Read fon Mɛsɛ́dó 19 Bible Online

Mɛsɛ́dó 19 - fon bible

Mɛsɛ́dó 19

¹Hwenu e Apolosu ɖo Kɔlɛ́nti ɔ́, Pɔ́lu gbɔn tokpɔn e ɖo só jí lɛ́ɛ mɛ, bó wá Efɛ́zi. É mɔ ahwanvú ɖé lɛ́ɛ ɖo fínɛ́,

²bó kanbyɔ́ yě ɖɔ: “Hwenu e mi ɖi nǔ nú Jezu ɔ́, Mawu ná Yɛsinsɛn mi a?” Bɔ yě yǐ gbe n'i ɖɔ: “Yɛsinsɛn ɖé tó tíin hǔn, mǐ se kpɔ́n gbeɖé ǎ.”

³Pɔ́lu ka kanbyɔ́ yě ɖɔ: “Yɛhwesin tɛ́ mi ka lɛ lo?” Bɔ yě yí gbe n'i ɖɔ: “Yɛhwesin Jǎan tɔn wɛ mǐ lɛ.”

⁴ Pɔ́lu ka ɖɔ nú yě ɖɔ: “Yɛhwesin kɔ lɛ́ sín hwɛ mɛtɔn lɛ́ɛ gúdo tɔn wɛ Jǎan lɛ nú mɛ, bó ɖɔ nú togun ɔ́ ɖɔ mɛ e ɖo gúdo émítɔn jǎwe ɔ́ wɛ yě ná ɖi nǔ ná; mɛ énɛ́ wɛ nyí Jezu.”

⁵Ée yě se mɔ̌ ɔ́, yě lɛ yɛhwesin ɖo Aklúnɔ Jezu nyǐkɔ mɛ.

⁶Pɔ́lu ka ɖó alɔ yě jí, bɔ Yɛsinsɛn wá yě jǐ, bɔ yě jɛ gbe ɖěvo dó jí, bó jɛ xó e Mawu ɖɔ nú yě ɔ́ ɖɔ jí.

⁷Yě bǐ ná yi gbɛtɔ́ wěwe mɔ̌.

⁸Pɔ́lu nɔ yi kplɔ́ngbasá, bó nɔ ɖo xó ɖɔ wɛ kpódó jiɖiɖe kpó káká nú sun atɔn; é nɔ ɖɔ nǔ e kan axɔ́súɖuɖu Mawu tɔn ɔ́ sín xó, bó nɔ́ tɛ́nkpɔ́n nú mɛ lɛ́ɛ ná mɔ nǔgbó nú xó e ɖɔ wɛ é ɖe é.

⁹Lo ɔ́, mɛɖé lɛ́ɛ ti tamɛ ɖo yě mɛ; yě gbɛ̌, lobo nɔ ɖɔ xó nyanya dó Aklúnɔ sín ali ɔ́ wú, ɖo togun ɔ́ nukɔn; énɛ́ ɔ́ wú ɔ́, Pɔ́lu gosín yě mɛ, bó kplá ahwanvú lɛ́ɛ, bó nɔ́ ɖɔ xó dó xó ɔ́ wú ayǐhɔ́ngbe ayǐhɔ́ngbe ɖo Tilánɔsi sín wěmaxɔmɛ.

¹⁰Nǔ nyí mɔ̌ xɔ xwe we, káká bɔ mɛ e ɖo Azíi gbé jí lɛ́ɛ bǐ: Jwifu lɛ́ɛ kpódó mɛ e ma nyí Jwifu ǎ lɛ́ɛ kpán se Aklúnɔxó ɔ́.

¹¹Mawu nɔ́ jlɛ́ nǔ ɖaxó ɖaxó lɛ́ɛ gbɔn Pɔ́lu jí,

¹²káká bɔ nú yě sɔ́ avɔ abǐ lɛ̌nsuví e jɛ Pɔ́lu wú ɔ́, ɖě dó azinzɔnnɔ ɖé wú ɔ́, azɔn tɔn nɔ gbɔ, bɔ yɛ nyanya ɖo mɛɖé jí ɔ́, é nɔ́ gosín mɛ ɔ́ jí.

¹³Jwifu ɖé lɛ́ɛ ká tíin, bó nɔ́ ɖo dǐndán kpé wɛ, bó nɔ́ ɖo yɛ nyanya nya sín mɛ lɛ́ɛ jí wɛ; yě lɔmɔ̌ wá jɛ Aklúnɔ Jezu nyǐkɔ ylɔ́ jí, bó ná dó nya yɛ nyanya sín mɛ lɛ́ɛ jí; yě nɔ́ ɖɔ nú yɛ nyanya lɛ́ɛ ɖɔ: “Un ɖe gbe dó mi; mi tɔ́n ɖo Jezu e xó Pɔ́lu nɔ ɖɔ ɔ́ sín nyǐkɔ mɛ.”

¹⁴(Vɔ̌sánú-xwlémawutɔ́ ɖaxó Jwifu lɛ́ɛ tɔn e è nɔ ylɔ́ ɖɔ Ceva ɔ́ sín vǐ súnnu tɛ́nwe lɛ́ɛ wɛ nɔ ɖo mɔ̌ bló wɛ.)

¹⁵Lo ɔ́, yɛ nyanya ɔ́ gblɔ́n nú yě ɖɔ: “Jezu ɔ́, un tunwun i, bó tunwun mɛ e Pɔ́lu nyí é; bɔ midɛɛ lɛ́ɛ ɔ́, mɛ nǎhún mi ka nyí?”

¹⁶Bɔ nya e jí yɛ nyanya ɔ́ ɖe ɔ́ zɔn yě jí, bɔ hlɔ̌nhlɔ́n tɔn hú gǎn yě bǐ tɔn; é xo yě káká, bó gblé wǔ yě, bó ɖe yě nyi mɛ̌, bɔ yě hɔn tɔ́n sín xwé ɔ́ gbe.

¹⁷Jwifu kpódó Glɛ̌sinu e ɖo Efɛ́zi lɛ́ɛ bǐ kpán wɛ se nǔ énɛ́ e jɛ ɔ́; énɛ́ ɔ́, xɛsi jɛ yě bǐ jǐ, bɔ yě sɔ́ Aklúnɔ Jezu sín nyǐkɔ su.

¹⁸Yě mɛ e ɖi nǔ nú Jezu lɛ́ɛ gěgé nɔ́ wá ɖɔ hwɛ yětɔn lɛ́ɛ, lobo nɔ ɖɔ nǔ e yě ko nɔ wa nyi do ɖ'ayǐ lɛ́ɛ ɖo agbawungba.

¹⁹Majíkiblótɔ́ gěgé nɔ bɛ́ majíkiwéma yětɔn lɛ́ɛ wá, bó nɔ́ dó zo, ɖo mɛ bǐ nukún mɛ; yě lɛ̌n wěma énɛ́ lɛ́ɛ bǐ sín akwɛ́ kpɔ́n, bó mɔ ɖɔ é ná yi gankwɛ́[5] adɔ̌kpo we děgba we afɔwó (50.000) mɔ̌.

²⁰Lě e Aklúnɔxó ɔ́ nɔ́ ɖo gbigba kpé wɛ kpódó acɛ kpó, bó nɔ́ ɖo hlɔ̌nhlɔ́n tɔn ɖe xlɛ́ gbɔn wɛ ɔ́ nɛ́.

²¹Ée nǔ énɛ́ lɛ́ɛ jɛ gúdo ɔ́, Pɔ́lu ɖɔ émí ná gbɔn Masedwani kpódó Akáyi kpán gbé jí, bó ná yi Jeluzalɛ́mu. É ka lɛ́ ɖɔ: “Un yi dɔ̌n ɔ́, un ɖó ná wá yi Hlɔ̌ma lɔmɔ̌.”

²²Énɛ́ ɔ́, é sɛ́ mɛ e nɔ dó alɔ ɛ lɛ́ɛ we dó Masedwani; yě mɛ we énɛ́ lɛ́ɛ wɛ nyí: Timɔtée kpódó Elasíti kpán; é ɖésúnɔ ka cí Azíi fínɛ́ kpɛɖé.

²³Hwenɛ́nu wɛ hunnyahunnya ɖaxó ɖé tíin ɖó Aklúnɔ sín ali ɔ́ wútu.

²⁴Nya nǔtuntɔ́ ɖé tíin, bɔ è nɔ ylɔ́ ɛ ɖɔ Demɛtliwúsi; é nɔ sɔ́ kpatágan dó tun vodún e è nɔ ylɔ́ ɖɔ Aatemísi[6] é sín xɔ kpɛví kpɛví ɖé lɛ́ɛ ná bó nɔ́ sa; énɛ́ ɔ́ nɔ́ zɔ́n bɔ é nɔ dɔn akwɛ́ gěgé wá nú azɔ̌watɔ́ lɛ́ɛ.

²⁵Nya énɛ́ wá kplé mɛ e nɔ wa azɔ̌ xá ɛ lɛ́ɛ, kpódó azɔ̌ ɖokpó ɔ́ watɔ́ e ɖo to ɔ́ mɛ lɛ́ɛ kpó, bó ɖɔ nú yě ɖɔ: “Xɔ́ntɔn ce lɛ́ɛ mi, mi tunwun ɖɔ azɔ̌ élɔ́ wɛ nɔ dɔn akwɛ́ wá nú mǐ.

²⁶Mi ka ɖo nǔ e dó sin wɛ nya Pɔ́lu énɛ́ ɖe ɔ́ mɔ wɛ, bó ɖo sise wɛ: é sɔ́ xó tɔn dó gblé tamɛ nú mɛ gěgé; ényí Efɛ́zi fí kɛ́ɖɛ́ wɛ ǎ, ɖibla gbɔn Azíi gbé ɔ́ bǐ jǐ wɛ, ɖó é nɔ́ ɖo ɖiɖɔ nú mɛ lɛ́ɛ wɛ ɖɔ nǔmɛsɛn e mǐ nɔ́ sɔ́ alɔ dó bló ná lɛ́ɛ kún nyí nǔ è nǎ sɛn ɖé ó.

²⁷Nú mǐ ma nyɔ́ wa ǎ ɔ́, ényí azɔ̌ mǐtɔn kɛ́ɖɛ́ wɛ é ná hɛn gblé ǎ; lo ɔ́, mɛɖé sɔ́ ná ké ya nú vodún ɖaxó Aatemísi sín xɔ ɔ́ lɔmɔ̌ ǎ, bɔ vodún énɛ́ ɔ́ ɖésú e mɛ e ko ɖo Azíi gbé ɔ́ bǐ jí, kpódó mɛ e ko ɖo gbɛ ɔ́ bǐ mɛ lɛ́ɛ kpán nɔ́ sɛn ɔ́ sɔ́ ná ɖó wi ɖé ta ǎ.”

²⁸Ée yě se mɔ̌ ɔ́, xomɛ sin yě, bɔ yě jɛ xó sú jí bó nɔ́ ɖɔ: “Aatemísi Efɛ́zinu lɛ́ɛ tɔn ɔ́ wɛ nyí nǔ ɖaxó.”

²⁹Bɔ to ɔ́ bǐ xozǐn, bó nyi ahwan ɖidó tokplégbasá; yě wlí Gayiwúsi kpódó Alisitáki kpán, bó dɔn yě hɛn yi fínɛ́. Yě mɛ énɛ́ lɛ́ɛ ɔ́, Masedwaninu wɛ yě nyí, bɔ yě kpó Pɔ́lu kpó zɔn.

³⁰Pɔ́lu ka jló ná yi fí e togun ɔ́ kplé ɖe ɔ́; lo ɔ́, yě mɛ e ɖi nǔ nú Jezu lɛ́ɛ gbɛ́ n'i.

³¹Xɔ́ntɔn tɔn axɔ́súzɔ́watɔ́ Azíinu ɖé lɛ́ɛ lɔmɔ̌ sɛ́ wɛn dó e ɖɔ é ní kɛnklɛ́n bó ma yi tokplégbasá ɔ́ gbeɖé ó.

³²Hwenɛ́nu ɔ́, mɛ ɖě sú xó, bó ɖɔ ɖě ɔ́, mɛ ɖě nɔ́ sú xó bó nɔ́ ɖɔ ɖěvo, bɔ agun ɔ́ bǐ fan. Mɛ gěgé ɖo yě mɛ, bó tlɛ tunwun nǔ e wú è kplé lɔ é ǎ.

³³Mɛ ɖé lɛ́ɛ ɖo agun ɔ́ mɛ, bó tín xó ɔ́ mɛ nú Alɛsándlu e Jwifu lɛ́ɛ sísɛ́ dó nukɔn é; énɛ́ ɔ́, Alɛsándlu bló alɔ nú yě, bó jló ná ɖɔ xó dó hwlɛ́n yě gán ɖo togun ɔ́ nukɔn.

³⁴Lo ɔ́, ée yě mɔ ɖɔ Jwifu wɛ é nyí ɔ́, yě bǐ sú xó zɛ̌ɛ́n, bó ɖo xó ɖokpó ɔ́ ɖɔ wɛ káká nú ganxixo we mɔ̌; yě nɔ́ ɖɔ: “Aatemísi Efɛ́zinu lɛ́ɛ tɔn ɔ́ wɛ nyí nǔ ɖaxó!”

³⁵Wěgbójínɔtɔ́ to ɔ́ tɔn ka hwíhwɛ́ mɛ lɛ́ɛ bó ɖɔ: “Efɛ́zinu lɛ́ɛ mi, mɛ bǐ tunwun ɖɔ Efɛ́zi to ɔ́ wɛ nɔ cɔ́ vodún ɖaxó Aatemísi sín xɔ ɔ́, kpódó akpajlɛ́ tɔn e jɛ ayǐ sín jǐxwé ɔ́ kpán.

³⁶Mɛ ɖé sixú gbɛ́ énɛ́ ǎ; énɛ́ wú ɔ́, mǐ ɖó ná hwíhwɛ́ mǐɖée, bó gɔn nǔ wa ma lin tamɛ kpɔ́n.

³⁷Mɛ élɔ́ lɛ́ɛ e mi kplá hɛn wá fí ɔ́, yě ɖu su ɖé nú vodún mǐtɔn ǎ, yě ka nylá nu ɖé dó vodún mǐtɔn wú ǎ.

³⁸Ényí Demɛtliwúsi kpódó nǔtuntɔ́ e nɔ́ wa azɔ̌ xá ɛ lɛ́ɛ kpán ɖó nǔɖé dó mɛɖé wú ɔ́, hwɛɖɔxɔ lɛ́ɛ ɖo nuvo; hwɛɖɔtɔ́ lɛ́ɛ lɔ ka ɖe; yě ní yi ylɔ́ hwɛ ɖo fínɛ́.

³⁹Ényí mi ka lɛ́ ɖo nǔ ɖěvo ba wɛ ɔ́, to ɔ́ ko kplé ɔ́, è nǎ ɖɔ gbo.

⁴⁰Mǐ ma nyɔ́ bló ǎ ɔ́, è nǎ ɖɔ to hɛn dán wɛ mǐ ɖe, ɖó nǔ e jɛ égbé ɔ́ wú; nǔ e wú è blǒ kplé élɔ́ din ɔ́, é tíin nyǐ ǎ; mǐ ka sixú mɔ xó jɔ xó ɖé, dó tín nǔ e wú mǐ kplé ɖo fí din ɔ́ mɛ ǎ.”

⁴¹Ée é ɖɔ mɔ̌ ɔ́, é nya mɛ lɛ́ɛ.