Read fon Mɛsɛ́dó 18 Bible Online

Mɛsɛ́dó 18 - fon bible

Mɛsɛ́dó 18

¹Énɛ́ ɔ́ gúdo ɔ́, Pɔ́lu gosín Atɛ́ni, bó yi Kɔlɛ́nti.

²É mɔ nya Jwifu ɖokpó ɖo fínɛ́; è nɔ ylɔ́ nya ɔ́ ɖɔ Akilási, bɔ é nyí tokpɔn Pɔ́ɔn mɛ nu; nya énɛ́ kpódó asi tɔn Plisílu kpó gosín Italíi wá ɔ́, é ko lín ǎ, ɖó axɔ́sú Klódu ɖe gbeta tɔ́n ɖɔ mɛ e nyí Jwifu lɛ́ɛ bǐ ní tɔ́n sín Hlɔ̌ma; Pɔ́lu yi mɔ yě.

³Ée Pɔ́lu kpódó yě kpó ɔ́, azɔ̌ ɖokpó ɔ́ wɛ yě nɔ́ wa ɔ́, Pɔ́lu nɔ xwé yětɔn gbe, bɔ yě nɔ́ wa azɔ̌ ɖó kpɔ́ yě nɔ́ gbá goxɔ.

⁴Gbɔjɛzán gbe Jwifu lɛ́ɛ tɔn tɛgbɛ ɔ́, Pɔ́lu nɔ yi ɖɔ xó ɖo kplɔ́ngbasá, bó nɔ́ tɛ́nkpɔ́n bɔ Jwifu lɛ́ɛ kpódó Glɛ̌sinu lɛ́ɛ kpán nɔ mɔ nǔgbó nú xó tɔn.

⁵Ée Silási kpódó Timɔtée kpó gosín Masedwani wá ɔ́, Pɔ́lu jó éɖée nú Mawuxó ɖiɖɔ kɛ́ɖɛ́, bó nɔ́ ɖe kúnnu nú Jezu ɖo Jwifu lɛ́ɛ nukɔn ɖɔ Jezu wɛ nyí Klísu;

⁶lo ɔ́, Jwifu lɛ́ɛ jló ná se xó tɔn ǎ, bó nɔ́ ɖo zunzun i wɛ; é ka xúxú awu tɔn lɛ́ɛ[4], bó ɖɔ nú yě ɖɔ: “Ényí nǔɖé ɔ́, ní nyí nú mi; nyɛ ko ɖe nyɛtɔn sín mɛ. Bɛ́ sín din ɔ́, un ná nɔ́ yi mɛ e ma nyí Jwifu ǎ lɛ́ɛ gɔ́n.”

⁷Pɔ́lu ka gosín fínɛ́ bó yi nya ɖé gɔ́n; nya ɔ́ nɔ nyí Titiwusi-Jusitúsi. Nya énɛ́ ɖó sísí nú Mawu, bɔ xwé tɔn ɖo kplɔ́ngbasá Jwifu lɛ́ɛ tɔn kpá.

⁸Klisipúsi e nyí kplɔ́ngbasá Jwifu lɛ́ɛ tɔn sín gǎn ɔ́ kpódó xwédo tɔn bǐ kpán ɖi nǔ nú Aklúnɔ. Kɔlɛ́ntinu e ɖótó Pɔ́lu lɛ́ɛ gěgé ɖi nǔ nú Jezu, bó lɛ yɛhwesin.

⁹Pɔ́lu ka mɔ nǔ zǎn mɛ gbe ɖokpó; é mɔ Aklúnɔ, bɔ é ɖɔ n'i ɖɔ: “Ma ɖi xɛsi ó; lo ɔ́, ɖo xó ɖɔ wɛ; ma nɔ abwɛ̌ ó;

¹⁰ɖó un ɖo kpɔ́ xá we, bɔ mɛ ɖěbǔ ná ɖó alɔ wú we, bó wa nǔ nyanya xá we ǎ; ɖɔ xó, ɖó mɛ gěgé ɖo to élɔ́ mɛ, bó nyí ce.”

¹¹Pɔ́lu nɔ Kɔlɛ́nti fínɛ́ xɔ xwe ɖokpó adaɖé, bó nɔ́ ɖo Mawuxó kplɔ́n mɛ lɛ́ɛ wɛ.

¹²Hwenu e Galiɔ́ɔn nyí tokpɔngán ɖo Akáyi gbé jí ɔ́, Jwifu lɛ́ɛ ɖó gbe kpɔ́, bó sí te dó Pɔ́lu jí; yě wlǐ i, bó kplá ɛ yi hwɛ nukɔn,

¹³bó ɖɔ: “Nya élɔ́ nɔ́ ɖɔ xó nú mɛ lɛ́ɛ, bó ná dó dɔn yě nú yě ná sɛn Mawu lě e sɛ́n ɔ́ ma zɔ́n gbɔn ǎ é.”

¹⁴Hwenu e Pɔ́lu jló ná kɛ nu dó xó énɛ́ ɔ́ wú ɔ́, Galiɔ́ɔn ɖɔ nú Jwifu lɛ́ɛ ɖɔ: “Jwifu lɛ́ɛ mi; ényí nǔ nyanya ɖé wɛ é dó sin abǐ agɔ ɖé wɛ é jɛ din ɔ́, un ná kú hǔn, bó se xó mitɔn.

¹⁵Lo ɔ́, ée ényí nǔ dɔn wɛ mi ɖe dó xógbe ɖé lɛ́ɛ wú, nyǐkɔ ɖé lɛ́ɛ wú, kpódó sɛ́n mi ɖésúnɔ tɔn kpán wú ɔ́, mi ɖésúnɔ wɛ ná kpɔ́n bó ɖɔ. Nyɛ wɛ ná ɖɔ hwɛ gbo nú mi ɖo nǔ énɛ́ lɛ́ɛ kɔn ǎ; un gbɛ́.”

¹⁶Ée é ɖɔ mɔ̌ ɔ́, é nya yě sín hwɛɖɔxɔ ɔ́ sá.

¹⁷Yě bǐ ka zɔn Sositɛ́nu e ɖo kplɔ́ngbasá Jwifu lɛ́ɛ tɔn sín gǎn nyí wɛ hwenɛ́nu ɔ́ jí, bó jɛ xixo e jí ɖo hwɛɖɔxɔ ɔ́ nukɔn. Galiɔ́ɔn ka mɔ nǔ énɛ́ lɛ́ɛ ɖě dó mɔ nǔɖé ǎ.

¹⁸ Pɔ́lu lɛ́ nɔ Kɔlɛ́nti xɔ azǎn gěgé; énɛ́ ɔ́ gúdo ɔ́, é jó nɔví ɖo Klísu mɛ lɛ́ɛ dó, bó dó tɔjíhún ɖidó Silíi, bɔ Plisílu kpódó Akilási kpó xwedó e; cóbónú é ka ná ɖidó ɔ́, é xwlɛ́ ɖa ɖo to e è nɔ ylɔ́ ɖɔ Sanklé ɔ́ mɛ, ɖó akpá e é kó dó nú Mawu é wú.

¹⁹Ée yě wá yi jɛ Efɛ́zi ɔ́, Pɔ́lu jó Plisílu kpódó Akilási kpán dó; é yi kplɔ́ngbasá, bó dɔn nǔ xá Jwifu lɛ́ɛ.

²⁰Jwifu lɛ́ɛ dó kɛnklɛ́n n'i ɖɔ ní nɔ émí gɔ́n kpɛɖé d'é jí, bɔ é gbɛ́.

²¹Hwenu e é ja yě gɔ̌n gosín gbé ɔ́, é ɖɔ nú yě ɖɔ: “Ényí Mawu jló ɔ́, un ná lɛ́ wá mi gɔ́n hwe ɖěvo nu.” Ée é ɖɔ mɔ̌ ɔ́, é yi byɔ́ tɔjíhún mɛ ɖo Efɛ́zi, bó ɖidó.

²²Ée é wá yi jɛ te ɖo Sezalée ɔ́, é yi dó gbe agun nǔɖitɔ́ lɛ́ɛ tɔn ɖo Jeluzalɛ́mu, bó yi Antyɔ́ci.

²³É xɔ azǎn yɔywɛ ɖé ɖo fínɛ́, bó ɖidó. É gbɔn Galati gbé jí, bó gbɔn Flijíi gbé jí ɖě jɛ ɖě gúdo, lobo dó wǔsyɛ́n lanmɛ nú ahwanvú Jezu tɔn e ɖo gbě énɛ́ lɛ́ɛ jí lɛ́ɛ bǐ.

²⁴Nya Jwifu ɖé tíin, bɔ è ji i ɖo Alɛsándli; è nɔ ylɔ́ ɛ ɖɔ Apolosu; nya énɛ́ wá Efɛ́zi; é nyɔ́ xó ɖɔ, lobo tunwun Mawuxó ɔ́ ganjí.

²⁵È kplɔ́n ɛ nǔ e kan Aklúnɔ sín ali ɔ́, bɔ akpakpa tɔn nɔ sɔ́ ɛ, bɔ é nɔ́ ɖo Wɛn Ɖagbe Jezu tɔn ɔ́ jlá wɛ, bó nɔ́ ɖo kplɔ́nkplɔ́n mɛ lɛ́ɛ wɛ, bɔ nǔ e ɖɔ wɛ é ɖe lɛ́ɛ bǐ nɔ́ sɔgbe, có yɛhwesin Jǎan tɔn kɛ́ɖɛ́ wú jɛ́n é mɔ nǔ jɛ.

²⁶É nɔ ɖo xó ɖɔ wɛ kpódó jiɖiɖe kpán ɖo kplɔ́ngbasá. Đěe Plisílu kpódó Akilási kpán se xó e ɖɔ wɛ é ɖe lɛ́ɛ ɔ́, yě dɔn ɛ dó wǔ, bó tín Mawu sín ali ɔ́ mɛ n'i.

²⁷Ée Apolosu jló ná yi Akáyi ɔ́, nɔví ɖo Klísu mɛ lɛ́ɛ na ɛ akɔ́nkpinkpan, bó wlán wěma sɛ́ dó ahwanvú Jezu tɔn e ɖo dɔ̌n lɛ́ɛ, nú yě ní yí i ganjí. Ée é wá jɛ fínɛ́ ɔ́, é dó alɔ mɛ e ɖi nǔ nú Jezu gbɔn fɛ́nú Mawu tɔn mɛ lɛ́ɛ ɖésú.

²⁸Đó, é nɔ ɖɔ xó kpódó hlɔ̌nhlɔ́n kpó, bó nɔ dó ɖe xlɛ́ Jwifu lɛ́ɛ agbawungba ɖɔ ali bú wɛ yě ɖe. É nɔ ɖe xlɛ́ yě ɖo Mawuxówéma ɔ́ mɛ ɖɔ Jezu wɛ nyí Klísu ɔ́.