Read fon Mɛsɛ́dó 2 Bible Online

Mɛsɛ́dó 2 - fon bible

Mɛsɛ́dó 2

¹ Pantekótu sín xwezán gbe ka wá su, bɔ nǔɖitɔ́ lɛ́ɛ bǐ kplé ɖo fí ɖokpó ɔ́.

²Tlóló ɔ́, zǐngídi ɖé gosín jǐxwé jɔhɔn ɖaxó ɖé wɛ ɖo nyinyi wɛ ɖɔhun, bó kpé xwé e gbe yě ɖe ɔ́ bǐ,

³bɔ yě mɔ nǔ zoɖɛ́ ɖɔhun ɖé lɛ́ɛ má yěɖée ɖó mɛ ɖokpó ɖokpó jí.

⁴Yɛsinsɛn gɔ́ ayi mɛ nú yě, bɔ yě jɛ gbe alɔkpa alɔkpa dó jí, lě e Yɛsinsɛn ɔ́ ná ɖɔ yě ní ɖɔ gbɔn é.

⁵Hwenɛ́nu ɔ́, Jwifu e nɔ xwedó Mawusɛ́n ɔ́ lɛ́ɛ gěgé ká gosín to e ɖo ayǐkúngban jí é bǐ mɛ, bó wá ɖo Jeluzalɛ́mu.

⁶Ée yě se zǐngídi énɛ́ ɔ́, yě nyi ahwan wá kplé, bɔ xó e ɖɔ wɛ mɛsɛ́dó lɛ́ɛ ɖe ɔ́ fyán yě tlala, ɖó mɛ ɖokpó ɖokpó nɔ́ se xó énɛ́ lɛ́ɛ dó é ɖésúnɔ sín gbe mɛ;

⁷bɔ é nyí nǔɖé bó kpácá yě, bó fyán yě, bɔ yě nɔ́ ɖɔ: “Yě mɛ énɛ́ lɛ́ɛ e ɖo xó ɖɔ wɛ lɛ́ɛ ɔ́, Galiléenu wɛ yě bǐ ka nyí ǎ cé?

⁸Nɛ̌ ka gbɔn bɔ ɖokpó ɖokpó mǐtɔn nɔ́ se xó e ɖɔ wɛ yě ɖe ɔ́ dó gbe mǐtɔn mǐtɔn mɛ?

⁹Gbɛtɔ́ ɖo mǐ mɛ bó gosín Paati, Mɛdinu kpó Elámu kpán; mɛ ɖě gosín Mɛzopotamíi, Judée, Kapadɔ́si, Pɔ́ɔn, gbɛtɔ́ gosín tokpɔn Azíi tɔn mɛ.

¹⁰Mɛ ɖé lɛ́ɛ gosín Flijíi, Panfilíi, Ejípu kpódó Libíi sín akpáxwé e ɖo Silenɛ́ɛ kpá é kpán; Hlɔ̌manu lɛ́ɛ ɖo mǐ mɛ.

¹¹Jwifu lɛ́ɛ, kpódó mɛ e wá byɔ́ sinsɛn yětɔn mɛ lɛ́ɛ kpán; Klɛ́tinu lɛ́ɛ ɖo fí, kpódó Alabíinu lɛ́ɛ kpó, có mǐ bǐ mǐ ɖo sise wɛ, bɔ yě nɔ́ ɖo azɔ̌ ɖagbe ɖagbe e Mawu wa lɛ́ɛ sín xó ɖɔ wɛ dó gbe mǐtɔn mǐtɔn mɛ.”

¹²É kpácá yě bǐ tawun, bɔ yě sɔ́ tunwun nǔ e yě ná ɖɔ ɔ́ ǎ, bó gbɔ bó nɔ kanbyɔ́ yěɖée ɖɔ: “Étɛ́ lɔkpa ka ɖíe?”

¹³Lo ɔ́, mɛ ɖé lɛ́ɛ ɖo yě mɛ, bó nɔ́ ɖo slǎmɛ ɖɔ mɛsɛ́dó lɛ́ɛ wú wɛ ɖɔ jí: “Vɛ̌ɛn víví wɛ yě nu gɔ́ xo.”

¹⁴Piyɛ́ɛ ka sí te, é kpódó hǎgbɛ́ tɔn wǒ-ɖokpó lɛ́ɛ kpán, bó zé gbe yi jǐ, bó ɖɔ nú mɛ lɛ́ɛ ɖɔ: “Mi Judéenu lɛ́ɛ kpódó mi mɛ e ɖo Jeluzalɛ́mu lɛ́ɛ bǐ sésé kpó, mi ní mɔ nukúnnú jɛ nǔ élɔ́ wú, bó lɛ́ ɖótó xó e ɖɔ gbé un ja é.

¹⁵Mɛ élɔ́ lɛ́ɛ nu ahan mú lě e mi vɛdó é ǎ, ɖó gan tɛ́nnɛ zǎnzǎn tɔn jɛ́n ɖíe ɖo xixo wɛ e.

¹⁶Lo ɔ́, nǔ e gbeyíɖɔ Mawu tɔn Jowɛ́li ko ɖɔ ɔ́ wɛ ɖo jijɛ wɛ; é wɛ nyí ɖɔ:

¹⁷ ‘Mawu ɖɔ: ɖo azǎn gǔdo gúdo tɔn lɛ́ɛ mɛ ɔ́, un ná gba Yɛ ce kɔn nyi mɛ bǐ jǐ; vǐ mitɔn lɛ́ɛ, súnnu kpó nyɔ̌nu kpán ná nɔ́ ɖɔ Mawuxó; dɔ̌nkpɛvú mitɔn lɛ́ɛ ná nɔ́ mɔ nǔ, bɔ Mawu ná nɔ́ xo dlɔ̌ nyɔ̌xónɔ mitɔn lɛ́ɛ.

¹⁸Dódó, ɖo azǎn énɛ́ lɛ́ɛ mɛ ɔ́, un ná gba Yɛ ce kɔn nyi mɛsɛntɔ́ ce súnnu kpódó nyɔ̌nu kpán jí, bɔ yě ná ɖɔ Mawuxó.

¹⁹Un ná ɖe nǔdábaɖa xlɛ́ ɖo jǐnukúnsin aga, bó ná ɖe nǔjlɛ́jlɛ́ xlɛ́ ɖo do, ɖo ayǐkúngban jí fí: hun kpódó zo kpó, kpódó azizɔ ɖaxó kpó ná tíin.

²⁰Hwesivɔ́ ná húzú zǐnflú, bɔ sun ná myá hun ɖɔhun, cóbɔ Aklúnɔ sín azǎn ɔ́, azǎn ɖaxó susunɔ énɛ́ ná wá.

²¹Énɛ́ ɔ́, mɛ ɖěbǔ ylɔ́ Aklúnɔ sín nyǐkɔ ɔ́, mɛ ɔ́ ná gán.’ ”

²²“Izlayɛ́li ví e mi! Mi ɖótó te bó se xó élɔ́ lɛ́ɛ: Jezu Nazalɛ́tinu ɔ́, nya ɖé wɛ é nyí, bɔ Mawu ɖe hlɔ̌nhlɔ́n tɔn xlɛ́ mi, gbɔn nǔjíwǔ kpó nǔ ɖaxó ɖaxó kpó, kpódó wuntun e Mawu jlɛ́ gbɔn jǐ tɔn ɖo mǐ tɛ́ntin, bɔ mi ɖésú tunwun lɛ́ɛ kpó gbla mɛ.

²³ Nya énɛ́ ɔ́, è jó e nú mi, lě e Mawu ɖésú kó jló, bó to gbɔn é, bɔ mi ká ɛ nyi aklúzu jí, bó hu i, gbɔn mɛdídá lɛ́ɛ lɔ mɛ;

²⁴ lo ɔ́, Mawu fɔ́n ɛ sín kú; é hwlɛ́n ɛ sín kúgan mɛ; ɖó kú sín hlɔ̌nhlɔ́n sixú hɛn ɛ ɖó te ǎ.

²⁵ Davídi ka ko ɖɔ xó dó wǔ tɔn ɖɔ jí: ‘Un nɔ mɔ Aklúnɔ hwebǐnu ɖo nukɔn ce; é ɖo ɖisí ce xwé bónú nǔɖé ní ma gba ayi dó nú mì ó.

²⁶Énɛ́ ɔ́ wú wɛ nyɔ̌ná gɔ́ ayi ce mɛ, bɔ un nɔ ɖɔ xó kpódó awǎjijɛ kpó. Agbaza ce na bo ɖo yɔdo mɛ ɔ́, é ná vo ɖo nukúnɖíɖó mɛ;

²⁷ɖó a nǎ jó lǐndɔ̌n ce dó nyi kútomɛ ǎ; a ka ná lɔn nú mɛ mímɛ́ towe ná nyɔ ǎ.

²⁸A xlɛ́ gbɛli lɛ́ɛ mì, lobɔ kpɔ́nɔxámɛ towe nɔ dó xomɛhunhun nú mì.’ ”

²⁹“Nɔví ce lɛ́ɛ mi, mi gbɔ nú ma ɖɔ xomɛ nú mi: tɔ́gbó mǐtɔn Davídi kú, bɔ è ɖi i, bɔ é kpo ɖo yɔdo tɔn mɛ, ɖo tomɛ fí káká jɛ égbé din.

³⁰ Lo ɔ́, gbeyíɖɔ Mawu tɔn wɛ é nyí, bó ka tunwun ɖɔ Mawu dó akpá, bó xwlé nǔ d'é jí nú émí ɖɔ émí ná wá sɔ́ vǐvú émítɔn ɖokpó ɖó axɔ́súzinkpo émítɔn jí.

³¹Fínfɔ́n sín kú Klísu tɔn ɔ́ wɛ Davídi ko mɔ, bó kó ɖɔ ɖ'ayǐ ɖɔ jí: ‘È nǎ jó e dó nyi kútomɛ ǎ, agbaza tɔn ka ná nyɔ ɖo yɔdo mɛ ǎ.’ ”

³²Jezu énɛ́ wɛ Mawu fɔ́n sín kú; mǐ bǐ wɛ mɔ;

³³bɔ din e Mawu sɔ́ ɛ su, bó sɔ́ ɛ jínjɔ́n akpá, ɖo ɖisí tɔn xwé ɔ́, Mawu tɔ́ tɔn sɔ́ Yɛsinsɛn e sín akpá é dó nú mǐ ɔ́ jó n'i, bɔ é gba kɔn nyi mǐ jí; nǔ e mɔ wɛ mi ɖe, bó ɖo sise wɛ din ɔ́ nɛ́.

³⁴Đó Davídi yi jǐxwé ɖě ǎ; é ɖésú ka ɖɔ: “Aklúnɔ ɖɔ nú Aklúnɔ ce ɖɔ: Jǐnjɔ́n ɖisí ce xwé,

³⁵káká nú ma sɔ́ kɛntɔ́ towe lɛ́ɛ dó bló afɔɖótɛn towe.”

³⁶“Izlayɛ́li ví lɛ́ɛ bǐ ní bó tunwun ganjí ɖɔ Jezu énɛ́ e mi ká nyi aklúzu jí ɔ́ wɛ Mawu sɔ́ Aklúnɔ, bó lɛ́ sɔ́ Klísu.”

³⁷Ée yě se xó énɛ́ ɔ́, é hɛn hǔn nú yě ɖésú, bɔ yě kanbyɔ́ Piyɛ́ɛ kpódó mɛsɛ́dó lɛ́ɛ kpán ɖɔ: “Nɔví ce lɛ́ɛ mi! Étɛ́ mǐ ká ɖó ná wa?”

³⁸Piyɛ́ɛ ka yí gbe nú yě ɖɔ: “Mi lɛ́ kɔ sín hwɛ mitɔn lɛ́ɛ gúdo; ɖokpó ɖokpó mitɔn ní lɛ yɛhwesin ɖo Jezu Klísu nyǐkɔ mɛ, bónú Mawu ná sɔ́ hwɛ mitɔn lɛ́ɛ kɛ mi, bɔ mi ná mɔ Yɛsinsɛn e nyí nǔníná Mawu tɔn ɔ́ yí.

³⁹Đó mi kpódó vǐ mitɔn lɛ́ɛ kpán wɛ Mawu dó akpá tɔn ná, káká yi jɛ mɛ e ɖo zɔga lɛ́ɛ bǐ sésé jí, mɛ e Aklúnɔ Mawu mǐtɔn ná ylɔ́ wá é ɖésú gɔ́n lɛ́ɛ.”

⁴⁰Piyɛ́ɛ ka lɛ́ ɖɔ xó gěgé ɖěvo nú yě, bó ná dó dɔn yě wá Mawu li jí, bó lɛ́ dó ná akɔ́nkpinkpan yě. É ɖɔ nú yě ɖɔ: “Mi hɔn sín gbɛtɔ́ dídá din tɔn élɔ́ lɛ́ɛ mɛ.”

⁴¹Mɛ e yí Piyɛ́ɛ xó se lɛ́ɛ ka lɛ yɛhwesin. Yě bǐ kplékplé yi afɔwó afatɔ́n (3.000) mɔ̌, bó jɛ yě jí gbe énɛ́ gbe.

⁴²Yě nɔ́ ɖó kan dó mɛsɛ́dó lɛ́ɛ sín nǔkplɔ́nmɛ kpódó kpɔ́ninɔ ɖo nɔví mɛ kpó wú, bó nɔ́ ɖó kan dó kɔnɖókpɔ́núɖuɖu ɔ́ kpódó ɖɛxixo kpó wú.

⁴³Đokpó ɖokpó yětɔn ɖo xɛsi ɖi wɛ; ɖó Mawu ɖo nǔjlɛ́jlɛ́ kpódó nǔdábaɖa gěgé kpó jlɛ́ wɛ gbɔn mɛsɛ́dó lɛ́ɛ jí.

⁴⁴ Yě mɛ e ɖi nǔ lɛ́ɛ bǐ sésé nɔ́ nɔ kpɔ́, bó nɔ́ kplé nǔ yětɔn lɛ́ɛ bǐ ɖó kpɔ́.

⁴⁵Yě nɔ́ sa nǔ yětɔn lɛ́ɛ, bó nɔ́ má akwɛ́ tɔn ɖo yěɖée tɛ́ntin lě e nǔ tɔn hu dó mɛ ɖokpó ɖokpó gbɔn é.

⁴⁶Ayǐhɔ́ngbe ayǐhɔ́ngbe ɔ́, yě nɔ́ yi kplé ɖo sinsɛnxɔ mɛ; yě nɔ́ ɖu nǔ ɖó kpɔ́ gbɔn xwé yětɔn lɛ́ɛ gbe xwé yětɔn lɛ́ɛ gbe, bó nɔ́ lɛ́ ɖu nǔ kpó xomɛhunhun kpó, kpó ayixa ɖokpó kpó.

⁴⁷Yě nɔ́ kpa susu nú Mawu, bɔ mɛ bǐ yí wǎn nú yě. Ayǐhɔ́ngbe ayǐhɔ́ngbe ɔ́, Aklúnɔ ka nɔ́ dɔn mɛ e é hwlɛ́n gán lɛ́ɛ wá gɔ́ nú yě.