Read fon Mɛsɛ́dó 17 Bible Online

Mɛsɛ́dó 17 - fon bible

Mɛsɛ́dó 17

¹Pɔ́lu kpódó Silási kpó gbɔn Anfipolísi kpódó Apoloni kpó mɛ dín, bó wá Tɛsaloniki; kplɔ́ngbasá ɖokpó ka ɖo fínɛ́.

²Pɔ́lu yi kplɔ́ngbasá ɔ́ lě e é ko nɔ bló gbɔn é. Gbɔjɛzán gbe atɔn ɖě jɛ ɖě gúdo ɔ́, é dɔn nǔ xá mɛ e ɖo kplɔ́ngbasá ɔ́ lɛ́ɛ dó nǔ e è wlǎn dó Mawuxówéma ɔ́ mɛ lɛ́ɛ wú.

³É tín nǔ e è wlán dó wěma ɔ́ mɛ lɛ́ɛ mɛ nú yě, bó ɖe xlɛ́ yě ɖɔ Klísu ɖó ná ji ya káká bó kú, bɔ Mawu ka ná fɔ́n ɛ sín kú lě e è wlǎn dó Mawuxówéma ɔ́ mɛ gbɔn é; é ɖɔ nú yě ɖɔ: “Klísu énɛ́ wɛ nyí Jezu e xó ɖɔ nú mi wɛ un ɖe é.”

⁴Mɛ ɖé lɛ́ɛ ɖo mɛ e ɖo tó ɖó yě wɛ lɛ́ɛ mɛ, bɔ xó énɛ́ lɛ́ɛ byɔ́ ayi mɛ nú yě, bɔ yě gɔ́ nú Pɔ́lu kpódó Silási kpán; mɔ̌ ɖokpó ɔ́, Glɛ̌sinu e nɔ ɖó sísí nú Mawu lɛ́ɛ gěgé kpódó nyɔ̌nu nukúnɖéjí gěgé kpán gɔ́ nú yě.

⁵Lo ɔ́, Jwifu lɛ́ɛ jɛ wǔ hwan jí, bó cyán toví dídá nǔvɔ́nɔ e nɔ́ ɖo dǐndán gbɔn alixo alixo wɛ lɛ́ɛ kplé; yě dɔn hunnyahunnya dó ahwan ɔ́ mɛ, bó dɔn to ɔ́ bǐ wlú. Yě yi Jazɔ́ɔn xwé gbe, bó ɖo Pɔ́lu kpó Silási kpó ba wɛ, bó ná kplá yě yi togun ɔ́ nukɔn.

⁶Ée yě ma mɔ yě ǎ ɔ́, yě zɔn Jazɔ́ɔn kpódó nɔví ɖo Klísu mɛ ɖé lɛ́ɛ kpán jí, bó dɔn yě yi gǎn e ɖo to ɔ́ mɛ lɛ́ɛ nukɔn, bó sú xó ɖɔ: “Mɛ e dɔn to fúnlɛ̌n gbɔn gbɛ ɔ́ mɛ lɛ́ɛ wá ayǐkúngban mǐtɔn jí,

⁷bɔ Jazɔ́ɔn ka yí yě dó xwé tɔn gbe; yě mɛ bǐ wɛ nɔ gba sɛ́n e Dadá Hlɔ̌ma tɔn dó lɛ́ɛ, bó nɔ ɖɔ axɔ́sú ɖěvo tíin bó nɔ́ nyí Jezu.”

⁸Xó énɛ́ lɛ́ɛ fɔ́n hun dó jǐ nú togun ɔ́ kpódó gǎn e ɖo to ɔ́ mɛ lɛ́ɛ bǐ kpó,

⁹bɔ Jazɔ́ɔn kpódó mɛ e è wlǐ gɔ́ n'i lɛ́ɛ kpán tó sɔ́ akwɛ́ ɖé ɖó gbanu hwɛ̌, cóbɔ è jó yě dó bɔ yě tɔ́n.

¹⁰Ée nǔ énɛ́ lɛ́ɛ jɛ tlóló ɔ́, nɔví ɖo Klísu mɛ lɛ́ɛ nyi Pɔ́lu kpódó Silási kpán sɛ́ dó Belée gbe nɛ́ gbe zǎn mɛ. Ée yě jɛ dɔ̌n ɔ́, yě yi kplɔ́ngbasá Jwifu lɛ́ɛ tɔn.

¹¹Jwifu e ɖo fínɛ́ lɛ́ɛ nyɔ́ xomɛ hú éé ɖo Tɛsaloniki lɛ́ɛ; yě yí Mawuxó se kpódó jlǒ ɖagbe kpán. Ayǐhɔ́ngbe ayǐhɔ́ngbe ɔ́, yě nɔ́ kíjé Mawuxówéma ɔ́, bó nɔ kpɔ́n ɖɔ xó e ɖɔ nú yě wɛ mɛsɛ́dó lɛ́ɛ ɖe ɔ́ ka sɔgbe ají.

¹²Bɔ mɛ gěgé ɖo yě mɛ, bó ɖi nǔ nú Jezu; mɔ̌ ɖokpó ɔ́, nyɔ̌nu Glɛ̌sinu nukúnɖéjí gěgé kpódó súnnu gěgé kpán ɖi nǔ nú Jezu.

¹³Lo ɔ́, éé Jwifu e ɖo Tɛsaloniki lɛ́ɛ se ɖɔ Pɔ́lu ɖo Mawuxó jlá wɛ ɖo Belée lɔmɔ̌ ɔ́, yě wá kplɔ́n nǔ mɛ lɛ́ɛ, bɔ yě fɔ́n gǔ, bó jɛ hunnyahunnya dó to ɔ́ mɛ jí,

¹⁴bɔ nɔví ɖo Klísu mɛ lɛ́ɛ yá wǔ nyi Pɔ́lu sɛ́ dó xuwa jí; Silási kpódó Timɔtée kpó ká cí to ɔ́ mɛ fínɛ́.

¹⁵Yě mɛ e ɖo Pɔ́lu nyi wɛ lɛ́ɛ kplá ɛ káká yi jɛ to e è nɔ ylɔ́ ɖɔ Atɛ́ni é mɛ bó lɛ́ kɔ. Pɔ́lu ka dó wɛn yě ɖɔ yě ní ɖɔ nú Silási kpódó Timɔtée kpán ɖɔ yě ní yá wǔ xwedó émí wú.

¹⁶Hwenu e Pɔ́lu ɖo te kpɔ́n Silási kpódó Timɔtée kpó ɖo Atɛ́ni ɔ́, é mɔ lě e vodún sukpɔ́ gbɔn ɖo to ɔ́ mɛ ɔ́, bɔ é sin xomɛ n'i tlala.

¹⁷É nɔ yi kplɔ́ngbasá, bó nɔ́ ɖo nǔ dɔn xá Jwifu lɛ́ɛ kpódó mɛ e ma nyí Jwifu ǎ, bó ka nɔ́ sɛn Mawu lɛ́ɛ kpán wɛ. Ayǐhɔ́ngbe ayǐhɔ́ngbe ɔ́, é nɔ́ yi tokplétɛn, bó nɔ́ yi dɔn nǔ xá mɛ e é nɔ mɔ ɖo fínɛ́ lɛ́ɛ.

¹⁸Glɛ̌sinu nǔnywɛ́tɔ́ e è nɔ ylɔ́ Epikiliɛn lɛ́ɛ kpódó ée è nɔ ylɔ́ ɖɔ Sitoyisiɛn lɛ́ɛ kpán lɔ jɛ xó ɖɔ xá ɛ jí. Mɛ ɖě nɔ́ kanbyɔ́ ɖɔ: “Étɛ́ ɖɔ wɛ nǔxweɖɔtɔ́ énɛ́ ka ɖe?” Mɛ ɖěvo lɛ́ɛ ká se xó e ɖɔ dó Jezu kpódó fínfɔ́n sín kú kpó wú wɛ é ɖe ɔ́, bó nɔ́ ɖɔ: “É cí to ɖěvo mɛ vodún lɛ́ɛ xó ɖɔ nú mǐ wɛ é ɖe ɖɔhun.”

¹⁹Bɔ yě kplá Pɔ́lu yi mɛ e nɔ́ kplé ɖo fí e è nɔ ylɔ́ ɖɔ Aleopaji lɛ́ɛ nukɔn, bó kanbyɔ́ ɛ ɖɔ: “Nǔkplɔ́nmɛ yɔ̌yɔ́ e a hɛn wá ɔ́, a sixú tínmɛ nú mǐ a?

²⁰Đó nǔ e ɖɔ wɛ a ɖe ɔ́ nɔ́ búdo dó mǐ, bɔ mǐ jló ná mɔ nǔ jɛ mɛ.”

²¹(Lo ɔ́, Atɛ́ninu lɛ́ɛ bǐ kpódó jǒnɔ e ɖo yě mɛ lɛ́ɛ kpán ɔ́, yě sɔ́ nɔ́ sɔ́ hwenu yětɔn dó wa nǔɖé ná zɛ yě ná ɖɔ xó yɔ̌yɔ́ e tíin lɛ́ɛ, abǐ yě ná ɖótó xó yɔ̌yɔ́ e tíin lɛ́ɛ wú ǎ.)

²²Pɔ́lu ka sí te ɖo mɛ énɛ́ lɛ́ɛ e nɔ kplé ɖo Aleopaji lɛ́ɛ tɛ́ntin, bó ɖɔ: “Atɛ́ninu lɛ́ɛ mi; un mɔ ɖɔ mi nyí sinsɛnnɔ tawun.

²³Đó hwenu e un ɖo to mitɔn mɛ gbɔn wɛ ɔ́, un mɔ vodúnxɔ gěgé sín vɔ̌sákpe; un tlɛ wá yi mɔ vɔ̌sákpe ɖé, bɔ è wlǎn d'é jí ɖɔ: ‘Vodún e è ma tunwun ǎ é tɔn ɖíe.’ Nǔ e mi ma tunwun ǎ bó ka nɔ́ sɛn ɔ́ sín xó ɖɔ nú mi gbé wɛ un ja.

²⁴ Mawu e bló gbɛ ɔ́ kpódó nǔ e ɖ'é mɛ lɛ́ɛ bǐ kpán ɔ́, é wɛ nyí Aklúnɔ jǐxwé kpódó ayǐkúngban kpán tɔn. Mawu énɛ́ ka nɔ́ nɔ sinsɛnxɔ e gbɛtɔ́ bló ɔ́ mɛ ǎ.

²⁵É ka ba nú gbɛtɔ́ ní bló nǔ alɔkpa ɖěbǔ dó sɛn ɛ ná nǔɖé wɛ hudó e ɖɔhun ǎ; é wɛ nɔ́ ná gbɛ, bó nɔ́ ná funfún kpódó nǔ bǐ kpó gbɛtɔ́ lɛ́ɛ.

²⁶Gbɛtɔ́ ɖokpó géé jí wɛ é ɖó togun lɛ́ɛ bǐ gbɔn, bó ma yě kpé ayǐkúngban ɔ́ bǐ sésé jí; é ɖó hwenu lɛ́ɛ, bó ka ɖó dogbó nú nɔtɛn togun lɛ́ɛ tɔn ɖokpó ɖokpó.

²⁷Mawu to nǔ lɛ́ɛ bǐ gbɔn mɔ̌, bónú gbɛtɔ́ lɛ́ɛ ná dó ba ɛ, bónú yě ɖo biba ɛ wɛ káká ɔ́, afɔ nyɔ́ ɔ́, yě sixú wá yi mɔ ɛ; có Mawu ka sɔ́ lín dó ɖokpó ɖokpó mǐtɔn ǎ.

²⁸“Đó, é wɛ zɔ́n bɔ mǐ ɖo gbɛ; é wɛ zɔ́n bɔ mǐ ɖo wǔ dǎn wɛ; é wɛ zɔ́n bɔ mǐ tíin. Nǔnywɛ́tɔ́ mitɔn lɛ́ɛ ɖésú ko ɖɔ mɔ̌ ɖɔ jí: “Vǐ tɔn wɛ mǐ nyí.”

²⁹“Ée é ka nyí ɖɔ Mawu sín vǐ wɛ mǐ nyí é ɔ́, mǐ sɔ́ ɖó ná lin ɖɔ Mawu cí siká abǐ kpatágan abǐ awǐnnya ɖagbe ɖagbe e gbɛtɔ́ sɔ́ linlin tɔn kpódó aɖawun tɔn kpó dó kɔn ná é ɖɔhun ǎ.

³⁰Nǔ ma nywɛ́ sín gbɛ e gbɛtɔ́ lɛ́ɛ kó zán ɖo hwenu e yě ɖo manywɛ́ mɛ ɔ́, Mawu lɛ́n hwɛ tɔn dó kɔ nú yě ǎ; amɔ̌ din ɔ́, é wá ɖo byɔ̌byɔ́ gbɛtɔ́ lɛ́ɛ bǐ wɛ, ɖo fí ɖěbǔ e yě kó ɖe ɔ́, ɖɔ yě ní lɛ́ kɔ sín hwɛ yětɔn lɛ́ɛ gúdo.

³¹Đó é sɔ́ azǎn ɖokpó ɖó te, bɔ azǎn énɛ́ gbe ɔ́, é ná xwedó hwɛjijɔ, bó ɖɔ hwɛ xá gbɛtɔ́ lɛ́ɛ bǐ, gbɔn mɛ e é ɖésúnɔ ko ɖe ɖó vo ɔ́ jí. É fɔ́n ɛ sín kú, bó dó ɖe nǔ énɛ́ ɔ́ xlɛ́ mɛ bǐ.”

³²Ée mɛ lɛ́ɛ se fínfɔ́n sín kú xó ɔ́, mɛ ɖě ko e; mɛ ɖě ka ɖɔ: “Mǐ ná se xó towe dó nǔ énɛ́ wú azǎn ɖěvo gbe.”

³³Pɔ́lu ka gosín yě mɛ.

³⁴É ɖo mɔ̌ có, mɛɖé lɛ́ɛ xwedó e, bó ɖi nǔ: mɛ e è nɔ ylɔ́ ɖɔ Denisi ɖo mɛ e nɔ kplé ɖo Aleopaji lɛ́ɛ mɛ é, kpó nyɔ̌nu e è nɔ ylɔ́ ɖɔ Damalísi ɔ́ kpó, kpódó mɛ ɖěvo lɛ́ɛ kpán ɖo yě mɛ.