Read fon Mɛsɛ́dó 25 Bible Online

Mɛsɛ́dó 25 - fon bible

Mɛsɛ́dó 25

¹Ée Fɛsitúsi wá Sezalée ɔ́, azǎn tɔn atɔngbe ɔ́, é gosín fínɛ́ bó yi Jeluzalɛ́mu.

²Vɔ̌sánú-xwlémawutɔ́gán ɔ́, kpódó Jwifugán lɛ́ɛ kpán ka kplé bo yi jɛ Pɔ́lu sín hwɛ̌ nú Fɛsitúsi,

³bó byɔ́ ɛ ɖɔ é ní nyɔ́ xomɛ dó émí wú, bó sɛ́ Pɔ́lu dó Jeluzalɛ́mu. Yě ɖɔ mɔ̌ ɖó yě ko blá gbě tɔn, bó jló ná hu i ɖo alixo.

⁴Lo ɔ́, Fɛsitúsi yí gbe nú yě ɖɔ Pɔ́lu ɖo gankpá mɛ ɖo Sezalée, émí ɖésúnɔ ka ná yi dɔ̌n ɖo malín málín mɛ.

⁵É ka lɛ́ ɖɔ: “Ényí nya énɛ́ wa nǔɖé nyi do hǔn, gǎn mitɔn lɛ́ɛ ní bó xwedó mì yi Sezalée, bó ná yi dó hwɛ ɛ.”

⁶Azǎn tántɔn, abǐ azǎn wǒ jɛ́n Fɛsitúsi nɔ yě gɔ̌n xɔ, bó lɛ́ kɔ yi Sezalée. Ayǐhɔ́ngbe tɔn ɔ́, é wá jínjɔ́n hwɛɖɔxɔsá, bó ɖɔ è nǐ kplá Pɔ́lu wá.

⁷Ée Pɔ́lu ka wá ɔ́, Jwifu e gosín Jeluzalɛ́mu bó wá lɛ́ɛ lɛ́ lɛ̌ dó e, bó jɛ hwɛ ɖaxó ɖaxó gěgé lɛ́n dó kɔ n'i jí; lo ɔ́, yě sixú ɖe xlɛ́ ɖɔ nǔgbó wɛ ǎ.

⁸Pɔ́lu ka jɛ xó ɖɔ dó ba hwɛjijɔ nú éɖée jí ɖɔ: “Un jɛ agɔ ɖé dó Jwifu lɛ́ɛ sín sɛ́n wú ǎ; un ka jɛ dó sinsɛnxɔ ɔ́ wú ǎ; mɔ̌ jɛ́n un ma lɛ́ jɛ dó Dadá Hlɔ̌ma tɔn wú ǎ é nɛ́.”

⁹Ée Fɛsitúsi ká jló ná wa nǔ bó ná dó xomɛhunhun nú Jwifu lɛ́ɛ ɔ́, é kanbyɔ́ Pɔ́lu ɖɔ: “A jló ná yi Jeluzalɛ́mu, nú è nǎ yi ɖɔ hwɛ xá we ɖo nukún ce mɛ a?”

¹⁰Pɔ́lu ka yí gbe ɖɔ: “Hwɛɖɔxɔsá ɖaxó wɛ un ná yi ɖo Dadá Hlɔ̌ma tɔn nukɔn; fínɛ́ wɛ è ɖǒ ná ɖɔ hwɛ xá mì ɖe; un wa nǔɖé dó Jwifu lɛ́ɛ ǎ; hwi ɖésúnɔ mɔ nǔ jɛ wú ganjí.

¹¹Ényí un wa nǔɖé nyi do nǔgbó, bɔ nǔ énɛ́ ɔ́ byɔ́ ɖɔ è nǐ hu mì ɔ́, un gbɛ́ kú ǎ. Amɔ̌, ényí hwɛ e dó mì wɛ mɛ nɛ́ lɛ́ɛ ɖe ɔ́ ɖě ma ka nyí nǔgbó ǎ ɔ́, mɛ ɖěbǔ ɖó acɛ e jó mì nú yě ɔ́ ǎ. Hǔn un ylɔ́ hwɛ ɖaxó ɖo Dadá Hlɔ̌ma tɔn gɔ́n.”

¹²Fɛsitúsi kpódó toxóɖɔtɔ́ tɔn lɛ́ɛ kpán ka wá yi kpá, bɔ é wá ɖɔ nú Pɔ́lu ɖɔ: “A ylɔ́ hwɛ ɖaxó ɖo Dadá Hlɔ̌ma tɔn gɔ́n. Hǔn a nǎ yi Dadá Hlɔ̌ma tɔn ɔ́ gɔ́n.”

¹³Ée azǎn ɖé jɛ wa yi ɔ́, axɔ́sú Aglipa kpódó asi tɔn Belenísi kpán wá Sezalée, bó ná ɖɔ nǔ dó Fɛsitúsi.

¹⁴Ée yě ɖo to ɔ́ mɛ fínɛ́ xɔ azǎn gěgé ɔ́, Fɛsitúsi wá ɖó Pɔ́lu sín xó ɔ́ te nú axɔ́sú ɔ́; é ɖɔ n'i ɖɔ: “Nya ɖé ɖo fí, bɔ tokpɔngán Felísi jó e nyi gankpá mɛ.

¹⁵Hwenu e un yi Jeluzalɛ́mu ɔ́, vɔ̌sánú-xwlémawutɔ́gán lɛ́ɛ kpódó Jwifu tomɛxó lɛ́ɛ kpán wá jɛ hwɛ tɔn nú mì, bó byɔ́ ɖɔ ma ɖó hwɛ n'i.

¹⁶Un ka yí gbe nú yě ɖɔ cóbónú Hlɔ̌manu lɛ́ɛ ná jó mɛɖé ɔ́, mɛ e ɖo hwɛ dó e wɛ lɛ́ɛ ɖó ná jɛ hwɛ tɔn ɖo mɛ ɔ́ ɖésúnɔ nukɔn, bónú é ná mɔ tɛn, bó ɖɔ xó dó ba hwɛjijɔ nú éɖée hwɛ̌.

¹⁷Énɛ́ ɔ́, yě xwedó mì wá fí; un sɔ́ nɔ te ǎ; ayǐhɔ́ngbe tɔn jɛ́n un yi jínjɔ́n hwɛɖɔzinkpo ce jí, bó ɖɔ è ní kplá nya ɔ́ hɛn wá.

¹⁸Yě mɛ e ɖo hwɛ dó e wɛ lɛ́ɛ sí te, bó dó hwɛ ɛ; lo ɔ́, nǔ nyanya e un vɛdó ɖɔ yě na ɖɔ é dó sin lɛ́ɛ ɔ́, yě ɖɔ ɖěbǔ ǎ.

¹⁹Nǔɖé dɔn xá ɛ wɛ jɛ́n yě ɖe kpowun; yě ɖo nǔ dɔn xá ɛ wɛ dó sinsɛn yě ɖésúnɔ tɔn wú, bó ɖo nǔ dɔn xá ɛ wɛ dó nya e è nɔ ylɔ́ ɖɔ Jezu ɔ́ wú. Nya énɛ́ ko kú; Pɔ́lu ka ɖɔ é ɖo gbɛ.

²⁰Ée un ma tunwun lě e un ná ɖɔ xó énɛ́ lɛ́ɛ gbɔn ǎ é ɔ́, un kanbyɔ́ Pɔ́lu ɖɔ é jló ná yi Jeluzalɛ́mu, bɔ è nǎ yi ɖɔ hwɛ tɔn ɖo dɔ̌n a jí;

²¹lo ɔ́, Pɔ́lu ylɔ́ hwɛ ɖaxó: é byɔ́ ɖɔ è ní bo ɖo émí cɔ́ wɛ káká jɛ hwenu e Dadá ɔ́ ná ɖe gbeta ɖé tɔ́n dó xó émítɔn wú é; énɛ́ ɔ́ wú ɔ́, un ná gbe ɖɔ è ní cɔ́ ɛ káká yi jɛ hwenu e un ná sɛ́ ɛ dó Dadá ɔ́ gɔ́n é.”

²²Énɛ́ ɔ́, Aglipa ɖɔ nú Fɛsitúsi ɖɔ: “Nyɛ ɖésúnɔ ɔ́, un jló ná se xó ɖé ɖo nya énɛ́ nu.” Fɛsitúsi ka yí gbe n'i ɖɔ: “Sɔ ko su ɔ́, a na se xó tɔn.”

²³Ayǐhɔ́ngbe tɔn ɔ́, Aglipa kpódó asi tɔn Belenísi kpán wá, bɔ ahwangán lɛ́ɛ kpódó tonukún lɛ́ɛ kpán kplá yě wa yi, bɔ yě byɔ́ hwɛɖɔxɔ ɔ́ sá kpódó yɛ̌yi kpán. Fɛsitúsi ná gbe bɔ è kplá Pɔ́lu wá.

²⁴Fɛsitúsi ɖɔ: “Axɔ́sú Aglipa kpódó mi mɛ e ɖo fí lɛ́ɛ é bǐ kpán; nya e sín hwɛ wɛ Jwifu lɛ́ɛ bǐ jɛ nú mì ɖo Jeluzalɛ́mu, bó ka lɛ́ wá jɛ nú mì ɖo fí, bó sú xó syɛ́nsyɛ́n ɖɔ è ma ɖó e gbɛ ó ɔ́, nya ɔ́ ɖíe.

²⁵Nyɛ ka mɔ ɖɔ é kún wa nǔɖé nyi do bónú è nǎ hu i ó. Lo ɔ́, ée é ɖésúnɔ ko ylɔ́ hwɛ ɖaxó ɖo Dadá Hlɔ̌ma tɔn gɔ́n ɔ́, énɛ́ ɔ́ wú wɛ un ɖe gbeta tɔ́n ɖɔ un ná sɛ́ ɛ dó gɔ̌n tɔn.

²⁶Un ɖó nǔɖé tawun bó ná wlán dó wǔ tɔn sɛ́ dó Dadá ɔ́ ǎ. Énɛ́ ɔ́ wú wɛ un ylɔ́ ɛ wá nukɔn mitɔn, ɖo tají ɔ́, hwi axɔ́sú Aglipa nukɔn, bónú è ko kan nǔ byɔ́ ɛ ɔ́, ma mɔ nǔɖé wlán sɛ́ dó.

²⁷Đó nyɛ mɔ ɖɔ è sɛ́ gantɔ́ ɖé dó mɛ, bó ma ka ɖɔ nǔ e é wa ɔ́ dó jǐ tɔn ǎ ɔ́, é kún sɔgbe ó.”