Read fon Mɛsɛ́dó 20 Bible Online

Mɛsɛ́dó 20 - fon bible

Mɛsɛ́dó 20

¹Ée zǐngídi ɔ́ wá xwɛ ɔ́, Pɔ́lu ylɔ́ yě mɛ e ɖi nǔ nú Jezu lɛ́ɛ kplé, bó dó wǔsyɛ́n lanmɛ nú yě, bó ɖɔ nú yě ɖɔ émí ná yi bó wá, lobo ɖidó Masedwani.

²É gbɔn fí énɛ́ lɛ́ɛ, bó ɖɔ xó gěgé ɖo fínɛ́, bó dó dó wǔsyɛ́n lanmɛ nú mɛ e ɖi nǔ nú Jezu lɛ́ɛ, bó wá yi Glɛ̌si yíkúngban jí.

³É xɔ sun atɔn ɖo fínɛ́; é ka wá ɖo nǔ sɔ́ wɛ bó ná dó tɔjíhún yi Silíi gbé jí, bó se ɖɔ Jwifu lɛ́ɛ blá gbě émítɔn; énɛ́ ɔ́ wú ɔ́, é ɖɔ émí ná lɛ́ kɔ gbɔn Masedwani.

⁴Mɛ e nyi i lɛ́ɛ ɖíe: Sopatlɔ́si Beléenu e nyí Pilusi ví é; Alisitáki kpódó Sekúndúsi kpó, Tɛsalonikinu wɛ nú yě; Gayiwúsi Dɛɛbenu ɔ́, kpódó Timɔtée kpó; Ticíku kpódó Tlofímu kpó, Azíinu wɛ nú yě.

⁵Mɛ énɛ́ lɛ́ɛ jɛ nukɔn, bó yi nɔ te kpɔ́n mǐ ɖo Tlowasi.

⁶Ée wɔ̌xúxú e mɛ è ma dó tɔ́n ǎ é sín xwe wá yi ɔ́, mǐ ɖésúnɔ ɔ́, mǐ dó tɔjíhún ɖo Filípu, bó xɔ azǎn atɔ́ɔ́n ɖo tɔ jí, bó wá mɔ yě ɖo Tlowasi, bó nɔ fínɛ́ xɔ azǎn tɛ́nwe.

⁷Azǎn nukɔntɔn e ɖo aklúnɔzángbla mɛ ɔ́, gbadanu tɔn ɔ́, mǐ kó kplé bó ná ɖu kɔnɖókpɔ́ nǔɖuɖu ɔ́; Pɔ́lu ka ɖó ná yi ayǐhɔ́ngbe tɔn zǎnzǎn; é ka ɖo xó ɖɔ xá yě mɛ e ɖi nǔ nú Jezu lɛ́ɛ wɛ káká bɔ zǎn vlɔ́ ɖó we.

⁸Zogbɛ́n gěgé ɖo títá ɖo xɔ e mɛ mǐ kplé ɖe ɖo síngbó jí é.

⁹Nyaví dɔ̌nkpɛvú ɖé ɖo ayǐjínjɔ́n ɖo flɛtɛ́li nu; è nɔ ylɔ́ ɛ ɖɔ Etíki. Nyaví énɛ́ wá jɛ amlɔgɔ́ sa jí, hwenu e xó e ɖɔ wɛ Pɔ́lu ɖe ɔ́ ɖo ga ɖi wɛ é. Amlɔ wá nyí i bǐ, bɔ é jɛ ayǐ sín síngbó atɔngɔ́ ɔ́ jí, bɔ kúkú tɔn jɛ́n yě wá zé.

¹⁰Pɔ́lu ka jɛ te, bó fɛ, bó zé e dó awa mɛ bó ɖɔ: “Ayi mitɔn ní ma gbadó ó, ɖó é kpo ɖo gbɛ.”

¹¹Énɛ́ gúdo ɔ́, Pɔ́lu lɛ́ yi síngbó ɔ́ jí, bó kán wɔ̌xúxú bó ɖu. É ka lɛ́ ɖɔ xó nú yě káká bɔ ayǐ hɔ́n, lobo ɖidó.

¹²Mɛ lɛ́ɛ ka kplá nyaví dɔ̌nkpɛvú ɔ́, bɔ é ɖo gbɛ; nǔ énɛ́ dó wǔsyɛ́n lanmɛ nú yě bǐ.

¹³Mǐdɛɛ lɛ́ɛ ɔ́, mǐ jɛ nukɔn nú Pɔ́lu, bó dó tɔjíhún, bó ɖidó Asɔ́si; fínɛ́ wɛ é ɖésúnɔ kó ɖɔ émí ná zɔn afɔ wá, bɔ mǐ ná zé émí ɖe.

¹⁴Hwenu e mǐ wá kplé ɖo Asɔ́si ɔ́, mǐ sɔ́ ɛ dó tɔjíhún mɛ yi Mitilɛ́nu.

¹⁵Mǐ gosín fínɛ́, bɔ ayǐhɔ́ngbe tɔn ɔ́, mǐ yi Cio nukɔn. Azǎn atɔngɔ́ ɔ́ gbe ɔ́, mǐ yi Samɔ́si, bó wá Milɛ ayǐhɔ́ngbe tɔn.

¹⁶Đó Pɔ́lu ɖɔ émí ná gbɔn Efɛ́zi nukɔn dín, bó ma wá gú hwenu ɖo Azíi ó; ɖó é ɖo hwlɛndó jí, bónú é kpé wú ɔ́, é ná ɖo Jeluzalɛ́mu ɖo Jwifu lɛ́ɛ sín xwe e è nɔ ylɔ́ ɖɔ Pantekótu ɔ́ gbe.

¹⁷Pɔ́lu sɛ́ mɛ dó sín Milɛ, nú yě ní yi Efɛ́zi, bó yi ylɔ́ agunnukɔntɔ́ lɛ́ɛ wá.

¹⁸Ée yě wǎ gɔ̌n tɔn ɔ́, é ɖɔ nú yě ɖɔ: “Lě e un nɔ mi mɛ gbɔn sín gbe e gbe un wá Azíi ɔ́, mi ɖě sɔ́ dán ɛ ǎ.

¹⁹Un nɔ sɛn Aklúnɔ ɖo mɛɖée sɔ́ hwe mɛ; un nɔ sɛn ɛ kpó avǐ kpó, bó nɔ́ sɛn ɛ ɖo wǔvɛ́ e mɔɖónúmɛ Jwifu lɛ́ɛ tɔn nɔ dɔn wá nú mì lɛ́ɛ é tɛ́ntin.

²⁰Nǔ e ná nyí le nú mi ɔ́, un hwlá ɖěbǔ dó mi ǎ: un ɖɔ bǐ nú mi, bó kplɔ́n bǐ mi ɖo agbawungba kpódó xwé mitɔn lɛ́ɛ gbe kpó.

²¹Un ɖɔ nú Jwifu lɛ́ɛ, bó ɖɔ nú mɛ e ma nyí Jwifu ǎ lɛ́ɛ ɖɔ yě ɖó ná lɛ́ kɔ sín hwɛ yětɔn lɛ́ɛ gúdo, bó húzú jɛ Mawu li jí, bó ɖi nǔ nú Aklúnɔ mǐtɔn Jezu.

²²Éɖíe! Din ɔ́, un xwe Jeluzalɛ́mu; ɖó Yɛsinsɛn ɖɔ nú mì ɖɔ nyi ɖó ná yi dandan; un ko tunwun nǔ e ɖo ná gbo mì wɛ ɖo dɔ̌n é ǎ.

²³Nǔ e un tunwun kpowun ɔ́ wɛ nyí ɖɔ: ɖo to ɖokpó ɖokpó mɛ ɔ́, Yɛsinsɛn nɔ ɖo ɖiɖɔ nú mì wɛ ɖɔ gankpá mɛ yiyi kpódó yajiji gěgé kpán ɖo te kpɔ́n mì.

²⁴ Amɔ̌, gbɛ nyɛtɔn ɔ́ wɛ nyí nǔɖé nú mì ǎ; éé ɖo tají ɔ́ wɛ nyí ɖɔ má kó sixú dó wezun e ɖo afɔ ce nu ɔ́ yi fó, bó wa azɔ̌ e Aklúnɔ Jezu sɔ́ dó así nú mì ɔ́ yi fó; é wɛ nyí ɖɔ má jlá Wɛn Ɖagbe e ɖɔ xó dó fɛ́nú Mawu tɔn wú é.

²⁵“Un gbɔn mi bǐ tɛ́ntin, bó ɖɔ axɔ́súɖuɖu Mawu tɔn sín xó nú mi; amɔ̌ din ɔ́, mi ɖě sɔ́ ná mɔ mì ǎ.

²⁶Énɛ́ wú wɛ un ɖo ɖiɖɔ nú mi wɛ égbé ɖɔ ényí mɛɖé dɔn ɖo mi mɛ ɔ́, é kún sɔ́ kan mì ó!

²⁷Đó un jlá tito Mawu tɔn ɔ́ bǐ mi; un hwlá ɖěbǔ dó mi ǎ.

²⁸Mi hɛn ayi dó miɖée wú, bó hɛn ayi dó agun Mawu tɔn e nu Yɛsinsɛn sɔ́ mi ɖó é wú, bónú mi ná xlɛ́ ali agunví lɛ́ɛ; agunví énɛ́ lɛ́ɛ e Mawu xɔ gbɔn Vǐ é ɖésúnɔ tɔn sín kú gbla mɛ é.

²⁹Un tunwun ɖɔ nyɛ wá yi gúdo ɔ́, gbɛtɔ́ dídá ajanuhla ɖɔhun ɖé lɛ́ɛ na wá byɔ́ mi mɛ, lobo na kú nǔbláwǔ ɖěbǔ nú agunví lɛ́ɛ ǎ.

³⁰Đo mi ɖésúnɔ mɛ ɔ́, mɛɖé lɛ́ɛ na wá sí te, bó jɛ nǔ e ma sɔgbe xá Wɛn Ɖagbe ɔ́ ǎ lɛ́ɛ kplɔ́n mɛ jí, bɔ mɛ gěgé ná xwedó yě ɖo mɛ e ɖi nǔ nú Jezu lɛ́ɛ mɛ.

³¹Hǔn, mi bo nɔ acéjí, bó ka flín ɖɔ zǎn kpódó kéze kpo ɔ́, un kún gɔn nǔ kplɔ́n ɖokpó ɖokpó mitɔn lɛ́ɛ kpódó avǐ kpán káká nú xwe atɔn ó.

³²“Din ɔ́, un zé mi dó alɔ mɛ nú Mawu, bó jó mi nú fɛ́nú tɔn sín xó. Mawu ɖó acɛ, bó ná na hlɔ̌nhlɔ́n mi, bó ná lɛ́ na mi nǔ ɖagbe e é ko sɔ́ ɖ'ayǐ nú mɛ e nyí étɔn lɛ́ɛ bǐ é.

³³Nukún ce ɖo mɛɖé sín akwɛ́ wú ǎ; é ka ɖo mɛɖé sín siká wú ǎ; é ka lɛ́ ɖo mɛɖé sín avɔ wú ǎ.

³⁴Mi ɖésú mi tunwun ɖɔ azɔ̌ e nyɛ ɖésúnɔ wa ɔ́ wɛ hɛn nyɛ kpódó hǎgbɛ́ ce lɛ́ɛ kpán.

³⁵Un xlɛ́ mi gbɔn alɔkpa bǐ mɛ ɖɔ mɔ̌ wɛ è ɖǒ ná nɔ́ wa azɔ̌ gbɔn, bó ná sixú dó alɔ wamamɔnɔ lɛ́ɛ, bó ná dó flín xó e Aklúnɔ Jezu ɖésú ɖɔ lɛ́ɛ ná; é ɖɔ: ‘Nǔnámɛ nɔ dó xomɛhunhun nú mɛ hú nǔyíɖomɛsí.’ ”

³⁶Ée Pɔ́lu ɖɔ xó énɛ́ lɛ́ɛ vɔ ɔ́, é jɛ kpo kpódó yě bǐ kpó, bó xo ɖɛ;

³⁷bɔ yě bǐ bɛ́ avǐ, bó kplá así kɔ nú Pɔ́lu, bó kí si n'i.

³⁸Wǔ kú yě tlala, ɖó é kó ɖɔ nú yě ɖɔ yě kún sɔ́ ná mɔ émí ó, bɔ yě nyi i káká yi ɖó tɔjíhún ɔ́ kɔn.