔ è nɔ ylɔ́ ɛ ɖɔ Timɔtée; nyɔ̌nu Jwifu e ɖi nǔ nú Jezu é ɖě sín vǐ wɛ, bɔ tɔ́ tɔn ka nyí Glɛ̌sinu.

²Nɔví ɖo Klísu mɛ e ɖo Lisitli kpódó Ikoniyɔ́mu kpán lɛ́ɛ ka nɔ ɖe kúnnu ɖagbe nú Timɔtée;

³bɔ Pɔ́lu jló ɖɔ é ní xwedó émí, lobo kplá ɛ; é gbo ada n'i, ɖó Jwifu e ɖo gbě énɛ́ lɛ́ɛ jí lɛ́ɛ wú; ɖó mɛ bǐ tunwun ɖɔ Timɔtée sín tɔ́ ɔ́, Glɛ̌sinu wɛ.

⁴Đo to e Pɔ́lu kpódó Timɔtée kpán nɔ gbɔn lɛ́ɛ mɛ ɔ́, yě nɔ́ ɖɔ gbeta e mɛsɛ́dó lɛ́ɛ kpódó agunnukɔntɔ́ Jeluzalɛ́mu tɔn lɛ́ɛ kpán ɖe tɔ́n ɔ́ nú mɛ lɛ́ɛ, bó nɔ́ byɔ́ yě ɖɔ yě ní se tónú nú gbeta énɛ́ lɛ́ɛ.

⁵Bɔ agun nǔɖitɔ́ lɛ́ɛ tɔn lɛ́ɛ nɔ ɖo dǒ lí wɛ ɖo nǔɖiɖi mɛ, bó nɔ́ ɖo jijɛ jí wɛ ayǐhɔ́ngbe ayǐhɔ́ngbe.

⁶Yɛsinsɛn ka lɔn nú Pɔ́lu kpódó Silási kpó ní jlá Mawuxó ɖo Azíi gbé jí ǎ, énɛ́ ɔ́, yě dín gbɔn Flijíi gbé jí, bó dín gbɔn Galati gbé jí.

⁷Yě sɛ yá Mizíi gbé jí, bó tɛ́nkpɔ́n ná yi tokpɔn e è nɔ ylɔ́ ɖɔ Bitiníi é mɛ; lo ɔ́, Yɛ Jezu tɔn lɔn nú yě ǎ,

⁸bɔ yě dín gbɔn Mizíi, bó yi to e è nɔ ylɔ́ ɖɔ Tlowasi é mɛ.

⁹Zǎn mɛ ɔ́, Mawu ɖe nǔɖé xlɛ́ Pɔ́lu: é mɔ Masedwaninu ɖokpó ɖo te, bó ɖo vo sa n'i wɛ ɖɔ: “Kɛnklɛ́n wǎ Masedwani, bó wá dó alɔ mǐ.”

¹⁰Ée Pɔ́lu mɔ nǔ énɛ́ ɔ́ gúdo ɔ́, mǐ sɔ́ nǔ, azɔn ɖokpó, bó ná yi Masedwani, ɖó mǐ mɔ gaan ɖɔ Mawu wɛ ylɔ́ mǐ, nú mǐ ná yi jlá Wɛn Ɖagbe ɔ́ to énɛ́ ɔ́ mɛ nu lɛ́ɛ.

¹¹Mǐ dǒ tɔjíhún ɖo Tlowasi, bó zɔn mɔ̌ tlɔlɔ yi tɔtɛ́ntinto e è nɔ ylɔ́ ɖɔ Samɔtlási ɔ́ mɛ, bɔ ayǐhɔ́ngbe tɔn ɔ́, mǐ yi Nɛyapolísi.

¹²Mǐ gosín fínɛ́, bó yi toxo ɖaxó e è nɔ ylɔ́ ɖɔ Filípu ɔ́ mɛ; toxo énɛ́ ɖo tokpɔnla nukɔntɔn Masedwani tɔn mɛ, ɖo Hlɔ̌manu lɛ́ɛ sín acɛ mɛ. Mǐ nɔ to énɛ́ mɛ xɔ azǎn nabí ɖé.

¹³Gbɔjɛzán gbe Jwifu lɛ́ɛ tɔn ɔ́, mǐ tɔ́n sín toxo ɔ́ mɛ, bó yi tɔ tó, bó vɛdó ɖɔ mǐ ná mɔ Jwifu lɛ́ɛ sín ɖɛxotɛn ɖé ɖo fínɛ́ wɛ sín. Mǐ jínjɔ́n ayǐ, bó ɖɔ xó xá nyɔ̌nu e kplé ɖo fínɛ́ lɛ́ɛ.

¹⁴Nyɔ̌nu énɛ́ lɛ́ɛ ɖě nɔ nyí Lidíi, bó gosín Tiatíi, bó nɔ́ sa akwɛ́núvɔ vɔvɔ ɖé lɛ́ɛ; é nɔ sí Mawu; é ɖo tó ɖó mǐ wɛ, bɔ Aklúnɔ hun ayi tɔn, bɔ é wlí tó xó e ɖɔ wɛ Pɔ́lu ɖe ɔ́ wú.

¹⁵É kpódó mɛ tɔn lɛ́ɛ kpó lɛ yɛhwesin; énɛ́ ɔ́ gúdo ɔ́, é sa vo nú mǐ ɖɔ: “Ényí mi mɔ ɖɔ un ɖi nǔ nú Aklúnɔ nǔgbó hǔn, mi wá nɔ xwé ce gbe.” É zín mǐ jǐ bɔ mǐ gbɔ bó yí gbe, bó yi nɔ xwé tɔn gbe.

¹⁶Mǐ wá xwe ɖɛxotɛnmɛ gbe ɖokpó, bó kpé nyɔ̌nu mɛsɛntɔ́ ɖé, bɔ yɛ nyanya ɖé ɖo jǐ tɔn, bɔ é nɔ kan amɔɛ nú mɛ lɛ́ɛ. Nǔ énɛ́ e é nɔ wa ɔ́ nɔ zɔ́n, bɔ é nɔ dɔn akwɛ́ gěgé wá nú gǎn tɔn lɛ́ɛ.

¹⁷Nyɔ̌nu énɛ́ ɔ́ jɛ Pɔ́lu kpó mǐ kpó gúdo, bó nɔ sú xó ɖɔ: “Mɛ élɔ́ lɛ́ɛ ɔ́, Mawu Ajalɔ̌nlɔn sín mɛsɛntɔ́ wɛ nú yě; hwlɛngán sín ali ɔ́ sín xó ɖɔ nú mi wɛ yě ɖe.”

¹⁸Mɔ̌ wɛ é ɖo mǐ gúdo xɔ azǎn mɔ̌kpán, bɔ é wá vɛ́ Pɔ́lu wú gbe ɖokpó, bɔ é lɛ́ kɔ bó ɖɔ nú yɛ e ɖo nyɔ̌nu ɔ́ jí ɔ́ ɖɔ: “Đo Jezu Klísu nyǐkɔ mɛ ɔ́, un ɖe gbe dó we: gosín nyɔ̌nu élɔ́ jí;” bɔ yɛ ɔ́ gosín nyɔ̌nu ɔ́ jí tlóló tɛn tɔn mɛ.

¹⁹Ée nyɔ̌nu ɔ́ sín gǎn lɛ́ɛ mɔ ɖɔ é kún sɔ́ ɖo akwɛ́ ɖé ná dɔn wá nú émí wɛ ó ɔ́, yě wlǐ Pɔ́lu kpódó Silási kpán, bó dɔn yě yi tokplétɛn ɖo gǎn lɛ́ɛ nukɔn;

²⁰yě kplá yě yi hwɛɖɔtɔ́ Hlɔ̌manu lɛ́ɛ tɔn nukɔn, bó ɖɔ: “Nya élɔ́ lɛ́ɛ ɖo to mǐtɔn hɛn wúlú wɛ; Jwifu wɛ nú yě,

²¹yě nɔ ɖo walɔ e sɛ́n mǐtɔn gbɛ́ nú mǐ lɛ́ɛ kplɔ́n mɛ wɛ; mǐ Hlɔ̌manu lɛ́ɛ ɔ́, mǐ sixú yí gbe ná ǎ; mǐ ka sixú xwedó ǎ.”

²²Ahwan ɔ́ lɔ sí te dó Pɔ́lu kpódó Silási kpó jí, bɔ hwɛɖɔtɔ́ lɛ́ɛ zɔ́n bɔ è ɖe awu nú yě mɛ we lɛ́ɛ, bó xo yě ɖó lanbá wú.

²³Ée yě xo yě, bɔ bǎkpa kpé yě wú ɔ́, yě kplá yě dó gankpá mɛ, bó ɖɔ nú gǎn e kpa acɛ dó gankpá ɔ́ nu ɔ́ ɖɔ ní cɔ́ yě ganjí.

²⁴Ée gǎn ɔ́ se mɔ̌ ɔ́, é kplá yě yi sú dó xɔ ɖé mɛ, ɖo gankpá ɔ́ tɛ́ntin, bó ján afɔ yětɔn lɛ́ɛ dó sókpo mɛ, lobo sú hɔn dó yě.

²⁵Zǎnvlɔ́ɖówe mɔ̌ ɔ́, Pɔ́lu kpódó Silási kpó ɖo ɖɛ xo wɛ, bó ɖo han ji mlá Mawu wɛ, bɔ gantɔ́ lɛ́ɛ ɖo tó ɖó yě wɛ.

²⁶Azɔn ɖokpó ɔ́, ayǐkúngban dán wǔ kpódó hlɔ̌nhlɔ́n kpó, bó húnhún gankpá ɔ́ sín dodó lɛ́ɛ bǐ; è nǎ mɔ nǔɖé kpowun ɔ́, hɔn lɛ́ɛ bǐ jɛ́n hun, bɔ gɛdɛ e è dǒ gantɔ́ lɛ́ɛ é bǐ wɛ́n kɔn nyi ayǐ.

²⁷Gǎn e kpa acɛ dó gankpá ɔ́ nu ɔ́ fɔ́n; ée é mɔ hɔn lɛ́ɛ bǐ ɖo nuvo ɔ́, é vɛdó ɖɔ gantɔ́ lɛ́ɛ hɔn yi wɛ sín, bó sún hwǐ, bó jló ná hu éɖée.

²⁸Pɔ́lu ka sú xó syɛ́nsyɛ́n ɖé, bó ɖɔ: “Ma wa nǔ dó hwiɖée wú ó, ɖó mǐ bǐ wɛ sɔgbe ɖo fí.”

²⁹Hwenɛ́nu ɔ́, é byɔ́ zogbɛ́n, bó lɔ́n byɔ́ xɔ ɔ́ mɛ, bó jɛ sísɔ́sísɔ́ jí, lobo jɛ kpo ɖo Pɔ́lu kpódó Silási kpó nukɔn.

³⁰É ka wá ɖe yě tɔ́n, bó ɖɔ: “Mɛɖaxó ce lɛ́ɛ! Étɛ́ un ɖó ná wa bɔ Mawu ná hwlɛ́n mì gán?”

³¹Pɔ́lu kpódó Silási kpó ka yí gbe n'i ɖɔ: “Đi nǔ nú Aklúnɔ Jezu, énɛ́ ɔ́, Mawu ná hwlɛ́n we gán, hwi kpódó mɛ e ɖo xwé towe gbe lɛ́ɛ kpó.”

³²Bɔ yě ɖɔ Aklúnɔxó nú é kpódó mɛ e ɖo xwé tɔn gbe lɛ́ɛ bǐ kpán.

³³É ka kplá yě azɔn ɖokpó ɖo zǎn xóxó énɛ́ mɛ, bó klɔ́ bǎkpa yětɔn lɛ́ɛ nú yě, bɔ tlóló tɛn tɔn mɛ ɔ́, é kpódó mɛ tɔn lɛ́ɛ bǐ kpán lɛ yɛhwesin.

³⁴Gǎn e kpa acɛ dó gankpá ɔ́ nu ɔ́ ka kplá yě yi xɔ tɔn mɛ, ɖo síngbó jí, bó ná nǔɖuɖu yě, bɔ é kpó mɛ tɔn lɛ́ɛ bǐ kpán jɛ awǎ ɖó Mawu e yě ɖi nǔ ná é wútu.

³⁵Ayǐ ka wá hɔ́n, bɔ hwɛɖɔtɔ́ lɛ́ɛ sɛ́ sɔ́ja lɛ́ɛ dó, nú yě ní yi ɖɔ nú gǎn e kpa acɛ dó gankpá ɔ́ nu ɔ́ ɖɔ: “Jǒ Pɔ́lu kpódó Silási kpó dó;”

³⁶énɛ́ ɔ́, gǎn e kpa acɛ dó gankpá ɔ́ nu ɔ́ wá yi ɖɔ nú Pɔ́lu ɖɔ: “Hwɛɖɔtɔ́ lɛ́ɛ sɛ́ sɔ́ja lɛ́ɛ dó ɖɔ è ní jó mi; mi tɔ́n bo yi ɖo fífá mɛ.”

³⁷Lo ɔ́, Pɔ́lu ɖɔ nú mɛ e è sɛ́ dó lɛ́ɛ ɖɔ: “Hlɔ̌manu wɛ mǐ nyí; yě ka xo mǐ ɖo agbawungba ma ɖɔ hwɛ xá mǐ, lobo bɛ́ mǐ wá kɔn nyi gankpá mɛ; bɔ din ɔ́, yě jló ná ɖe mǐ tɔ́n mɛɖé ma se; gbeɖé kpɔ́n, yě ɖésúnɔ ní wá ɖe mǐ tɔ́n.”

³⁸Sɔ́ja lɛ́ɛ ka sɔ́ xó énɛ́ lɛ́ɛ yi ɖɔ nú hwɛɖɔtɔ́ lɛ́ɛ; ée hwɛɖɔtɔ́ lɛ́ɛ se ɖɔ Hlɔ̌manu wɛ yě nyí ɔ́, xɛsi jɛ yě jí,

³⁹bɔ yě wǎ mɔ Pɔ́lu kpódó Silási kpán, bó sa vo nú yě, lobo ɖe yě tɔ́n, bó ɖɔ yě nǐ kɛnklɛ́n bó gosín to ɔ́ mɛ.

⁴⁰Đěe Pɔ́lu kpódó Silási kpán tɔ́n sín gankpá ɔ́ mɛ ɔ́, yě wǎ yi Lidíi xwé, bó mɔ nɔví ɖo Klísu mɛ lɛ́ɛ ɖo fínɛ́, bó dó wǔsyɛ́n lanmɛ nú yě, lobo ɖidó.